لا اعلم مابي ...

[Jorh]

سؤجن
سلام عليكم
ترددت بزاااف باه نطرح عليكم مشكلتي
مي في لخر قلت نتوكل على ربي ونحكيلكم
بلاك نلقا حل للصراع النفسي لي راه يدور فيا
قبل لانبدا نهدر نطلب من الادارة انو تنحي هذا الموضوع من بعد ثلاث ايام من الطرح
لعدة اسباب
المهم
الكل يعرفني يعرف منى كريم
في العالم الافتراضي
مي متعرفوهاش في العالم الواقعي
انا كأي انسان عندي قصة وعندي حياة واصدقاء والخ الخ
منى كريم ناضت واحد النهار
لقات روحها موسوسة
واش هي الحاجة لي تخلقت على جالها
ربي علاه خلقها ... هي زيادة من فوق الارض ... تساهم في انقاص الدخل العام للعائلة المتكونةمن 13،
نفرد
وليت نكره روحي ...
بالمعنى الحرفي نخزر لوجهي في لمراية منطيقش روحي
هيييي منى كريم علاه مش كي خوتها اكل يعرفو يقراو واكل واصلين واكليا يخدمو
واكليا كذا وكذا
علاه منى كريم مش ...
مشرفة عايلتها
لالا بالعكس حاطة قيمتهم في الارض
اني نهدر وهذي الفكرة جاية في راسي
ربي سترك علاه راكي تفضحي في روحك (ميروحش فكركم لبعيد ... بالله عليكم مش ناقصة )
منى كريم عندها عشرالاف خطأ في حياتها
...
هذي في جيهة
...
منى كريم علاه مبداتش تصلي كي كان عمرها 7
علاه حتاه ولا عمرها 16
وباه واضبت على الصلاة
وبكري كانت تصلي وتخلي
منى كريم علاه
قصرت في حيجابها وماكانش ومهوش لحد الان كيما قال ربي
...
منى كريم علاه ولما واضبت على الصلاة زعما زعما
علاه متصليش الفجر
في وقتو غير كي تعود تقرا
...
منى كريم عندها باك السنة هذي
اكل يتمسخرو انت تجيبي الباك
...
علاه انت ادبية
وخاوتك اكل علميين
..
علاه مكيش كي
خاوتك ... تحرقني هذي الكلمة
ومش غير في القراية في كلش
في لفحولة في لفطانة
وفي وفي
علاه مكش فحلة علاه تخلي من حقك
علاه كذا
...
منى كريم بدات تقرا
الحالة حالة قالت السنة نجيب الباك
..
فجأة ...حبس كلش
المهم منقراش ... يا جدك ولات تدخل للكوزينة ...
وتنوع ...
حزموني ورزموني وسايسوني لنطيح
في الليسي
تقرا وتقول نروح للدار ونحط نقرا
من بعد مدة
تحسب في الوقت وكتاه تصوني الساعة
باه تروح للدار
...
ولات تخاف تكون وحدها في الطريق ...
ولا تروح تقرا وحدها
منى كريم متشاركش في القسم عندها الاجابة وساكت ..
...
منى كريم من بعد مدة اخرى
نظمت وقتها
حابت تقرا وعندها العزيمة تحط تقرا
تيه في حوايج خرين
منى كريم كانت تنوض تقرا على 5
ضك ترقد على 10تنوض على 7
نهار تقرا ونهار متقراش 8


....
منى كريم تاايهة مابين
كلام ربي وواش راهي حابة
علابالهي بلي لازم تبع كلام ربي لانو هو لي راح يوصلها لواش تحب
لكن المشكل ساعة تبع عشر تخلي
...
والمشكل الاكبر لي بكاها الليالي
وسهرها ...
وقتل فيها لحياة
هو الوسواس
.....
كلمة تجبد كلمة
توصل لكلمة اكبر
...
ولات تظل في اليوتيوب مع الداعية نايك
...
حتاه جا النهار وعرفت بلي هو مجرد وسواس ويروح بالاستعاذة من الشيطان
...
المشكل ... هي مش مسامحة روحها
...
وتظال تجلد فيها
...
راحت تاني لليوتيوب
تتفرج في ابراهيم الفقي
..
ومعتز مطر
وغيره
باه تتصالح مع ماضيها
...
وهنا وقتها راهي يضيع
...
تحط تقرا تلقا روحها شاردة في الماضي وتبكي
..
...
وهنا عرفت منى كريم
بلي راهي حابت تتبدل من يومها
...
مش حابة تتعب
...
ترقد تنوض تلقا روحها
في عفة مريم وطهارة ايزيس
....
منى كريم ظهرلها مشكل تاني
....
هو كل تصرف ديرو اه هذا حرام
ربي قال هكا
...
راني تايهة بين لحلال ولحرام
بين الماضي والحاضر
بين قلبي وعقلي
...
بين منى وهديل
وهذي لخرة قصة اخرى
كون نحكيها تريوني بالرصاص ههههه
...
مشكلتي ولا منعرف وين نصنفها
انو مهما صرالي نضحك
الشي لي خلا امي تقولي معندكش قلب
....
وولات هي ولا واحد اوخر
ميهتموش لهدرتهم لي يخرجوها في
حقي عمبالهم بلي مش حنزعف
نزعف
ونخبي
وننسا ويجي نهار ونتذكر ونبات نبكي
عندي الاحساس بعد فوات الاوان ههههه
كيما واحد النهار انا وابي
كنا نقصرو عادي


