بخصوص موضوع خطيبي تبدل عليا

[مشكلتي]

السلام عليكم
لم أستطع قراءة الردود بالموضوع الأول دون توضيح
بالنسبة للردود وأغلبيتهم يشوفوني معارضة الجلباب كاني كافرة
الحمد لله متحجبة وحجابي مش تاع خرطي وتاع بنات اليوم ، حجاب بكل المعايير لا سروال ولا حتى الحجابات الطويلة تاع درك
حجابي شرعي كامل الشروط متوفرة فيه ، الحمد لله ولديا رباونا من صغرنا انا واخوتي على الدين والطريق الصحيح
مشكلتي لما حجابي يتوفر على جميع الشروط علاش يقيدني بالجلباب خاصة اني لن أجدا راحتي به في مجال عملي
وبحكم اني مهندسة وتنقلاتي من هنا وهنا وخرجاتي اليومية تتحتم عليا نلبس حاجة تناسب عملي وأكرر حجابي شرعي ياناس
وأظن من يعرف جيدا مجال عملي سيفهمني يعني مجموعة اسباب تخليني ارفض الجلباب على الاقل في الوقت الحالي

لدلك لاداعي لتهجمات من الاعضاء ، حين وضعت موضوع طلبت النصح وليس ردود تنفر الشخص الدي طلب منكم المساعدة

لاتنسوو أن الكلمة الطيبة حسنة ، سلامي
​

 

[Perle Blanche]

رد: بخصوص موضوع خطيبي تبدل عليا

السلام عليكم
الصلاة و السلام عليك حبيبي يا رسول الله
شوفي حكاية التهجم هااذي انا شفتها مرات و درت عليها موضوع مي صراحة المثالية راهي دايرة رايها فالمنتدى
المهم انا في رايي مدامك مقتنعة الله يسهل عليه قبلك هكا عن اقتناع مرحبا مقبلكش الله يجيب الخير

مش مقتنعة بالجلباب مش مقتنعة يروح يخطب صاحبة الجلباب راهو ذركا موضة العصر و تاني بالألوان لي حبوهاا
​

 

[Salam Fleur]

رد: بخصوص موضوع خطيبي تبدل عليا

السلام عليكم اختي

انا مازال عند ردي ... خطيبك غلط باه انه يربط زواجكم بلبس الجلباب ... ياك عرفك من قبل وانتي لابسة حجاب علاه ماقالكش من الاول .... عاودي هدري معاه وفهميه وجهة نظرك ....... و ادعي ربي سبحانه يفرج عليك ..... و ربي مافيه غير الخير ​

 

[شمس الاصيل2]

رد: بخصوص موضوع خطيبي تبدل عليا

اختي الحبيبة العقد شريعة المتعاقدين و الزواج عقد من حقك تشرطي ومن حقو يشرط و من حقك تقبلي ومن حقك ترفضي و هدي حياتك انتي لتكونيها والدين ماهو لحية ماهو جلباب الدين مكارم اخلاق

 

[همس الوُرود]

رد: بخصوص موضوع خطيبي تبدل عليا

السلآم عليكم ~

قوليلي نوع حجآبك هذآ نقدر نهدر معآك متقوليش يتوفر على كل الشروط وهو أصلآ مآعلآبآلنآش نوعه ..

و عملك أيضآ ليس للفتيآت يعني التنقل من هنآ وهنآك عمل رجآل يآ أختي .. أصلآ المرأة يجب عليهآ البقآء في المنزل وإن عملت لآ تعمل في أمآكن الإختلآط

وأنتي كل مرة في بلآصة يآ أختي

أنآ مآنيش نقوللك رآكي ضد الجلبآب وإنمآ زوجك على حق كيمآ قآللك الجلبآب تلبسيه وهو مذكور في القرآن فكيف لآ تقتنعي به ؟؟


من حقو زوجك يحبك تكوني زوجة صآلحة مستورة في بيته يحميك ويخآف عليك و تكوني جوهرة ليه وحدو

تحيآتي ..
​

 

[وردة المحبة]

رد: بخصوص موضوع خطيبي تبدل عليا

السلام عليكم
اختي فكري جيدا وأعيد التحدث معه ،فاذا أنت لست مقتنعة وهو يريد ذالك ،فان لم تجدي حل ماعليك الا بفسخ الخطوبة
الأن أحسن من عقد الزواج وتكبر المشاكل
وحسب موضوعك لأول مرة هوأخبرك قبل الخطبة وأنتي قبلتي اذن الخطأ خطأك ولاتنزعجي مني ،فالأمور مثل هذه الحل الوحيد هو الفراق
والله اعلم
​

 

[Hakan]

