جداتي ،، نانة ،،ماني ،، حنانة ،، مذكرات لاتنسى

[أبو عاتكة]

كثير اللي صراتلو كاين اللي مازال عايش فيها وكاين اللي بقاتلو الا ذكريات واش نقولوا ربي يحفظهم ويرحم اللي مات


كي تروح لجداك زيارة ولا خالتك ولاعمتك كبيرة في السن وتكون عزيز وهي كريمة وتزغد بزاف وشاطرة حتى وهي وركايبها طاحو

الحاجة متشقيش روحك راني هذا وين فطرت واستقهويت يكثر خيرك

معليش وليدي زيد افطر راك مفطرتش زين كول الڨاطو

يا جدة علاش هذا التعب والله راني خدام وراح عليا الحال
كول وليدي مانيش مطيبة حتى حاجة
ايه نسيت حاجة واش راني ناسية....

يا حسراه يا جدة خلي عليك هاذ الشقى والله راني جيت نصبح عليك ونڨولك صباح الخير برك


اقعد وليدي تبات ؟ نطيبلك مختومة للعشا ( محاجب)

ياربي يحفظهم ان شاء الله ومايحرم منهم بيت ويرحم اللي توفاو وما يحرم الجنة لكل مومن.

هيا هتهلاو فيهم وفي رواحكم وصاحبة الصورة ادعولها لقيتها في موقع ومنعرفهاش عملت عليها الموضوع بصح عجبتني كي فكرتني بالوميمة اللي راحت ومشات.

 

[إلياس]

نشفى لجدتي رحمها الله، كانت تحكي لينا عن ايام صغرها و ايام لعشوها مع المستمدر الفرنسي و ما فعلوهم بهم ، نشفى مرة كانت تتفرج فيلم جزائري ثوري حيث قتل جنود الاحتلال اي الفرنسي احد الثوار بدات تنوح و تبكي عليه لم تسكت حتى اتى أبي رحمه الله و شرح لها كل شيء وقال لنا متزديوش تفرج قدمها افلام الثورية لانها لها ذاكرة كبيرة عن المستعمر و عن جدكم رحمه الله كيف عذب امامها ايام الثورة
هذه ما عندي من ذكريات عن جدتي رحمها الله توفيت جدتي رحمها الله تعالى سنة 2008

 

[السلطانة]

الجدات جمال من عالم آخر
يفرحو وبحطو الشي لي عندهم ويحبو يقدموه هوم

جدتي والدة أبي رحمها الله توفت قبل مانولد انا شفتها في التصاور وتمنيت كون عاشت معانا كون راها كانت حياتنا احلى

جدتي والدة أمي هي لي نعرفها مليح وتربيت عندها كانت حنينة طيبة شاطرة تخبز تطيب تسيق كباقي جدات هذك الزمان
لكن من سنة 2019 صرالها شلل نصفي
الحمد لله الحركة رجعتلها
لكن تقاست شوي من مخها عادت تنسى مؤخرا عادت تنسانا تنسى وتتخيل امور بزاف
المهم كي نروح ونشوفها تفرح بيا كي فرحة البيبي وتتونس باولادي وتفرح بيهم

ربي يحفظها ويطول في عمرها ويرحم الجدات لي توفات

 

[سكون الفجر]

يا أخي بكيت قبل كتابة هذا التعليق
عن جد الجدات حب من نوع تاني تماماً جدتي لها الآن سنتين من توفت أسأل الله أن يجعل الجنة مثواها
جدتي ام والدي لازالت على قيد الحياة لكنها من الجدات اللي ما يحبو الاحفاد هههه الله يعطيها الصحة
أنا وجدتي والدة امي قصة صداقة وحب يعني فعلاً لي معها ذكريات كثيرة لا تعد وأحمد الله على ان من علي بتلك المدة التي عشتها مع جدتي
الله يرحمها ويجمعني بها في الجنة يارب [حتى أن والدتي تقول لي اني أشبهها كثيراً قلباً وقالباً] هذا الشيء يسعدني ويشعرني بالفخر

رحمها الله ورحم كل جدات المسلمين وجعل الجنة مثواهن يارب
بارك الله فيك أخي على الموضوع القيم
الله يبارك فيكم

 

[جليلوس]

اولا ربي يرحم ميمتك وحنينتي ويجعلهم من اهل الجنة يارب
فكرتني بيامات مايتعاودوش ربي يرحمك في ديك الرقدة
بالقليل وتشبع عندها وتخرج متخوم وزيد تصرلك الصرة العولة معاك
كانت لنا جدة بمثابة ام ثانية لا تعوض خلات بلاصتها خاوية نتاع الصح كي راحت مشات البركة من الدار
سبقتني الدمعة يا خويا فريد وتصدق انو لبارح دارت ثلاث سنوات ملي راحت من هاد الدنيا

شريط الذكريات يمر امامي ياربي الصبر ياربي