اهلا لماوياتي الزينات
j'espere تكونو كامل ملاح
وكعادتي انا فاعلة خير
قلت نجيب لحباباتي كاش وصفات للبشرة
من عند ميمة (تعرف للطب البديل)
كامل علابالكم ناس بكري كانو يديرو حوايج طبيعية ووجوههم يشعلو كي المراية
امالا هاوليكم ماسكات ناتيغال للوجه:
- حب الشباب يقدر يكون وراثي امالا باش نتفاداو ظهور الحب
ادهني بشوية طماطم قبل ما ترقدي وخليها شوية وقت واغسلي ورشي وجهك بشوية ماء ورد وزيدي اغسلي ونشفي
هادي الوصفة ديريها من الصغر قبل ما يظهر الحب يعني من سن 14- 15
- لكان طاح الفاس فالراس وناضلك حب الشباب اولا ردي بالك تمسيه ولا تفلقي الحبات
هرسي شوية اسبيرين مع قطرات ماء حتى تولي عجينة وحطي شوية فوق راس كل حبة وارقدي بيها ومع المداومة يبدى الحب ينشف ويتنحالو الانتفاخ
- كي تطيبو التاي فالدار الحشيش الي يبقى منو حطيه في مكعبات الفريجيدار مع شوية ماء وخليه يجمد ومبعد احكمي المكعب ومرري على وجهك حتى يذوب
ولا احكمي الحشيش كيما راه واتكاي وحطيه على وجهك وخليه
راهو يتغلغل في طبقات البشرة ويمنع الاكسدة وينشط الدورة الدموية وما يبقاش وجهك اصفر
- كامل نعرفو اليابانيات حتى وهوما عجايز وجوههم ما فيهمش التجاعيد
والسر تاعهم هو بياض البيض خلطيه مليح مع النشاء حتى يولي حاكم روحو
وادهني وجهك وخليه ينشف دوك تحسي وجهك تزير خليه ربع ساعة واغسلي
دوك يتنحاو الترهلات ووجهك تحسيه صافي يشعل
- الرسول عليه السلام وصانا ندهنو بزيت الزيتون وهو هايل للبشرة
بعد نزع الشعر من فوق الفم ادهني البلاصة بشوية زيت زيتون وخليه
دوك تلاحظي بلي ما ينوضش تمتم وينوض خفيف ومع المداومة يتنحى خلاص
زيت الزيتون يقضي على البصيلة ويصيب بالصلع
- لكان حسيتي بوجهك تعبان خلطي شوية خميرة الخبز مع القارس حطيها فوق وجهك حتى تنشف واغسلي دوك ترجع لوجهك الحيوية
الخميرة تاكل هادوك الطبقات الميتة الي فالمسام وتخلي وجهك يتنفس
نتمنى تستفادو والي عندو وصفات اخرى ما يبخلناش
تحياتي القلبية
