~°~°~ فساتين منوعة من تجميعي ~°~°~

[Soumia hadj mohammed]

أهلا وسهلا بكم
اعضاء وزوار منتدىاللمة الجزائرية
أهلا بي بينكن يا لؤلؤات اللمة
اشتقت اليكن واتمنى انكن بخير
قمت بتجميع عدد من الفساتين حسب ذوقي
هي متنوعة بين قصيرة وطويلة ، فيها الوان عديدة ، لون واحد ,,,, الخ
وددت لكن المشاركة
لكل امراة منّا ولها ذوق
لكل انثى منا تفاصيل تهوي قلبها
لكل منا الوان تحب ان تكون في ملابسها ​

المطلـــــــــــــــــــوب من كل عضــــوة انها تختار فستان او اكثر من المجموعة انها تجاوب على الاسئلة التالية :

1. فاي فستان اعجبك ؟
2. شاركينا بما أعجبك وصفي لنا مميزاته حسب ذوقك
3. في اي مناسبة ممكن ترتدينه ؟
4. ان كان مزاجك سيءا فاي فستان تسلبينه قد يغير مزاجك ؟
5. ما الشعور الذي يمنحك اياه هدا الفستان الذي اخترته ؟

يُـــتــــبـــــع ​

 

[Soumia hadj mohammed]

تحياتي يا اميرات اللمة ​

 

[كهينة القبائلية]

جميلة جدا شكرا حبيبتي على الموضوع

 

[Soumia hadj mohammed]

جميلة جدا شكرا حبيبتي على الموضوع

اهلين وسهلين كهينة
اختيار رائع
لكن عليك الاجابة على الاسئلة المطروحة ​

 

[Soumia hadj mohammed]

@سكون الفجر
@السلطانة
@لؤلؤة قسنطينة
@أم منيــــــر
@بنقابي افتخر
@طموحة
@همس الوُرود
@"viola"
@Malika Tlm
@عآشقة الجنـة
@خديجة ph
@Oum Loukmane
@*amani*
وكل العضوات اكيد الموضوع للجميع

 

[Malika Tlm]

السلام عليكم
حبوبتي كل الفساتين رووووعة املا لازم لامل نجربهم ونجاوب ههه نرجعلك غاليتي
رووووعة
لي عودة ان شاء الله

 

[لؤلؤة قسنطينة]

السلام عليكم ورحمة الله وبركاته
يعطيك الصحة سمية على الموضوع وعلى الصّور الجميلة و الفساتين الراقية
شكرا لهذه المجموعة الجميلة
وللإجابة على الاسئلة
1-أي فستان أعجبك؟
كاين فساتين ماش فستان ههههه
ورايحة نجاوب على السؤال الثانيو الثالث مع بعض كذلك
2-شاركينا بما أعجبك وصفي لنا مميزاته حسب ذوقك؟
3-في اي مناسبة يمكن ترتدينه؟

نحب الفساتين لي تكون سامبل ومافيهاش التخربيش بزاف وهاد الفستان الأخضر مع أنو صورتو بعيدة
ومابيانش مليح بصح عجبني

هاد الأسود يهبل الله يبارك، مع أني عمري لا لبست فستان قصير يعني راني نخير برك هههه
بصح جميل وبسيط وراقي وفيه الدانتيل

هادا تاني جميل وبسيط وراقي وأنيق ولونو جميل كذلك وأنا أيي حاجة بسيطة تعجبني

هاد العبدة في حد ذاتها عجبتني هههه نموت على حاجة تاع وقت بكري الشابو والفستان بهادوك الفيونكات الصغار
واللون جميل وهادىء، صراحة الشي تاع وقت بكري دايما حلوّ وأنا أصلا
نميل بزاف للحاجة لي طويلة وبأكمام طويلة

