مرحبااااا
فجأة أصبح الممثل التركي كيفانش تاتليتوغ الشهير باسم مهند ملء السمع والأبصار.
سحر قلوب ملايين المراهقات العرب وحطم قلوب العذارى
أصبح شغلهم وشغلنا الشاغل.
صوره ملئت الموبايلات.
الستات اتهبلت عليه والرجالة حاقدين وبيقولوا ايه حكاية سي مهند ده؟
مهند أو كيفانش عمل كليب مع رولا سعد قبض فيه لوحده 120 ألف دولار.
فنانة لبنانية بتقول: شو رولا كيف خطفت هالزلمة.
ملايين التعليقات الأنثوية على المنتديات العربية كانت رد فعل على خبر الكليب الأخير.
بنت مصرية بتقول شوفو الهانم عنيها هتطلع علي مهند حبيبي ازاي.
وبنت تانية بتقول يا بختها.
وبنت اماراتية بتقول كيف أصدق ان مهند الجميل ممكن أن يحب رولا.
وبنت سعودية مستعدة لدعوة مهند لأداء فريضة الحج بعد ما يتجوزها.
بعض المجلات بتعلن عن وجود نية انتاجية في مصر للاستعانة بمهند في أفلام مصرية.
حتى لو كان العربي عنده مكسر مش مشكلة.
مفتي المملكة العربية السعودية نفسه تدخل بفتوى بيحرم فيها مشاهدة مسلسل نور بوابة مهند الوردية للعالم العربي عن طريق قناة mbc ووصفه بانه مسلسل"منحط ومنحل"وان"أي محطة تعرض المسلسل فهي بتعلن الحرب على الله ورسوله"
المفتي وصف المسلسل بأنه "يدعو إلى الرذيلة ويحبذها وينصرها ويؤيدها وينشر أسبابها ويصور الجريمة كمادة ترى حية والعياذ بالله بدليل إنتزاع الحياء".
وأضاف ان من "يقوم على إعداد هذا الفيلم متخصصون في الإجرام، متخصصون في الضلال، متخصصون دعاة الشيطان وجنود إبليس"، "أي محطة تنشر هذا الفيلم المجرم (مسلسل نور) فإنها قد أعلنت حربا على الله ورسوله"
رولا سعد حبت تطمن البنات وترد عن مهند الاتهام بالشذوذ فقالت ان مهند فيه ست في حياته.
بس على الله متكنش تقصد نفسها لأن مجلات ومنتديات كتير نشروا صور حميمية بينهم ومن تعليقات المناقشين واضح ان فكرة قصة الحب تفزع بنات كتير عندنا.
الحقيقة أنا كنت مشدوه مش مصدق الهوس الأنثوي من ناحية .. خاصة ان عدد من المواقع نشر ان طلب تعلم اللغة التركية زاد بنسبة كبيرة بعد عرض المسلسل مدبلج علي الام بي سي ومش مصدق الاهتمام الاعلامي الغير طبيعي من ناحية تانية بالنجم التركي وسيرته وأهمية معرفة ان كان شاذ ولا طبيعي.
وزاد الموضوع أكتر وأخد حجم أكبر من حجمه بتصريحات مفتي السعودية الأخيرة!
حاجة غريبة جداً وهوس غير طبيعي .. زمان البنات كانت برتمي نفسها من البلكونات بعد سماعهم بخبر موت العندليب ودلوقتي البنات طلة تامر حسني عليهم ومهند جننتهم.
ولأن الرجالة مش أسلم فالست نانسي وهيفاء أسالت لعابهم من قبلهم.
تفتكرو طبيعي ان البنات والفضائيات والمجلات ومفتي الحرمين ينشغلوا بالكلام عن موديل أول مرة ياخد دور بطولة؟
طيب تفتكرو أمريكا هتحارب ايران ولا مش هتحاربها؟
وياترى تصريحات خالد مشعل عن الدور المصري كفاية لرد قادة حماس المطالبين بدور قطري وأوربي بديل عن الدور المصري؟
وياترى عبد السلام محجوب ليه كان رافض ان أحمد الهوان أو جمعة الشوان يكشف شخصيته .. شخصية الريس زكريا؟
وياترى هل فيه فرق فعلاً برأيكم بين أوباما وماكين ولا مفيش؟
وياترى رئاسة مصر مع فرنسا للاتحاد من أجل المتوسط دليل على دور كبير ليها في المنطقة ولا هي اتنازلت في المقابل على مقر السكرتارية بصفة نهائية؟
وياتري معقول أمريكا تحط جدول زمني لانسحابها من العراق وانجلترا لأ بعد تولي أوباما الحكم؟
وعلشان متزعلوش تفتكرو مهند هيرجعلنا تاني ولا الصحفيين ورجال الدين الحقودين هيقطعو رجله؟
:tt1: تحياتي :tt1: