أغرآض تجنبيهآ في جهآزك {موضوع تجميعي}

[الورد الأحمر]

السلآم عليكم ورحمة الله وبركاته
---
عضوآتنآ وعروسآتنآ الكريمآت أهلآ وسهلآ بكن
كذلك أهلآ بالزآئرآت ونتمنى انضمآمهن ~

الموضوع مبين من عنوآنو وكشرح أكثر للموضوع:
هو كموضوع لتبآدل التجآرب خآصة من المتزوجآت أو المقبلآت على الزوآج
وهو يخص جهآز العروس الذي تحضّره قبل الزوآج ... ~

بزآف مآ نصآدفوآ بنآت حديثآت الزوآج يحكو على الجهآز ونآدمآت على بزآف
أمور شرآوهآ وخسرو فيهآ مصروف وبعدهآ تطلع هذي الأمور غير مهمة ومآ
تستعملهمش ويروحو خسآرة ولآ تكتشف أنو لي قآلولهآ اشري هذيك الحآجة
جرو عليهآ وكآن المفروض مآ تشريهآش ... ~

يعني لي تلقآهآ ندمت لي كثرت من لفرآش ولي ندمت لي كثرت من الكوسميتيك
وهكذآ كل وحدة على وآش ندمت ... ~

دونك أكيد أنتي كمخطوبة ومقبلة على الزوآج وانتي كمتزوجة ديجآ ولآ أنتي كمستعة
طحتو ربمآ في الموقف هذآ ولا سمعتو على أمور قآلوآ عليهآ أتجنبوهآ ...~

في الموضوع هذآ نتبآدلوآ الخبرآت في المجآل هذآ وننصحوآ بعض من الجآنب هذآ حتى
الوحدة مآ توقعش في غلطة عملوهآ بنآت قبلهآ وتخسر درآهمهآ على أمور مآ تحتآجهمش
وإلا مآ كل وحدة تكون عندهآ ملآحظة وممكن تفيدنآ بيهآ ... ~

دونك نتمنآو تتفآعلوآ معآنآ ونكسبوآ خبرآت من بعض :love01:

وربي يهني كل وحدة ويكمللهآ بخير ولي مآزآل مآ جآش نصيبهآ
ربي يطيحهآ في ولد لحلآل لي يسترهآ ويصونهآ ~

تحيآت طآقم الإشرآف :love01:

​

 

[الحلم الوردي]

رد: أغرآض تجنبيهآ في جهآزك {موضوع تجميعي}

يعطيك الصحة اختي نور
لي عودة ان شاء الله
​

 

[آمِيْرَتُه]

رد: أغرآض تجنبيهآ في جهآزك {موضوع تجميعي}

السلام عليكم
موضوع مليح راح يفيد لبنات
إن شاء الله المتزوجات يفيدوهم

 

[¬Đỉaмơŋđ ✿]

رد: أغرآض تجنبيهآ في جهآزك {موضوع تجميعي}

وعليكم السلآم ورحمة الله تعآلى وبركآته

موضوع مهم وكيما قلتِ نسمعو بزاف من المتزوجات كي تتخطب وحدة يبداو ينصحو فيها أشري هاذي وبالاكي من هاذي ووو تتزوجي وتطيشها تشبع بيها غير الخزانة ووغيرها.
إن شاء الله يفيدونا المتزوجات أكثر بحكم تجربتهم هكذا مانوقعوش في نفس الأخطاء.
يعطيكم الصحة على الفكرة.

في المتابعة

​

 

[ملكًة الاحسآس]

رد: أغرآض تجنبيهآ في جهآزك {موضوع تجميعي}

وعليكم السلآآآم
والله طليتي على قلبي بالموضوع هدآ
من نهآر يسمعو بالطفلة تخطبت تبدى كل متزوجة بنصآئحهآ
وحده تقولك مآتديش هدي ولوخرى تقولك والله تندمي عليهآ مآلبستيهآ نهآر
تزيد تدخل الثآلثة على الخط آآو مآتديري كيفي ديت وكثرت فينآلمون مآلبست وآلو
حرنــآ وآش نديو ووآش نتجنبوو ، وبموضوعك هدآ رآيحة تعآونينآ بزآآف
ان شاء الله لكل متزوجة دآت حآجة وصح لقآت روحهآ صرفت درآهمهآ فيهآ بآطل تنصحنآ
يعطيك الصحة على الفكرة ، في المتآبعة ان شاء الله
​