هاد العبدة تاني عجبتني كيما راهي والقماش تاع الفستان جد جمييييل
بالاك تستغربو من اختياري لهذه الفساتين لكن فيها ريحة تاع زمان ولمسة جد جميلة وراقية
وهاد الانسانة عجبتني بالمشطة تاع شعرها بفستانها كلشي خارج على بعضاه
وكيما قلت أي حاجة بسيطة تجذبني

هاد الفستان تاني عجبني بزاف، نمو تعلى الفساتين لي فيهم هاديك الطرزة التقليدية
وزيد اختيار الالوان موفّق جدا، عجبني هادا
أما بالنسبة للمناسبات لي تتلبس فيهم هاد الفساتين بصراحة أغلب المناسبات تكون حفلات زفاف
وإلا أعياد ميلاد نهدر على العصرية أما الفساتين القديمة هاديك والتقليدية كن نصيب نلبسهم في الدار
وبالنسبة للعصرية نتحدث على الناس كيفاه تلبسهم بالنسبة ليا في الاعراس الفساتين لي نلبسهم كامل طويلة
وبأكمام طويلة وبالخيمار لأني متحجبة

3-إذا كان مزاجك سيء فاي فستان سترتدينه؟
4-ماهو الشعور الذي يمنحك إياه الفستان الذي اخترته؟

إذا كان مزاجي سيء نختار الفستان الاسود لي بالدانتيل خاطر كلاس وتحسيه فخم حسب اللون تاعو
إذا اتبعتيه بتسريحة جميلة ومكياج راقي ماش غير يطلعلك المورال هههه
وإلا نقلبها تاع وقت بكري طول هههه ندير كيما هاديك لي بالشابو وإلا لابسة فستان ازرق وسط الحشيش
باه إما نرجع للزمن الجميل وإلا نحس روحي هايدي وسط الجبال

نتمنى نكون جاوبت كما يجب، وصراحة كاين كذلك فساتين اخرى نالت اعجابي لكن خيرت البعض فقط
شكرا للموضوع سمسومة بارك الله فيك
تحياتي​

 

[Soumia hadj mohammed]

السلام عليكم
حبوبتي كل الفساتين رووووعة املا لازم لامل نجربهم ونجاوب ههه نرجعلك غاليتي
رووووعة
لي عودة ان شاء الله

اهليين ملوكة
انتظر عودتك
راهي مريامو حطت ماخلات هههه ​

 

[Soumia hadj mohammed]

السلام عليكم ورحمة الله وبركاته
يعطيك الصحة سمية على الموضوع وعلى الصّور الجميلة و الفساتين الراقية
شكرا لهذه المجموعة الجميلة
اهلييييييين حبيبتي
الله يسلمك
وللإجابة على الاسئلة
1-أي فستان أعجبك؟
كاين فساتين ماش فستان ههههه
ورايحة نجاوب على السؤال الثانيو الثالث مع بعض كذلك
2-شاركينا بما أعجبك وصفي لنا مميزاته حسب ذوقك؟
3-في اي مناسبة يمكن ترتدينه؟

نحب الفساتين لي تكون سامبل ومافيهاش التخربيش بزاف وهاد الفستان الأخضر مع أنو صورتو بعيدة
ومابيانش مليح بصح عجبني

صح بالرغم انو بعيدو وغير واضح لدرجة كبيرة لكن ممكن انك تحسي بروعته لانو ذوقك هو لي يبينلك تفاصيله
بالنسبة لي هدا الفستان بالضبط نلبسو لما يكون مزاجي حزين وهادئي ونكون في حالة صمت ههه حبدا لو نلبسو ونبقو جالسة في مكان يسمح لي برؤية بعيدة

هاد الأسود يهبل الله يبارك، مع أني عمري لا لبست فستان قصير يعني راني نخير برك هههه
بصح جميل وبسيط وراقي وفيه الدانتيل

