حكايتك مع 2017 ..

[Hakan]

السلام عليكم ورحمة الله وبركاته
اعزائي افضال وفضليات اللمة الجزائرية
ان شااء الله احوالكم بخير وانتم بالف صحة وعافية
في الحقيقة احببت ان نضفي جوا جميلا نستمتع فيه بقصص البعض نجاحات واخفاقات البعض الآخر
الاول نهنئه والثاني نحفزه على المزيد من المحاولات للنجاح في الاخير
كل منكم عاش 2017 بكل ايامها ونعلم جميعا انه لم يتبقى لهذا العام سوى القليل
لذا احببت من الجميع مشاركتنا بقصصهم وحكاياتهم مع 2017 وللجميع الحرية في النشر في هذا الموضوع
شكرا مسبقا للجميع تمنياتي لكم بالتوفيق
​

 

[GI Joe]

salam
l hamdullah 2017 ma met 3abd 3ziz 3liya ma perdit hadja w au mm temps marbahtech hadja beyna fi hyati
kemelt l 9raya w t3alemt lekhyata f saiif
maaais lyoum li howa mon anniversaire fet khaal tehragt b pistolet a colle w l gateau li dertou mandjahlich kima haba w rassi youdje3 nhar kamel, maalich le39oba l ta3 l3am l djay tkoun journée khir​

 

[Hakan]

salam
l hamdullah 2017 ma met 3abd 3ziz 3liya ma perdit hadja w au mm temps marbahtech hadja beyna fi hyati
kemelt l 9raya w t3alemt lekhyata f saiif
maaais lyoum li howa mon anniversaire fet khaal tehragt b pistolet a colle w l gateau li dertou mandjahlich kima haba w rassi youdje3 nhar kamel, maalich le39oba l ta3 l3am l djay tkoun journée khir​

هههه ذاك الزهر هذا عيد ميلاد ولا يوم اللعنات ههه
ربي يطول في عمرك ان شااء الله ويخليلك والديك ويرضيهم عليك ويرضى عليك
مازال شهر في 2017 بالاكك شما يصرى ههه الله يهنيك ​

 

[همس الوُرود]

السلام عليكم
2017 فات أجمل عام بالنسبة ليا والحمد لله
فيه عرفت قيمتي عند خوتي وشحال يحبوني وشحال أنا محمية حسيت روحي أميرة
بعد ماظلموني وخوتي الي وجابولي حقي والحمد لله
فيه خويا دار عملية وإن شاء الله يا ربي يشفيه ويرجع بصحتو بعد كل هدي السنوات من العذاب
فيه خويا خطب والحمد لله ومنه إن شاء الله يا ربي راهي جاية الي تعوضني فختي وإن شاء الله مرتو تكون هي ختي بإذن الله
فيه رحت سطيف رحت دزاير حوست درت لعبت ضحكت
فيه لبست جلبابي والحمد لله
فيه تعلمت المحاجب وأنواع جديدة تع ليقاطو ههه
فيه تلاقيت بصاحبتي الي تفارقنا أنا وهي عام فيه تعرفت على صديقات لدوك راهم الأحلى رغم أنو كاين الي يجرحو مي كاين تاني الهايلات
فيه تعرفت على 3 صديقات متجلببات سلفيات وحققت حلمي أني نمشي مع متجلببات
فيه اكتسبت خبرات جديدة وتعلمت بزاف أمور تعلمت معنى المسؤولية معنى وحدة قايمة على دار تعلمت معنى التعب الي تتعبو ماما علينا بعد مامرضت وأنا الي حكمت بلاصتها الله يشافيها
فيه صرت فتاة أقوى ,, والحمد لله ^^​

 

[بشرى ملاك]

2017 امممممم
الصراحة كانت احسن من السنة لي قبلها..
كانت عندي شوية مشاكل ومرضت مرض شديد لكن ايضا فرحت بزاف كي زاد عندي ولدي انس حبيبي...
ربي يدوم فرحكم..
شكرا على الموضوع.

