حاب نتزوج....لكن

[βïģ βôşş]

السلام عليكم ان شاء الله راكم بخير
حبيت نهدر حاجة راهي فقلبي ووجعتني بزااااف
عجبتني وحدة رحتلها عرفت بنفسي وقلتلها حاب نعرف وين تسكني لاني حاب نتقدم لاهلك ونهدرلهم عليك ونتعارفو بطريقة رسمية ادا كتب ربي الحمد لله مكتبش كل واحد يكمل حياتو
قالتلي منعرفكش ووووو قلتلها حاب نعرفك وتعرفيني بطريقة رسمية بعلم اهلي وعلمك
قالت لالا منحبش هاكا
درك حاب نعرف الي حاب لحلال وطريق صحيحة كي يتلاقا مع موقف كيما هادا نضرتو وتفكيرو كيفاه يرجعو لنساء بصفة عامة

 

[السلطانة]

وعليكم السلام ورحمة الله وبركاته


الزواج لازم يكون الاعجاب والتفاهم والانسجام وقبول الطرفين لبعض

ممكن الطفلة عندها نظرة خلاف... ولاتخمم في الزواج من جيهة خلاف... ولاخافت كي عادت متعرفكش.. ألف احتمال

الأصح تتقدم لأهلها منها اذا قالولك تقدر تتقدم للخطبة تقدم اذا رفضوا بعد تجرب تنساها.

ربي يوفقك ان شاءالله اخي ويرزقك بالزوجة الصالحة.

 

[إلياس]

استخر الله ان شاء الله فيها

 

[aljentel]

يعني انت اذا شفت وحده عجبتك تقول وين ساكنه ابي اخطبك !!
في تقديري اخي العزيز ليست هذه الطريقه المناسبه وليست هكذا تورد الابل حتى وان كانت نيتك صافيه وقصدك شريف …
ربي يوفقك .….

 

[Andy_Delort]

/

النسا هاذو متقدرش تفهمهم اخي العزيز ههه
متقلقش روحك لوكان يكون كاتبهالك ربي تديها رغم انف الصعوبات ولاكان مكتبهالكش ربي
يكونلك مكتوب ماخير منها.... تيسر وخليها تعرفك وتعرف ظروفك وهكذا وانت زيد سقسي عليها وشوف وربما مع الوقت تتضح الامور

 

[dahman kz]

وعليكم السلام
بما انها عجباتك روح لدارهم واخطبها بطريقة شرعية محترمة وتكلم معاها في الشوفة الشرعية قدام والديها
علاه رايح تكلم فيها في الشارع ؟؟
الخطوبة تكون في دارهم و من والديها و ما تكونش من الشارع اخي
راهي حرمة و بنت ناس وبنت رجال و كي ترجع للدين و المنطق و العرف تاعنا ماعندكش حق تهدر معاها في الشارع اصلا .
و مفروض رفضها هذا يشرفك و مايغضيكش منه الحال اخي.

 

[Hakan]

ياخويا الهدرة من تالي ما دام قاتلك لالا ما عجبتهاش من تالي ،ماهي قضية حلال ولا حرام ولا تعارف ، طفلة كون تعجبها ياودي راهي تدخل في حيط على جالك ،واذا ما عجبتهاش والله وترفد جبل على جالها ما تقيمكش .

 

[وۣۗهۣۗہۣۗم]

شوف خوياا من وجهة نظرى كاين خلل باه قاتلك لالا كاين حاجة اوفيسيال ومكانش مراا متحبش تتستر وتتزوج وتبنى عائلة هاد شئ محال اذا راك تشوف بلي طفلة عاجباتك ومرتاح لها طريق واضح سهلها متصعبهاش احكى طول مع والدها وباه تقطع الشك باليقين استخر الله وربي يوفقك لما فيه الخير لكما

 

[خديجة ph]