 

[iman-dz4ever]

رد: أغرآض تجنبيهآ في جهآزك {موضوع تجميعي}

موضوع هايل في وقتو انا وحدة منهم كل وحدة في فاميلتي متزوج حكمتني وحدي و عطاتني ليست بصوالح لازم نديهم و حوايج لالا حرت
​

 

[ام أمينة]

رد: أغرآض تجنبيهآ في جهآزك {موضوع تجميعي}

مشكورة على الموضوع

نصيحة برك لي راهم يجهزو الزواج ماشي لبسة و ذهب و قش .....شوفو للزواج السلبيات قبل الايجابيات
انا من رايي الوحدة تدي قيسها لان الحوايج مش رايحة تلبسهم في يوم واحد و الفراش مش رايحة تفرشيه و لا تتغطايه في يوم واحد و كل واحد له وجهة نظر
​

 

[السلطانة]

رد: أغرآض تجنبيهآ في جهآزك {موضوع تجميعي}

وعليكم السلام

أول حاجة ننصحكم بيها القش تاع المناسبات بلاكو تكثرو منو
أنا الحاجة لي ندمت عليها اني عملت تصديرة وكون غير كريت كان افضل ليا
بما اني من ولاية وتزوجت في ولاية اخرى هذا الشي اثر عليا يعني معنديش عراس خلاص تقريبا ويروحو عليا العراس في ولايتي ومنحضرش ..
وصدقوني من غير عرس واحد مازدت لبستها وراهي في الgاردر روب
صح تديرو اللباس التقليدي تاع ولايتكم لي ماتروحش لامود تاعو
مي بقية الملابس غير متكثروش شوفو الحاجة لي متروحش لامود تاعها
انا نفسي كونتر الازياء الغالية لانها مع الوقت تروح لامود تاعها وتلقاي روحك خسرتي بلافايدة
وتلقاي روحك خيطتي الجديد وطيشتي القديم وهاذي طبيعة المرأة للأسف.
النصيحة الثاني هي :
اذا كنتي رايحة بدارك وحدك زينة وماباهي
مي كان عدتي رايحة لدار الشيخ وعندك شومبر وحدة غير ديري حسابك
لاشومبر ماهيش راه تهزلك كامل واش ديتي وتصبحي ترجعي فيهم لداركم :tongue02:
مثلا لبساطاطات تاع الصوف والبونج والزربية كان لاشومبر تاعك صغيرة متقدريش تفرشيها وتبقاي مروليتها وحاطتها بور الباب تديرلك الفوضى
وكاين تاني كيما لي يديو صالون ماروكان وتبقاي مخبيتهم ومضيقة عليك
ادي قيس دارك ولالاشومبر تاعك وخمي وين تخبي من مباعد
وزيد مع الوقت القش ماشي راح يهرب
راه يتبدل ومود تروح ومود تجي ماتجي تخرجي بدارك وحدك تلقاي لي ديتي فاتت لامود تاعو وتحبي تبدلي من جديد :tongue02:
هيا نتمنى نكون فدتكم
وربي يهنيكم


​

 

[iman-dz4ever]

رد: أغرآض تجنبيهآ في جهآزك {موضوع تجميعي}

نصائح هايلين ام ياسمين سيرتو نتاع التصدير نحير في الي تشري قنادر تصديرب ملايين باش من بعد تخبيهم في الخزانة انا راح نكري ان شاء الله من غير النايلي الي نشريه فقط و قفطان سامبل برك وزيد الكوسميتيك شحال شفت بنات يدو كوسميتيك قيمة ما يحلو بيه حانوت و صوالح راح تفوت مدة صلاحيتهم قبل لا نستعملهم حرام تبذير و زيد راح ندير فكرة سمعتها وحدة مدولها مهر عشر ملاين وكامل اهلها قالولها قليل و مايديرولك والو ايا هيا قبل لا تصرف المبلغ نحات منو مبلغ تصدقت بيه للجامع ايا ربي طرح فيها بركة دارة مضرب روعة و بلا مازادت حتى دينار كفاها المهر و كل الناس حارو فيها الله يبارك ان شاء الله نطبقها
​