 

[لؤلؤة قسنطينة]

السلام عليكم
راك تدوس على الجرح خويا حكيم
بصراحة ماش من حقي نقول هاد الكلام لكن أسوء عام في حياتي هو عام 2017
ربي يغفرلي ماش من حقي نقول هكا خاطر أي حاجة من ربي مرحبا بيها وربما مصاعب وهموم اليوم هي خير لينا مستقبلا
لكن 2017 خلالي جرح عميق في القلب لازملو سنوات ويا ربي لا يتداوى خلالي صدمات وووو
لكن في نفس الوقت فيه حوايج ملاح لازم الانسان يحمد ربي عليهم وهو الصحة لي راهي تتجدد كل عام هل هادي مانحمدوش ربي عليها؟
على والدينا لي ربي مفرحنا بشوفتهم كل عام وهادا يعتبر أجمل كنز لينا، كذلك عندي ذكريات جميلة كالتخرج تاعي مثلا
رغم المصاعب لي مرت عليا فيه لكن لما نتفكر وقوف الاساتذة ويذكرو في اسمي واسم زميلتي ويقولو قررنا نمدولهم علامة 16 وتطلق وحدة
من زميلاتي تزغريتة سمعتها الجامعة كاملة ههههه كي نتفكر هاديك اللقطة لحمي تشوك هههه نتفكر كذلك نهار السوتنونس كيفاه جازو فيه مشاكل كبار وخلعة
وكيفاه تمرمدنا فيه وكيفاه الداطاشو مالقيناهش وكيفاه الميكرو ماحبش يمشي وكيفاه جاوبنا على اسئلة الاساتذة والارتباك، نشفى عليها وحدة من الاساتذة ماخلاتش فينا طرف هههه
وفي الاخير طرحت علينا 6 اسئلة وقاتلنا كن ماتجاوبونيش على 3 منهم ماتنجحوش وتروحو خائبين تما قلبي حبس وغير مدتلنا الاسئلة جاوبنا عليهم في 3 وجيت رايحة نكمل لخرين
قاتلي حبسي يا بنتي رايحة تجاوبي على كلشي هههههه شبعت ضحك وهوما شبعو عليا ضحك وتاني دارولي ملاحظة للآن نتفكرها نشبع ضحك كي كتبنا في مقدمة الميموار
بلي البنوك الاسلامية تشجع على التعاون ووو والبنوك التقليدية تشجع على البغض والخصام ووو شافت معايا الاستاذة الممتحنة وقاتلي تبان لي كتبها عندو حقد للبنوك هههه
قاتلي باينة نتي لي كتبتيها وأنا نضحك بالدموع هههه قلتلها هيه والله أنا ساع شبعت ضحك، يعني ربي اكرمنا والحمد لله ورايح يبقى 4 جوان 2017 أجمل يوم في التاريخ
كذلك ذكرياتي مع الدراسة والجامعة لي مستحيل تغيب من بالي، كذلك الثلوج لي نزلت في شهر جانفي وانا ندعي في ربي أنو يحكم باه مانديرش الامتحان ههه
خاطر الامتحانات كانو ورا بعض وماعنديش الوقت باه نحفظ وكل ليلة ووجهي لاصق في الطاقة نستنى في التلج يحكم ومع الصباح غير نكونيكتي
نلقى البنات لي يقروا معايا كامل تما نسقسيو في بعضانا اذا حكم التلج عند كل وحدة فينا وكاين حتى لي يبعتولنا الصور كدليل ههههه يوليو هوما يروحو يرقدو
وانا ياكلني قلبي نولي نوض نحفظ ونستغل الوقت، كذلك ذكريات ذهابي أنا وزميلتي في الميموار للجامعة الإسلامية صراحة الايام لي رحت فيهم لهاد الجامعة
ماننساهمش حياتي كاملة كانو اسعد لحظاتي تما وكذلك زيارتنا للبنك الاسلامي كانت هناك لحظات طريفة جدا كي نتفكرها نضحك وحدي يعني في الاول قتلك راك
تدوس على الجرح لكن درك تأكدت أنو هاد العام ماهزش الجرح برك هز الضحكة والفرحة وتجدد النعمة، والحمد لله دائماااا وأبدااا على واش عطانا ربي كتر خيرو سبحانو
وان شاء الله السنة المقبلة تكون أجمل وتتحقق فيها دعواتنا يارب
شكرا خويا حكيم على الموضوع بارك الله فيك ماتنساش نتا تاني تحكيلنا على 2017 كيفاه جاز معاك
تحياتي
​

 

[يونس قاسم]