اسكتييييي بـــــــــــــــــــــــــــــرك انا من عشاق اللون الاسود وخاصة الحوايج لي تحتوي على الدانتال هه وين ماكان دانتال ينحط قلبي عليه هههه
ولي زاد اللباس جمالا كونه قصير هو الميل لي لتحت كاين اختلاف فالطول بين الجهة الامامية والخلفية اسفل الفستان

هادا تاني جميل وبسيط وراقي وأنيق ولونو جميل كذلك وأنا أيي حاجة بسيطة تعجبني

هاد العبدة في حد ذاتها عجبتني هههه نموت على حاجة تاع وقت بكري الشابو والفستان بهادوك الفيونكات الصغار
واللون جميل وهادىء، صراحة الشي تاع وقت بكري دايما حلوّ وأنا أصلا
نميل بزاف للحاجة لي طويلة وبأكمام طويلة
هههه قصدك العبدة والا العباية ؟
الفستان هدا رائع كل الروعة من ناحية اللون اللون صح هاااادئ جدا خاصة كي دخلو عليه اللون بلون كاسي
عندي اقتراح تغيير واحد فيه ، ركزي معايا :
الشريط الي جاي من العنق هابط حتى ما تحت الصدر ، لو يتوثق تماما مع القوس لي عند الصدر وعلى الخصر او ما فوق الخصر عند وين يتغير تفصيل الفستان يكون مثل حزام ابيض او ابيض كاسي وميكنش عريض يجي هايل ههه بالنسبة لي

هاد العبدة تاني عجبتني كيما راهي والقماش تاع الفستان جد جمييييل
بالاك تستغربو من اختياري لهذه الفساتين لكن فيها ريحة تاع زمان ولمسة جد جميلة وراقية
وهاد الانسانة عجبتني بالمشطة تاع شعرها بفستانها كلشي خارج على بعضاه
وكيما قلت أي حاجة بسيطة تجذبني

هاد الفستان تاني عجبني بزاف، نمو تعلى الفساتين لي فيهم هاديك الطرزة التقليدية
وزيد اختيار الالوان موفّق جدا، عجبني هادا
ياودي على ريحة زمان نقلك عطيني يدك نتخامسو
ناو كومنت رانا فنفس الاحساس ومنستغربش لاني فاهماتك
مثل هد الفستان نلبسو كي نكون دارية عرضة للاحباب في داري ههه راني نحلم
ونكون طابخة اكلات تقليدية
ياااا درى مريم ؟؟؟؟ كي جيتك
اذا كان شعري طويل وكثيف ممكن جداا نعملو جديلة تكون شابة
وش رايك ؟ ولا نطلقو هههه.
أما بالنسبة للمناسبات لي تتلبس فيهم هاد الفساتين بصراحة أغلب المناسبات تكون حفلات زفاف
وإلا أعياد ميلاد نهدر على العصرية أما الفساتين القديمة هاديك والتقليدية كن نصيب نلبسهم في الدار
وبالنسبة للعصرية نتحدث على الناس كيفاه تلبسهم بالنسبة ليا في الاعراس الفساتين لي نلبسهم كامل طويلة
وبأكمام طويلة وبالخيمار لأني متحجبة
روعة ، / دايرة جلباب مريم ؟

3-إذا كان مزاجك سيء فاي فستان سترتدينه؟
4-ماهو الشعور الذي يمنحك إياه الفستان الذي اخترته؟

إذا كان مزاجي سيء نختار الفستان الاسود لي بالدانتيل خاطر كلاس وتحسيه فخم حسب اللون تاعو
إذا اتبعتيه بتسريحة جميلة ومكياج راقي ماش غير يطلعلك المورال هههه
هههههههه يطلعلك مورال بلا تسريحة
والله ساعات شعري يكون مكشرد ومام با منمشطوش هكاكا برك نبقى نخلط فيه يبانلي روعة يطلعلي مورال نروح لخياتي نقلهم شوفو
عبالكم هدي شحال يليقلها لاكوافوز به تخرجها هكا بييييييييييييييييييييييييييين ههه
الاسود نفضلو في مناسبة كما قلتي حاجة تكون كلاس
اما لي نعدل بيه مزاجي الاخصر لي قتلك عليه
وإلا نقلبها تاع وقت بكري طول هههه ندير كيما هاديك لي بالشابو وإلا لابسة فستان ازرق وسط الحشيش
باه إما نرجع للزمن الجميل وإلا نحس روحي هايدي وسط الجبال