رد: بخصوص موضوع خطيبي تبدل عليا

يعني السيد قبل بالعمل نتاعك اللي قلتي انو فيه تنقلات
وزيدي الحجاب نتاعك يناسب العمل نتاعك
ونضن الجلباب تاني عادي المهم الهدرة من الاخير ربي يكون معااك
ماهي مثالية مني نهار قتلك حجاببات نتاع خرطي او اني من النااس الصالحين لا يااختي
مي حرصا عليك وبااش ما تفرطيش في هذا الانسان
قادر نقلك واش دخلو فيك ونورمالمون ما يهدرش ولوكان جا راجل صح ما يوافقش اصلا على العمل نتاعك فمابالك
الجلباب مي راني قتلك شويا من عندك وشويا من عندو
يعنيي لوكان يقلك حبسي العمل ولا الجلبابب هنا اصلا رايحة تنساي مشكل الحجاب وفورا تقولي الجلباب
لانو حنايا طبيعتنا كبشر يتبعون هواهم لازم يحطونا في الامر الوااقع بااش نستقيم
المهم خيتي راني قتلك كلامي ومافيه اي تجريح من اي نوع
تحبي تفسخي خطوبتك تحبي تروحي تفهمي رااجلك بلي الحجااب نتاعك عادي اذا فهم بها ونعمة اذا ما فهمش شوفيلك اللي يطييحلك على القوسطو نتاعك انت ما راكي محتمة وهو ما راهو محتم عليك
واذا رايحين تحكو على الحب نضن هو ما يناقشك على جال جلباب وانت ماتشكي على جلباب ربي يهنيك سلاام..​

 

[{مُدَلَّلَتُهُ}]

رد: بخصوص موضوع خطيبي تبدل عليا

السلام عليكم و رحمة الله و بركاته

رجعت نشوف لردي في موضوعك نظن ماكانش فيه تهجم عليك مي اذا شفتي فيه أي نوع من التهجم السماح أختي رانا في العواشير

و الإخوة و الأخوات إذا قالولك حاجة راهي من عونك برك ! خافو عليك

شكون راهي تلقا ضوك ولد الحلال الي يدلها على طريق الحق ؟ احمدي ربي حبيبة و الله كاين وحدين مساكن طاحو في رجال جروهم للرذيلة جرا و مبعد جبدو رواحهم . كي تشوفيهم ولا تسمعي حكاياتهم تعرفي بلي راكي محظوظة بالراجل الي عندك ربي يباركلك فيه و تحمدي ربي عليه

شوفي روحك و شاوري والديك إذا هاد الجلباب ما ساعدكش حاولي بالتي هي أحسن أنك تقنعي خطيبك بحجابك أنك مستورة و أن حجابك مستوفي لكل الشروط !

مثلا قوليله إذا راك باغيني نزيد نطول الخمار مش مشكل بصح الجلباب ما يساعدنيش في مجال عملي . . . الخ

ربي يسرلك الي فيها الخير شاوري عقلك مليح ما تشوفيش برك لجانب واحد شوفي للموضوع من كل الجوانب و استخيري و ان شا الله ما يكون غير الخير


​

 

[لؤلؤة قسنطينة]

رد: بخصوص موضوع خطيبي تبدل عليا

السّلام عليكم
ختي لعزيزة , راكي قلتيها بنفسك نتي جيتي تطلبي النصيحة
يعني تسمعي للآراء كامل بإيجابياتها وسلبياتها
اذا كنتِ جاية تطلبي النصح وتستناي نقولولك راجلك غالط و عندك الحق تفسخي الخطوبة
يسما هنا سامحيني ختي ماش جاية تطلبي النصيحة, جاية تسمعي كلام يناسبك
حنا من واجبنا كأهلك هنا داخل اللمة ننصحوك بلي نشوفوه مناسب ونتي تميزي بين الردود وتاخدي النصيحة
وماش معناها ندعيو المثالية , لما قتلك كن جيت في بلاصتك نفرح لأنو راجلي طلب منك الجلباب راني نقصدها صح
خاطر درك يحبلك راجل يجي يقولك يا طفلة حابك تتستري من العيون الشيطانية
مارانيش نكدب ولا نزيد فيها ولا نبين روحي راني ملايكة, انا منا لغدوة معرف اذا نبات وربي راضي عليا ولالا
هادي دنيا وهادا شيطان
وكيما قالتها ختي lovely smile حنا ماتهجمناش عليك ولا قلنا كافرة, راكي لابسة حجاب شرعي الحمد لله ربي يكملك
بصح لو لبستي جلباب رايحة تتقدمي خطوة للأمام هادي هيا نصيحتنا, ونتي في الموضوع السابق مابينتيلناش
نوع العمل تاعك, قلتي راجلي فرض عليا الجلباب وخلاص, اكيد حنا نقولوك ديريه
شوفي ختي لعزيزة حنا ناس شافو مشكلة وجاو نصحوك كأخت وكأخ, عجبتك النصيحة تاعنا معليش ديري الجلباب كسترة
باه تربحي دارك وتربحي عند ربي
واذا ماش حابة حاولي توصلي فكرتك بلعقل واذا ماوصلتش راكي حرة تفسخي الخطوبة
انا قدمتلك رأيي ونصحتك كأخت, وكن جات ختي لي هدرت معايا نجاوبها بنفس الطريقة
درك نتي شوفي واش يناسبك
واعتذر على الرد السابق, ربي يهنيك ​

 

[الباندي]

رد: بخصوص موضوع خطيبي تبدل عليا

اختي من كفرك و اخرجك عن ملة الاسلام من ؟ لم الحظ اي رد فيه تهجم ممكن نقول قسوة بعض الشيئ هنا اتفق معك ..فبعض الاعضاء لديهم اسلوب حاد في بعض المواضيع ..و انا منهم الحقيقة لذا اعذرينا اختي الكريمة ..بالاضافة الى اننا كبشر مختلفين في كيفية التعبير و في طريقة الكلام ...اكيد لن تسمعي مايرضيك...