قالي ههههه هو قالها بتمسخيرة
(بمزاح)
قالي اسكتي ولا نشكي بيك لبوليس
وكان قالها قبل ليا وهو مزعف مش مني
من امور هكا
المهم انا سكت وهو قعد يضحك
وانا تهت وتفكرة ذاك النهار
وقعدت نبكي
ومهدرتش معاه يومين
هو صح سامحتو بصح منعرف كيفاه نشرحلكم
...
أمممم
فهمتوني كيفاه
...
وراح تقولو وراح تقولو
راني متوقعت غير الاسوء في ردودكم
لكم حرية التعبير هه
ذك راح ننشر وشي راه يقولي ياك لازم تحكي وتشكي غي لربي
ياك كذا
ياك تسقسي غير ربي على الحل
لمشاكلك
..
لازم مطيحيش لازم متضعفيش
لازم متنكسريش
لازم كذا
لازم كذا
....
هكذا راح تغلبك الدنيا عند اول مشكل
تروحي تبكي عند منتدى اللمة
....
والله والله والله
راح نهبل
ولات الشقيقة متخطينيش مرة
ها ذك هدرت هكا
ذاك شي قالي الناس عندهم السرطان وماداروش كيفك
الناس عنهم عشرات المشاكل وماقالوش كيما راكي تقولي ولا شكاو لواحد
اذا راكم فاهمين فهموني
انا منيش فاهمة !?!?!!


ملاحظة :
عندي ازمة ثقة
نشك في كل حاجة
واي حاجة وفي كل عبد واي

 

[🌌🔮متألقة🔮🌌]

اختي العزيزة و الكريمة اطردي الافكار السلبية من رأسك
و لقد خلقت لسبب لانه لا يوجد شيئ على وجه الارض ليس له سبب
و فكري باجابية قد نشعر بالحزن احيانا
و هذا اكتئاب من الاحسن التخلص منه لانه قد يضيع حياتك كلها
و قوي روحك وديري تحفيز يلا نوضي يلا
الحياة ماهيش غير اكتئاب و بكى وصدقيني انساي و لا راكي رايحت تخرجي عن المسار
منعوضوش الماضي بصح نقدرو نغيرو المستقبل
و امني دوما انك ستحدثينا تغييرنا حتى لو كبت
هذه نصيحة من القلب

 

[الطيب الجزائري84]

انصحكم بالمحافظة على الصلاة في وقتها
قراءة القرآن بالتدبر
الدعاء وخاصة أوقات الإجابة
المحافظة على الأذكار اليومية
وفقكم الله

 

[sanaya]

سلام و الله تبانلي أنو اهلك او المحيطين بك زعزعوا ثقتك بنفسك
هاذي من جهة
من جهة بزاف مللي راك تحكي راهم من أزمات المراهقة لحلال و لحرام وووووو الحق عييت من الكتابة
يااختشي بعثيلي ايمايلك و لا رقمك مع الادارة نتواصلوا و بالاك نقدر نساعدك و لا انا نبعثلك

 

[إلياس]

نصيحتي عليك بقراءة القرآن الكريم و اذكار الصباح والمساء و النوم حاولي تصلي صلواتك الخمس في مواعيدها مع الوضوء لكل صلاة و مصاحبة الاخيار و الدعاء ان شاء الله خير اختي و ابتعدي عن كل ما هو سيء للغاية و اطلبي من والديك الدعاء لك من الآخرين
حفظك الله ورعاك أختي الكريمة

 

[جليلوس]

يا ختي نحييك على الجرأة لي عندك وعلى الإندفاع المدهش لي عندك
قريتي كتابك بيمينك الحمد لله قبل ما تلقايه لهيه في الآخرة وهذا لم يكن سوى ومضة عن حياتك
تفاءلي الخير تلقاي الخير
علابالك في هاد الدنيا واحد ماراه معصوم من الخطأومليح الواحد يتفكر منين داك واش دار ويصحح اخطائه
ربي يفرجها عليك .... نوضي صلي ركعتين وادعي ربي وخلي عليك هاد الكلام وهاد الوسواس
انعلي الشيطان يا ختي .... تهون ان شاء الله

 

[Jorh]

