انا منعرفش العربية

[ابو اسامة 66]

السلام عليكم هذا العفسة كرهتلي حياتي وين تروح تصيب غير الفرنسي خباطي تقول رنا عايشين في باريس وخطرات يبانو شي ناس يقعد ساعة وهو يحكي بلفرنسي نقلكم حاجة لي ميعرفش الفرنسي جي وقت يقلو حطها روح بزاف يا خواتي شوية عربية ورجعنا غير تحفض زوج كلمات تقول هربت لزمان حتى ولادنا رجعت عندهم في سنة الثالثة وروح انت خليه يبغي العريبة وترجع عقلية فرنسي

​

 

[ماكانش]

واش انديرو لازم ندوروها فرونسي وخلاص

 

[brahim tiniri]

هذاك ما حلبت واش راح ادير يعطيك الصحة
-مع تحيات الجنرال- نرجو لكم التوفيق-
​

 

[zagane]

salam alaycom

aya wache mn francais li yatkalamha
francais ma3arbna
kima
ma ndimariche
rani fatigué
w w w w

 

[HAMOUDI2000]

ديغول مات وخلاها فينا

 

[ђĩหđǿĉħǻ]

واش حاب تدير خويا؟
هادي هي و هادا هو

​

 

[Midia]

الحاجة اللي تقلقني اللي هي في قناة النهار و لا الشروق كي المراسل يهدر مع شاب يهدر معاه بالدارجة و شوية فرنسي كلمات كلمات برك هاذي حاجة نورمال مي طفلة من تبدا و هي بالفرنسي حتى تخلاص اووووف مش كامل بصح كاين لبنات يحبو يبانو زعما لاكلاس في لا ثيلي هاذي سماطة صح هكا لعرب يقولو صح الجزايريين تاع فرنسا
​

 

[ريم الشرق]

الله غالب الي يتكلم فرونسي يقولو عليه متحلب وقاري و ............... اما الي عادي يتكلم بالعربية يقولو عليه دوار​

 

[assinat]

الله غالب الي يتكلم فرونسي يقولو عليه متحلب وقاري و ............... اما الي عادي يتكلم بالعربية يقولو عليه دوار​

hhhhhh شفتي كيفاش
العربية لغة القران

 

[love papitou]

واش راح دير خويا

 

[simou11]

استعمار 132 سنة عادت التعاملات كامل بالفرنسية اكيد راح يخلي نتائج
و تشوف خاصة العجائز عندهم كلمات مايعرفوش معناهم بالعربية اصلا

و الفرنسية ولات جزء من اللهجة تيعنا كيما نورمال تلقا 1 % من الشعب لي يقولو عادي
و انا وحدة من الناس كاين كلمات والفت بيهم
و نقولهم ديما
كيما مام با ماعاباليش كيفاه نقولوها بالدارجة تيعنا :$
مي مش معناها نحكي كلش فرونسي


و ادي تاع لي يحكي فرونسي مثقف انا ماتجينيش منطقية
لانها لغة فرات
مادابينا نتعلموها
" من تعلم لغة قوم امن شرهم "
مي مش معناها لي مايحكيش فرونسي كافي
ولا لي يحكي فرونسي يا لوكان مندوبة معناها مثقف

و حنا ربي يسامحنا
نشجعو فاها
تلقا واحد سنة 3 مايعرفش يكتب 2 جمل صحاح بالعربية
يبداو يقريوه فرونسي
حاجة عادية تلقايه يخلط هك و هك كي يكبر

و زيد الوزراء و المسؤولين و الخ الخ
عمرك شفتي واحد فيهم يحكي بالعربية ؟
و حتي كي يحكيو عربية يسودولها سعدها
بالرغم من انو في القانون العربية هي اللغة الرسمية
كيما واحد رئيس جمعية ماعندوش الحق يحكي بالفرونسي
مي اك تعلم :down:

عابالي طولت في الله غالب
موضوع حساس ياسر

مشكور خويا ​

 

[dana1993]

والله جامي ههههه
يا خويا سي فري في دارجتنا كان كلمة فروتسي و الغاشي كامل يستعملهم
اما الخباطي هاذي يخلوها في وفتها خير قراية و لا خدمة و لا مع واحد اجنبي مي حنا في بعضانا علاه التمصخير هذا
هههه ربي ييجيب الخير
مرسي

 

[lizou]

هادي هي خويا ماعندنا ما نديرو دوكة ولات مام لي يعرف 2 كلمات بلفرونسي تلقاه زعمة يلعبها تقول ميغري تاع الصح وهو والوووووووووووو كون تسقسيه يولي يحشم و ماعلابالوش واش يقولك هههههههههههه​

 

[قناص الغرام]

ياو قول الحمد لله كي جات في الفرونسي راني خايف
لا يدرروها جابونية

 

[farid8751]

السلام عليكم
الواحد كي يحكي دارجة بطبيعة الحالة الدارجة فيها كلمات فرنسية هذي هنا عادي لانها مش ضارة وتبانلنا بلي دارجة المشكل الكبير كي تلقا مسؤال قد الدنيا يحكي ويخاطب في الشعب بيها في اليتيمة وهو يعلم بلي الدستور يمنعو يخاطب بيها الشعب هل ياترى هذا مسؤول فرنسي يخاطب فينا ولا جزائري كيما حنا ولمن راه يحكي الفرنسية والشعب كاين 2 او 5 بالمئة لي يتقنو الفرنسية
والمشكل الثاني هو قناة اليتيمة هي لي ساهمة في نشر هذه الثقافة ولها الدور الكبير في ذلك لان معظم حواراتها المباشرة والناس لي تعرضهم في الحصة يحكو فرونسي عادي قدام الملايين ملا الشعب شاف بلي لي يحكي فرونسي راه مثقف وعالم كبير رجع يقلد فيه وهو الصح ذوك الكبار زعمة لي يحكو بالفرنسية حبو يبينو بانهم قادرين واعيين وقد المسؤلية وهم في الحقيقة يغطو في العجز نتاعهم ..ولاحضو الناس المخلوعة بالفنسية كي يسمع واحد يحكي فرونسي يقول والله فلان غير قاري مي هو في الحقيقة تريبل زيرو لي يعرف الفرنسية يعرفها كلغة وكادب ويتقنها ويحتفظ بيها ليه كشخص يسحقها مش يحكي بيها قدام الملأ ..شفوني ..شكرا على الموضوع الصراح حاب نحكي اكثر لكن طولت عليكم بزاف ههههههههههههههههه
​

 

[أم عبد الله]

يااخي يااخي الجزائر فرنسية
ولاو يهدروا بيها كثر من العربية مع انها لغة الاسلام

هل هو تقليد اعمى
ام من مخلفات فرنسا

ربي يهدي برك وعلينا نعلموا ولادنا اللغة الام خير

سلامي