تعدد الزوجات مبتغى الأزواج

[فعل الخير غايتي]

السلام عليكم و رحمة الله تعالى وبركاته

مساء الخير يا لحباب هاو واش حوالكم لباسا ؟؟

الموضوع باين من العنوان و لي هو تعدد الزوجات
اغلب الرجال حابين ضروك يزيدو يتزوجو كل واحد شا عندو لبروف لمرته باش يعاود بالتالية
علبالنا بلي الشرع حلل اربع زوجات بصح الوقت لي رانا فاه غلات لمعيشة ياسر و اذا عاود اتسمى مرته لولى رح يفرط فاها ياسر و يتوله غير لجديدة
و الله هي كل واحد كيفاش يشوف هذا الشيء
حبيت نعرف رايكم في هذا السوجي بالذات

سؤالي موجه للشباب بصفة خاصة زعما تقدر تعاود تزوج على مرتك ؟ و زعما قادر توفق بينهم ؟؟
و الوقت لي رانا فيه يسمحلك باش تقيم التعدد ؟؟
ولا تفضل زوجة واحدة و تكون وفي لاها و وفية ليك و خلاص


ان شاء الله منكونش ثقلت عليكم
و سلامي حار نبلغو ليكم و لناس الشرق لعزاز على قلبي بزاف

​

 

[لؤلؤة قسنطينة]

مساء الانوار حبيبتي ان شاء الله احوالك بخير؟
بارك الله فيك على الموضوع وبالرغم من أنو الفئة لي موجه ليها السؤال بكثرة هي فئة الشباب
لكن حبيت نشارك ولو بكلام قليل
فيما يخص تعدد الزوجات باه نتكلمو بصراحة شاب اليوم مسكين راهو يخدم الليل مع النهار غير باه يوفر
زوج دورو ويجيب مرأة وحدة (1) رقم واحد هاداك راهو لازملو شقاء فمابالك بـرقم 2 و3 هههه هادو جدول الضرب وياربي هههه
خاطر شاب اليوم راهو يخمم في الدار ولا في الكراء وزيد المهر وخدمة تكون مناسبة ومعرف لاكان يقبلو بيه
يعني زوجة واحدة وبالسيف خلي يا 2 ولا 3، ربما الفئة لي تقدر دير تعدد درك في وقتنا هوما الرجال لي فايتين الاربعين يعني بين الاربعين
والخمسين خاطر دار الدار ودار مستقبلو وولادو كبرهم فرغلو الجو وزيد المجتمع يساعدو على ذلك من ناحية ارتفاع نسبة العنوسة
وانتشار فئة الناس لي تبيع بناتها بالدراهم، يعني درك وحدة يجيها حتى ولو راجل متزوج يكون حاكم بوسط مليح وسيارة ودار مليحة
توافق بيها بوالديها وبجيرانها هههه قادر حتى يزوجو زوج خواتات مع بعض ههههه وحتى ولو كانت بنت العشرين واكيد بدون تعميم
يعني هادا رأيي على العموم ونخليو الراي للبقية وللشباب بالاخص
شكرا على الموضوع غاليتي
تحياتي
​

 

[Mustapha Bita]

وعليكم السلام

انا تاني عندي بعض الاسئلة ليهم
لمادا تعدد الزوجات
ومالفائدة
هل كل مراة وكيف هي
وان كانت كل مراة وكيف هي
لمادا من الاول لم تختر صاحبة المواصفات التي تريدها
ولمادا يحق للرجل بالتعدد بدون مراعاة مشاعرها
والاهم من دالك (هل المراة عندكم مجرد اداة (انتم تفهمون قصدي ) او انها انسانة)
انت لست سلطان عليها وهي كدالك
مجرد بشر مثل بعض .... ليس هي مخلوقة من حديد وانت من دهب.

 

[Hakan]

تعدد الزوجات
والله صراحة سوجي مكانش منو طول مابقاتش تعدد الزوجات ضركي راهي تعدد الخيانات برك
بيسك لما تروح للمحكام وتشوف نسبة التعدد في الجزائر تلقايها غير 5/100 من مجموع المتزوجين
يعني موضوع لتكسار الراس فقط
مي الحاجة اللي محيرتني المراة الجزائرية ماعندهاش مشكل انو الرجل نتاعها يتعدد في الخيانات نتاعو
هذي زميلة عمل هذي تلميذة عندو هذي المريضة نتاعو اذا كان طبيب بففف والله غير حرت موضوع الزواج كرهت جدو وموضوع التعدد زاد كمل عليه
انا شخصيا التعدد نشوفو حاجة عادية فقط وفر لكلا الزوجتين حقهما وكي نقول حق
يعني ماكل مسكن مشرب
اما الحب وغيرو المهم يحترمهم في زوج ولكان يبغي وحدة على الاخرى هذي حاجة قلب البنادم ماعندوش القدرة واش يدير
كاين اللي متزوج بمرا ومازال قلبو مع مرا اخرى مالغري ما تزوجهاش هذا لايعني انو ماهوش عايش مع مرتو بسعادة والله اعلم ​