من نيتك حاب تخطبها في الشارع و زيد حابها توافق في الشارع ربي يهديك يا ولد الناس
قلنالكم كي تعجبكم طفلة ابعثلها مع اختك خالتك عمتك مراة صاحبك اخت جارك ياااااااو ابعثولها مع مرأة بطلو الطبيعة هذي تاع نخطبها في الشارع زعما حب يقول راني جاي من الطريق الصحيح لالا خويا راك احرجتها مليااااار و كي قالتلك لازم نعرفك راهي لم تقصد تتلاقاك تتفرج في وريث جمال سيدنا يوسف راهي قصدت تبعثلها مع وحدة تقولها عالاقل اسمك وين تسكن عمرك و واش تخدم لازم تعرف اقل شيء هذو الحوايج باه تقولك هيه تقدم لباباها ولا راك مريح في داركم ماكالاه تشقي الحاجة
هاذي مش موح باب الواد تقصدها في قابسة شما في الطروطوار تقولك من عينيا
هاذي طفلة يا الرب الكريم راك احرجتها يا خويا

 

[الامين محمد]

اخي هناك احتمالين
الاحتمال الاول انها ماهيش حابة تتزوجك
الاحتمال الثاني ممكن غلطت كان الافضل تسأل عليها من بعيد حتى تتبين كيف امرها
و هل هي اللي راح تناسبك و تكون ليك زوجة بعدها جس نبضها عن طريق امرأة وسيطة من اقاربك
او معارفك بعدها تقرر اذا تروح تخطبها و لا لالا

 

[سماء صافية]

ممكن عندها خوف من الزواج بواحد ماتعرفش افكاره ولا حتى شي عليه
بحكم انها سمعت تجارب فاشلة..
لكن انت قلت لها تتعارفو في الخطبة وهذا شي منطقي جدا و واضح

احتمال انك لم تقع في قلبها..

 

[أفنانوه]

السلام عليكم ان شاء الله راكم بخير
حبيت نهدر حاجة راهي فقلبي ووجعتني بزااااف
عجبتني وحدة رحتلها عرفت بنفسي وقلتلها حاب نعرف وين تسكني لاني حاب نتقدم لاهلك ونهدرلهم عليك ونتعارفو بطريقة رسمية ادا كتب ربي الحمد لله مكتبش كل واحد يكمل حياتو
قالتلي منعرفكش ووووو قلتلها حاب نعرفك وتعرفيني بطريقة رسمية بعلم اهلي وعلمك
قالت لالا منحبش هاكا
درك حاب نعرف الي حاب لحلال وطريق صحيحة كي يتلاقا مع موقف كيما هادا نضرتو وتفكيرو كيفاه يرجعو لنساء بصفة عامة

لا حول ولا قوة الا بالله
حسبت تقول رفضت تعطيك مكان السكن بالاك
بصح باش حابة تتعرف بدون علم الاهل صعيبة شوي والله صح قلبك يوجعك

شوف خويا نعطيك نصيحة
ذي مقولة قريتها

لا تبحث عن النساء
بل ابحث عن الرجال
ف في بيوت الرجال تجد خير النساء

وربي يرزقك الحلال الطيب والزوجة الصالحة التي تعينك على دينك ودنياك
ولك التوفيق

 

[saho souhila]

في واقعنا اليوم اغلبهم لي يتلاقو بنت برا يقولو نفس هذا الكلام 80 بالمئة تكون دارتك منهم نتا تبعها ملبعيد ادا شفتها بنت مليحة ومحترمة روح لدارهم ديركت و خلاص

 

[حاتم خليفة]

ياطفل مش هكذا راك في مش في

من الأفضل أنه تبعها من بعيد باه تعرف وين تسكن ومن بعد قول ليماك تروح تشوفها وتسقسي عليها مليح من بعد إذا الطفلة قبلت بيك أتكل على ربي وإذا ماقبلتش بيك شوف في بلاصة أخرى​