فهموني واش راه صاري

[أم معتز القالمية]

السلام عليكم ورحمة الله وبركاته

أول مشاركة ليا في ركن فرغ واش كاين في قلبك
رحبو بخالتكم
خالتكم اليوم جاية تهدرلكم على واش راه صاري في بيتها :very_mad:
القصة ومافيها
أنو عندي وليدي الصغير 4سنوات في عمره
عندو مدة شهور بدل هدرتو لـــ الفصحى
ومالقيناش واش نعملو معاه
رايحين تقولولي بلي حاجة مليحة
نعم هي حاجة ماكانش كيفها
لكن لي ماش نورمال أنو نسى اللهجة العامية :dunno01:
كي ينود الصباح
يقولي :صباح الخير ياأمي
كيف حالكي
أريد شرب الحليب
وكي يجي باباه يقولو :أبي لقد اشتقت لك
وميحبسش من الفصحى كلامو كامل بيها
والبهدلة كي يجونا الضياف
ويبدى يمشي لاكاسات تاعو
هو أصلا كان بدى يهدر ميسكتش

مرة جات الوالدة تاعي عندنا ورحنا نجيبوها في الطوموبيل
مسكينة را سها وجعها :down:
كي شافها مافهمتش عليه قالها :
أيتها الجدة الشريرة لما لاتفهمين كلامي
هيا تكلمي تكلمي
وهي مسكينة تقولي سكتي وليدك واش راه يقول
وأنا تبهدلت
حاولت انا وباباه نفهموه والو
قولولي واش راه صاري في وليدي :cray02::surrender01:


​

 

[رنيم الصمت]

رد: فهموني واش راه صاري

وعليكم السلام اهلين و سهلين خالتي .. وشمن خالتي راكي المازوزية نتاعنا
الله يبارك على وليدك ربي يحفظولكم
فكرتيني في وحدة نعرفوها طبيرة و تهدر فصحى نورمال و الناس يضحكو عليها و هي ماعلابالهاش
هي صح مليحه كي راه يهدر فصحى
بالصح كيفاش فجأة تبدلت هدرتو يعني بين ليلة و نهار وللا مع الوقت ؟؟؟؟؟ ... بالاك بيه الرسوم المتحركة متأثر بيها و بالاك لانو مش مخالط اطفال ؟؟؟؟ .... اما اذا حسيتيها حالة غريبة ننصحك بالرقية

​

 

[soussou bel]

رد: فهموني واش راه صاري

هههههههههههه

نفس المشكل نتاع بنت اختي عندها 3 سنوات


اكيد يتعلم اللغة افصحى اذا 24/24 ساعة يتفرج في الرسوم المتحركة

عادي مراحش يبقى هكدا غير الميكيات راهم ماثرين فيه

 

[nada242008]

رد: فهموني واش راه صاري

كيما قالوك لي قبلي اكيد الكوميكات ماثرين عليه ..نقصيلو شوي من التفراج هههه باش مايتقمصش الشخصية
واقرايلو قصص مفيدة كيما قصص الانبياء بطريقة مبسطة
ولولاد كامل لي في عمرو مايسكتوش هههه حاولي تعمريلو الفراغ بهوايات اخرى
اشريلو ادوات للرسم ولا دخليه لجمعية لحفظ القران باش يفرغ الشحنات الزايدة ههه

 

[حورية الجزائر]

رد: فهموني واش راه صاري

موضوع وليدك ضحكني بصراحة

ان شاء الله يقدرو يفيدوك

 

[nanoche]

رد: فهموني واش راه صاري

ههههههههه والله كنت محتارة في بنت الجارة مي الحمد لله كاين كيفها
هي تاني كي تجي لعندي تقولي مرحبااا أنا نرجعلها مرحبا كيف حالك
تقولي أنا بخير شكرا على السؤال :s
هاي تحيرني دي فوا وكي تقعد لعندي بزاف نتونس بيها مي الأكيد انو السبب هو التفراج على الرسوم المتحركة بزاف
مليحة مايلاقوش مشكل في التعلم يكونو خفاف
ما تتحيريش وما تزيروش عليه خليوه برك يتخالط مع الدراري و ما تفتحيلوش التلفاز طول النهار و راح يرجع لطبيعتو
ربي يشدلك فيه اختي
​

 

[يونس الصديق]

رد: فهموني واش راه صاري

السلام عليكم

لا أراه مشكل بتاتا
فأطفال اليوم لديهم طاقة كبيرة ، ولديهم ذاكرة قوية جداا
الأمر راجع ربما للتلفزة ولدي ابن عمة حتي انو حافظ كامل الاغاني
دعيه ولا تقسي عليه مدام انو صغير في السن وخرجيه يتفسح ، اصدقائو ايضا مع الوقت حاولي تخليه يجتمع بيهم
الامر يحتاج وقت وفي هدا حاولي اغتنام فرصة في تعليمه وتحفيظه ما يفيده

لا قلق الامر عادى

 

[zagane]

رد: فهموني واش راه صاري

السلام عليكم
ههههههههههههههههههه
هدا من كثرمتابعته للرسوم المتحركة في امبيس3 وسبايس تون وغيرها
في يوم من الايام سيحمل البالية المكنسة ويحاول الطيران بها
لكن لا تقلقي عندما يدخل للمدرسة سيتعلم الدارجة لانها اصبحت لغة رسمية بدل العربية
صباح الخير الشيخ تفضل صاحبي وووووو

 

[nina]

رد: فهموني واش راه صاري

الله يبارك هذه حاجة مليحة و ما هيش كامل مشكل وليدك رفد الهدرة على الرسوم المتحركة يشوف تلفزيون بزاف بعديه عليه و اهدري معاه بالعامية و خليه يخالط الاولاد في الشارع و راه تعودي تشتكي بلي راه انسا اللغة العربية هههههه