عام تقدر تقول مخلط ههههههه الحمد لله
الفرحة تاع التخرج و حفلة التخرج خاصة كي جات يما و سلمتلي الشهادة
و فرحة المنصب و العمل و خويا خطب و فتحلي الطريق هههههههه
الحزن ... فراق اجمل الاصدقاء
وفاة ام صاحبي
و ربي يجيب الخير للجميع

 

[السلطانة]

وعليكم السلام ورحمة الله وبركاته
عام 2017 بالنسبة ليا فات عادي يعني مافيهش حوايج مميزة بزاف لكن خليني نتفكر ونرجع للور
يادرا يادرا

هيه مع بدايتو طاح الثلج وتسكرت عليا الطريق في شهر ديسمبر وقعدت في دارنا :Love::Love::Love::Love:
لنهاية شهر جانفي منها فرحت بزاف وراجلي جا بعدها جابني لداري

رجعت لداري بعدها صرات مشاكل في دار شيخي شهر مارس تهنينا من سلفي ومرتو قسمو بعدما دارولنا ضغط كبير الحمد لله كانت فرحتي كبيرة

افريل بنتي غلقت العام بعدها جا رمضان بنتي مرضتلي تقريبا شهر كامل بين الصيام والكوزينة والجري عند الطبيب
بعدها عادت تمشي وشدت روحها في المشي وبدات مغامرتي الجديدة اني نجري من وراها
جات العطلة الصيفية خرجت نحوس مع راجلي بحرنا وزرنا شحال من ولاية
جا العيد الكبير ومنو جاني خبر يفرح لي هو
راجلي بدا يبني في دارنا الجديدة :Love::Love::Love::Love: ايه مصدقتش
الحمد لله ربي فرج علينا
راجلي ويماه واختو راح نسكنو مع بعض
معليهش الحمد لله انو نتهناو من دار الورثة وتتباع وكل واحد يعيش حياتو
ايه تفكرت تاني خويا الصغير جاب الباك وفرحنا بيه
ماما خرجت تقاعد من خدمتها وفرحت وفرحنا كي ريحت وتهنات
الحمد لله على كل حال
شكرا خويا حكيم خليتنا ندير فلاش باك للعام لي فات

 

[فيتامين سي]

ندير ميزاجور لعقلي و نرجع :Love:​

 

[أشــواق 19]

السلااام عليكم..
عام 2017 كان مخلط عليا صرا فيه لمليح ولي مش مليح...!

كان افضل عام من ناحية دراسة طلعت لاسيري بمعدل لكنت حاباتو..تعلمت حوايج بزاف في مجال الاعلام والاتصال..! كنا أفضل كلاسة كامل متفاهمين نخدمو كامل كيف كيف منبانوش اصدقاء نبانو اخوة والحمد لله مزالني في نفس لكلاسة..نحسهم الصح يقراو حبا في الدراسة مش يقراو علجال لانوت وشهادة..
تعرفت ثاني على بنت من أخبث البشر لي صادفتهم في حياتي...بالرغم انها تسكن في نفس بلاصة لي نسكن فيها ونقراو كيف كيف ولي سوء الحظ كانو كامل البحوث حاكمتهم معاها ..مي
خلاتني نكتاشف بلي طيبتي أسوا ما فيني..صراحة كل القسم يكرها من تصرفاتها..من نظراتها مستراحتلهاش هكداك وريسكيت وقلت معليش نوقف معاها ندير فيها خير تقابلني بي الشر تمنيت مرة برك مرة تحشم وتقول هذي الطفلة راهي دايرة فيا خير نحبس من الهبث تاعي مع انو انا من نوع لي يهدر في الوجه وكنت نقولها يا مخلوقة اخطاك من لي جاست هدو تاوعك مي الله غالب العيباد لي كيما هاك ميفهموش و ميستاهلوش.ربي يهديها الحمد لله لي بعدني عليها..
وافضل الايام يمات كي كنا راح ندو الفاكونس تصالحت مع انسان عزيز عليا بزااف بزااف وجا وزارني في سطيف عقبنا يوم مليح بزاف مع صحبتي واختي وبنت خالي..!
وبعدها رحت للعاصمة غيرت جو وزرت بلاصة لي من طفولة مرحت ليها هذي بلاصة نستراح فيها بزااف نحسها مدينتي الثانية..
ايا بعد كي رجعت لسطيف مع بداية شهر سبتمبر واقتراب مناسبة العيد..من هنا بدأت مشاكلي..بدأت خيبتي...(لا داعي لذكر التفاصيل هههه مش حابة نبلكي ههههه المهم انتهت بخسارة شخص علبالو شحال نعزو نشتيه ونقادرو نحتارمو..مي معلباليش علاه دار كيما هاك علاه وعلاه..!
ربي لي يعلم وش كاين في القلوب..
مزال شهر ديسمبر ولي هو شهر ميلادي نتمنى تصرا حاجة مليحة تنسيني في قع لي فات ..ونتمنى 2018 يكون عام خير علينا كامل