نتمنى نكون جاوبت كما يجب، وصراحة كاين كذلك فساتين اخرى نالت اعجابي لكن خيرت البعض فقط
شكرا للموضوع سمسومة بارك الله فيك
تحياتي
العفو حبيبتي فرحت بمشاركتك
ولكي مني التحية ​

والله فشيتيلي خاطري
وانا نقرا فتوضيحاتك نحسها منطلقة من عندي ، ذوق + احساس + اختيار نتفق فيه ههه هل انا توامك يا اختي

 

[لؤلؤة قسنطينة]

اهليين ملوكة
انتظر عودتك
راهي مريامو حطت ماخلات هههه ​

اديتهم كامل هههه
لازم نزرب قبل مايطيرو بيهم هههه​

 

[Soumia hadj mohammed]

اديتهم كامل هههه
لازم نزرب قبل مايطيرو بيهم هههه​

اسمعي على حساب ردك ليه ليه
منظنش قريتي ردي الداخل
فتحي فتخي ردك هههه

 

[Soumia hadj mohammed]

مريم
غلطت فوحد الرد لي هو هدا

ياودي على ريحة زمان نقلك عطيني يدك نتخامسو
ناو كومنت رانا فنفس الاحساس ومنستغربش لاني فاهماتك
مثل هد الفستان نلبسو كي نكون دارية عرضة للاحباب في داري ههه راني نحلم
ونكون طابخة اكلات تقليدية
ياااا درى مريم ؟؟؟؟ كي جيتك
اذا كان شعري طويل وكثيف ممكن جداا نعملو جديلة تكون شابة
وش رايك ؟ ولا نطلقو هههه.

راه منطبق على اخر فستان حطيتيه
ههه بقيت نشوف كنت حاطاتو مع الفستان الازرق
يااااا برديييي على نعرض الناس وانا لابساتو
هدا يليق في كش نزهة ربيعية

 

[لؤلؤة قسنطينة]

اسمعي على حساب ردك ليه ليه
منظنش قريتي ردي الداخل
فتحي فتخي ردك هههه

ههههه والله صح، حتى حطيت الرد باه قريت ردك
رانا نتشابهو والله، عندي بزاف توأمات في المنتدى منهم @faith8
من هاد المنبر نديرلها استدعاء تجي تشارك معانا ذوقها
وبالعودة للرد السابق تاعي، نفس الشي بالنسبة للفستان الاخضر
تحسيه هادىء تاع قعدة في جنان فوق ارجوحة هههه والاسود هاداك
أكديلي على التفصيلة تاع من قدام قصير شوي على من اللور تهبل هاد اللقطة هههه
عندي فستان تاع دار طويل بصح الطول لي من قدام اقل لي من الوراء
كأنو تاع الاميرات هههه نموت عليه، واكديلي على الدونتال
سورتو فساتين الزفاف لي اكمامهم طويلة وبالدونتال نهبل عليهم اصلا طبيعتي
اي فستان معري يطيح من عيني ههه نحس فخامتو راحت عكس لي الاكمام
تكون طويلة ولا شبه طويلة تجي باهية وكلاس
بالنسبة للعبدة هاديك قصدي الانسانة والفستان والحذاء والنوار والديكور هههه
على هادي قتلك كلشي عجبني، وراني درت تخيل لتصميمك باين يخرج هااايل
بالمناسبة نحب الفساتين لي الستيل تاعها تاني يكون ماش طويل خلاص وين يغطي
الرجلين وماش قصير يجي متوسط كيما لي في الصورة يجي كلاس بزاااف
نوليو لهاديك لي في الجنان، والله تقول دخلتي في عقلي والله حتى انا تخايلت
روحي لابستو في الدار هههه ومع جديلة كيما قلتي وتزينيها ببعض الزهرات الجميلة
تجي طووووب
واصلا كيما قلتي التسريحة ماش شرط التسريحة المرفوعة هاديك لي جبل
قادرة تحكمي شوي شعر على اليمين وشوي من على اليسار وتدوريه وتحكميه وتخليه مطلوق
ديجا كلاس، اصلا نحب البساطة التخربيش هاداك مانحبوش لي يلفت الانتباه
ولا حبيبتي مازال مادرتش الجلباب عن قريب ان شاء الله، بصح نلبس كيفك ههه
قوليلي وين شفتيني هههه نلبس حجابات طول يعني حجاب طويل وعريض
شكرا سمسومة على الموضوع الراقي كرقيّ روحك استمتعت بهذه الجلسة والله
بوركتي غاليتي ❤​

