بنات وينكم ؟ ممكن تساعدونا؟

[الورد الأحمر]

السلام عليكم ورحمة الله وبركاته

مساء الخير بنات كيفكم ان شاء الله راكم بخير ؟

راهي قريب العطلة وقريب الوحدة ترجع متفرغة ألوغ حبيناكم تقترحوا علينا أشياء أو أفكار
حابين تشوفوها في منتدى عالم المرأة وبإذن الله نحاولوا نجسدوا أكبر عدد ممكن من الأفكار
المطروحة بالتنسيق مع صاحبات الأفكار طبعا كل وحدة وفكرتها تُنسب ليها وتُطرح باسمها
نتمناو تفاعل منكم



خيرة جانت, ساندريلا زماني, ملكًة الاحسآس, றĭṩṤ❤Ṡoşσ, Moon_light


​

 

[السلطانة]

رد: بنات وينكم ؟ ممكن تساعدونا؟

وعليكم السلام

جا الصيف وقربت العطلة ان شاء الله لبنات يمدو اقتراحات

 

[ام عبد الرؤوف]

رد: بنات وينكم ؟ ممكن تساعدونا؟

السلام عليكم النهار يطوال صح ومنلقاو مانديرو اولا انا نقترح عليكم توجدو لرمضان خاتر راهو قرب وتاني حاجة ديرو وقت للمصحف حفظ او قراءة للختم واي حاجة نتفكرها راني نقولكم

 

[الورد الأحمر]

رد: بنات وينكم ؟ ممكن تساعدونا؟

أهلا أم عبد الرؤوف ايه عادة نعملو تجمع في رمضان لختم القرآن . مغسي عالتفاعل والاقتراح وأي شي آخر ما تبخليش علينا

 

[ملكًة الاحسآس]

رد: بنات وينكم ؟ ممكن تساعدونا؟

وعليكم السلآم
اختي ام عبد الرؤوف فكرتك بخصوص رمضآن مليحة
خآصة انه مش بزآف ويدخل ربي قدرنآ عليه ان شاء الله
لو حضرتك فكرة بخصوص هذآ الموضوع مآتتردديش وحطيهآ هنــآ
بوركتِ وشكرآآ على اقترآحك

​

 

[maroua girl]

رد: بنات وينكم ؟ ممكن تساعدونا؟

انا ديت عطلة و راني نخمم كيفاش غادي نفوت هدوا ثلاثة شهور انتظر اقترحاتكم

 

[ويبـقى الأمــل]

رد: بنات وينكم ؟ ممكن تساعدونا؟

مساء الخير
انا عندي فكرة ان شاء الله تعجبكم وهيا

تحضيرات سريعه ونصائح رمضانية لكل امرأة جزائرية لتوفير الوقت والجهد بالكوزينتها في رمضان

بمانو الرمضان قرب وزيد سخانة مانقدروش نعقبوه اليوم الكل واحنا في كوزينة
علاج ماتديروش فكرة انو نضمو رواحناا قبل الرمضان ونجهزو كل شي واهم تنظيم وتحكيلنا كيفها التنطيم تاعم
منها مانقلقوش من كوزينة وفي ساع ونخرجو وتاني نغتمنو الوقت انعبدو فيه ربي وماننسو الذكر والقران وزيد تجينا ساهلة الكوزينة مانخافوش منها
واش رايكم
​

 

[السلطانة]

رد: بنات وينكم ؟ ممكن تساعدونا؟

مرحبا بيكم يالبنات شكرا على الاقتراحات

زيدو كاشما عندكم افكار خلاف تفضلو بيهم

مرحبا بيكم كل

​

 

[السلطانة]

رد: بنات وينكم ؟ ممكن تساعدونا؟

وتاني لي عندها كاش اقتراح لرمضان

هاي المجموعة

مجموعة عـالم المرأة


باه تنضم

نديرو كاش فعالية ولا كاش حاجة


المهم عالم المرأة كبير وواسع وتقدرو تمدو اقتراحات بزاف


​

 

[السلطانة]

