قعادي فالدار جيحني وعلملي التفنيين واش رايكم

[حياة هانئة]

متزوجة وماكثة بالبيت كنت نقرا وخدمت لمدة 4 سنين وممبعد الاطفال حبست الخذمة:up: وتفرغت ليهم برك وليت قليلة الاختلاط بالجميع حتى اهلي خاطر نتلقى صعوبة باش نخرج ومام يجوني اهلي داري تولي فوضى خاطر ولادي ميخلونيش وما يخلوش ضيافي بهناء :down:مشكلتي من كثر ما راني غير فالدار ومع اطفال وليت مين نتلاقى اشخاص يتلفلي الكلام ومنعرفش نرتب حديثي نذخل ونخرج فالهدرة ومعودش نقدر ندبر ولا واحد يشاورني نعجز نعاوني ونلقالو حل حتى الكلام عاد يتلخبطلي حرف نحذفو حرف نزيدو ههههه وهذا ازعجني وليت مقلقة كثر ونتحرج لما نحكي مع الناس :-o:-oراجلي معدتش نقدر نحاورو ونقنعو كيما بكري :s
انا والفت مع الجامعة والعمل وكنت نطير مع الطايرين وقعدة الدار بدلتني وعلمتني التفنيين حتى نشاطي وحيويتي قلوا بزاف :sport02:وعدت تقريبا مهملة وانا الي كنت مرحة وخفيفة وظريفة :love01:
واش الحل----

 

[sahiko hamza]

رد: قعادي فالدار جيحني وعلملي التفنيين واش رايكم

وعليكم السلام ورحمة الله

لاباس بيك اختي ماتقلقيش روحك
بالعكس النعمة لي عندك تتمناها الف وحدة
زوج - بيتك - و الاولاد
احمدي ربي على النعمة لي راكي فيها

اما قضية كلامك عادي
راح تعتادي على الامر
واكيد خاوتنا المتزوجات هنا راح يزيدو ينصحوك .

ربي يصلح حالكم .
​

 

[السلطانة]

رد: قعادي فالدار جيحني وعلملي التفنيين واش رايكم

الدار راهي تجيح العبد هههههه راني جربتها وكرهت انا تاني
بعد ماكنت نخدم

لازمك تديري برنامج لحياتك اختي انا هكا درت

نظمي وقتك تهناي

 

[stelllo]

رد: قعادي فالدار جيحني وعلملي التفنيين واش رايكم

ان شاء الله يكبروا اولادك
وترجعي لنشاطاتك
بصح ماتهمليش روحك وثقافتك لازم تطلعي ع الأشياء الجديدة لنفسك ولاولادك ولراجلك ماش ماتحسيش عمرك متأخرة بزاف عن اللي حواليكي
حاولي ترتبي امورك ويكون ليك طابع خاص

 

[بنت الـ25]

رد: قعادي فالدار جيحني وعلملي التفنيين واش رايكم

أهلا اختي
صح قلة اختلاطك بالناس وتركيز اهتمامك برك على حاجة معينة يخليوك تنغلقي على العالم الخارجي
هكدا صرات لاختي الكبيرة لما تزوجت ، قاتلي دبدبت وليت منعرفش نحكي مع الناس
والسبب نظن هو الحشمة والخجل والابتعاد تاني على الناس مدة طويلة
نصيحتي ليك متخليش الدار واولادك يعزلوك على العالم الخارجي ، لازم تختلطي بالناس
منقولش تضلي برا مي روحي عند اهلك واهل زوجك، اعرضي أهلك واهلو عندك
حتى لو الاولاد يقلبو الدنيا متخليش هاد الشي يعرقلك حياتك ، اتعايشي مع هاد الواقع واتأقلمي
احنا مين يجيو خواتاتي وولادهم تولي السيركيلايون فالدار ، الهرج ، العياط، البكاء، الفوضى
مي هدا جامي منعهم انهم يجيونا ولا احنا نقلقو منهم رغم اننا موالفين بالكالم
هدا وش ننصح اختي
​

 

[بنت الصحراء08]

رد: قعادي فالدار جيحني وعلملي التفنيين واش رايكم

معرفتش واش نقولك
ان شاء الله الاخوات المتزوجات يعاونوك
​

 

[رنيم الصمت]