 

[الامين محمد]

اعتقد لم يعد هناك تعدد الزوجات بل اصبح تعدد العشيقات
و الذي للأسف اصبح أمرا مألوفا في مجتمعنا
و الرجل الذي ليست له عشيقة يبدوا غير طبيعي

 

[ليليا مرام]

السلام عليكم خويا
والله الموضوع هذا قديم جديد مع انو دايما نهدرو فيه مي لازم نعاودو نجبدوه
الرجال حبيت نعرف علاه يعددو على نساهم وهوما ما راهمش قادرين حتى على وحدة الف سبب يمدلك مرتي مريضة ويروح يجيبها اكثر منها
مرتي ما تولدش ويجيب الثانية ويولد معاها ويزيد يعاود عليها املا كيفاه خونا فهم روحك
اللي يقولك مرتي كبرت ويحوس علر الانوشة ويزيد هذيك تكبر ويعاود عليه يا خويا عندهم القوة يتزوجو ويعاودو الراجل ما يشبعش يتزوج ب 4 اللي حلال و 400 اللي حرام هذا هو عينو ما تشبعش الله غالب
اما لو جات للنسا المرا مش فيدها الامر لانو هي مسكينة المضرارة يجيلها ضرة يا تقبل ولازملو يجبد الدين بباه المرا تقنع مسكينة وتقولك ايه صح ربي قال وانساو ولن تعدلو هذي واحد ما شاف فيها غير عرفو حلال يا حسراه
مي نقولك الراجل رجع يخاف من مرتو اي واحد هنا معانا فالمنتدى متزوج نتحداهم فقي قلبهم كامل بغيين يعددو هههه مي وريلي شكون يروح لمرتو ويقولها ههههه الليلة تلقاهم دايرين خيمة هنا هههههههههههههه
ياخي الله يهديكم يا رجال

 

[الامين محمد]

السلام عليكم خويا
والله الموضوع هذا قديم جديد مع انو دايما نهدرو فيه مي لازم نعاودو نجبدوه
الرجال حبيت نعرف علاه يعددو على نساهم وهوما ما راهمش قادرين حتى على وحدة الف سبب يمدلك مرتي مريضة ويروح يجيبها اكثر منها
مرتي ما تولدش ويجيب الثانية ويولد معاها ويزيد يعاود عليها املا كيفاه خونا فهم روحك
اللي يقولك مرتي كبرت ويحوس علر الانوشة ويزيد هذيك تكبر ويعاود عليه يا خويا عندهم القوة يتزوجو ويعاودو الراجل ما يشبعش يتزوج ب 4 اللي حلال و 400 اللي حرام هذا هو عينو ما تشبعش الله غالب
اما لو جات للنسا المرا مش فيدها الامر لانو هي مسكينة المضرارة يجيلها ضرة يا تقبل ولازملو يجبد الدين بباه المرا تقنع مسكينة وتقولك ايه صح ربي قال وانساو ولن تعدلو هذي واحد ما شاف فيها غير عرفو حلال يا حسراه
مي نقولك الراجل رجع يخاف من مرتو اي واحد هنا معانا فالمنتدى متزوج نتحداهم فقي قلبهم كامل بغيين يعددو هههه مي وريلي شكون يروح لمرتو ويقولها ههههه الليلة تلقاهم دايرين خيمة هنا هههههههههههههه
ياخي الله يهديكم يا رجال

نونونو
انا مخلص ليها ني الحلال ني حرام
راهي عاملالي جي بي أس تجبدني وين نروح هههههههههههه

 

[فعل الخير غايتي]

ههههه كل واحد واش رايو
مشكورين لانكم عطيتو رايكم
راني نستنى في لي مزالو

 

[aljentel]

الزواج مسئوليه واذا ما الله وفقك بزوجه صالحه يجب الاكتفاء بها ..
لتعيش حياتك بشكل جميل وبلا منغصات ...
شخصيا اعتبر تعدد الزوجات قمة المهانة للمرأه ..