رد: بنات وينكم ؟ ممكن تساعدونا؟

للرفع​

 

[السلطانة]

رد: بنات وينكم ؟ ممكن تساعدونا؟

أهلا وسهلا صيفنا تميّز وابداع مجموعة عالم المرأة 2014​

 

[ويبـقى الأمــل]

رد: بنات وينكم ؟ ممكن تساعدونا؟

مساء الخير جبتكم فكرة اخرى ان تعجبكم

واش رايكم بمأنو فصل الصيف فصل الاعراس والمناسبات
انو كل واحد تحكيلنا على جديد وحصري كاين في موضة المايك اب والفساتين والقفاطن واش قواطو كل شي جديد
او فكرة اخرى انو كل عشرة ايام هكا نعينو مجموعة من بنات مالفين بالعراس وامبعد يحكولنا
وهكا باش نكسرو الروتين الصيفي ​

 

[الورد الأحمر]

رد: بنات وينكم ؟ ممكن تساعدونا؟

أهلا بيكم لبنات كل اقتراح مهما تشوفوه بسيط حطوه ممكن ندمجوه مع اقتراحات أخرى ونخرجو بشي مليح في لافان ...
ويبقى الأمل يعطيك الصحة أختي على الاقتراحات لي ممكن نطوروها مع بعض ونخرجو بنتيجة مليحة ...
في انتظار آراء أخرى

 

[ام عبد الرؤوف]

رد: بنات وينكم ؟ ممكن تساعدونا؟

السلام عليكم انا نقلكم واش ندير بالضبط في هاذ الايام نجيب الفريك حب نغسلو ونقطرو ونشيحو مليح عند الشمس طبعا نملحو وهو ومشمخ ومن باعد نبعث نرحيه ونسيرو بالسيار تاع البربوشة ونحيلو الدقاق بالسيار الرقيق
ونحطو في بورت مونجي ونخبيه ومن باعد نرجع للثوم هاذ الايام راهي تتباع بسعر معقول وتاني اصلية ومليحة نشمخها في الماء ليل كامل ومن باعد نقيها باستعمال القفازات ومن باعد نجمدها حب يعني نحطها في الكونجلي ونخرجها نرحيها في الرحاية تاع الغرس او تاع التريسيتس ترجع كي البوماد خاتر حطيتها في الكونجي وهذا هو السر ونضيفلها الملح والزيت ونحطها في بورت مونجي صغار شريتهم على ذمتها ونحطها في الكونجلي
نرجع للجلبانة نقيها تاني ونغسلها ونقطرها مليح ونقسمها على حسب الكمية الي نطيبها ونحطها في ساشي ونخرج منهم الهواء ونغلقهم ونحطهم في الكونجلي
ومن باعد الطماطم حب نغسلها ونحطعل في قدر ونخليها حتى تذبال ومن باعد نرحيها وثم نصفيها بشاش ونزيدلها شويا ثوم ونحطها في الكونجلي
والماء تاعها نطبخ لبه هاذ الايام ومن باعد نخلي كي قرب رمضان بايمات قليلة ونشري التوابل حب ونرحيهم في الدار بعد التنقية تاعهم ونحطهم في البوات تاعهم ونخليهم ان شاء الله لرمضان
اما الفلفل الحار نرحيه هو والفلفل الحلو ومزيدلهم الثوم والزيت زيتون والقارص معصور ونحطهم في بلارات تاع الزجاج يطيبو ونسميوه بوفرجوخ راهو يجي بنين وماشي حار يحبوه اولادي بزاف
هذا واش تفكرت ندير وكاش جديد راني نقولكم ووالي وجدتو كامل يساعدني بزاف في رمضان ويمدلي الوقت باش نختم القران حتى لخمس مرات في الشهر الكريم ونزيدلكم فكرة هذا وين تفكرتها راني حاى الكيرة لخميرة في رمضان ندير منها بزاف ونطيبها نص طياب ونحطها في الكونجلي وكل يوم نجبد وقت الي قرب المغرب ونطيبها دجي تقول جديدة اما بالنسبة للمعجونة او الرخسيس ندير قيس نهارين ونحطها في الثلاجة دجي خفيفة لعجينة تاعها نحلها بالحلال ونطيبها دجي تهبل
هههههههههههههههه كثرت عليكم اللهم بلغنا رمضان

