تحضيراتكم للمولد النبوي الشريف

[هدوء المطر]

رد: تحضيراتكم للمولد النبوي الشريف

سلآم آنسآت/سيدآت اللمة
إن شاء الله فآت عليكم المولد النبوي الشريف بخير وصحة وعآفية،.
حبيت نشآرككم بأجواء المولد النبوي في دآرنا، ديزولي لاpـآغآي فوطو نتاعنآ سلفتها لوحدة تكون لي، على هذيك ما قدرتش نصورلكم العشآء، ألوغ في السهرة كي عادت جآية بنت خآلتي، قلتلها جيبيلي معآك لاpـآغآي فوطو نتآعك،
هذآ واش قدرت نصورلكم:

​

​

سلآم
​

 

[shahrazad]

رد: تحضيراتكم للمولد النبوي الشريف

يعطيكم الصحة يالبناات الله يبارك عليكم
ربي يقوي خيركم ان شاء الله
جبت مشاركتي فالمولد هنا للذكرى ان شاء الله
اللهم صلي وسلم على سيدنا محمد

​

 

[ام ايناس]

رد: تحضيراتكم للمولد النبوي الشريف

اللهم صلي وسلم على سيدنا محمد صلى الله عليه وسلم

زوووووووم

للسهرية

وهادا لي تحب التاي

الطمينة

نوسة تقوللكم صح مولودكم

وهنا بابي وايناس

​

​

 

[كوثر الوهرانية]

رد: تحضيراتكم للمولد النبوي الشريف

اممممم فريدة يعطيك الصحة بصح فهميني وشنهي هذوك الدوائر اللي في العيش مفهمتهمش
صح مولودك وينعاد علينا كامل بالصحة و الهنا

الله يسلمك يا لحبيبة ينعاد علينا و عليكم بالخير و البراكة
هدوك الدوائر نقلولهم التعمير و هو عبارة على
لحم مرحي مع ستة ملاعق اكل كبار سميد محمص شويا على النار و بصل مرابي و ثوم بكترة مرابي و ربطة قصبر و ربطة معدنوس مقطعين رقاق انا نطحن كل شيء فالروبوا و عطور ملح فلفل اسود و كروية و راس الحانوت و سكنجبير قليل من الكبابة و القرنفل مطحونين وملعقة اكل زبدة و نعجن كل شيء و نبقى نضيف فالبيض حتى نتحصل على عجين مثل البيسكوي نضعها في ساشيات نلويها مليح و نحكمها من الاطراف بخيط باش نتحصل على حربوش متل الكاشير و نحطها في كسكاس تفور مدت ساعة و كي تطيب المرقة نتاع بركوكس نحطها فيها تغلي زوج غليات و نحيها و نقطعها دوائر صغيرة
البيض تدخلك حتى ثمانية بيضات
ارجوا ان تكون الوصفة واضحة و ادا مفهمتيش راني هنا نعاودلك
هدا التعمير تقدري تعمري بيه الدجاجة
و تاني يرافق الشخشوخة يجي بنين و ادا حبيتيه حار ضيفي فلفل احمر حار :up:

 

[ام ايناس]

رد: تحضيراتكم للمولد النبوي الشريف

امممم فريدة التعميرة تبان تهبل يعطيك الصحة

​

 

[كوثر الوهرانية]

رد: تحضيراتكم للمولد النبوي الشريف

نبدا ببسومتي بصحتك يا لحبيبة هدا لا شيطاتك مريومة و طيبتي هدا الخير بصحتكم
ام ندوشة كل شيء هايل الله يعطيك الصحة واللي زاد طبعها حنة لعروسة الصغيرة جاتها تهبل بصحتها
احساس انثى بصحتكم القصرة كل شيء هايل مكانش كيما لمت العايلة
شهرا مشاء الله فحلة و مرة و نص الله يعطيك الصح ربي يفرحك كيما راكيمفرحة والديك و عايلتك كل شيء هااااااايل بصحتكم
ام نوسة ام طعام يشهي و نوسة و بلال مشاء اله كبروا و الحنة جاتها شابة بصحتكم و التعمير بنته هايلة ميتشبعش
انا درته في جال كريم يموت عليه

 

[هدوء المطر]