 

[لؤلؤة قسنطينة]

مريم
غلطت فوحد الرد لي هو هدا

ياودي على ريحة زمان نقلك عطيني يدك نتخامسو
ناو كومنت رانا فنفس الاحساس ومنستغربش لاني فاهماتك
مثل هد الفستان نلبسو كي نكون دارية عرضة للاحباب في داري ههه راني نحلم
ونكون طابخة اكلات تقليدية
ياااا درى مريم ؟؟؟؟ كي جيتك
اذا كان شعري طويل وكثيف ممكن جداا نعملو جديلة تكون شابة
وش رايك ؟ ولا نطلقو هههه.

راه منطبق على اخر فستان حطيتيه
ههه بقيت نشوف كنت حاطاتو مع الفستان الازرق
يااااا برديييي على نعرض الناس وانا لابساتو
هدا يليق في كش نزهة ربيعية

ههههه اصلا فيزوج كنت نشوفهم ملاح للدار
هادا ولا لاخر يهبلو فيزوج​

 

[faith8]

لبيت الدعوة وهاني جيت .... أونفان زدمت ماشي خخخ
هنيئا لنا توأمة جديدة ههههه والله ذوق جميل جدا أحسنت الانتقاء
واللي خيرتهم مريوم عجبوني خاصة مع الشرح المفصل
ههههه وبالنسبة ليا اللي عجبوني كيما قالت مريم ماشي فستان فساتتيين خخخخ جيت نسلع تقولي دخل للمركز التجاري
ساعفوني هههههه
نبداو مي دوموزال

آه قليع قلبي ♥_♥
خصاتة هاد السندالة يجي توب

والأكسسوارات لا شيء غير خاتم قبايل و مناقش من نفس الستيل يكون فيهم المرجان الأحمر
اه قلبي اه هههههه
يجي بزززاف راقي وخشين فاي مناسبة سعيدة تلم الاحباب والعائلة بالنواغ جاي بزززززاف توووب
♥♥♥


هاد الزوج يتشابهو نوعا ما لكن اللي بالقطيفة عجبني بزاف
شتوي دافئ راقي
لونه *-* أخضر راقي ماشي هاداك اللي يصرع العينين هههه شيك بزاف ماشي مبهرج فيه الاناقة والبساطة وهذا ما ألفتني
♥♥♥
♥


هادا الفستان بلونه وشكله تحسيه ربيعي بإمتياز مع لمسة الدونتال تحسيه كلاسيكي عصري في آن واحد
مانعرف علاه بانلي تاع وحدة مثقفة ربما البساطة اللي فيه هههه
♥♥
♥
♥

هاد الفستان رغم انو مش من عادتي يلفتو انتباهي هاد الزخارف في الملابس لكنني تخيلت نفسي ألبسه في سهرة رمضانية عائلية
لأنه عادة في رمضان يكونو حفلات تع الختان و الاسبوع مع جاي مستور ما لقيتش أمثل من هاذا الفستان
يناسب أجواء الليل والعواشير مع الأضواء الفستان المناسب في المكان المناسب ههههه
♥
♥
♥