والله يهدي ما خلق

 

[فعل الخير غايتي]

صحيح خويا يعني الزوجة إذا وفرت كلشي لزوجها و عاود تزوج عليها هنا رح يكون ظلمها

 

[sanaya]

تعدد الزوجات صراحة موضوع شائك
هناك بعض النساء يستاهلو الرجل يتزوج عليها
مثلا خدامة فالليل هادي كاينة
ولانهار كامل برا
ولامحسبتش ڨاع الراجل تاعها
دير واش تحب تخرج تطلع تهبط كلي مهوش تما خلاص
ولا لمرا المهملة اللي تهمل روحها لارياضة لاأناقة وووو
هادو يستاهل راجلهم يتزوج عليهم
هناك بعض الحالات التي يجب أن يتزوج فيها الرجل ولكن لو نرى للمرأة سنجد أنه شيء صعب بالنسبة ليها ولديها الحق أنو تحس بتلك المرارة :
مثلا مرا عاشت مع راجل صبرت وربات وعاوناتو بالدراهم ونهار تكبر لمرا يقولك نحب وحدة صغيرة
وي عندو الحق مي مام هاذ لمرا تجيها واعرة ڨاع هداك التعب والصبر باش نبنوا الدار ونكبروا دراري يهديلي كهدية تعبي زوجة ثانية
ومثلا تصاب المرأة بمرض يروح يتزوج
صح هذا حقوا
مي مام لمرا تقول فروحها نهار اللي ملقاش صلاحو راح بدلني
حالات كما هادو واعر تحكم فيهم
لأنو من جهة الرجل عندو الحق
ولكنه إيذاء لمشاعر المرأة
تبقى حالة أخرى وين تلقا زوجة رائعة وفي المستوى من كل شيء صغيرة وقارية ووووووووووو
ويجي يقولك حاب نزيد نتزوج
هادي تاني واعرة لأنو هاذ لمرا تجيها إهانة بالرغم من كل اللي دارتو ومزال راهي ديرو يجي يحب يتزوج
هنا تحس كلي فشلت في إرضاء الزوج
وهناك حالات أيضا لازم يتزوج فيها الرجل كبرودة المرأة ولا حياء في الدين
في الأخير
لسنا أبدا ضد شرع الله
ولكن :
هناك أين لازم يتزوج الرجل ( المرأة الباردة)
وهناك اللي يستاهلو يتزوج عليهم(المرأة المهملة )
وهناك أين يكون لازم يتزوج وحقو مي يجرح الزوجة كثيرا ( مثلا كتكبر فالسن )
وهناك الزواج الذي لامعنى له ( كتكون عندو زوجة مثالية )
في الأخير موضوع كما هذا منقدروش نسقطوه في كل فئات المجتمع لأنو كل زيجة عندها أسبابها ومحاسنها ومساوئها
وهنا نحكيكم حكاية :
هاذي عمتي 30 سنة تمرمدت مع الراجل وعايلتو ومبعد لكرا وووووو
وخترة نفحتلو يتزوج طفلة
ووعدها يعدل بيناتهم
نهار خطب الطفلة قالهم والله مرتي مخصتلي والو
أنا برك نفحتلي نتزوج
أيا تزوج ولأسبابه المادية بدأ ينحاز للزوجة الجديدة وتفاقم الأمر حتى وصلوا للطلاق
لأنو هملها هي ولادها
والنتيجة حاليا راهي خدامة تعيش في زوج ولاد
هنا الراجل هذا كتزوج قال فيه أجر
معليش
ولكن أليس الأجر أن تحافظ على الزوجة التي أنجبت لك الأولاد
هنا نشوف صراحة زواج هذا في هاذ الخالة بعدأن كان أجرا أصبح معصية لأنو ضيع زوجة وأولاد
هادي حكاية واقعية
وكما قلت موضوع كما هاذا
ديما نقول فيه كل زيجة و الحالة نتاعها
نتمنى فكرتي وصلت سلام

 

[أم أُنٌَيسة]

السلام عليكم و رحمة الله تعالى و بركاته
شخصيا مع تعدد الزوجات بشرط توفر الشروط ووفق مايسنه الشرع
اما في حالة بلادنا ، خلي البير بغطاه كيما يقولو
كل شيء عادي في بلادي كيما قال فارس ولد العلمة :
يابلادي كل شيء فيك عادي
كي تقتل طفل هدي عادي في بلادي
تجي تطبق الاعدام حقوق الانسان تنادي
كي تسرق لملاير هدي عادي في بلادي
كي تخطف شكارة تع حليب يطبقو عليك قطع الايادي
كل واحد نفسي نفسي هدي عادي في بلادي
كي تشوف مصلحتك يتهموك بالتفكيرالاحادي
متزوج عندو عشيقة هدي عادي في بلادي
تعدد الزوجات فيه شر للعبادي

و توجد لها بقية
ربي يهدينا و يثبتنا ان شاء الله
​