 

[cosette]

2017
بين الحلو والمر,
نححت وظلعت لرابعه متوسظ بمعدل الحمد اﷲ 15
حاز بيان مي من سبتمبر قلعو مشاكل grV
خسرت نص صحاباتي اللي كان عند بالي نكمل معاهم قراتي ,تعرفت هه
علی احمل كشرودات هههه
تحرحت بزاف ,انضريت من كل شي صرالبروبلام مع الي حظيتهم في مضرب خويا ,
هبظت فالقرايا كرهتها ,
ربي يستر
ان شاذ ﷲ 2018 احسن منها يارب

 

[ربي اغفرلي]

‏صَبـَاح الخَيرات لأصحَاب الأيَادِي المبَللة بطَهارِة الوضُوء
المـُضِيئة بنُـور ⁧ صَلاةِ_الفَجر ⁩

المَحفـُوظـَة فـِي ذِمة اللَّه حتَى تُمسِي..

 

[ربي اغفرلي]

كل سنة نتعلم منها اشياء منها ما نمحوه ومنها ما نتعلق به ....!!!!!!
أزددت فيها يقينا ًأن للدعاء في الثلث الأخير من الليل معجزات ألهية جميلة .
فاتت سنة : حصل فيها الكثير من المواقف ( المفرحة – المحزنة – الصحيحة – الخاطئة )
أخذت مني أصحاب ..... وقربت لي أغراب ... تغيروا علي أقراب وأعطتني أحباب ...
وتعرفت على حقيقة بعض البشر النقية وكشفت لي معادن البعض السئ .
فاجأتني بسقوط أقنعة البعض وجعلتني أتمسك بالبعض الأخر ...
تعلمت منها أن من لا يراني بعز لاأراه بإجلال ...
سنة مرت مزركشة الألوان ،،،،،!!!!!!
♧♧♧♧♧♧♧
تعلمت منها أن الحب أخلاق وسمو ورفعة قبل أن يكون مشاعر.... وأن الاحترام أساس أي تعامل مهما كان نوعه... وأن العواطف إذا تمادت أكثر من اللازم أصبح صاحبها ساذجاً .
...و أن هذا الزمن لا يكره البعض لبعضهم لعيوبهم بل لتميزهم ..وأن تكون إجاباتي بذكاء وإن عوملت بغباء ....وأن لا أحزن على علاقة خسرتها في بدايتها لأن الله أبعدها عني ليبعد عني اصحابها .....وأن الحجر الذي يسد طريقي لايحزننى أبدآ.... و أن لاأحكم على أخلاق الرفيق قبل أن أجربه عند الغضب ....
...وأن البيئه التى تربى فيها الشخص تنعكس على تعامله مع الناس
....وأن الضربه التى لاتميت تقوي
.....وأن الندم مر المداق والحدر عسل مصفى
....وأن الطيبه خطيئه فى بعض الآحيان
...وأن القلوب البيضاء اصبحت نادره جدآ
♤♤♤♤♤♤♤♤♤
فاتت سنه ممتنة على كل من بقى فى حياتى ولم ثأثر فيه رياح العواصف.
أشكر من حمل لى فى قلبه التقدير. وأحترمنى فى غيابى قبل حضورى.
أشكر كل شخص أهدانى لحظه جميله.وكل شخص دعى لى فى ظهر الغيب.
أشكر كل من تحملنى بما فى من مساؤى فكلنا دو مسا ؤى له جانب مضئ وجانب مظلم .كالقمر
أشكر قلوب نقيه لازالت تهدينى الآمان .
أشكر من لازال قلبه يحتضنى ويهدينى العطاء والتضحيه والحب .
أشكر كل من نبهنى لآخطائ وتحمل عيوبى قبل محاسنى .
أشكر كل من عاتبنى إذا تعترت ووضح لى ماجعله يستاء منى لعل أحدنا يقنع الآخر .
فاتت سنه ....
أعتدر لمن قصرت فى واجبه ومن أخطأت بحقه فى موقف أوكلمه سوء .
وكل عام وانتم بخير

