في حيرة

[مشكلتي]

السلام عليكم و رحمة الله و بركاته

جيت نحكيلكم حكايتي انا امرأة متزوجة و رزقني ربي بالبنين مشكلتي انو اخت زوجي لا تنجب الأولاد (ربي يرزقها ) طلبت مني نمدلها واحد من ولادي تربيه

الصراحة ما قدرتش نقوللها لالا شفت كبدتها مكوية على طفل و على بالي رح تتهلا فيه مبصح ما قدرتش نمدلها واحد من ولادي كي يكبر هاذ الوليد و يسقسيني علاش مديتيني و علاش انا مشي واحد من خاوتي

االمشكل راه مطير النوم من عيني عاونوني تعيشو و قولولي كيفاش نتصرف عقلي رح يطير مني
​

 

[راضية حامدة]

رد: في حيرة

تم الاعتماد

الاستخارة ثم الاستخارة
اذا مديتيلها اي واحد ما رح يخصو والو
و اذا خليتيه ما رح يخصو والو
لكن صعبة شوي صح
استخيري المولى و هو يدلك على احسن باب

 

[نَدَى اليَآسَمين]

رد: في حيرة

اختي زوجك و عايلتو وافقو على الشي هادا ؟

اذا ايه ! يا اختي استخيري المولى عزوجل هو الي يعينك و يبينلك الطريق الصحيحة

الولد اذا مديتيه لعمتو اكيد رح تتهلا فيه و تحطو في عينيها . مرت خالي مدت وليدها لخالتي و الله الطفل معيشاتو خالتي عيشة الملوك الي يقول عليها تحضر

صح هي صعيبة شوية عليك تتخلاي على فلذة كبدك مبصح بالإستخارة كل شي يبان

ربي يهدي سرك و يسرلك ما فيه صلاحك و صلاح اولادك
​

 

[largo19]

رد: في حيرة

السلام عليكم و رحمة الله و بركاته

جيت نحكيلكم حكايتي انا امرأة متزوجة و رزقني ربي بالبنين مشكلتي انو اخت زوجي لا تنجب الأولاد (ربي يرزقها ) طلبت مني نمدلها واحد من ولادي تربيه

الصراحة ما قدرتش نقوللها لالا شفت كبدتها مكوية على طفل و على بالي رح تتهلا فيه مبصح ما قدرتش نمدلها واحد من ولادي كي يكبر هاذ الوليد و يسقسيني علاش مديتيني و علاش انا مشي واحد من خاوتي

االمشكل راه مطير النوم من عيني عاونوني تعيشو و قولولي كيفاش نتصرف عقلي رح يطير مني
​

السلام عليكم ,, أختي ,, أمر كيما هذا راهو حسّاس بزّاف ,,, هذا إبنك ,, و مستحيل إنسان يتخلّى على إبنو ,, خاصّة المرأة ,,, أخت زوجك الله يرزقها الذريّة ,, لكن أنتي ما كنتيش سبب المشكل و ماهوش من مسؤوليتك تعوضيلها ,,,, و الحمد لله أنتي تفكّرتي في شعور إبنك بعد ما يكبر , يحس بالتميييز بينه و بين إخوته الآخرين ,, ربّما يشك في روحو و يدخل في عالم آخر ,, ننصحك ما تمدّيش إبنك و ربّيه وحدك ,,, أمّا أخت زوجك باش تعاونيها نوصّيك تحكي معاها بلّي تروح تكفل يتيم من دار رعاية الطفولة المسعفة أحسن ,, لأنّها تضرب عصفورين بحجر ,, أوّلا تعوّض إحساس الأمومة اللي فقداتو ,,, و ثانيا تربح أجر كبير بكفالة اليتيم و ذكريها بفضل كفالة الأيتام و الرسول صلّى الله عليه و سلّم يقول (بعثت أنا و كافل اليتيم كهاتين - و قرن بين إصبعيه-صلى الله عليه و سلّم) ,,,, و هكذا تعيشو كامل متهنيين و تربحوا الأجر والثواب بئذن الله,,, ربي يوفقك اختي