في المقابل هادا الفستان المورد وكم أعشق الأقمشة الموردة خاصة فولاغ تكون خفيفة ظريفة وتبعث على البهجة
هادا مثالي في يوم عيد أو لمة أصدقاء احتفال بنجاح .. فرح المهم نسميه فستان البهجة والسرور ههههه
♥♥


و هادو فساتين عرس بإمتياز سواء بالأسود نرافقو بحذاء أسود كعب عالي القاع ديالو أحمر تع louis vuitton
أو اذا كانو باللون البوغدو ولا gغونا
مع حذاء اسود ♥

والماكياج يكون خفيف أي لاينر و احمر شفاه لا اكثر والمجوهرات تكون فضية سامبل *-*
♥♥
وهاداك الفستان اللي بالشابو عنها الحق مريم يرجعك للعصر البرجوازي الجميل تع الانجليز ♥
ملي كنت صغيرة نحب الستيل ديالهم بزاف حلو ومستور وراقي
لوكان نلس هكذا فستان جيبولي المضلة ديالو ونركب العربة تع الأحصنة ههههه ولا السيارات الكلاسيكية تع القرن الماضي هههه
جميل جدا ♥-♥ عصر الاناقة
♥♥♥
/
//
/

هادو يجو مع القعدات التقليدية الأعراس تع الديار والعائلة ملمومة يتناسبو نع الخمار كي تكون الخالوطة وشابين بزاف ♥
♥♥
/
/
/
/


وأخيرا هادو تاني فيهم لمسة من العصر الجميل ايضا وراهم ولاو آلا مود *-*
يهبلو ويناسبو المحجبات جايين مستورين و فيهم كمية من البساطة والرقة لا تصدق ♥
هادا نتخيل روحي فبيت ريفي مع كتاب أجلس فالشرفة مع فنجان شاي و تسريحة شعر بالظفيرة
والإطلالة تكون جبلية خلابة واسعة المنظر
ماشي غير يطلع المورال هههههه الدنيا ترميها موراك
♥♥
ايه الأحلام ياه خلوني نولي للواقع ههههه كثرت
شكرا عالقعدة الزينة وعلى الذوق الراقي اختي سمية ومريم
سعدت بالمشاركة معكم
واسمحولي طلقت هبالي بزاف هههههه اتحمست بالخيال هههه
دمتن♥​

 

[لؤلؤة قسنطينة]

@faith8 قتلتيني ضحك هههه
والله جبتيها سوا سوا حتى عينيا عادو يخرجو منهم النجوم هههه وانا نتخيل
سورتو تاع مظلة وعربة اااه يا قلبي وزيديلها فارس فوق الحصان الابيض
وهاداك الصندالة تاع القبايل واش تعجبني
من نهار شفتها في النت وانا هابلة عليها
يعطيك الصحة والله ديتينا في رحلة جميلة
وليت نتخايل روحي في الجبل قدام كوخ من الخشب وسط الاعشاب
وندور كيما الآنسة صفاء تاع رسوم لحن الحياة هههه راهي فكرتني بيه اسماء
كي حطت غنايتو في الحالة الخاصة وزدت قريت هنا ردك اكتملت الصورة
يعطيك الصحة على ذوقك الراقي يا راقية ❤
اصلا كاين بعض الفساتين عجبوني وماذكرتهمش لقيتك ذكرتيهم
صحيتي أمونة
​

 

[faith8]