 

[الورد الأحمر]

رد: بنات وينكم ؟ ممكن تساعدونا؟

أهلا أم عبد الرؤوف يعطيك الصحة الفحلة هذو تدابير منزلية ملاح يساعدو على كسب الوقت بارك الله فيك ... هاكي جبتيلي فكرة لموضوع نديروه ومادابيك بعدها تعبي ردك هذا كيما راه وتحطيه بالموضوع لي يندار وكاشما زدتي تفكرتي غير ما تبخليش علينا يعطيك العافية .

 

[ام عبد الرؤوف]

رد: بنات وينكم ؟ ممكن تساعدونا؟

السلام عليكم اختي مون لايت مكان حتى مشكل نعاونو بعضانا ونتعلمو ونستفادو من بعضانا كيما قلت من قبل الكوزينة في المناج نخليها هي الاخيرة خاتر قد مكانت نظيفة تفتح الشهية للعمل فيها خاصة انو الاواني تاع رمضان خاصة ومميزة انا هاذ العام ان شاء الله العام الاخير ليا في داري الي راني فيها عندي فيها خمسة عشر عام وان شاء الله نرحل لداري الجديدة من ورا رمضان واذا كتب ربي راكم تكوني معايا خطوة بخطوة لذا هاذ العام مراحش ندير حتى مناج للدار بصح راني نحكيلكم على الاعوام الي فاتت انا كي يدخا الصيف نبدا بالزور نغسلهم كامل ونخبيهم في ساشي تاعهم ونجبد الفراش تاع الصيف ونخبي تاع الشتاء ونرجع للمناج تاع الحيطان والطيق والريدوات تعرفو كل شئ يتبدل كيما الريدوات نلدلهم نغسلهم ونخليهم ونجبد تاع الصيف اما الكوفر كنابي تاني كيف كيف نغسلهم ونخبيهم ونبدلهم

 

[maroua girl]

رد: بنات وينكم ؟ ممكن تساعدونا؟

انا راني دخلتها غير نقي الحوش نقي الشومبرا نقي الكوززينا و مدابيا حاجا وحدوخرا و كل وحدا تعطينا افكار و معرفتش كيفاش نسجل روحي في مجموعة عالم المراءة ممكن تساعدوني

 

[أمــ وليــد الجزائرية]

رد: بنات وينكم ؟ ممكن تساعدونا؟

صباح الخير

جيت بفكرة ليكم ياعالم المراة و منيش حابة نطرحها هنا رح نوصلهالكم في الخاص هههه باه تكون مفاجئة
ولا نجحت الفكرة رح تكون اجمل ذكرى في قسم عالم المراة لــ2014 الي يتحداني يجيب فكرة أروع و معليش تكون في المستور حتى تخرج المهم شغلو مخكم وجيبولنا افكار نزهاو بيها جميعا

​

 

[الورد الأحمر]

رد: بنات وينكم ؟ ممكن تساعدونا؟

شكرا اختي ام عبد الرؤوف يعطيك الصحة ...
فلة شوقتيني للفكرة ان شاء الله تحقق نجاح كبير ...
في انتظار اقتراحات أخرين ...

 

[الورد الأحمر]

رد: بنات وينكم ؟ ممكن تساعدونا؟

انا راني دخلتها غير نقي الحوش نقي الشومبرا نقي الكوززينا و مدابيا حاجا وحدوخرا و كل وحدا تعطينا افكار و معرفتش كيفاش نسجل روحي في مجموعة عالم المراءة ممكن تساعدوني

المجموعة لازم تبعتلك المسؤولة عليها دعوة انضمام باه تقدري تدخليلها ...
كي نلمو الافكار نتلمو ان شاء الله في المجموعة باه ناقشوهم ونخرجوهم بحلة مليحة للمنتدى