مغترب تحت المجهر

[ام الحلوين]

قصدك الكيسان تاع الاولاد هادوك برك الي خضر وزرق او ك عرفت بالتقريب قداش:
ايه هدوك هما الكيسان .
خليني نشوفلك شوي اسئلة اخرين:
مرحبا و انا راني واجدة .
اكثر اكلة تحبيها وتستمتعي وانت اطيبي فيها؟
صراحة ماعنديش اكلة معينة لكن نفرح كي نطيب حاجة يحبوها لولاد و باباهم .
واش عندك من اجهزة تواصل يعني بخلاف الكمبيوتر والتيليفون؟
غير هدو و الموبايل تاعي خسر راني حابة سامسونج س 4 ان شاء الله نشريه قبل مانهبط .
في التيليفون اديرو ديما الاوفيرطات اتبعي انت هاد الحوايج والا لا علاقة؟
لا علاقة مرة رحت نخلص التلفون و ماكنتش نهدر اللغة مليح سقساتني وحدة قاتلي تقدري تعيطي باطل لوكان تبدلي لهدي الشركة قلتلها ايه من بعد 20 يوم بعثو لراجلي بروصي خلص 36 £ ،قالي كي ماتفهميش علاه قلتي ايه قتلو الله غالب حبيت نهدر باطل ههههه .
شحال من متعامل تاع هاتف عندكم؟ وانت بشحال من نيمرو ماشية؟
نورمالمون 4 و انا ماشية برقم واحد .
كي تروحي للبلاد تخلي خطك تاع بريطانيا والا تمشي بتاع الجزائر؟
كل مرة نشري بيس و نودرها العام لي فات ماشريتش مشيت بتاع يما .
يطلبو منك تاع البلاد التيليفونات والحوايج تاع الالكتروميناجي والا لا؟
فاميلة الزين يطلبو منو بصح جامي هبطت بسكو هبط قبل الزواج و هما قالو و الله ماجابلنا ، امالا دروك و الله مايشوفوها هههههههه.
كي تشري الكادوات لتاع البلاد تشري من راسك والا تصقصيهم واش حبين؟
نسقسي اختي بس و الباقي نشري واش نقدر عليه و واش يوالمهم .
اكثر واحد تحيرلك واش تشريلو كي تجي مروحة شكون هو؟
حاجة هبطتيها للبلاد وعجبتهم كامل وقالولك علاش ما جبتلناش كامل كيفها؟

خاوتي لولاد و لا جدتي ماتقنع بوالو ههههه.

 

[أم أمين23]

خليني نرجع للولادة وايامها الاولى
درتي العقيقة لولادك والا لا؟
وين درتيها في البلاد والا في بريطانيا؟
قلتي طهرتي اسحاق فكرني برك وين في البلاد والا هنا؟
الا هنا في بريطانيا قصدي كيفاش درتيها والا البلاد كيف كيف ولو اني شافية حكيتي على الموضوع بصح نسيت معليش عاودي فكريني هههه
ولادتك واناها الي كانت اسهل في الطفلة والا في الطفل؟
وذرك واش حاسة عندك طفلة والا طفل؟
واشنو الاسم الي في بالك ما تقوليش ما خممتش على الاقل هكاكا اسم برك وما تقوليليش تاع الاولاد قوليلي انت واش حابة؟
راه يتحرك البيبي بزاف والا راه راكح؟
واش من شهر راكي ضرك؟

 

[joumane]