 

[الورد الأحمر]

رد: أغرآض تجنبيهآ في جهآزك {موضوع تجميعي}

السلام عليكم

شكرا أم ياسمين عالنصائح يعطيك الصحة
أختي iman-dz4ever سي فغي شفت بزاااااااااف بنات يدو الكوسميتيك تاع لعجب احنا رانا نشريو للاستعمال اليومي بواط تبقالنا قرن كون ما نملوش منها ونطيشوها ما تفضش وما فهمتش علاه يدو الشي هذاك كامل كون حتى جا هالشي لي يليق غير ألوان وتبهريج وما يستعملو منها والو وكلها ماركات والله واحد ما سمع بيهم الديشي الكل يحطوه في وجهم .. عن نفسي نفضل نشري بواط ولا زوج وماركة معروفة وأصلية على نشري 10 وكلهم ماركات يتجربو في وجهي ولا في جسمي ونحكي على المكياج ولا البارفانات ولا حتى اللوشن المعطر للجسم هذو كامل الوحدة تدي منهم لقليل للاستعمال في اللول خاصة إذا رايحة تسافر ومن بعد كي ترجع منين رايحة تسكن يخي كاين محل كوسميتيك كومام ؟؟ وتشري منين يفضولها ... والله ولينا كي نشوفو واش يشرو نتخيلو بلي سمعو بلي رايحة تتقطع الدعوة دونك يخبيو ما بين ما تتحل الأزمة !! شوية كومام الوحدة ما تكونش مخلوعة والله تدي حاجة عليها القيمة خير من تدي ألف حاجة ديشي .

 

[@R@ZIK]

رد: أغرآض تجنبيهآ في جهآزك {موضوع تجميعي}

السلام عليكم
يعطيك الصحة اختي موضوع شباب ومفيد
صح عندكم الحق الكل ولى يشكي من بعد العرس ما لبسناش وندمنا لي دينا كلشي
انا مثلا اختي كي تزوجت سمانت بزاف حاجة ما ولات تجيها
كرهت كل ما تجي تقيس حاجة تلقها ضيقة
نصيحة لي تخيط ومام تشري طالع لازم دايما دير حساب الزيادة 2 سنتيم
بلاك تسمان اوموا تحل شويا الخياطة وتستغل اللبسة ديالاها
شكرا على الموضوع
تحياتي​

 

[نبض الحياة]

رد: أغرآض تجنبيهآ في جهآزك {موضوع تجميعي}

السلام عليكم ورحمة الله وبركاته
يعطيك الصحة نونوغاا على الفكرة
والله ديما توووووp بافكارك حبيبتي
بالنسبة اللي شفته في عروسات لافامي نتاعي
كاين اللي كثرو الفراش ولقات لاشومبغ ضيقة حتى رجعاتو
وكاين اللي كثرت قش الجهاز وبقا في الخزانة الغبرة تاكل فيه
ماما ديما تقولي العروسة لازم تكثر برك مت حوايج الدار اللي يلتبسو كل يوم
اما الباقي غير زيادة عليها ويجي مع الوقت
والحوايج راهم متواجدين كل يوم يعني البنت ماشي رح تشري لجهازها وتحبس لا لا
امااذا كانت العروسة رايحة لدارها تحول هاجوح وماجوج ومعليهاش ههههه
الاساس هو الهنا وراحة البال بزاف بنات نعرفهم ياما داو معاهم بازارات ورجعي بيهم لبيوت والديهم !
واش الفايدة من هاد الشي كل .....
ربي يهنيكم حبيباتي ^^

 

[فيتامين سي]

