بيت المغتربين

[lina-67]

ههههه ام الحلوين ولادك مساكن راكي دايرتلهم العسكر في الدار
سمورة ربي يخليلك بنتك واش اسمها

 

[ام الحلوين]

يا جهاد اختي و الله مرات نشوف روحي كيما الوحش سيرتو مع الحمل و القلق .
هاذ ليامات الولد راه يضرب اختو هبلني و ماحبش يسمع الهدرة و زيد الغيرة غير يجي فايت حدايا لازم يعطيني ضربة للكرش ،طلعتهم في 2 للشومبرا في الليل و قلتلهم لي يضرب و لا مايسمعليش الهدرة ندخلو هنا و نطفي عليه الضوء و يجي ليكم nutty man كيما يقولو هما ،دروك ركبتهم خلعة غير يديرو حاجة نقلهم انا مانهدرش في النهار كي جي الظلمة نتفاهمو يولو يحلو مساكن و غير يغرب المغرب تلقايهم قاعدين و يمسكنو .
ربي يهديني .

 

[SAMIRA25]

بالنسبة للترواح للبلاد كل واحد كيفاش يشوف فيها ويبقى الراي فيها للراجل لخاطر الا قبلتي والا اعترضتي خصوصا الا اعترضتي لو هكا والا هكا يقولك يخي قتلك مالا خليه يدير واش حب والايام وواش كاتب ربي يكون

ام امين يسلم فمك على هدا الكلام عين العقل

 

[SAMIRA25]

لبنات لي كنتم تحكيو على الريجيم
ادخلو هنا تحرقو شوي سعرات حرارية:d
https://www.4algeria.com/forum/t/369476/#post4718009​

 

[SAMIRA25]

الله يبارك سميرة ربي يعينك و يحفظ بنتك و يطول في عمرها .
و الله فكرتيني في بنتي كي كانت 8 اشهر كنت حاملة بالطفل 5 اشهر ، مرة ماحبتش ترقد عضيتها من رجلها من تحت و مرة تاني في الليل ماحبتش ترقد دخلت رجلي بين الواح المطرح و طبعتها من الحيط للحيط مسكينة نخلعت و رقدت حتى 8 تاع الصباح.
صح التربية صعيبة سيرتو لولاد لي مايرقدوش في الليل .بصح الحمد لله كانو يرقدو وقيلة من الخوف .

ام الحلوين واش عاملة في الاولاد مساكن :d
اني نضحك برك
والله ربي يعين خاصة كي يبداو يتحركو و الله تتحزمي صباح و العشية و يا ربي ربي يحفظهم كاملو يعينا و يرزق كل وحدة

 

[مريومةمم]

مرحبا بيك مريومة واش مغتربة ولا قريب تتغربي

سلام اختي لست مغتربة لكن حابة نعمل سياحة ان شاء الله ادا تسقبلوني.....:p

 

[مريومةمم]

وش راهم ناس الغربة؟زعمة دزاير خير؟
كل واحد يقول وين يفضل يعيش؟

 

[SAMIRA25]

سلام اختي لست مغتربة لكن حابة نعمل سياحة ان شاء الله ادا تسقبلوني.....:p

مرحبا بيك اختي معانا تنورينا ربي يسهلك

 

[أم أمين23]

ربي يخليكم ويحفظ اولادك
ام الحلوين راكي كيفي انا وليدي الكبير درت الرعب مسكين القلقة والغش كامل فيه شحال من مرة نهزو ونخبطو على بيها مازل عاقل ويخاف لضرك بعكس سي امين الي تربى بدلال باباه ومام الضرب ما نضربوش بزاف هنا هنا وين وليت نخلع بعيطة هههه
مريومة اكيد البلاد خير لو كان الراتب هو نفسو الي ياخدو الراجل في الغربة لخاطر المعيشة هنا بزاف غالية تدي 10 ملاين وما تلحقيش خصوصا مع الكرا والغاز والتريسيتي تاخذ اكثر من نصف الراتب

 

[ام الحلوين]

سميرة صح الهبطة لازم راي الراجل و تاني قناعة المراة .
مريومة البلاد ثم البلاد ثم البلاد ثم الغربة. انا نفضل البلاد و لو ان فيها مشاكل و ما فيهاش امكانيات كيما الخارج ، لكن البلاد هي 1 .
ام امين ربي يصبرنا ولينا مقلقلين بلا سبب .

