خوك خوك لا يغرك صاحبك

[CHOUAIB12]

السلام عليكم خاوتي

وش راكم ان شاء الله بخير راني جديد معاكم في هادا القسم ان شاء الله نوالفو بعضانا

اليوم راح نحكيلكم على شويه من قصتي مانيش موالف نحكي على خاطر نامن بلي الشكوه لغير الله مذله
غير الله غالب لازم نديفولي مع خاوتي راني راح نتكلاتا

حاب نفهم علاه الدنيا ضياقت عليا هاكدا وكلش راح في رمشه وهنا نهدر على الصحاب لي كنت زعما نحسابهم صحاب

الله غالب ندمت على معرفتهم وكيفاه كنت معاهم . . اليوم لقيت روحي وحدي في هاد الدنيا كنت نحساب في روحي غير انا وصحاب راح نبقو اليوم لقيت روحي وحدي هههه بففف ياخي وقت

تغيضني روحي كي نتفكر ايامات قداش تغيضني كي نتفكر الوالده تعيطلي وانا خارج بزرب لناس ماتستاهلش . . قداش تغيضني كي نتفكر كيفاش نتفكرهم ونعيطلهم كي يسافرو و الحاجه نعيطلها غير كي توصل

ولا خويا لي كنت نروتاردي كي يطلب مني حاجه وهوما نوقف معاهم ونفريلهم امورهم قداش من واحد عملت ليه تصميم للمحل تاعو قداش من واحد عملت ليه كروت وتصاميم لاعمال معارفهم التجاريه كنت نقول ماعليش صحابي ولازم نحمرلهم وجهم عيب نحكم عليهم دراهم . .نكارين الخير الكف مايستاهلوهش . . . اليوم خويا دخل ضحك معايا زعما يحوس على ستيلو عندي حطلي 1000 دج بالسرقه جاتو عيب يمدهالي وهو عارفني ماخرجتش من لاشومبر عندي مده

لي يقرا هاكدا يقول طالب دراهمهم ولا حاجه . ..حاشا. . الحمد لله زايد خيري وراني كافي شري . . راني نادم على معرفتهم برك

شحال تغيضني كي نفتح البورتابل نلقى ابال تاع صاحب واحد قعد راجل معايا غير هو صاحب الصغر يجيني لدر ويسأل عليا ويعاود يرجعلي كي ما يلقانيش غير بش يطمن

كل هادا على واش على جال صراتلي مشاكل والدنيا دارت عليا الكل راحو ويحسابو في الدنيا ضامنه

اليوم عرفت شكون الصاحب شكون الخو وشكون العدو

ليام تدور و راني عارف هادا ابتلاء ومشاكل لي راهي عليا راهي امتحان من عند المولى

خاوتي حبيت نقللكم واش راني نعيش وش تعلمت من هاد الدنيا لي قل خيرها

صاحبك هو ذراعك تعلمت نتهلى في عيلتي على خاطر لقيت غير وقفت خويا وضحكة اختي وبسمة الوالده بالدنيا وما فيها وطلة صاحبي في يوم شدتي و الله ما ننساهالو

مستحيل نطلب انتوراج احسن من هادا ربي اعطاني نعمه واليوم خلاني نشوفها بعد ما كنت اعمى من الرماد لي في العينين وصحاب الخاينين


ربي يفضلهملي

تهلاو في رواحكم و ربي يخليلكم ناس لي تعزوهم

اني خارج من المنتدى حابكم تتهلاو في ارواحكم وان شاء الله كاش نهار نرجع للمه باسكو راهي غاليه وصعيب نفرط فيها فيها عرفت اروع ناس

ربي يحينا ونتلاقاو في ساعة خير ان شاء الله

 

[الخيزران]

بوحك تلقائي و رائع اخي شعيب
نراك بخير دوما لاأطال الله غيبتك
​

 

[CHOUAIB12]

بوحك تلقائي و رائع اخي شعيب

نراك بخير دوما لاأطال الله غيبتك​

مرسي عليك اختي وربي يفضلك

 

[alardo]

السلام خويا شعيب

انا تعجبت لانك تصمم لناس بلا مقابل؟؟
صدقني الوقت هذا ميستاهلش الطيبة لذي الدرجة ، وكما علابلك بلي في وقتنا كثرو لي يقولو هات وما يعرفوش آك
كلنا تقسنا من احبابنا و اصحابنا ..... و آخرتها ...وجاعة الراس و قلة الصحة
الواحد من التخمام على مكان والو ولا هو و الداجة واحد
كيما يقولو عبد بزوج كيلو بطاطا