رد: تحضيراتكم للمولد النبوي الشريف

نبدا ببسومتي بصحتك يا لحبيبة هدا لا شيطاتك مريومة و طيبتي هدا الخير بصحتكم
ام ندوشة كل شيء هايل الله يعطيك الصحة واللي زاد طبعها حنة لعروسة الصغيرة جاتها تهبل بصحتها
احساس انثى بصحتكم القصرة كل شيء هايل مكانش كيما لمت العايلة
شهرا مشاء الله فحلة و مرة و نص الله يعطيك الصح ربي يفرحك كيما راكيمفرحة والديك و عايلتك كل شيء هااااااايل بصحتكم
ام نوسة ام طعام يشهي و نوسة و بلال مشاء اله كبروا و الحنة جاتها شابة بصحتكم و التعمير بنته هايلة ميتشبعش
انا درته في جال كريم يموت عليه

الله يسلمك كوثر
صح لمة العآيلة عندها طعم خآص، ربي يدوم لمتنا وجمعتنا إن شاء الله،
صحّ مولودكم، إن شاء الله ربي يعيدو علينا بالصحة والهنآء.​

 

[انريس]

رد: تحضيراتكم للمولد النبوي الشريف




اليوم مولود حبيبي رسول الله صلى الله عليه وسلم اذا كان عظيم البشرية موجود معنا الان فماذا عساه يقول عنا الان اللهم صلي وسلم عليه وعلى اله وصحبه اجمعين





راني جيت وجبت شويا صور صورتهم بالبورتابل نتاع راجلي وشنهي مهمش خارجين مليح هو البورتابل هذا والضلمة ما يتفاهموش المهم نشارك بالشي اللي قدرت عليه في انتضار الصور نتاع بورتابل اختي هذوك خرجو ملاح وصورتلي الاحتفال و الشموع وهذوك ليزلفيرات انا هنا صورت غير بالزرب كي كنت نحط في لحوايج في السهرة
هذا عشايا راجلي كان جيعان محبش يستناني ههههه بدا ياكل كي صورت حكمتلو على يدو مزلت حتى محطيتش البن و الكيسان يعني انا نحط وهو ياكل زربت صورت ديجا فسدلي لفخذ نتاع الداند هههههه

تعشينا ليه ليه وزربت هزيت لماعن و سجيت الصالن للضياف جات ماما و اختي المخطوبة و بنت خالتي موزجة وما جابلهاش ربي لولاد عندها 6 سنين زواج ادعيولها ربي يرزقها واختي وحدة اخرى و عجوزتي و سلفاتي زوج و مرت سلفي و الرجال جا خويا و سلفي
حطيتلهم هذي التحلية جات بنينة بنة لا تقاوم الصراحة اول مرة نجربها الكيسان قلبوهملي ممسوحين

ودرت هذي التارتة نتاع البافاروا ثاني طعم روعة بصح انا راني شبعتها تعديلات هههههههه شريت لحوايج وانريس منعرف وين درقتهملي حتان ناصت الضباح و باه جبدتهملي كنت انا فريتها وعدلت حتان كرهت وخلاص المهم الطعم نورمالمن راني حا فضت عليه الجيلاتين مدرتش منحبهاش زودت النشا شويا و جات هااااااااايلة نضن خير من الجيلاتين
ندوش قتلك تشوفيها متعرفيهاش هههه

وضرك ملك السهرة التشيز كيك هذاتاني نديرو بلا جيلاتين و يجي رووووووووووعة هنا راني مدايرة تشيز كيك بالموس نتاع الشيكولة يممممممممم وشنهي هنا راني صورت قبل ما نمسح لحواشي كنت مزروبة يعني مسحتهم كي حطيتهملهم ولكن صورت قبل منمسح شوفو لحواشي كي تهزو المول نتاعكم يتخلط شويا الموس مع الكريمة البيصاء هزو طرف سارفيات نتاع كاغط و امسحو بيه رايح يبانولكم الطبقات مليييييييييح

 

[نور الحبوبة]