 

[بنت الـ25]

رد: في حيرة

السلام عليكم
ربي ما يحرم بشر من نعمة الضنا
بون اختي احنا في عايلتنا كاينة هاد الحكاية
عندي مرت عمي ما تجيبش لولاد ،، وكاينة مرت عمي اخرى رزقها ربي
آخر طفلة مدتهالها رباتها وكي عرفت صلاحها الطفلة فهموها بلي هدا لي مربيها عمها وباباها هاو فلان وعادي
انا في رايي مديلها الطفل الصغير وحتى لو كبر رح يعرف وحدو انتي علاه مديتيه هو بالدات
والأكيد راحين تشوفوه دايما يعني ما راحش يحس بالفرق بينك انتي وعمتو
انوي نية خالصة لله برك اختي " فمن فرج على مؤمن كربة من كرب الدنيا فرج الله عنه كربة من كرب الآخرة"
وجزاك الله كل خير وربي يكثر من امثالك
​

 

[وصال]

رد: في حيرة

السلام عليكم ورحمة الله تعالى وبركاته

اختي هذا امر يعود ليك انت وقدرتك لكن تحبي رايي نورمال اذا قدرتي مديهولها راكي راح ديري خير كبير على مااظن وزيد راح تمديه للعايلة ماشي براني انا عندي بنت اختي ، اختي مدتها لوستها كيزادت وراهي عايشة لاباس عليها والحمد لله ودوك تجي لعندنا وراهي عارفة بلي اختي ماماها واحنا تقولنا خالاتي ونورمال بصح كاين عفسة لازم من صغرو تقولو بلي انا عمتك عادي ، كاينة حاجة ربما تعرفيها بصح نذكرك ربما تغفلو عليها التبني حرام يعني يقعد في اسمك وهي تربيه برك متعطيلوش اسم راجلها وربي يجازيك خير ان شاء الله .
ملاحظة اذا عرفتي روحك متقدريش غير ماكان لاه تحطي روحك في اختبار كيما هذا لاخاطر الكبدة صعيبة .
ربي يوفقك ويحفظك ويفتح عليك وعليها بالذرية الصالحة يا رب .
في امان الله .

 

[زيزي احمد]

أنا ضد فكرة أنك تعطي ابنك لتربيه أخت زوجك فهذا غير معقول و غير منطقي
إذا كانت تريد تربية طفل فلتذهب إلى دار الأيتام و تطلب ذلك أو تبحث عن أحد مات والداه و تركاه دون رعاية
الأبناء أمانة من عند الله فلا يجب أن يضيعها أحد لأننا نسأل عنهم يوم القيامة
تحلي بالشجاعة و ارفضي هذا الطلب أحسن من تعيشي معذبة طول حياتك
أنا كذلك أستاذة و طلبت مني إحدى النساء أن تأخذ ابنتي إلى الأبد لتربيها بحجة أنها لا تنجب و أنني غير قادرة على تربيتها هي و أخواتها لأننه ليس لدي الوقت بحكم العمل فرفضت رفضا قاطعا في وجهها و قلت لن أعطي ابنتي و لو أكلت التراب من أجلها و الحمد لله كبرت هي و أخواتها و أصبحت الآن في سن الزواج و الحمد لله
لا تفرطي في أي أحد من أولادك فأنت من يلام في الأول و الأخير حذاري

 

[لاجودان شاف]

