كي ضاقت بيا واتقفلت في وجهي وضاق صدري وضلامت بين عينيا
قتلو ياربي راني بين يديك .. نتا لي خلقتني ونتا لي جبتني للدنيا ومصيري نرجع ليك
راني بين يديك اي حاجة تجيني قابلتها وواش يصرالي راضية بيه في النهاية راني كي ورقة الخريف
نتمايل من جهة لجهة وتديني رياح الايام يمينا وشمال
وربي سبحانو ماخلانيش .. ماضيعنيش .. مانسانيش .. ماطيشنيش
خممت بيني وبين نفسي وقلت لما تروح لمكان معين مستشفى ولا شركة ويقولولك فلان راهو حاكم مركز مليح تما
روح ليه برك ويفريلك امورك، تروح ونتا مهني ونتا فرحان ومتأكد مائة بالمائة أنو كل امورك مقضية
فمابالك بالله سبحانه وتعالى رب السموات والأرض .. هو لي خلقك هو لي خلقلك هاد القلب لي يوجع فيك
احيانا تحكم ورقة وتخدم بيها شكل هندسي ولا حاجة باهية تخبيها مدى الحياة وتحب خدمتك وصنع يديك
فمابالك بربي سبحانو لي خلقك ولي سخرلك الارض والحيوان وكتبلك رزقك ويغفرلك كل ماتذنب
كيفاه القلب هادا لي خلقو هو سبحانو مايقدرش يداويه بعدما مرض؟ ما يقدرش يريحو بعدما تعب؟
دموعك لي تنزل طول الليل .. النوم لي طاير من عينيك .. التنهدات لي تتنهدها كل ثانية
الظلام لي يحارب فيك من كل جهة .. في رايك ربي يرضالك هاد الشي؟ ورايح يخليك في هاد الازمة؟
هو لي مهما نذنبو يعطينا الفرص .. حتى ونتا تذنب وتدعي ربي يسهلك من جهة خلاف يسهلهالك ويحققلك واش في بالك
يعطيك فرصة تخمم مع روحك .. يعطيك فرصة تحشم من نفسك ومن افعالك خاطر الكرم تاعو ومحبتو أكبر مما تتوقع
دار في راسي بزاف كلام ولقيت روحي تافهة قدام رحمة ربي سبحانو
لقيت روحي تافهة خاطر كيفاه نحزن وكيفاه نعذب قلبي وكيفاه حطمت قلبي من كثرة البكاء وربي كاين
نوض في الليل نلقاه يستناني نشكيلو .. نوض على 5 نلقاه يستناني نبكيلو .. على 12 تاع النهار يستناني نشكيلو
على 5 تاع لعشية يستناني باه يسمعلي .. على 10 تاع الليل يستناني باه نفرغ قلبي ليه
ماش في كل ساعة وماش في كل دقيقة بل في كل ثانية وفي كل لحظة ربي معايا ويسمعلي ويخفف عليا وينزل رحمتو على قلبي
وانا لي ضعفت ويأست وربي لي خلق هاد القلب بجنبي ويسهلي كل اموري
مالقيت مانقول غير شكرا لك يارب .. لو ندير حسنات حياتي كاملة مانلحقش قد جزء وقد ذرة من الرحمة لي راك تنزلها على قلوبنا
ألف حمد وشكر لله ..
-آسفة لكتابتي باللغة العامية .. ما لقيتش اصدق من هاد الكلمات لأنو رافقتها الدموع والله-
~لؤلؤة قسنطينة~