رد: تحضيراتكم للمولد النبوي الشريف

صحا مولودكم ربي يرزقنا شفاعة النبي كلشي بالطبع والشان يعطيكم الصحة يا. حراير دزاير نشكرو اسما الله يحفظها درتنا هذا الموضوع باه نتعرف عل تقاليدينا وعوايدنا كل وحدة عرفتنا عل عوايد المنطقة انتاعها انا عمري ولا سمعت. عل الطمينة تندار في المولود وهاذي معلومة جديدة عليا نشكركم عرفت ني بيهااحنا في هذا اليوم نطيب بربوشة ولا شخشوخة بالجاج ولا بالحم ونجيب الديسار بانواع والحلويات منها المشرية ومنها المخدومة في الدار ونشريو لبخور ولمحارق والشموع وكامل لوازم الاحتفال ونعجن الحنة مع لعشية اقول ناس بكري الحنة المعجونة بكري هيا الي تجي مليحة وكي يجد لعشا لبنات اقولو عشينا قبل المغرب وكي يتعشاو يخرج البرا مع الجيران وانا نتفرج من البالكو واحد الاجوا متتنساش وكي يدخل اكمل لعب في لطيراس وطبعا انا معاهم و مبعد ننزل ونكمل السهرة مع لتاي والحلويات والمكسرات ومن ثما كي حب يرقد نحنيلهم ونروح نقي الكوزينة ومنرقد حت نرجع كلشي لبلا صتو وقبل مانرقد نطل عليهم نلقا لبفرحة في وجوهم وهوما راقدين اييييييه كانت ايام حلوة وبريئة متتنساش ذرك لماعن نعيا نوض نغسلهم ربي اهنينا وافرحنا ويجمعنا في الجنة هاذي حكايتي مع المولود هذ العام محتفلناش درت تريدة بالجاج مع الديسار والقازوز والصلاة عل النبي

 

[SAMIRA25]

رد: تحضيراتكم للمولد النبوي الشريف

يعطيكم الصحة كامل و الله عيشتونا اجواء رائعة و كانا كنا معاكم
و شكر خاص لام انريس على الموضوع لي عرفنا على تقاليد الجزائرييين في الاحتفال
جنا كنا بكرييييي خلاص نحتفلو بيه كي كنا صغار دوك لالا
كنا نديرو العشاء شخشوخة و الحناء و المفرقعات و البخور و الشمع و النجوم ههههه
ربي يدوم الافراح على الجميع
بارك الله فيكم و جزاكم خيرا​

 

[ام ريهام]

رد: تحضيراتكم للمولد النبوي الشريف

انريس امممممممممممممم كلشي هايل يعطيك الصحة يالفحلة ان شاء الله راني نستنا في باقي الصور

 

[anissa 13]

رد: تحضيراتكم للمولد النبوي الشريف

انريس شوفي الفرق بين اجابتها واجابة روز الحكيمة ماكان راح يصرا والو لوكان جاوبتني بطريقة الطف وارقى من هاك
علماء الدين نحكيو عليهم بادب العالم اذا اخطأ له أجر واذا أصاب له أجرين يعني في كل الحالات هم افضل منها هي جات تقول واحد النار يحرمو عاشوراء ..... كلمات سوقية
ياريت علماء الازهر ياخدو تقاعد تروح هي تخدم فبلاصتهم هي ادرى منهم
​

 

[anissa 13]

رد: تحضيراتكم للمولد النبوي الشريف

ياكبار لكروش كامل هاد الحطة وحتى وحدة ماتفكرتني وقالت نعرض المخلوقة ماعندهاش مع من تحتفل ههههههه خفتوني ناكل بزاف ههه
انا عرضتنا لوستي لبارح لبست لولدي قشابية هههه كشفنا ماحبش الحنا عملتلو غي يد ديراكت دخلها ففمو قلتلها غي نحيلو وجهو ماشي وجه الحنة
ضحكوني بناتها فرحانين بالماكلة والحطة وهوما مافهينش حتى معنى مولد النبي ولاعارفين حتى شكون النبي قالها رجلي فهميهم وحكيلهم سيرة نبينا ماشي عرفتي غي طيبي و تحطي
بدلت شوية كنت مغمومة فالدار
بصحتكم كلش بالمالح بالحلو بالمحارق هههه كلش هايل غيرتوني
​

 

[حاتم خليفة]

رد: تحضيراتكم للمولد النبوي الشريف

بما اني الرجل الوحيد في هذا الموضوع حبيت نقوللكم اني اول مرة نفوتو عادي نورمال غير انا وخويا برك في الدار و2من الجيران وحدة بعثتلنا تليتلي الاحمروالثانية بربوشة انا ماشعلت شمع ولا درت اي شيء شعلت غير البخور ههههههههههههه

 

[ام ريهام]

رد: تحضيراتكم للمولد النبوي الشريف

بصحتكم اخي حاتم التليتلي والبربوشة ينعاد عليكم بالصحة والهنا ان شاء الله


بدون تعليق احسن

 

[انريس]

رد: تحضيراتكم للمولد النبوي الشريف

راني جبتلكم بعض الصور اللي وعدتكم بيهم و مازال نزيد نحط

 

[أم رزق الله]

