قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

[mima.kouki23]

قولولنا وش يلزم في فليزة العروسة لي يجيبوها دار العريس :d
إن شاء الله تعجبكم الفكرة
و ألقي منكم رودو كثير ة :up:

 

[السلطانة]

رد: قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

أهلا بيك اختي قصدك تاع العطيّة؟ لي يجيبوها معاهم

انا مدلي الصوارد وشريت حوايجي وحدي - انا من قالمة وراجلي من مسيلة. وعاداتهم ماش كيما تاعنا .هيا شريت واش يناسبني

كوسميتيك ،صبابط ولي بوشات ،نويزات تكون مليحة بالبابوش تاعها ،2 تبديلات

 

[mima.kouki23]

رد: قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

نعم أختي العزيزة تع العطية بالهناء ان شاء الله

مي هي لازم تكون حاجة تقيلة معاهم مش غير هدم الحوايج

أنا من عنابة

 

[الحلم الوردي]

رد: قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

والسلآم عليكم والرحمة
الحاجة الاولى :الشمع والحنة
والطبق نتاع مقشقشة
الفوطة نتاع الحنة
2ويزات للحنة تحني عليهم
وكاين كل واحد والمقدور نتاعو
كيما اختي حنات على
فردة مقياس الذهب
ثانيا:قندورة تكون باهضة الثمن مليون ونص
وحذاء كيما القندورة كاين الي يحب اللون الابيض و لا الغوس
وتانيك الملابس الداخلية
وديزابيي يكون مليح مع حذاؤو
وبيجامة للزوج وصاك مليئة بمسلتزمات الزوج
ومالات صغيرة فيها مكياجها ومسلزماتها
والعطور
المنطقة الشرق الجزائري قسنطينة
​

 

[الحياة كلمة]

رد: قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

على حساب ولاية المدية هادو هوما عاداتنا نهار الطفل يدي فليزة للمراة
لازم يشري تقريبا بخاسك كامل هادو
عندك
فليزة معاها مانات
في الفليزة كاين
منصورية
صباط
بوشات
دوزان الحمام كلش مجمول من فوطة الحمام حتى للبليغة
طرف قديفة
طرف تع الباليطة تع الحمام وحدو ولا بالفتول
باطة مكياج
ريحة و
سختشي تبان
نويزة (ديزابيي تع صبيحة تع التعرويس)
وممكن طايور
او فالمانات باغيغ ذهب ولا كوردو
كل واحد او مقدورو
وتانيك صيغة بيضا
وتانيك ملايا و سباط و كلش نورمالمو ونخلي لبنات يكملو

ساك تع الخرجة فالطريق

بلا ماننساو بزكي دو فلور و زوج سنيزات حلوة كيما مقوط او تشاراك



سلامي
​

 

[FARAH-31]

رد: قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

Hna fi wahran la valise li yjibha el 3riss nsamouh el snei w yjibouh lel 3rossa nhar hanetha fih désabié complet nuisete kimono pyjama bustier et short koulchi blanc m3a el babouche ta3ah les deux piéces blanc et rose ou couleur wahdokhra , mlaya avec le soulier et pochette ou djelaba kaftan ou mansouria karakou ou ksantinia ou 3anabia ou jabador ta3 el chedda avec le soulier et la pochette ta3ah ida ken del doré le soulier et pochette ykounou doré w el 3akss , tbak ta3 el hana complet hana chmaa tass ta3 el hanna ykounou ya doré ya argent 3la hssab el tbak w tbak wahdakhor moyen ykoun fih swallah el cosmétique chompoing apres chompoing masc créme maquiage…….ect w manensouche koul wahda chabrat men dhab la plus part ydirou parure w kayen li yebrou sensla wahadha w mengouch wahda www 3la hssab el kodra aya w manesouch les gateaux plawate mnaw3in hadi hia 3adetna fi wahran normalement hhhh lol

 

[بوربيع نهاد]

رد: قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

الجيجلية جاتكم وجات باعادتهم اولا لازم اهل العروس يشروهم اولا فليزة ولاملات.فليزة لازم كلش بزويجة.طايور الخرجة.قفطان مخيط اوقماش قفطان بلا خياط .زوج سوتيات زوج قماج الصبحات .ديزابي كامل ابيض اللون.زوج سرافت تاع الوجه.زوج سرافت تاع .........زوج صابو وسندال او صباط . وقندورة لام العروس.وقماش بلاخياط.ومحرمة الراس للجدة تاع
..ااب والام.وعلبة حلوةالدراجي والقفة نحط الحني ولوازمها.وعلبة مكياج.وزوج شامبوا وزوج قراعي ريحة.وباط لاباس الحمام.ولاملات نضع الدهب كامل ..