 

[lina-67]

انا في رايي البلاد باسكو كاينة الفاميليا و لحباب هذا ماكان بصح لوكان جاو كامل هنا هنا خير هنا حتى واحد ما يديلك حقك بصح في البلاد الحقرة و الظلم ربي يهديهم
ام الحلوين و ام امين وقيلة عندكم الحق على لولاد انا راني نهدر باسكو مازال ما سييت راني خايفة نولي كثر منكم ههه

 

[fatouma2012]

سلام عليكم كيراكم ؟ أم الحلوين والله كيما قلتي راني غير مع سرسورة نصبح دايخة

كي راكم تفوتوا فالويكاند ؟ أنا أمس خرجت شريت ريدويات للدار ، فرحت بزاف خاطرش راني في عام ملي رحلت وهادا وين شريتهم هههه ، مولات السكنى لي كراتلنا هي تركية عطاتني وحدين درتهم بصح قصار هما يبغو ستيل قصير ودايما نحاس داري خاصها حاجة خاصة الصالة مايطبعها غير الريدو كيما تقول ماما ، راني غير مورا راجلي إليوم باه نتقب الحيط بصح منضنش راح يتهرب بصق الاحد ممنوع الحس فالبناية ، بصح أنا صامطة ونلعبها منفهمش ههههه

جهاد شفتي فرحنا بصيف وعاود الحال تبدل وبرد

سميرة يادرة بنوتك كاش سنينات أنا سرسورة 9 شهور ومكان والو غادي نزيدها شهر لمكان والو ناديها ل-dentist ونخدملها dentier ههههه

 

[ام الحلوين]

سلام لبنات
فطومة ربي يحفظلك سرسورة ، و بصحتك الريدوات و هنا في اوروبا تلقايهم يستعملو غير القصار و غاليين .
انا البارح خرجت عشية تعشيت برا و قضيت للدار و اليوم ولادي راحو يقراو العربية و انا خرجت مع الزين شريتلهم شوية حوايج و شرالي سندويش كرنطيطة من عند الزيريين و دروك رجعت للدار بسكو راسي قتلني برا .
سلام .

 

[lina-67]

بصحتك القرنطيطة ام الحلوين انا شريت الحمص مطحون كي نتوحشها نديرها
فطومة بصحتك الرداوات انا جبت معايا من البلاد لصال امونجي و الصالون شريتهم منا
انا كنت في المارشي هدا وين دخلت راني رايحة ندير السفنج مع لاتاي اللي حبت تاكل مرحبا
سلام

 

[SAMIRA25]

فطومة بصحتك الريدوات
و بنتي نودت زوج سنينا لي لتحت و راه عادي
ما تديها ما والو ان شاء الله كي ليوم يخرجو و تشبع فيكم عضان:d​

 

[SAMIRA25]

ام الحلوين بصحتك الخرجة والقرنطيطة
انا عمري و الا كليتها و لا شفتها قدامي:p​

 

[SAMIRA25]

جهاد ديريني في الحساب نموت على السفنج مع الحليب
بصح الا ما عندكش نجيب معايا
و قوليلي كيفاه طريقة في صنع القرنطيطة و جي بنينة حابة نجربها ​

 

[lina-67]

سميرة مرحبا كاين لحليب كاين القهوة كاين الشكولا كيما تحبي
انا القرنطيطة ندير عبر حمص مطحون ب اربع عبار ماء مثلا ديري زوج كيسان حمص و ثمانية كيسان ماء و حبة بيض و شوية زيت قد مغرف كبيرة و ملح و كمون و خلطي كلش بالفوي من بعد ديري الفور يسخن و دهني البلا بشوية زيت و فرغي الخليط و دخليها في الفور التحت كي تشوفيها بدات تطبخ طلعيها الفوق و خليها حتى تحمار تجي هايلة

 

[SAMIRA25]

يعطيك الصحة جهاد ان شاء الله نجربها ​

 

[ام الحلوين]

جهاد الكرنطيطة صنعتها اكثر من مرة و نرميها ماتخرجليش مليحة ان شاء الله نجرب طريقتك ، بصحتك السفنج راني شبعانة من الكرنطيطة و زدت ميريندا ،بصح بعثيلي 2 حبات سفنج للزين من ساع و هو يدور في الكوزينة مالقاش باش يشرب القهوة من بعد خرج لولاد ل park و انا راني نخمم واش نطيب عشا .
سميرة يسلمك حنونة ان شاء الله جربي الكرنطيطة و ذوقيها .