خافو ربي في أولادكم

[خيرة الوهرانية]

- يا الأولياء ، قلبي وجعني ما قدرتش نسكت .. خافو ربي ف ولادكم نتوما السبب الأول و الأخير ف ضياعهم !
- تلاميذ ما يرقدوش ف الليل يجو للقسم يرقدو !!
- تلاميذ بلباس فاضح تحشم المرأة السوية تلبسو قدام خوها و باباها راهم يجو بيه للمدارس !!
- تلاميذ بأفكار مرعبة ( مؤخرا تعمق معي أحد التلاميذ حول موضوع الانتحار حبسلي مخي ) !!!!
- تلاميذ مع أفعال و أقوال تفوق سنهم بكثير !
- تلاميذ و تلميذات يسهرو و ما يباتوش ف الدار تحت غطاء بايت عند صاحبي و عند صاحبتي !!

- لي لفوق نقدر نجوزها عادي ، مي حكمتني القنطة كي اكتشفت انو كاين تلاميذ سنة أولى ثانوي لا يؤمنون بالله و يفصحون عن هذا دون أي حرج ،، حق ربي غير الدمعة هبطتلي و أنا ننصح ف واحد منهم ،، ما تخيلتهاش على الاطلاق .. ياو ماشي سنة اولى جامعي ، راني نقول سنة اولى ثانوي ملحدين و عن قناعة تاني !!!!!!!

- رسالتي للأولياء ، الله يحفظكم خافو ربي ف ولادكم ، والله تتحاسبو عليهم حبيتو ولا كرهتو .. ضيعتوهم بالفشوش و التقلاش .. ضيعتوهم بالحرية العمياء .. ضيعتوهم و ضيعتو أخلاقهم و حطيتولهم مصائب ف حياتهم و ف دينهم !

- حاشا الأولياء لي متحلبين للعقلية ، يزغد وليدو يزغد معاه ، ربي يخليهم و ألف تحية ليهم !

 

[إلياس]

لي عوده باذن الله إن شاء الله للموضوع

 

[ذكريات]

رانا نعانو من إستقالة الأولياء، جيل واعر ووقته واعر، وكل واحد راه بين يديه شيطان، بالنسبة للي ما يعرفش يستغل الهاتف المحمول، ربي يسترنا ويستر وليداتنا وربي يهديهم ويهدي والديهم، موضوعك أختي شائك والحدبث فيه مثل الدخول في متاهة، إن شاء الله رسالتك توصل وتحرك شيئاما في القلوب والعقول الغافلة.

 

[Hakan]

مشكلة تصيبي هاذ النوع من الاولاد والديه قارين و عندهم درجات لا بأس بها دكاترة وووو ، ربي يعافينا هذا السبب نتاعوا دائما نذكرو اهمال دور المسجد و المدارس القرآنية ،دخلوا ولادكم من الصغر المدارس القرآنية و خلوهم ثم ،اخطيكم من المدارس الخاصة هذي النجليزية وهذي فرنسية ،راهم اذا حفظوا القرآن يوصلولك بعيد والله ثلاثا غير ماشي واحد ماشي زوج نعرفهم من حفظة كتاب الله راهم في أعلى المراتب أدب وخلق وربي يحفظ ويصون خاوتنا وخواتاتنا.

 

[secret de coeur]

أهلين اختي خيرة
نقولك حاجة ماشي غير حنا رانا نشكيو من تربية اطفال هاد الجيل حتى الغرب راه عندهم نفس المشكل
يعني اصلا الوقت هذا صعيب وماشي غير على المسلمين
الأفكار الرائجة والعصر الي رانا فيه اصلا سريع بزاف ومخيف
حتى بالنسبة لواحد كبير
فمابالك طفل
علابيها دايما نقول ماتجيبش 3 وربعة وتحير فيهم كيفاش تربيهم جيب واحد ولا تنين ومدلهم وقتك
انا ضد المراقبة اللصيقة وضد ارعاب الطفل
بيسك وقتنا راه صيعب يبدا يقارن روحو بأقرانو وكيفية تعامل والديهم معاه ويولي عدوك
غير كون قريب من ولدك هذا يكفي
وماشي تجيب كازيرنة وتقولي ماقدرتلهمش.
ربي يقدر كل واحد

 

[وۣۗهۣۗہۣۗم]

وصلنا لوقت صعيب بزااف الواحد يحل عينيه عشرة على عشرة وياربي منلوموش الاولياء اللي كانووو ومازاالوو يتبعووو كل تحركات اولادهم ويسقسووو على صحابهم وكاين اللى هم اللى يخيروهم لهم السبب الرئيسي كيما تفضلتي خيتوو هما الاولياء في حد ذاتهم تلقاهم بعاد على الدين وتربيتهم 00 حتى وتلقاهم ذوو مناصب وكذاا همهم الوحيد التحواس الماكلة والشريب طونوبيلا وفيلات وهي فرات كيما نقولوو يا المزوق من برة وش حالك من داخل

ربي يسترنا ....

 

[أفنانوه]

لا حول ولا قوة الا بالله
ربي يكون فالعون ان شاء الله
ربي يهدينا ويثبتنا على الدين والطاعة ويغفرلنا

 

[السلطانة]

عندك ألف،حق،أستاذة راكي تهدري من قلب الميدان

جيل وجهو مسنطح حاشا الفئة لي متستهلش
وتفكير مخربط جاي من افكار اكتسبوها من النت والصحبة السيئة
يعني كل واحد يربي ويعس ولادو قبل ميبعثهم يقراو

موضوع مهم بارك الله فيك

+ختم التميز