 

[ربي اغفرلي]

 

[Jawad Mouloudia]

سنة اخرى فاتت صعيبة عليا مثل السنة لي فاتت و لي قبلها و لاكن بالعزيمة و الاصرار ان شاءالله و التوكل على الله
نوصل وين راني حاب و نتمنى التوفيق للجميع

 

[عماد خطاب]

المشكل تاعي ماشي في الأعوام
الحقيقه انني شخص طيب جدا
خلوق ومهذب لساني طيب الحديث
كل عام نشوف نفسي تتواضع كثيرا
الحمد الله
هذا
من
فضل
ربي
​

 

[ضيوف وسـنغادر]

السلام عليكم
شكرا للموضوعالجميل الذي اخرج الكثير
سبق وان حكيت في مدونتي #40
تقبل مروري الطويل الثقيل ><
''
2017 صديقي اقتربت شمعتك على الانطفاء
ساشتاق اليك صديقي يا من قضيت معي اياما جميلة لا تنسى ولن تمح
لهيب شمعتك يا صديقي قدم لي الكثير
وحمدا لله والله اعلم ان كنت سانطفيء قبل ان تنطفيء انت كليا او قد نرحل سويا الله اعلم باجلنا يا صديقي
صديقي اتتذكر من التقينا؟ التقيناهم وتعرفنا عليهم وقضينا معهم اجمل الذكريات ووقفنا بجانبهم نمسح دمعتهم ونطمئن كل ساعة
ولكن صديقي ارايت! عندما ابتعدت قليلا لم يسال عن صديقتك احد وكنت انت كل ليلة تلاحظ تلك الدموع المترقرقة فوق خذي وانت تحترق كعادتك في صمت رحلتُ عنهم ولكنني كنت قوية اليس كذلك^^
صديقي اتتذكر تلك الايام الجميلة التي قضيناها بين مروج النرجس برفقة جدتي وكم كانت جميلة جدا كالنرجس تحمل بيدها نرجسا اخرى
تتذكر عيد ميلادي يا صديقي كان صباحه مؤلما اليس كذلك؟ ولكن عوضني الله بمسائه فالحمد لله
ههه صديقي 2017 ارايت اخي الذي اكبره ب4 سنوات اصبح يفوقني طولا ويناديني بأختي الصغيرة القصيرة
رايت صديقي كم كان ولا زال صغيري يحبني ويحترمني ويشجعني ويعلّمني من أدبه الكثير اسال الله ان يحفظه لي
ولا ننسى صديقي تلك الشقية التي اعادتني بفضل الله وانتشلتني من وحل الياس والهم في كثير من الاحيان احفظها يا الله
صديقي اتتذكر تلك الاوقات الصعبة التي قضيتها وحدي انظر اليك وافكر والدمع ينساب على وجنتاي كنت انت والله اعلم بحجم الفراغ والهم الذي شعرت به والتعب الذي كان فوق اكتافي
ولله الحمد ان زال
صديقي اتتذكر؟ تلك الايام على فتاة بلغت الثامنة عشر بقدومك كانت قاسية جدا تلك الايام
التي شحب فيها وجهي وتوسعت فيه هالاتي وبان للجميع نقص وزني الرهيب ولكن لم يسال عن السبب احد
صديقي اتتذكر دقائق وساعات وثواني ذلك الشهر كيف مضى حجم الضغط الرهيب الذي عشته والتعب الذي بدلته
لأختم نهايته بزيارة للمشفى على جناح السرعة
ولكن الحمد لله حتى الزجاج يتم ترميمه بعد الكسر
اجل اعلم انك تذكرك الان تلك الليالي التي قضيناها نتأمل نجوم السماء الصافية
وذلك الموعد الذي كنت فيه اسكن عالما مختلفا من السكينة والطمانينة والايمان كم كانت حلوة تلك الدموع
ويا صديقي لا اظنك تنسى ذلك اليوم الذي خرّت فيه قوآي وتغيرت 'ضيوف' واصبحت تبدي عكس ماتخفي
كنت احتضر ولم يقف بجانبي احد ليسمعني
بل كل كلامهم كان صاعقا كالسهام تخترقني
والله انهم ظلموني يا صديقي لم يعلموا ولم يحسوا ولم ولم ولكن كانت تخترق ابتسامة دمعاتي حسبي الله فربي يكفيني
ولكن حمد لله فالخير فيما اختاره الله دعوته سبحانه دعوتين مستحيل ان لا يجيبهما فقد استجاب للاولى واخّر الثانية
والحمد لله شق لي الله بابا موصدا واسكتهم الله جميعا
واسال الله ان يحفظ ورود قلبي وامله
صديقي لنعد لايام الصيف الجميلة كان هناك شيء يميزها ولا زلت لا اصدق انني فعلتها فالنترك الامر سرا بيننا وبين الله سبحانه
صديقي تتذكر تلك الايام بالمطبخ كانت حقا اياما رائعة ان تجعلهم يبتسمون من اكل تعدّه تلك فرحة من نوع مختلف فلله الحمد
مضت الايام صديقي اجل مضت وشمعتك بدأت الاحظ قصر حجمها ظلمتك في كثير من الاحيان وظلمت نفسي سسامحني صديقي واسال الله ان يعفو عني
صديقي اتتذكر ولله الحمد في جميع ابتلائاته ذلك اليوم حين ظن الجميع انها نهايتي وهرع الي الجميع في موقف لا زلت اتذكره
صحتي يا صديقي صحتي خانتني وأصبح تسارع نبضات قلبي من الجري الخفيف يخيفني
اصبحت اخاف ان اجلس وحيدة في المنزل يا صديقي
ومضت الايام صديقي تتذكرهم أجل لم يتغيروا مع الاسف مازالت نفس النظرات لم تتغير انهم يخسرونني رويدا رويدا صديقي
صديقي هنالك الكثير والكثير بيننا ....ان تموت امامي يا صديقي انه والله لصعب جدا
صديقي اوصيك ان تسامحني وتبلغ اهلك مسامحتي وان تشفع نواياي الطيبة واعمالا تحصى على اليد يوم الحساب
صديقي اذكرني بالخير والحمد لله ان اوجدك في علبة شموعي
صديقي ساشتاق اليك صديقي ساحن اليك صديقي كن متاكدا انني ساذرف دموع بسببك
صديقي الوداع ان غادرت قبلي والوداع ان غادرت بعدي فالله اعلم
ولكن مهلا لا تكتئب مازالت بعض الايام امامنا سنجعل ختامها مسك باذن المولى
وقبل ان تذبل يا صديقي
دعني أكتب بخط عريض
الحـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــمد لله على كل شيء
والله لذنب عظيم ان لم أحمد الله على كل ما اعطى فحقا الحمد لله
عدد قطرات المطر وحبات الثلوج التي تسقط الآن
وأستغفر الله واتوب اليه
اهدنا الى ما تحبه وترضاه يا الله♥
وتوفيقك يارب♥
''​