اعبت عليك شيئا .. قلتي لم تكملي قراءة الردود صدقيني يوجد اعضاء لهم نصائح قيمة جدا ..مع التاكيد كما قالت اختي اللؤلؤة القسنطينية حفظها الله نحن لا ندعي المثالية و لا نملك الحقيقة المطلقة فنحن بشر مثلك نتاثر و نقع تحت الضغوطات و كثيرا ما نتيه ...و نقع في اخطاء بالجملة .
...فكان الاجدر الاستماع او قراءة الردود ومن ثم تؤخذي الذي يعجبك و تتركي ما لا يعجبك ..
ثم ان تعقيبك لم توضحي شيئا بل اكتفيت بانك تعملين فقط في مجال الهندسة يعني كثيرة التنقل بين مكتب الدراسات او المؤسسة التي تعملين فيها ورشات البناء على حسب علمي حسب اعتقادي و الله اعلم ان الجلباب لا يعيق عملك ابدا..سواءا كنت مهندسة معمارية او مهندسة مدنية

ليس الجلباب من يعيقك بل تفكيرك على مااظن هو من يعيقك !!

اجلسي مع زوجك جلسة صريحة ووضحي له قناعتك و بيني له مبادئـك و اسبابك للرفض و هو ايضا يعطي ماعنده و يوضح لك لماذا فرض عليك لبس الجلباب مع ان اسبابه واضحه لانه و الله اعلم حسب ماذكرتي في موضوعك الاول ان اهله يلبسون الجلباب و هنا تقصدين امه و اخواته ..اي انها عائلة ملتزمة محافظة جدا جدا فيريد ان تكملي حَبَة العِقُد المتبقية و تنظمي الى عائلته بجلبابك ايضا بالاضافة الى اسباب اخرى ..(مجرد تخمين فقط )
---
ربي يقدر الخير اختي و يرشدك الى الطريق الصحيح.و انا نتمنالك من هذا المنبر يتم زواجك بخير و يجمع بينك و بين زوجك تحت سقف واحد و تزول كل العقبات و المشاكل ...لا ان تصل الامور اذا سمح الله الى فسخ الخطوبة
----
اذا كان ردي السابق ازعجك و رايت فيه ما يسيئ اليك فانا اعتذر اليك​

 

[جليلوس]

رد: بخصوص موضوع خطيبي تبدل عليا

السلام عليكم
اختي الكريمة لم ارى موضوعك السابق لكنني احيطك علما مامن تهجم فقط من قسى في كلامه فذلك في صالحك ليس الا
يالوكان ماننصحوكمش ونرشدوكش ... واش تقولي ماهمدش دايينها فيا ؟؟
ياخي هاكا ... ربي يهديك اعيدها واكررها ... ماكاش تهجم كل ذلك لمصلحتك وانت ادرى بها
اما فيما يخص موضوع الحجاب ... يااختي راكي تقولي شرعي وبكل معنى الكلمة ... يعني حاب نفهم حاجة واش ماعجبوش خطيبك
راني معاه في حاجة ياخي حاب يسترك وجلباب مش عيب المهم تكون بيناتكم مودة ورحمة هادا الصح في العشرة
حاولي تتفاهمي معاه غير بشوي ... ممكن ماعجباتوش تنقلاتك بين الحين والآخر كما تفضلت في قولك انك مهندسة ...ربي يباركلك في عملك... لكن من حقو يا سيدي راح يكون اب لأولادك ولا عندك فيها راي آخر هادي ؟؟
المهم ربي يفتح عليكم ويكمللكم بالخير ان شاء الله ...
عليك بالإستخارة وان شاء الله لي فيها الخير ربي يجيبها
تحيتي
​

 

[GI Joe]

رد: بخصوص موضوع خطيبي تبدل عليا

ook srali kifek, kount haba ndir jelbab mais mama mahabetch gatli yginik mba3da fi khademtek w terrein ...
normalment kima mama 9an3etni beli hakda thani rani masstoura w bien t9an3i l fiancé ta3ek ntia

essemhili ntom tchokitou men nssahom dayrin l jelbab dnc hna thani on a le droit netchokew menkom w m la façon d pensé hadi

ki demandi un avis ya9der ykoun positif w ya9der ykoun negatif