رد: تحضيراتكم للمولد النبوي الشريف

الله يبارك على اناريس يا اسماء ربي يحفضهالك هي و ختها يعطيك الصحة على كلش

 

[انريس]

رد: تحضيراتكم للمولد النبوي الشريف

الله يبارك على اناريس يا اسماء ربي يحفضهالك هي و ختها يعطيك الصحة على كلش

ربي يعيشك اختي العزيزة وربي يخليلك البوقوص نتاعك امين يا رب
نشكركم كامل على التفاعل الهايل نعيمة كنت حاضرة بقوة و شاركتينا فرحة المولد ربي يفرحك ببنياتك و راجلك وربي ينقص عليه شويا ضغط باه يعود يقعدمعاكم كتر احساس انثى نقلتيلنا اجواء رائعة رائعة رائعة ابدعت والله
دلول شكرا بزاف بزاف العصافير نتاوعك نوسة و بيلو زينولي الموضوع ربي يخليهملنا نشاء الله
ملوكة ربي يحفضك يا لحبيبةو يعلي مراكزك و يحفضلك لبنيات انشاء الله
عفوفة و سراق الرشتة معندي منقول غير الله يبارك و ربي يحفضهملك و يبعد عليهم العين يا رب
رغود ميرسي بزاف بزاف كانت اول حاجة تدخل موضوعي الرشتة نتاعك ربحنا عليها وجابت الخير منوراها
شهرورة يا الحرة نتاعنا نقصي شويا شطارة عليها ولاو يقولولك طاطا يا العجوز ههه حنا عندنا في سطيف لولاد الصغار كي يعودو يعرفو يهدرو بزاف نعيطولهم لعجوزكيما انريس بنتي مسكينة وين تروح يا لعجوز يا لعجوزهههههههه
فريدة شكرا على المشاركة القيمة و الافادة بخصوص التعميرة راكي جبتيلنا حاجة جديدة
بيسو وناس المريكان و لبساكرة يا خالي ربي يعطيك ما تتمناي يا اختي يا احلى اخت في اللمة ربي يخليلك مريومة يا رب
سارة شكرا على المرور حبيبتي
حاتم شكرا على المرور كن جيت منقبل رانا بعثنالك واش تحتاج راه كاين كلش من اللبربوشة للمفرمسة للرشتة كلش كلش واش تحب
روز شكرا على النصيحة القيمة رايحة نجربها في اقرب وقت
انيسة شكرا على المرور و اهتمامك بالموصوع0 نشاء الله نكون نقلتلكم جزء بسيييييييييييط من الاجواء الاحتفالية نتاعنا نتوما في المهجر خاصة
حكيك اسعدني جدا تثبيتك للموصوع و متابعتك شرفتيني يا الغالية شكرا جزيلا
نعيمة اللي هيا نور الحبوبة يا حبيبة قلبي سامحيني والله اسمك سقط سهوا راني درت تعديل قبل هذا و مخرجش المهم نشكرك شكر كبييييييييييير وخاص خطراكش بالرغم من انك ما احتفلتيش مع ذلك دخلت و نورتيني بالمشاركة نتاعك معايا ربي يحفضك يا لحبيبة و يحفضلك لوليدات امييييين يارب حقك عليا يا عمري و الله مقصدت ومنقلكش نسيتك خطراكش والله منسيتك الغلطة سرات بالاك من النت و لا من بنتي تبربش بزاف على خاطر كنت في كل مرة ندير تعديل و نزيد نشكر اللي شاركو معايا ونعاود نولي نطل كشما نسيت ونزيد ندير تعديل انا شكيت انت درتك في التعديل الاخير و التعديل منضافش للرد سامحيني يا لحبيبة اموووووووووووووووووووواح

 

[أم نورس]

رد: تحضيراتكم للمولد النبوي الشريف

Yaaaaaaaaaaah ya khti anrisse fakartini baiam zman ghir konna nahtaflou balmaoulid fi darna ya khsara rahou hadouk liamatt
Bsahatkoum khtitou ana rani falghorba la ihtifal wala walou

 

[انريس]

رد: تحضيراتكم للمولد النبوي الشريف

Yaaaaaaaaaaah ya khti anrisse fakartini baiam zman ghir konna nahtaflou balmaoulid fi darna ya khsara rahou hadouk liamatt
Bsahatkoum khtitou ana rani falghorba la ihtifal wala walou

معليهش يا ختي حتى حنى نحاوهالنا هذي العادة هذا العام بزاف اللي ما احتافلوش موالف سطيف يضوى كااااااامل في هذا اليوم السنا ماكان ماكان