اطباقي في رمضان

[ام تسنيم واحلام]

السلام عليكم ورحمة الله وبركاته
ان شاء الله ركم كامل لاباس

اليوم حبيت نشارك معاكم اطباقي وان شاء الله تعجبكم وتجربوهم اطباق ساهلة ولذيذة
الطبق الرئيسي
طجين الزيتون بطريقتي
اولا المقادير :أفخاذ دجاج +بهارات+ملح +معدنوس+جزر+فطر+بصل+ زيتون بدون عظم +شوية زبدة+ملعقة صغيرة خل
اولا ننزع العظام من الافخاذ كما في الصورة عملية سهلة متخهوهاش تنزعوهم غير بشوية تنجحلكم وتخلطو البهارة (لي تفضلوها لكن متكثروش) و ملح مع الزبدة وشوية خل(الخل يخلي الدجاج طري )

ثم تدهنو قطع الدجاج بتلك الخلطةمن الداخل وتقطعو شوية معدنوس وشوية زيتون ثم تلوها كما في الصورة ثم لوو عليها ورق الزبدة(هذا افضل من أوراق الألومنيوم )ولي معندها ورق الزبدة تقدر تستعملو كما في الصورة في سنية الفرن ديرو شوية ماء وضعوا القطع المغلفة دخلوهم الفرن بعد ميطيو نحو الغلاف ودهنوهم ب خلطة الزبدة ودخولهم يحمرو من الفوق
نجوزو اللمرق في طنجرة نحطو الزيت وهذيك العظام والبصل نقلوهم مليح والبهارات والملح ونمرقو ثم نضيف الزيتون والجزر مقطع دوائر والفطر والمعدنوس حتى يطيبو
ونقدموهم بهذا الشكل وشهية طيبةيتبع ​

 

[ام تسنيم واحلام]

الطبق الجانبي
كرات اللحم المفروم والبدنجال
المقادير:كمية من اللحم المفروم +حمص(طايب )ثوم+ بادنجال خبز مرحي +فلفل أحمر +راس الحنوت +فلفل أسود +ملح
نضع البهارات والثوم والخبز المرحي(يخلي اللحم طري ) وفلفل الأحمر والملح مع اللحم المفروم ونمزجوهم جيد ونديروها كور صغيرة
في قدر نديرو شوية زيت يسخن ونضع
كرات اللحم يتقلو كما في الصورةنزيد عليهم فلفل الأحمر والبهارات ونمرقو في نصف الطياب نضيفو الحمص
ومن جهة أخرى نقطع البادنجال دوائر ونقلوها بعد ميطب كلش نقدمه بصحة والراحةيتبع ​

 

[ام تسنيم واحلام]

المقبلات
اخترتلكم 2 ان شاء الله يعجبوكم
اولا :الكورني
المقادير :بطاطا(نغالوها ثم نهرسوها )+معدنوس+بيض مغلي(نقطعوه قطع صغيرة )+جبن مثلاثات+ملح+فلفل أسود نمزجوهم كما في الصورةثم جيبو خبزة الديول نقصموها على 2 كما في الصورةونطوها على 2 كما في الصورةونغلفوها في مول تع الكورني كما في الصورةثم نقلوهم في الزيت ونحوهم من المول ونديرو الحشوة في لبوش (اوكيس تع الحليب ) ونحشو لي كورني (تقدرو ديرو اي حشوة تحبوها )
ونزينوها بجبن المبشور وشهية طيبة ​

 

[أشــواق 19]

واووو حبيبتي كلشي يشهييييييييي يعطيك الصحة
انا في المتابعة ☺☺☺☺

 

[ام تسنيم واحلام]

2
مملحة هايلة بدون لحوم
العجينة :2 كسان حليب+ربع كأس زيت +مغرف كبيرة خميرة الخبز+ملعقة صغيرة سكر نخلطوهم شوية ثم نضيف الفرينة والملح ونعجنوها حتى تولي طرية(تكون تتلاسق شوية )ونتركها تخمر
الحشو:في طنجرة ندير شويةزيت+بصل مقطع رقيق نقلوهم مليح ثم نضيف الفلفل الأخضر الحلو مقطع رقيق ثم نضيف الطماطم ونقلوهم مليح ثم البهارات(لي تحبوها )نقصو للفرن ونخلوها تجمر بعد متخمر العجينة نقطعوها كويرات صغيرة ونديرها في مول تع لي بخكات
وندرولها الحشوة والجبن والزيتون كما في الصورةنخلوها تزيد تخمر شوية ثم نضعها في الفرن بعد مطيب نتركوها تبرد شوية ونحوها من المول ونقدموهم بالصحة ​

 

[ام تسنيم واحلام]

التحلية
نقدملكم 2 وحدة حلوة معسلة وأخرى باردة لكي نرضو الجميع والكل يستفيد
التحلية1
حلوة تركية أسمها şekerpare (شكر بارا )المهم ساهلة ولذيذة
اولا نحضر السيرو
2كسان سكر +2كسان ماء +قارص نحركوهم ثم نشعلو عليهم النار بعد ميغلو نتركهم 10دقائق ونطفو ونتركها تبرد نجزو للعجينة
250غ زبدة + نصف كأس سكر نخلطهم ثم + 2بيضات كاملين + بياض بيضةثم+نصف كأس سميد(سميد تع المقروط متوسط )+كأس جوز الهند (نواد كوكو ) +قرصة ملح ونلموها بالفرينة و+كيس ونصف خميرة الحلوة(16غ )
ملاحظة :الكأس لي عبرت بيه تع240مل
ولي يحبو بالغرام حطيتهم في الصورة
بالنسبة للفرينة تدي حولي 500غ نكورها كويرات صغيرة 30 غ للكويرة (مثل حبات المشوك )وندهنهم بصفار البيض وفي كل كويرة نديرو حبة كاوكاو(هي الأصلية يدرولها حبات البندق )تقدرو ديرو اللوز وندخلوها تطيب حتى تحمار غير نخرجوها من الفرن نعسلوها مليح(نعسلو ونعودو لازم تشرب مليح)
ملاحظة : تقدرو متعسلوهاش جي ثان مليحة مع قهوة حليب
ونقدموها بالصحة والهناء ​