رد: قعادي فالدار جيحني وعلملي التفنيين واش رايكم

السلام عليكم
وعلاش هاذ الخالوطة لي راكي عايشة فيها
خصك شوي ثقة في نفسك ..واش خصك الله يبارك عليك الف وحدة تحسدك على وضعك انسانة مثقفة ذات خبرة عندك دار و الاولاد يعني متحملة مسؤولية كبيرة استغنيتي على خدمتك و دراهمك على جال زوجك و اولادك شكون لي تقدر تقدم تضحية كيما هادي على جال دارها
رجعي ثقتك بنفسك كيما قالت ساندي ديري برنامج تشفاي لجدول التوقيت تاع الابتدائي ؟ ديري واحد كيما هو احكمي كراس و ابداي اكتبي ، قسمي اعمالك المنزلية على السمانة و على حساب وش يساعدك و ديري جدول شهري للماكلة ( الغدا و العشا و الفطور و القوتي اذا حبيتي ) باش متضليش تخممي وش ندير وش ندير بلا ما تنساي ديري اوقات لاولادك تدواشهم تقصري معاهم تحوسي بيهم ادا كنتي تخرجي الخ و متنسايش ثاني ديري وقت باش تروحي لاهلك و ناسك قال كل سمانة خصي فيها عشية تخرجي لوحدة من العايلة و هكدا و الحاجة لخرى اهتمي بنفسك من ماسكات لشعرك و لوجهك و ماكياج و لبس .... كلش بالتخطيط و تنظيم الوقت
اما حكاية اولادك لي مش يسمعولك و دايرين فوضى مديريش هاذ الموضوع هاجس و عقبة و فلت الامر من يدك لالا مزال تبقاي انت امهم و قادرة ترجعيهم خللي مدة شوي طويلة ايامات اضربي عليهم النح حاولي تتفاداي الهدرة معاهم وللا الزقا عليهم وقت حتى يستغربو و يعودو يقولولك اهدري معانا ثم بدلي السيستام معاهم كي يغلطو عاقبيهم كيما كانو يعاقبونا اهلينا اخطينا من علم النفس تاع هاذ الوقت راه مش عاجبني زاد هرد عقليات الذراري بكري كانو بضربونا و الرسول عليه الصلاة و السلام قالك (واضربوهم ) و كانو يبيتونا بلا عشا ومامتناش بالشر الحمدلله و ينحو علينا الحوايج لي نحبوها و معاها توييو وللا فلقة فوقها ههههه و لي تقتل الذراري و تخليهم يرجعو كي القطوطة كي تنايفيهم و ديري روحك مش تشوفي فيهم .. نشفى كنت صغيرة صحبتي تجيني تبكي تقوللي ماما مش تهدر معايا نقولها اضربيني بيتيني في صال دو بان و متنايفينيش هههههه
بالتخطيط و تنظيم الوقت قادرة تتحكمي في دارك و اولادك كلش بيدك انت متنسايش الناس يحكمو على الدار و الزوج و الذراري من المراة المراة هي كلش في الدار
و ربي يسهلك امورك و يجعل حياتك حياة هانئة:regards01:

 

[زهرة الندى]

رد: قعادي فالدار جيحني وعلملي التفنيين واش رايكم

السلآم عليكم ،،

كما قآلوا الاخوات قبلي
السبب هو الخجل الزائد ،، بلآكـ تكون عندكـ حشمة لا تغلطي في كاش كلمة ولآ مآ يفهموكش ناس كيمآ رآكي تقصدي وأيضآ عدم الإحتكاك بالآخرين

وانا مع كيمآ قآلولك تنظمي وقت وتزيري على روحك في لبداية برك وحتى أولآد - الله يبآركـ - رآح يتعلمو منكـ ويهداو بشويآ بمآ أنكـ من قبل نشيطة وحيوية مش رآح تجيك حاجة صعيبة ورآح تتخطآي المشكل بسهولة ان شآء الله

ربي يسهلكـ ويكون معآكـ خيتي
​

 

[حياتي ابداع]

رد: قعادي فالدار جيحني وعلملي التفنيين واش رايكم

صح اختي القعاد فالدار تجيح و أنا جربتها و الاخوات نصحوك كيفاه تتخطايها بصح أنا حابة نهدرلك على نقطة ربما راكي ناسيتها وهي الأولاد. أنتي يا اختي قارية و فاهمة و واعية و كي حبستي من الاختلاط فقدتي القدرة على التواصل فمابالك بالأولاد اللي راهم صفحة بيضة و جايين للدنيا إذا عودتيهم على عدم الاختلاط راح يجيوك خجولين و انطوائيين.
لازم تخرجي انتي و الاولاد تزوري الاقارب و تجتامعو في مصلحتك و مصلحة ولادك

 

[رقيقة المشاعر]

رد: قعادي فالدار جيحني وعلملي التفنيين واش رايكم

خوفتيني انا تاني نحوس كي نتزوج نحبس الخدمة
تضحية صعيبة قاع هكااا

 

[حياة هانئة]

رد: قعادي فالدار جيحني وعلملي التفنيين واش رايكم

شكرا للعضوات على المشاركة فقط حبيت ارد واضيف انا لست شخصية خجولة بالمعنى السلبي لاني منذ كنت اي ايام الدراسة والعمل كنت منطلقة وبالطبع لا انكر الحياء لني كنت ولا زلت انثى حيية المشكل اني احس بالضغط بسبب المسؤوليات الكبيرة ولا اجد لنفسي مساحة لانفس عنها او لابرز ذاتي عندي الكثير من التخطيطات لكن وقتي للاسف لم يعد ملكي بل قلما اجد ساعة ارتاح فيها

 

[حياة هانئة]

رد: قعادي فالدار جيحني وعلملي التفنيين واش رايكم

شكرا رنيم الصمت على المساعدة وحقيقة لقيت ما يفيدنا كثيرا

 

[nanoche]

رد: قعادي فالدار جيحني وعلملي التفنيين واش رايكم

مساء النور أختي وربي يجيبلك اللي فيها الخير
ههههه تعرفي واش ضحكني؟؟ انو عندك أولاد وعلى حساب الشوفة طايرين ربي يبارك كيفاش لسانك رجع ما يعرفش يحكي راهم نورمالمو سرحوهولك ههههه
ربي يشدلك فيهم وفي مول البيت
نصيحتي ليك عزيزتي ما تغلقيش على روحك لازملك تحكي مع الناس و شوفي كاش جارة قرعاجة تطلعلك لاميزاجوغ دايما ههههه..... والقعاد في الدار ماشي سبب طبيعتك الميالة للعزلة هي اللي راها خلاتك هاكدا ولازم تبدلي حياتك وتحطي لروحك بروgرام تتمشاي عليه
ربي يوفقك
​