السلام عليكم ورحمة الله وبركاته
رمضان مبارك ختي
أنا ضد الفكرة تماما واياك والانسياق وراء العواطف
خلي الولد بتربى مع خاوتو ومعاك ومع باباه باه كي يكبار يبرك نتي وباباه وهذا حقكم منو
قد يجي ليوم وتتعذبي بزاف لما تشوفيه بار بعمتو لي رباتو ونتي أمو لي جبتيه ومش عاملك قيمة
وهاذي أخت زوجك ما تملكيلها غير الدعاء
وماتدري لعلو يجي اليوم ويبعدو ولادك كامل عنك ويبقى غير هذا قريب
وممكن بتصرفك هذا راح يصير نوع من الفرقة بين الخاوة لانو هذا ماترباش معاهم فمش راح يعتبروه أخ حقيقي
والله أعلم
​

 

[Telemly]

vous avez trouver votre enfant dans une pochette surprise ? ou dans un Kinder-Surprise
il faut arrêter avec ça sérieux !! donner son propre enfant
puis quoi encore ! vous avez combattu durant 9 mois ! 9 mois de souffrance après une autre femme , vient , normal ,le prendre , l’élever , et vous ?​

 

[YAHIA S]

جامي اتمدي ولدك

لكبدة عمرها ما تخرج للبرانية

كي تخرج تفسد


حتى لو كان اخت راجلك


كاين اولاد مطيشينهم في سبيطارات


و في دار الايتام


اتروح ادير اجر خير ليها و راجلها


و اوليدك ما تحطيش في امر كيما هذا

 

[soussou bel]

حرام عليك
علاش تفرقي بين اولادك

المستشفيات راهي معمرة تربي واحد

بصح تفرقي بين اوادك و ديري مشكل نفسي لهم
حرام
انا في بلاصتك عندي 20 و ناكلو غير الخبز و منمدش واحد

الاطفال كاينين و ماشي صعب باش تربي واحد

تربي واحد معندوش والديه تدي فيه اجر بصح تربي واحد عندو والدوه و تحرمه من خوته حرام و تدو غير الدنوب

 

[NICE]

اختي حاجة ماش نورمال بيزار علخر وكيفاش اصلا قدرتي تطرحي هاذي الفكرة راي كبدتك لي حدمديه وكيفاش يهون عليك ولدك علابالي غاضاتك اخت راجلك بصح راهي انانية اذا طلباتك فيه نقلك ادعيلها يفرج عليها ربي واحكمي في ولدك خيرليك الزمان واعر اختي وياكي تفرطي في ولدك وماتنسيش 9شهور واني حملاتو وتعذبتي كجبتيه وفي لخر تمديه كي والو ماش نورمال اختي

 

[R@MA]

السلام عليكم
اسمحيلي انا متأكدة انو ولا ام تقدر تفرط في كبدتها وتمدو لانسانة خلاف تربيه
حتى ولو كانت امها او اختها
انا عندي طفلة جربت الامومة والله تطبق الدنيا لا نفرط في ظفر من ظفرها
هي الهوى
حتى ولو كبدتها مكوية كاين بزااااف لتخلاو عليهم والديهم
نظن افضللها تربي ابن محروم على انو تحرم ابن من امو وتربيه
حتى ولو كانت راح تعيشو لابال في
هومحتاج حنانت الام لي مايلقاها حتى عند وحدا ياربي وتكون عندها اقصى درجات الحنانة
ردي بالك تغلطي غلطة رايح تندمي عليها مجرد ان وليدك يقلك وعلاش انا بذات كلمة دمر
ربي يكون معاك
​

 

["Màrià"]

امم تقدر تروح لدار اليتامى و تتبنى كاش واحد
كاين بزاف دراري صغار يسحقو عايلة تتهلا فيهم
و ولادك راهم عندهم نتيا ربي يخليك ليهم
و اختك ربي يرزقها ان شاء الله
و اذا حبت تربي كيما قتلك تقدر تتبنى
علاه تحرمهم مساكن منك
و ربي ما فيه غير الخير
​

 

[**laila**]

اختي..القرار مش قرارك وحدك

و ماهوش ولدك وحدك..استخيري المولى و تفاهمي مع راجلك

بالتوفيق

 

[اسماء16]

الاستخارة احسن شيء وان شاء الله ربي يدلك
​