 

[أم راضية ~_]

رد: فهموني واش راه صاري

السلام عليكم
حنا عندنا وليد وحدة فاميلتي كي بدا يهدر اهدر بالفصحى و يعرف يصرّف والسبب الميكيات طبعا ..
ومازال للآن رح يدير 4 سنين
الاولاد الي يشوفو بزاف الميكيات ماشي مليح
بصح حاجة ما فهمتهاش في الحكاية اسكو كان يهدر الدارجة نورمال وتم تم انقلب و دورها فصحى بلا فاصل وبلا ما يحبس؟؟؟
ادا كان هكدا ... ماشي نورمال !!
اما ادا كان موالف من صغرو ومن الي بدا يهدر نظن حاجة عادية و تفيدو فالمستقبل وما يخفاكش اللغة العربية صعيبة ربما هادا يسهل عليهم فالمستقبل يتعملوها على اصولها و ما يبهدلوناش كيما تاع لاتيلي .. مسلمين ما يعرفوش العربية ...
وادا شفتيه كثر منها بزاف على جناح السرعة لازم يحفظ القرآن ما عندوش مبرر من المفروض راهو ينطق الحروف مليح هههههه
وفي كل الاحوال نقصيلو الميكيات و راقبي مليح واش يشوف نوعية و المادة المقدمة فالرسوم هادي لانها و عن تجربة كوااارث ..
راني هدرت اكتر من وليدك ههههه
ربي يحفظو​

 

[ام اشراق]

رد: فهموني واش راه صاري

السلام عليكم

واش نقولك انا ثانى عندى نفس المشكل بنتى تهدر باللغة الفصحى وكتشد فى هدرة ماتسكتش حافظة الامثال والحكم تاع غامبول .فتيات القوة . الخ وتضلى ترسم كيكملوا اللى تحبهم تروح الانترنت تعاود تجبدهم تتفرج وترسم. وكى تخرج برا ماتلعبش مع البنات تتصرف كيما الميكى ....ذوك راه فى عمرها 7 سنوات مليحة فى القراية من الاوائل وموهوبة فى الرسم الميكى كيما تشوفو ترسموا ولات تروح تلعب مع صحابتها نقدر نقولك نقصت على اللى كانت ماهيش تتفرج بزاف .لازم الطفل يلعب مع نتاجوا باه يخرج منذاك الانطواء وعالم الميكيات راها مرحلة عابرة ان شاء الله وتجوز . اصبرى برك راه نص الجيل الحالى كيما هو . بعدا راهم يهدروا بالفصحى لوكان جاو القنوات بالفرنسية ولا الانجليزية يولى ثان مشكل واحداخر ينساو حتى الانتماء والهوية امالا الحمد الله الى جات فى الفصحى برك

 

[MĭŠš Čhŏů]

رد: فهموني واش راه صاري

السلام عليكم
هههه حاجة عادية طاطا
كانت عندي بنت عمتي تهدر كيما ولدك هكا
في عرس عمتوتي دخلت لقات الحس قالت لامها (ماهذا الضجيج) ههههه
وجارنا يلعب غميضة قالولو تخبى وراء الباب قاللهم( لالا..تشوفو كدميَّ) يعني قدميَّ حتى القاف بنطقها كيما اللبنانيين
و 65% من الاولاد اللي يهدرو بالفصحى يتفرجو براعم

ما تخافيش كي يكبر تتنحالو بنت عمتي درك تقرا سنة 3 تهدر نورمال


وتفكري : وراء كل طفل يهدر بالفصحى قناة براعم
ههههه
​

 

[maroua girl]

رد: فهموني واش راه صاري

السلام عليكم
انا تاني عندي ابنت خالتي تهدر بالفصحى و لكن مرات تهدر بالداريجة نورمال و هذا بسبب ثاترها بالرسوم المتحركة
و تاني لازم تكوني عم ولدك مين يكون يتفرج لانه كاين قنوات يديروا وحد رسوم متحركة يعلمو الاطفل كيما حنا نقولو تبهليل و القباحة و كاين قنوات ما شاء الله
و ربي معاك

​

 

[ام سراج الدين وملك]

رد: فهموني واش راه صاري

الله يبارك على وليدك 4 سنين ويهدر الفصحة أنا من جيهتي نشوفها حاجة عادية ولا داعي للحشمة قدام الناس راه صغير
ياريت ولادي كيفو ربي يحفضهولك ويحميه

 

[وردة أوراسية]

رد: فهموني واش راه صاري

و عليكم السلام و رحمة الله

ربي يهنيك ختي و ربي يحفظلك وليدك يا رب

مورالي هابط قريت موضوعك و الله ضحكت اسمحيلي اخيتي بصح متتقلقيش

قترة و تفوت مستحيل يبقى عمرو كامل و لا يكبر بيها

ربي يجيب ليه فيه الخير و ربي يفرحك بوليدك ​

 

[adel._dz]

رد: فهموني واش راه صاري

ايتها الجدة الشريرة لماذا لا تردي ههههههههههههه

 

[Fifi london]

رد: فهموني واش راه صاري


السلاام أختي تأكدي انه راجع للتلفزيون
بحكم إقامتي بالخارج كان ابني متعلق بمشاهدة التلفزيون باللغة الانجليزية ولما بلغ 3 سنوات صار يتحدثها بطلاقة مع أني اكلم ابني بالعربية في البيت
والله تمنيت لو كان أولادي مثله ، بالنسبة لي هذا امر إيجابي فلا داعي للقلق
سلااااام