ام الحلوين بسبوسه هايله وان شاء الله نسييها في اقرب وقت وتصلحلي كيما تاعك
والله يا اختي نجي مشارجيا بالاسئله انا نبدى نكتب كلشي يتبخر هههه
قوليلي تخافي من الطياره والا لا وشحال انساعه با تلحقي البلاد
ديري البوراك في رمضان والا لا ويتباعو الديول عنكم
واسحاق واسراء جبتيهم وانتي لي خطتتي والا جاو غلطه
وحمله هادا انتي لي بغيتي تانيك و عندك بنت والا ولد و واش من شهر راكي
وربي يسهلك حببتي في الولاده وقوليلي في نفساتك تعقبيهم وحدك والا عندك شكون يجي يعاونك
وهل درتي من قبل ليبرجمون لاهلك وكاشمن جاك والا لا
قوليلي تكرهي ساعات من الطياب وتعياي واش ديري والا ديما عندك الافكار وشطوره في المطبخ
وتحبي تبتكري هما اكلات والا تحبي كلشي تقليدي وعلى اصولو
والله يبارك حريرتك تبان روعه سيرتو هاديك الخلطه لي تزيدي في الاخير راني هزيتها وان شاء الله نجربها

 

[ام الحلوين]

خليني نرجع للولادة وايامها الاولى
درتي العقيقة لولادك والا لا؟
مادرتش بسكو ماكانش عندي ماعن كبار و الثلاجة صغيرة يعني مايجيش فيها كبش كامل و الوبد تاني مادرتش و العام لي فات كي ختنت الولد شريت كبش و نويناه الكبش تاع البنت و الولد مازال قلت ادا كتب ربي كي نروح للبلاد نشري 2 كباش و ندير 4 قصعات تاع طعام 2 للمسجد و 2 لدار العجزة .
وين درتيها في البلاد والا في بريطانيا؟
راني شرحتلك .
قلتي طهرتي اسحاق فكرني برك وين في البلاد والا هنا؟
هنا بسكو عندي مشكل في البلاد ماحبيتش ندير و نخسر و مانفرحش .
الا هنا في بريطانيا قصدي كيفاش درتيها والا البلاد كيف كيف ولو اني شافية حكيتي على الموضوع بصح نسيت معليش عاودي فكريني هههه
نعاود يا لحبيبة ديتو ختنتو و خليتو ريح 3 سمانات و درت بالسبت فطور ل 7 نسا و الاحد عشا ل 19 رجل .و الحمد لله فات كلشي مليح و كامل عجبتهم العرضة نسا و رجال .
ولادتك واناها الي كانت اسهل في الطفلة والا في الطفل؟
قلت البنت صعيبة بصح الولد اصعب كثير.
وذرك واش حاسة عندك طفلة والا طفل؟
حابة بنت و حاسة ولد و الله اعلم .
واشنو الاسم الي في بالك ما تقوليش ما خممتش على الاقل هكاكا اسم برك وما تقوليليش تاع الاولاد قوليلي انت واش حابة؟
حبيت مايا قبل الحمل و الان راني نقول ابتهال او بسمة و الولد جواد او نضال .بين هاد الاسماء يعني مازال ماقررتش مليح .
راه يتحرك البيبي بزاف والا راه راكح؟
كي دخلت في الشهر 3 ب 10 ايام حسيتو يتحرك و قلت سير ولد و دروك مرانيش نحس .
واش من شهر راكي ضرك؟

اليوم كملت 17 اسبوع يعني سمانة في الشهر 5 .

 

[ام الحلوين]