@faith8 قتلتيني ضحك هههه
دوم الضحكة يا رب *-*
والله جبتيها سوا سوا حتى عينيا عادو يخرجو منهم النجوم هههه وانا نتخيل
سورتو تاع مظلة وعربة اااه يا قلبي وزيديلها فارس فوق الحصان الابيض
هههههه راكي كملتي الصورة *-* آه من الأحلام والخيال
وهاداك الصندالة تاع القبايل واش تعجبني
من نهار شفتها في النت وانا هابلة عليها
شفتيها شحال شابة تحفة ♥
يعطيك الصحة والله ديتينا في رحلة جميلة
وليت نتخايل روحي في الجبل قدام كوخ من الخشب وسط الاعشاب
وندور كيما الآنسة صفاء تاع رسوم لحن الحياة هههه راهي فكرتني بيه اسماء
كي حطت غنايتو في الحالة الخاصة وزدت قريت هنا ردك اكتملت الصورة
ايه الآنسة صفاء♥ لحن الحياة والله هو تمام التمام الطفولة الجميلة كي تجي تشوفي عشنا معاهم بلا ما نفيقو والله سوا سوا
نفس الستيل *-* والله هاديك الغنية نغليهالك عن ظهر قلب ومن قلبي ههههه مزالني حافظتها
هادي رحلة صغيرونة كاش نهار نبحرك فعالم الخيال اختصاصي هههههه
يعطيك الصحة على ذوقك الراقي يا راقية ❤
الله يسلمك من ذوقك يا غالية
اصلا كاين بعض الفساتين عجبوني وماذكرتهمش لقيتك ذكرتيهم
كفيت ووفيت اديتهم كامل ما قدرتش نخلي غاضوني ههههههههههه
صحيتي أمونة
الله يسلمك حبيبة صحيتي انتي عالدعوة الجميلة
♥​

 

[السلطانة]

لي عودة ان شاءالله حبيبتي الى هذا الموضوع الرائع بعد وضع ختم التميز ????

 

[السلطانة]

1. فاي فستان اعجبك ؟
   
   
   
   
   
2. شاركينا بما أعجبك وصفي لنا مميزاته حسب ذوقك نحب فستان سامبل
3. 
   
4. في اي مناسبة ممكن ترتدينه ؟ ممكن عرس
5. ان كان مزاجك سيءا فاي فستان تسلبينه قد يغير مزاجك ؟ : الفستان لي يجيني على القوسطو ونكون مرتاحة فيه D
6. ما الشعور الذي يمنحك اياه هدا الفستان الذي اخترته ؟ الاسود يشعرني بالقوة والاناقة مشكورة حبيبتي موضوع رائع

 

[ضآحكة مستبشرة]

السلام عليكم حبيبتي سمية موضوع رائع ينقصو فقط الطمس هههه
يعطيك الصحة على الفساتين الجميلة حرت واش نخير كامل يدو العقل بصح في الاخير عجبني واحد كثر منهم كامل ههههه​

• فاي فستان اعجبك ؟:​
• اعجبني هذا الفستان جدااااا و كثيرا​

​

• شاركينا بما أعجبك وصفي لنا مميزاته حسب ذوقك :​
• هذا الفستان بسيط جدا و فضفاض و يناسبني جدا لاني مليت من القصير ولي على لاطاي ههه​
• و كذلك اللون بزاف شباب انا وين تكون الالوان التفاؤلية هاذي نكون يعني بسييط و بااهي​
• ​
• في اي مناسبة ممكن ترتدينه ؟​
• في عرس عائلي لما يكون الاختلاط و لما نكون معجوئة بالعمل ههه شباب و يهبل تاع خدمة ماشي وقت التصديرة و الحطة​
• في بلاصة كاش جبة هذا نلبسووو خير بصح وين نلقاه ههه​
• ​
• ان كان مزاجك سيءا فاي فستان تسلبينه قد يغير مزاجك ​
• من الفساتين لي حطيتيهم ممكن نلبس هذا​
• 

  ​
• ما الشعور الذي يمنحك اياه هدا الفستان الذي اخترته​
• الشعور بالراحة لانو مستور و خفيف و لونو باهي و يهبل ​

مششكوووووووووورة حبيبتي سمية استمتعت بالموضوع ​