@جليلوس ايت جرأة من فضلك ... دائما ماكان اندفاعي سبب وقوعي وبالعامية تشرشيحي
اعلم ذلك بصح كيشغل الحاجة لي نديرها نتوسوس منها
مثلا ذاك النهار كنت نتناقش مع استاذ وكنت نخزر فيه عادي جدا مش معنى اني اتأمله ولا كاش حاجة .... من بعد فجأة تفكرت بلي لازم نغض البصر مع انو كنت عادي وقفت مكملتش النقاش وطلبت اني نخرج الاستاذ تفاجئ يو المشكل السيد شعرو شايب !?!?!
اك فاهم منعرف اذا وصلت الفكرة

 

[Jorh]

@الياس و@الطيب الجزائري84
اشكركما على النصيحة ... والله احاول
اما بالنسبة للصلاة اضطر ان اجمع مابين الضهر والعصر يومي الاحد و الثلاثاء لانو نقرا من 8الى 4عصرا ومكاش مصلى وباه نروح للدار
ميخلونيش
دعواتكم اخوتي في امان الله

 

[Jorh]

اختي العزيزة و الكريمة اطردي الافكار السلبية من رأسك
و لقد خلقت لسبب لانه لا يوجد شيئ على وجه الارض ليس له سبب
و فكري باجابية قد نشعر بالحزن احيانا
و هذا اكتئاب من الاحسن التخلص منه لانه قد يضيع حياتك كلها
و قوي روحك وديري تحفيز يلا نوضي يلا
الحياة ماهيش غير اكتئاب و بكى وصدقيني انساي و لا راكي رايحت تخرجي عن المسار
منعوضوش الماضي بصح نقدرو نغيرو المستقبل
و امني دوما انك ستحدثينا تغييرنا حتى لو كبت
هذه نصيحة من القلب

اهلا صغيرتي شكرا جزيلا على النصيحة والتشجيع المشكل اعرف كل هذا اريد التغير واريد كل هذا لكن اتوقف عند اخر لحظة
لا استطيع شي ما يمنعني اتفهمين ما اقصد
اتمنى ان لا اكون اثرت بك وبكم بسلبيتي هذه
في امان الله

 

[Jorh]

سلام و الله تبانلي أنو اهلك او المحيطين بك زعزعوا ثقتك بنفسك
هاذي من جهة
من جهة بزاف مللي راك تحكي راهم من أزمات المراهقة لحلال و لحرام وووووو الحق عييت من الكتابة
يااختشي بعثيلي ايمايلك و لا رقمك مع الادارة نتواصلوا و بالاك نقدر نساعدك و لا انا نبعثلك

قلت لك المحيطين بي يضنون اني لا أتأثر بكلامهم الحقيقة تعبت من اداء دور القوة والحيوية .... اقول لهم طلامكم لا يهمني لا كن كلامهم يضربني في الصميم وخاصة اقرب الناس الي الذين لم يستطيعو فهمي ... صديقتي المقربة لاحظة هذا الشيء لاكنها تستمر في قول اضحكي .. اضحكي... وما فائدة الضحك وداخلي يحترق !!!! .... ولكن قلت ازمات مراهقة اعرف اني في مرحلة انتقالية .... لكن لما ارى الاخرين لا يمرون بها ... هذا سؤال لا اقول انو علاه انا برك الحمد لله راضية بحالي فقط سؤال
صدقيني لا املك رقم هاتف ولا املك هاتف حتى
اما الايميل وليت نخيق منو ... اصبري ايامات نتصالح انا وياه ونحل واحد جديد شكرا لمرورك

 

[🌌🔮متألقة🔮🌌]

اهلا صغيرتي شكرا جزيلا على النصيحة والتشجيع المشكل اعرف كل هذا اريد التغير واريد كل هذا لكن اتوقف عند اخر لحظة
لا استطيع شي ما يمنعني اتفهمين ما اقصد
اتمنى ان لا اكون اثرت بك وبكم بسلبيتي هذه
في امان الله

فهمتك انت تدركين اهمية التغير لكن لا تسطعين التغيير
لتتغلبي على اليأس

شاهدي الفيديو و زوري القناة و ان شاء الله تبتعدين عن الافكار السلبية وتابعي سلسلة خطوة لتحققي هدفك

https://www.youtube.com/playlist?list=PLdFEWv5NgWAbhn_DkNr4_VOCX9qXEwCKN

 

[إلياس]

@الياس و@الطيب الجزائري84
اشكركما على النصيحة ... والله احاول
اما بالنسبة للصلاة اضطر ان اجمع مابين الضهر والعصر يومي الاحد و الثلاثاء لانو نقرا من 8الى 4عصرا ومكاش مصلى وباه نروح للدار
ميخلونيش
دعواتكم اخوتي في امان الله

ربي يوفقك ان شاء الله أجمعين