ام الحلوين بسبوسه هايله وان شاء الله نسييها في اقرب وقت وتصلحلي كيما تاعك
ان شاء الله حبيبتي .
والله يا اختي نجي مشارجيا بالاسئله انا نبدى نكتب كلشي يتبخر هههه
معليش زيدي تفكري غير بشوية و لا من بعد سقسيني في بيت المغترب .
قوليلي تخافي من الطياره والا لا وشحال انساعه با تلحقي البلاد
عادي في الاول ندوخ شوية من بعد خلاص ندير 2سا و 30د.
ديري البوراك في رمضان والا لا ويتباعو الديول عنكم
ايه ندير البوراك بصح الزين مايحبوش بزاف و الديول يتباعو بصح كونجلي و يجو ملاح .
واسحاق واسراء جبتيهم وانتي لي خطتتي والا جاو غلطه
اسراء جات بعد الزواج يعني في وقتها و كي شفت الولادة قلت خلاص موحال نزيد و ربي كتبولي بعد الربعين و انا نشرب في الحبوب و زعفت ماحبيتوش و كنت نظل نبكي و ما حبيتش نروح للطبيب و نعرف جنسه و ربي عاقبني جاتني ولادتو صعيبة بزاف حتى وصل للموت مسكين و الحمد لله على كل حال .
وحمله هادا انتي لي بغيتي تانيك و عندك بنت والا ولد و واش من شهر راكي
ماكنتش نخمم دروك و الزين كان مقلقني من بعد حبست الحبوب و ماخبرتوش باش مايبقاش يعس فيا و كون مايكتبليش الله الحمل يقولي ماتسمعيش الهدرة و الحمد لله حملت اول شهر و من بعد خبرتو بلي راني حامل فرح بزاف و عندي 17 اسبوع اي اسبوع في الشهر 5.
وربي يسهلك حببتي في الولاده وقوليلي في نفساتك تعقبيهم وحدك والا عندك شكون يجي يعاونك
ان شاء الله حبيبتي في البنت جاوني خواتات زوجي وحدة من البلاد و وحدة متغربة .
وهل درتي من قبل ليبرجمون لاهلك وكاشمن جاك والا لا
ايه في الولد درت ليما و اختي كان عندها 5 سنين و جاو عندي شهرين و زادت جاتني هذيك المتغربة.
قوليلي تكرهي ساعات من الطياب وتعياي واش ديري والا ديما عندك الافكار وشطوره في المطبخ
و الله مرات نكره و اذا ما حبيتش نطيب نعيط للزين يجيب من برا .
وتحبي تبتكري هما اكلات والا تحبي كلشي تقليدي وعلى اصولو
مرات و نحب نخلط سيرتو في رمضان و الزين يقولي علاه هذا الطياب غير تاع رمضان ههههه زعمة راني مجوعاتو في الفطر و نطيبلو غير في رمضان .
والله يبارك حريرتك تبان روعه سيرتو هاديك الخلطه لي تزيدي في الاخير راني هزيتها وان شاء الله نجربها

الله يسلمك و هذيك الخلطة هي لي تعطيها البنة بسكو ناس داري مع الاخر يضيفو الطماطم مصبرة و في الاول مايقليوهاش مليح جي مزيتة و قارصة و حريرتي عجبتهم الحمد لله .

 

[ام الحلوين]

هدو بعض الصور من ختانة وليدي .
النسا طيبت الحريرة و سلاطة و الكسكس و شطيطحة جاج و طاجين الحلو.
هذا الكسكس تاع النسا .

هنا حطيت مطرح تاع ولادي كنت رايحة نرميه و غطيتو بتواسيري يبان طابلة كبيرة ههههه.هنا من جهة اليمين .

و هنا في الوسط .

و هنا في جهة اليسار .

هنا الرجال قبل مايجو .

و الرجال درت غير حريرة و سلاطة و كسكس هذي السلاطات تاعهم .

و هذا الكسكس .

و هذو الحلويات تاع الرجال و تاع النسا ماصورتش بصح نفس الحلوى .

 

[روعة انثى]

الله يسلمك حنونة و ربي يحفظك
معليش يا لعميرة سقسي واش تحبي و في اي وقت رانا هنا باش نتعاونو و نتعلمو .
و السبور مانحبوش سيرتو من العام لي فات شرالي الزين دراجة تاع سبور و انا قلت لازم نجرب امالا لبست حوايج خفاف تاع سبور و جبت قرعة ما حدايا و بديت يالله يا الله قريب 30د من بعد جا الزين يطبطب رحت فتحت عليه الباب و يضربني الهوا و برا كان الثلج طايح و مرضت قريب سمانة و انا في حالة من ذاك اليوم طلعتها الفوق للشومبرا تاعي و دروك سير بلي تكون الرتيلة بانية فيلا فيها .
داود ما يعاود .