رد: أغرآض تجنبيهآ في جهآزك {موضوع تجميعي}

موضوووووووع مليح بزاف ربي يخليك حنونة
انا مرة في الفاسبوك درت موضوع قلتلهم واش هي اكثر حاجة ندمتو عليها في جهازكم كل التعليقات كانت انه كثرو تصديرة و صبابط تصديرة و من بعد مستغلوهاش و كانت نصائحهم بلي يكرو احسن مي تديرو زوج لبسات ليك ولا 3 برك تحبي تزيدي كري و من بعد كلش يخرج و تندمي باطل

 

[الورد الأحمر]

رد: أغرآض تجنبيهآ في جهآزك {موضوع تجميعي}

السلام عليكم
يعطيك الصحة اختي موضوع شباب ومفيد
صح عندكم الحق الكل ولى يشكي من بعد العرس ما لبسناش وندمنا لي دينا كلشي
انا مثلا اختي كي تزوجت سمانت بزاف حاجة ما ولات تجيها
كرهت كل ما تجي تقيس حاجة تلقها ضيقة
نصيحة لي تخيط ومام تشري طالع لازم دايما دير حساب الزيادة 2 سنتيم
بلاك تسمان اوموا تحل شويا الخياطة وتستغل اللبسة ديالاها
شكرا على الموضوع
تحياتي​

وعليكم السلام
والله يا اختي انا تجيني ماشي قضية تزيد 2 سم في لحساب تبانلي الوحدة ما تكثرش أصلا من حوايج التصديرة على خاطر شفت بزاف بنات من بعد ما يلبسوهمش يحسوهم كي شغل ديمودي ويحبو يشريو حاجة جديدة يروحو بيها مازلت نشوف غير شوية مخلوعات تلقاهم يهزو لافاليز كيما راها ويروحو لعرس ويعادو يتصدرو في عراس الناس كي شغل محرومات وكون حتى داك الشي ولا ديك الحطة كلش حوايج هك نسوي تحسيهم في عمرهم فوق 40 سنة ... تبانلي الوحدة تدير الحاجة لي تكون متأكدة منها أنها تزيد تلبسها وإذا كانت من النوع لي ما تحبش تعاود تلبس الحاجة ما تكثرش وخلاص .
مغسي عالتفاعل .

 

[الورد الأحمر]

رد: أغرآض تجنبيهآ في جهآزك {موضوع تجميعي}

السلام عليكم ورحمة الله وبركاته
يعطيك الصحة نونوغاا على الفكرة
والله ديما توووووp بافكارك حبيبتي
بالنسبة اللي شفته في عروسات لافامي نتاعي
كاين اللي كثرو الفراش ولقات لاشومبغ ضيقة حتى رجعاتو
وكاين اللي كثرت قش الجهاز وبقا في الخزانة الغبرة تاكل فيه
ماما ديما تقولي العروسة لازم تكثر برك مت حوايج الدار اللي يلتبسو كل يوم
اما الباقي غير زيادة عليها ويجي مع الوقت
والحوايج راهم متواجدين كل يوم يعني البنت ماشي رح تشري لجهازها وتحبس لا لا
امااذا كانت العروسة رايحة لدارها تحول هاجوح وماجوج ومعليهاش ههههه
الاساس هو الهنا وراحة البال بزاف بنات نعرفهم ياما داو معاهم بازارات ورجعي بيهم لبيوت والديهم !
واش الفايدة من هاد الشي كل .....
ربي يهنيكم حبيباتي ^^

اهلا روكا منورة حبيبتي
شفتي لعمايل لي يديرو فيهم لبنات ؟ وزيد خساير برك والله ونص من الشي لي داروه يروح في البوبالة حاشاك ولا يتصدقو بيه ولا يبقى مكنّز يرجع مع الوقت يليق في المتاحف
الوحدة تكثر تكثر مرات والله ما يكفيهم الوقت باه يلبسو كامل التصديرة ... عندها الحق امك الوحدة تكثر من القش تاع الدار اليومي أكيد تحتاجو ما تبقاش تسنى في الحاجة تشيح باه تزيد تلبسها ولا تكثر من القش تاع برا تاني باه ما تبقاش لاصقة في نفس الحاجة ومش معناها بعد تدير لعجب على خاطر السيزون ليه ليه تفض ويتخباو والعام لي بعدو أم يبانولها ديمودي ههه دونك الوحدة تدير كلش بحدود من ناحية القش أما من ناحية لفراش بزاف رجعو بيهم لدرهم ولا كدسوهم فوق لخزانة ما كسبو منهم والو من غير بشعو المنظر تاع لاشومبغ !
بالنسبة ليا لي رايحة بدارها معليش تكثر لفراش ينصاب مي لي رايحة تترص مع دار حموها تهني برك روحها مي تلقى كل وحدة تتخلع غير ما تتخطب من بعد تندم كون الدراهم لي خسرتهم على هذوك الشايات لي بقاو مكدسيهم استخدمتهم في أمور خلاص كون أي خير .
وربي يهني كل وحدة ويكمللها :love01:

 

[الورد الأحمر]

رد: أغرآض تجنبيهآ في جهآزك {موضوع تجميعي}

موضوووووووع مليح بزاف ربي يخليك حنونة
انا مرة في الفاسبوك درت موضوع قلتلهم واش هي اكثر حاجة ندمتو عليها في جهازكم كل التعليقات كانت انه كثرو تصديرة و صبابط تصديرة و من بعد مستغلوهاش و كانت نصائحهم بلي يكرو احسن مي تديرو زوج لبسات ليك ولا 3 برك تحبي تزيدي كري و من بعد كلش يخرج و تندمي باطل

أهلا أختي منورة
ايه الكل يشكو من قش التصديرة يكثرو يا اختي بزاف وتلقاي منهم غير زوج ولا باهيين والباقي والله خرطي وخسارة الدراهم برك نبقى نشوف معاهم وفي قلبي نقول كيفاه عجبتهم روحهم هك !! الصبابط يبانولي ينصابو إلا إذا كانو هذوك لي يجيو بلي perles كاين لي يدهشو فيهم هذوك ليه ليه يديموداو وفي وقتهم وماشي باهيين ... موضوع الكرية مليح مي تاني ما تقدريش تتكلي عليه كوم مرات ما تلقايش لي مودال لي انتي حابتهم وماشي ديما تلقاي لاطاي تاعك تاني وزيد فكرة انهم ملبوسين ديجا وحدها تحبطلك لعزيمة ... دونك ماكانش كيما الوحدة تتصدر في شوية حوايج ما مليحاش الوحدة تتورا بزاف على والو ... تقدر تدير الستايلات المعروفين دزيري كابيل باغباغ وصواغي وقفطان وتربح مي البانيت يظلو يديرو في لقنادير والله يجيو يعيفو ... المهم في اللخر كلش يديمودا ويبقاو على وجها كان لبستهم تجي ضحكة وكان طيشتهم اسمهم خسارة على والو ... ربي يهديهم تاني لبنات تاعنا يوخذو والديهم ما يجيو يروحو لدار راجلهم ... وربي يهني كل وحدة ومغسي عالتفاعل حبّوبة :love01:

 

[ام ريحانة16]

رد: أغرآض تجنبيهآ في جهآزك {موضوع تجميعي}

ماشاء الله ااخواتي نصايح هايلين
انا نقول الشيء اذا زاد عن حده انقلب الى ضده حتى حاجة متكثري منها
وامبعد تشري واش تحتاجي
اكيد كل وحدة تتاثر بكلام الاخريات مشريتيش متديش
لكن كل وحدة تحسب على حساب وين رايحة ومبارك للجميع

 

[ازهار الربيع]

رد: أغرآض تجنبيهآ في جهآزك {موضوع تجميعي}

موضوع قيم
شكراااااا لكن

 

[تـريـــاق المحـبـة]

رد: أغرآض تجنبيهآ في جهآزك {موضوع تجميعي}

يعطيك الصحة اختي نور
لي عودة ان شاء الله مشكورة على الموضوع وعلى النصائح صحيح كاين الي يدوا اكثر مما يحتاجوا​

 

[آمِيْرَتُه]

رد: أغرآض تجنبيهآ في جهآزك {موضوع تجميعي}

السلام عليكن
أين أنتن بنات ؟
للرفع