 

[ام تسنيم واحلام]

التحلية2
هذي التحلية انا عرفةبزاف منكم يحبوها
تحلية إيطالية (تيراميسو )يم يم
:200مل كريمة فريش سائلة+ملعقتين كبار سكر +فاني نضربوهم حتى تطلع شوية ثم نضيفو جبن مسكربون ونضربو حتى يمتزج مليح
من جهة اخرى نديرو كمية من النسكافي في الماء ونغمسو فيها البسكوي من جهة لي مفيهاش السكر ونضعها ساير داير على المول ونديرو طبقة من البسكوي من التحت ثم طبقة من الكريمةوهكذا لكن الطبقة الأخيرة تكون كريمة ونديروها تبرد على الأقل 6 ساعات (من الأفضل ليلة كاملة وعند التقديم نروشها بالكاكاو
ونقدموها ماما ميا ​

 

[ام تسنيم واحلام]

السلطة
خترتلكم نوعان لكي يستفاد الكل
1 حمص بطحينة
كمية من الحمص نغلوها جيدا ثم نطحنوها حتى تصبح مثل لبيري نضيفلها ملعقة طحينة(الطحينة جلجلان يرحيوه حتى يصبح مثل الزبدة وهو ليخدمو به حلوة الترك ) وقليل من عصير الليمون والملح وشوية كمون ونخلطوهم حتى يمتزج الخليط جيدا ونتركوه في الثلجة حتى يشد روحو نزينوها الزيتون الاسود وزيت الزيتون والكمون وفلفل الأحمر ونقدموها صحتين وهنا السلطة 2
لي معندهاش الطحينة دير هذي منعشة وهايلة سلطة في الكاسات
.
في كاساة ندير طماطم مقطع رقيق من التحت ثم فوقهاالحمص طايب مليح فوقها قسبر مقطع رقيق
تحبي أضيفي خيار بصل اي خضر تفضليها
في ايناء ديري عصير القارص والملح والثوم ونعناع يابس خلطوهم مليح وسقو الكاسات وزينوهم من الفوق كيما تحبو وتركوهم يبردو وقدموهم شهيتكم بصحة وان شاء الله تكون ستفدتو ولو قليل وصحا فطوركم حباباتي ​

 

[الحلم الوردي]

الله عليك ام تنسيم اطباقك روووعة
وطريقتك مليحة بالبزاااااف
عجبوني كامل بصحتك

 

[ام تسنيم واحلام]

الله عليك ام تنسيم اطباقك روووعة
وطريقتك مليحة بالبزاااااف
عجبوني كامل بصحتك

يسلمك حنونة انت الأروع

 

[ام زين الدين]

ماشاء الله كلش يشهي تسلم يدك

 

[Djaouida]

مشالله كلش شباب والله راكي ساجية الله يبارك عليك حبوبة
وشهيتيني وااااع هههه
بصحتكم زينة​

 

[Mårőųā Řāhïł]

الله ب

 

[Djaouida]

هاني جيت ههههههه راني جربوصفة من وصفاتك وجات فور بصح لڨو جوسي بآ نفطر ونقولك خخخخ

 

[ام تسنيم واحلام]

هاني جيت ههههههه راني جربوصفة من وصفاتك وجات فور بصح لڨو جوسي بآ نفطر ونقولك خخخخ

بصحتك حنونة

 

[❤️كلي أمل❤️]

يعطيك الصحة اختي ام تسنيم
أطباق كلها راااائعة وتبان تشهي ولله
مشكوووورة حنونة

 

[ام تسنيم واحلام]

يعطيك الصحة اختي ام تسنيم
أطباق كلها راااائعة وتبان تشهي ولله
مشكوووورة حنونة

شكرا لك ورمضانك مبارك

 

[حمزةusma]

يعطيك الصحة اطباق شهية كلها
شكرا لك على مجهوداتك

 

[سكون الفجر]

ما شاء الله لا قوة الا بالله وصفات رائعة
تسلم ايديكِ حبيبتي ام تسنيم على مشاركتنا هذه الوصفات الرائعة
بإذن الله سأطبق بعضها
تسلم ايديكِ يا الغالية والله ما قصرتي
دامت ديارك عامرة حبيبتي

 

[ام تسنيم واحلام]

ما شاء الله لا قوة الا بالله وصفات رائعة
تسلم ايديكِ حبيبتي ام تسنيم على مشاركتنا هذه الوصفات الرائعة
بإذن الله سأطبق بعضها
تسلم ايديكِ يا الغالية والله ما قصرتي
دامت ديارك عامرة حبيبتي

السلام عليكم ورحمة الله وبركاته
شكرا حبيبتي على مرورك العطر
وبارك الله في جهودك