ههههههههه ضحكتيني تاع الصح
بلاكي تعاودي باش ما تمرضيش :p
هدا وين دخلت لقيتك مزهية الحالة الله يبارك
خسارة اليوم عندي خدمة بزاااااف
راني نطل من التاقة و منين داك نخطف نكتب كلمة و لا زوج

 

[joumane]

يعطيك الصحه يالالا والله خير من تاع البلاد
ربي يحفضك لوليداتك ويعطيك صحيحتك

 

[ام الحلوين]

روعة ان شاء الله مانزيدش نعاود و ربي يعاونك في خدمتك .
جمان امين يا رب و العقوبة للافراح عندكم .

 

[lina-67]

الله يبارك رووعة يعطيك الصحة بصح قوليلي وين طيبتو دارك قداتك !

 

[joumane]

ام الحلوين جيرانك عندهم حشاك كلاب والا لا
وهل تخافي من الكلاب كي تشوفيهم وتبعدي على طريقهم والا نرمال
كي تجي من البلاد واش هيا الاشياء لي ديما تجيبيها معاك
وقوليلي تخرجو ديري شواء البرا انتي والزين والاولاد والا لا سيرتو ضرك وقتا الشوا عندهم
و عندكم حدائق خاصه بالشواء والا لا
وتحبو الشواء والا لا

 

[ام الحلوين]

الله يبارك رووعة يعطيك الصحة بصح قوليلي وين طيبتو دارك قداتك !

يبارك فيك تعيشي و الطياب غير انا طيبت في الكوزينة بسكو كبيرة و بديت بكري ،كيما الحريرة طيبتها في لاكوكوت درت 3 مرات باش نزرب و فرغتها في القدور و المرقة تاع الكسكس تاني طيبتها في لاكوكوت و سلفت الماعن على صحباتي و جارتي الزيرية .

 

[ام الحلوين]

ام الحلوين جيرانك عندهم حشاك كلاب والا لا
ايه عندهم نعيفهم بزاف .
وهل تخافي من الكلاب كي تشوفيهم وتبعدي على طريقهم والا نرمال
نموت منهم قبل اسبوعين عيطلي الزين قالي نتلاقاو قريب للدار مسكين 25د و هو يستنا و انا فاتحة الباب و نطل و حاشاك الكلب قاعد قدام الباب تاعهم و ماحبش يدخل ستنيتو حتى دخل باش رحت .
كي تجي من البلاد واش هيا الاشياء لي ديما تجيبيها معاك
التشيشة (الفريك) و الكسكس و زيت الزيتون و معجون التين نموت عليه و هنا ماكاش و تون تاع الطماطم و خميرة الحلوة نشري الباكي لي فيها 100 و نقسمها مع دارنا و الزيتون الاسود تاع السلاطة تاع هنا ماشي مليح و التمر و العسل الحر و طوابع القاطو جبب ليا و خيمارات .
وقوليلي تخرجو ديري شواء البرا انتي والزين والاولاد والا لا سيرتو ضرك وقتا الشوا عندهم
و عندكم حدائق خاصه بالشواء والا لا
كاين بلاصة تحت بصح الجوارين يهبطو هما و كلابهم حاشاك و يطيبو الحلوف و يشربو القازوز تاعهم هههههه.و انا جامي هبطت نعيف .
وتحبو الشواء والا لا

نحبوه سيرتو لولاد وشريت شواية كهربائية و نشوي في الدار .

 

[joumane]

صباح الانوار ام الحلوين
حببتي راني تشكرتك على البسبوسه ونزيد نتشكرك هنا والله مقاديرها مضبوطه وتهبل
بارك الله فيك

 

[ام الحلوين]

صباح الانوار ام الحلوين
حببتي راني تشكرتك على البسبوسه ونزيد نتشكرك هنا والله مقاديرها مضبوطه وتهبل
بارك الله فيك

صباح الخيرات
الله يبارك و لا شكر على واجب المهم خرجتلك و تاكليها بصحتك حنونة .
ربي يخليك .