لي ميسألش عليك ممكن عندو عذر و الا همو هو اكثر من همك انت و احوالو متسمحش حتى باه يخرج من الدار
لكن لي يلعبها رايس و الباقي خدامينو هذا الله يلعنو
تعرف خويا شعيب انا "اصحابي تاع الجامعة" ما تلاقيتش بيهم غير مرة صدة في الصيف هذا
سألت عليهم عيدت عليهم و لا واحد قال نعيط نسقسي عليه واش عايش و الا لا
لكن مش نستنى في حتى واحد يسأل عليا على خاطر نعرف شكون صاحبي حتى لكان بعيد عليا ب100 سنة

المهم
نتمنى ليك حياة سعيدة خويا
و ربي يبعد عليك ناس الشر

إحترامي
​

 

[دقات قلب * sali*]

السلام عليكم ورحمة الله وبركاته


علابالي خويا بالاك يكون مدحنا مش باهمية انو رسالتك توصل

لكن قبل اسمحلي نقلك انو شابة رسالتك وفي الصميم

تلقائيتك وبعفويتك الي حكيت بيها يفهمها كل واحد منا وتدخل قلبو

شكون منا ماعاش موقف كيما انت وشكون منا مافاتت عليه شدة

والله ياخويا كل واحد فيينا عاش مرحلة صعيبة وقاسية تختلف من واحد لاخر

حتى انو الواحد يحس روحوا كبر 100 عام بصح يقولوا الضربة الى متكسرش تقويك

ومول النية الا مربحش يسلك على خير

ماتندم على حتى حاجة الشدة توريلك وتمدلك درس

كون مش هاد الدرس متحسش براحة الى راك تحس بيها اليوم

ومعرفتش قيمة اهلك وصاحبك مليح كيما عرفتها اليوم

وهادي دنيا دالات ومول التاج ويحتاج واليوم عليك وغدوه عليهم


ارمي وراء ظهرك وقالك دير الخير وانساه ودير الشر وتفكروا


ربي ينولك على قد قلبك ونيتك خويا لعزيز

ويحط في طريقك ولاد الحلال ويفرج عليك

الله لا يغيبك خويا ربي يفرح قلبك وينوروا


تقبل مروري واسمحلي على الاطالة

بصح كيما يقلك مايحس بجمرة غير الى عفس عليها



تحياااااااااااااااااتي


الجزائــــــر sali ​

 

[عائد.26]

شكرا على كلامك الرئع مي لازم دير في بلك الدنيا هادي تجارب مي متقولش كامل الاصدقاء كيف كيف وكاين قصة جرب بها احد الولدين لابنه كان يدعى بصديقه فلان يقول له صديقي فلان فلان.... وفي احد الايام قال الاب لبنه بغي نجرب صديق فلان واش رائيك رد الابن على ابيه قلو جربو قل لبنه جيب شات من المرعى وذبحها ثم غطيها وترك غير دمها يبان
وقلو اروح لعند صحبك وقلو ذبحت واحد وقلو يجي يدفنه معاك ولما راح الولد لصديقو فزع وقلو لا وكي عاد الابن لابيه قلو صح واش قلت وقل الاب روح لصديق فلان وقلو واش قلت لصحبك وقلو ابي قتل انسان وهو يطلب منك المساعة لدفنه وفي تلك الدقيقة خرج صديق ابوه مسرع من غير ما ينتبه للبس حذاء نتعو وعندم وصل قلو هات فاءس ورفش باش ندفنوه ومن ثمة رفع صديق ابوه الغطاء فوجد شات مذبوحة ومن ثمة احظر الوالد لصديقة العشاء وقل له الصداقة تعرفها عند الشدة ولايس في وقت الفرج

 

[محمد.م]

وعليكم السلام ورحمة الله وبركاته ومغفرته

ولا يهمك شعيب

ارمي خلف ظهرك وابقَ سائراً على ما أنت عليه

فهم من خسروك وأنت ربحت نفسك

لا تجعل أهوال الصدمات تجعلك في معترك بينك وبين نفسك

ولا تجعل لطعنات الغير أثراً فيك

واجعل صراخك صرخة رجاء من الله

لا تتوقف عن إبداعك لكن لا تجعلنا في سجن حزنك نتألم لك حبيبي

بارك الله فيك وحفظك من كل شر

وقيّض الله لك من يصاحبك ويحبك فيه وله

وقبلة على جبينك اللجيني يا أيها الطيب الخلوق يا أحلى شعيب