السلام عليكم و رحمة الله تعالى و بركاته
اليوم حبيت نحكيلكم على المولد النبوي الشريف كيفاش كان بكري
الله يبارك كانت النية و الاخلاص كانو بكري ينوضو الرجال بكري يروحو يقضو و يشرو الدجاج و الخضرة و كل ما يلزم لهاد اليوم المميز و النساء فالدار يوجدو الطعام ولا الرشتة ولا الشخشوخة و يوجدو بسبوسة و القريوش للسهرة
و الا كانو الخاوة يسكنو قراب من بعض يتلمو في الدار الكبيرة عند الوالدين و ممكن يجو شوية من الاهل مثلا العمة او الخالة......
يتعشاو كامل مع بعض وش من قصرة وش من ضحك و كانت لومبيونص كبيرة
وبعد العشاء الرجال يروحو للجامع يصلو و يقعدو يقراو القرآن و لي يروح للقهوة يقصر مع احبابو
اما النساء لي تغسل الماعن و لي تكنس و لي تخمل كامل مع بعض و وحدة ما تقول انا خدمت ولوخرا راهي قاعدة
بعد هذا كلو يجو الجيران و يتلمو فالساحة تاع الدار على الطابلة تع لاتاي و الكاوكاو و اللوز و القريوش و البسبوسة و يديرو الحنة للبنات الصغار و هما فرحانات و كانو يديرو العاب مي ما شفيتش وش هما و كانو البوقالات يعقدو و ينو الله الله
اما الاولاد الذكور كانو يخرجو للشارع يلعبو مع بعض و يطرطقو محيرقة و زوج ماشي كيما ضرك تقول الحرب الله يستر و كاين لي يروح مع باباه يقرا القرآن و كامل فرحانين
و الله كاين فرق كبير بين المولود تع بكري و تع هاد الاعوام بكري كانت عندو بنة سبيسيال اما الان كل واحد في دارو و المحارق لي يشوفهم يتباعو تقول رايحين يحررو كاش بلاد و يديرو منافسة شكون لي يشري كثر و شكون لي يطرطق كثر
و لوكان تقولو هادوك الدراهم اديهم صدقهم على المحتاجين و لا طيب طعام و لا رشتة وصدقها تدي اجرها يقولك ما عنديش
ربي يجيب الخير و خسارة يامات زمان ما يولو و ناسها الزينين ما يولو
اتمنى ان يعجبكم موضوعي
تحياتي للجميع