 

[حروف تائهة]

2017
مانقدرش نقول مليحة او شينة
لانو كلش من ربي مليح
و كيما كاين الشين كاين ثاني الزين
2017 تعلمت فيها اكبر و اهم درس في حياتي
و طبعا خلصت ثمن هذا الدرس غالي
2017 قربتني من ناس و ولاو عزاز عليا
اول مرة نحس صح بلي بمعزتي عند احدهم و نستشيرو في اموري ( خاصة انو كان يشوفني متكبرة )
2017 اختي تخطبت و ان شاء الله ربي يهنيها و خويا كمل فوت العسكر و ان شاء الله ربي يوفقه و خايا لاخر ادا الباك
2017 قربتني من ناس و بعدتني على ناس اخرين
عام كلو احداث و كلو عثرات و استيقاضات
و ان شاء الله العام الجاي يكون جميل و معا تخرجي اجمل و اجمل
بارك الله فيك اخي على هذي الفرصة لجمع حساباتنا
تحياتي

 

[Princess nour]

2017
كانت فيه الايام مليحة و ماشي مليحة محزنة بزاف
فيه توفى ولد خالتي و كانت هدي صدمة كبيرة بالنسبة لينا بزاف و خطبنا فيه لخويا و تعرفت فيه على صحبات سكر الله يبارك و ربي يخليهم ليا و نشالله 2018 يكون عام الخير علينا

 

[باتنية و نص]

لا شيئ يستحق الذكر