 

[بنت الـ25]

رد: قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

السلام عليكم
موضوع الجرية (احنا نقولولها في قسنطينة الجرية ) موضوع مليح اختي
رح نجاوبك وش نديو احنا مع زادت والات رانا نقديو فالجرية تع مرت خويا يعني جاتك عالقوسطو ههههه

بون نشريو فاليزة وبناتها يعني فاليزة كبيرة ووحدة متوسطة والصغيرة اللي هي المالات
معاها
البينوار تع الحمام (sorti de bain ) معاه منشفة كبيرة ولا زوج صغار وملوة تع الراس
(او يتباع كومبلي)
مناشف تع الوجه (باطة فيها 3 ولا 4 ملاح يكونو مطروزين )
ديزابيي ابيض والبابوش تاعو
نويزات بيضا مليحة بالكيمونو تعها وملحقاتها (اك تعرفوهم خخخخ)
زوج تبديلات وحدة منهم بيضا والاخرى اي لون احنا درنالها قندورة كوكتال بيضا وقفطان دوغي
مع كل تبديلة بوشات وصباط نفس اللون هادو يتحطو في رافية باهية بخيزونطابل يعني خخخخخ وملحقات كل تبديلة
تاني برنوس ولا عباية من هادو الباهيين اللي خرجو طرانصبارون يتلبسو فوق القنادر تع تصدار كي تخرج مثلا تروح حريم في كاش عرس
الكوسميتيك يشمل الماكياج والأمور تع الدوش (شامبوا ،آبخي شومبوا، جال دوش، صابون، ديودوغون، بارفان، كريم الجسم...) ويكونو نفس لامارك لا سيري كاملة كيف كيف مثلا دوف
احنا كنا رح نشريولها لونصونبل تع العقد ومعاه صاكو وصباطو ونديوهم فالجرية
ممبعد مدينالها دراهم ودبرت راسها بارسكو الجرية والحنة رح نديروها مور العقد هكدا تفاهمنا

والامورات تع الحنة تاني ام يتباعو كامل مع بعضاهم
ونحنيو على حاجة تع دهب
وبالاك كشما نسيت ،، الموهيم ادا تفكرت نجي نقولكم خخخخخ

سلاااااااااااااام
​

 

[أفرآح]

رد: قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

سلـآم ــآلله عليكم ..~

الله يهنيكم وجميع المقبلات والمقبلين على الزواج بعمارة الدار وزيان السعد يـــآرب

بون احنا عندنا في سيدي بلعباس مايجبوش فاليزة يجيبوا {السْنِي } بمعنى صينية كبيرة ويديروا فيها ...

كاراكوا ولا قسنطينية ولا عنابية ولا قفطان ولا منصورية كل واحد واش شرطت عليه العروسة وواش يقدر طبعا مع بوشات وصباط سواري اكرمكم الله وحزامة تكون اما دوغي ولا ارجون على حساب السباط ولي في القندورة لكانت معمرة بالارجون ارجون وهكذا ..
بالاضافة لديزابيي وبوشماقها وملابس داخليه وجلابة وخمار وعجار لشرطه عليها ويكون السني مغلف بورق شفاف
ومعاه سله صغيرة الكوسميتيك كلش مكياج بارفان ديودورون جال دووش والخ . وسني فيه الحنة ورق وفيه قوالب السكر والدراجي والحلوى ويجبوا تانيك سلل فيهم الفاكهة والتمر ووو الخ وسنيوات نتاع القاطو ..

 

[Amoula22]

رد: قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

انا من المسيلة
ودونك عادوا كامل يمدوا دراهم وكل وحدة تشري واش حبت واهل العريس ماشي حق عليهم يجيبوا حتى حاجة الا اذا حبوا هوما يجيبولها
مي اللي حبت هوما يشريولها نورمالموا في الفيونساي يجيبلها كلش زوج زوج يعني لبست الدار يجيبولها زوج والخرجة زوج والاحذية يجيبولها زوج واللبسة الداخلية وزيد الصابون والبرفان والديودروا وفي الدخول نورمالموا يجيبولها وحدة وحدة كيما الفيونساي
وبلا ماننسا الطبق فيه الشموع وحنا والحلوى هادوا يجيبوهم في فيونساي

 

[salma zayna]

رد: قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

انامن بوسعادة يوم الجمعة لي فات خطيبت اختي وجابولها ملحفة وعباية و2 دوبياس قندورة تع دار ومنصورية وحذاء صواري وصابوا بوشات تع ميكياج وريحة هدا مكان هههههههههههههههههههههه حنا مانكتروش

 

[معسكر]

رد: قولولنا وش يلزم في فليزة العروسة لي يجيبوها دار العريس و كل واحدة تقولنا من أي منطقة هي

أنا من معسكر حنا العريس يجيب الفاليزة للعروسة نهار الحنة نسموها السني ويجيبوه عائلته كاملة ويحطو فيه ****و ولا قسنطينية ولا قفطان زائد سباط نتاعه وجلابة وسباطها زائد ملابس داخلية بيضاء شمع والحنة و ماء الورد والسكر القندلي كيربطو الحنة صوالح كوسمتيك زائد الحاجة المهمة الذهب