 

[joumane]

ام الحلوين اسحاق واسراء كيفاه يعيطولك امي والا بما والا ماما وووو
كي تحبطي لبلاد تقعدي في داركم والا في بيت زوجك
قوليلي قي البيت واش تفضلي تلبسي بيجامات والا قنادر
وكي راكي ناويا تهبطي البلاد نهائيا واش هيا الاشياء اللي حابه تهبطيها معاك

 

[ام الحلوين]

ام الحلوين اسحاق واسراء كيفاه يعيطولك امي والا بما والا ماما وووو
يعيطو امي و ابي ،و زوجي فرحان بأبي بسكو مايحبش يعيطولو papa ههههه و في البلاد كامل عجبوهم كي يقولو ابي و امي .
كي تحبطي لبلاد تقعدي في داركم والا في بيت زوجك
ماعنديش دار راجلي بسكو هو يتيم و عندي غير خاوتو كل واحد بدارو و حنا تاني شرينا دار يسما كون نروح نبقى فيها غير انا و الزين املا ننزل في دارنا و ثاني يوم نروح عند خاوتو 2 ساكنين متقاربين و من بعد كل يوم نروحو عند 1 و لا 2 بسكو بزاف الله يبارك و مرات نروح لداري غير عشية و لا نبات بصح نتقلق بسكو الدار فارغة .
قوليلي قي البيت واش تفضلي تلبسي بيجامات والا قنادر
نلبس بيجامات بونتكور و لا فيزو ماشي سروال و الاكثرية لي غوب قصار
وكي راكي ناويا تهبطي البلاد نهائيا واش هيا الاشياء اللي حابه تهبطيها معاك

اولا هبطت سيشوار و كوات ليا و لولاد و الغلاف تاعهم و غلاف تاع مخايد و سرابت و حديد تاع حوايج و رايحة نهبط ميكسور و باتور و مشينة تاع بقلاوة و ميكروند و دراجات تاع ولادي و فور و فريتوز و شواية تابيات تاع الحمام هدا واش راني متفكرة .

 

[أم أمين23]

ما شاءا لله العرضة هايلة اعطيك الصحة
بما انو جهاد جطت صور الدار تفكرت نصقصي الدار الي كارينا كارينها بالموبل والا الموبل تاعك ؟
كي تزوجتيك نت سمينة والا رقيقة وبعد الزواج كيفاش وليتي؟
وتعجبك روحك ضرك والا كيما كنت قبل ؟
والزين كيف كيف يعني سمان والا قعد كيما هو والا زاد شيان؟

 

[ام الحلوين]

ما شاءا لله العرضة هايلة اعطيك الصحة
يبارك فيك حنونة .
بما انو جهاد جطت صور الدار تفكرت نصقصي الدار الي كارينا كارينها بالموبل والا الموبل تاعك ؟
لقيت مطرح تاعي و تاع لولاد رميتهم و شريتلهم ملاح و لقيت سوفا و طابلة مع 3 كراسى و وحدة تاع تلفيزون و ريدوات خبيتهم ماشي شابين و 3 طوابل بالقجور .
كي تزوجتيك نت سمينة والا رقيقة وبعد الزواج كيفاش وليتي؟
كنت 57 و بعد الولادة 75 و في الصيف لي فات درت ريجيم هبطت 65 بصح في البلاد ماعجبتهمش قالولو شينتي و كي طلعت هنا وليت 73 و دروك مع الحمل مانيش عارفة شحال راني بلاك نكون 75.
وتعجبك روحك ضرك والا كيما كنت قبل ؟
عادي راني راضية بروحي هكذا .
والزين كيف كيف يعني سمان والا قعد كيما هو والا زاد شيان؟

هو تاني سمن و سيرتو كرشو كبرت بزاف و غير يهدرو فاميلتو يقولهم راني مهني علاه مانسمنش و راكي عارفة هدرة البلاد رقيق يقولو راكي مجوعاتو و راه مغبون و السمين يقولو علاه سمن بزاف .
و الحمد لله المهم الصحة .

 

[SAMIRA25]

يعطيك الصحة ام الحلوين عرضة و عليها الكلام
كل شيء متول ربي يجازيك و يحفظلك اولاد و تفرحي بيهم​