سلام الله عليكم الكل فرد فرد وجماعة جماعة وجزائري جزائري لخطرش وحدنا وحدنا:sadwalk:
اليوم حبيت نعرجوا شوية على موضوع (LES RESEPTION عندنا حنا
اي وحد النهار ترسمت وحدة المخلوقة تخدم معنا و لصقوا فيه الزملاء باش ديرلهم عرضة كيما نقولوا حنا في الدارجة الفال :sheer:
المخلوقة حشمت وقررت باش دير الفال نهار الثلاثاء لعشية منخدموش و ماديرش مشاكل لعمرها
كتبت اعلان لصقاتوا في قاعة الاساتذة انوا كاين عزيمة نهار الثلاثاء لعشية شكيت الجماعة بدات تصوم من نهار الاعلان باش توفر بلاصة تعمر فيها الماكلة نتاع العرضة
ويجي الثلاثاء العبد يحشم مايروحش تقول تتكبر و تحسب روح قررت انا وحبيبتي نروحوا
بمجرد درنا دورة نتاع ليكول لحنا عينا صف نتاع الاساتذ و اولادهم اكثر من الصف نتاع التلاميذ نهار لقراية و كل وحدة هازا صاك كابا باش تعمر فيه
دخلنا و قعدنا و بدأت المأكولات و المشروبات وووووو هي تحط والناس تهز تاكل خرجوا تعادل
دخلنا لشوط الأضافي شوط نتاع الحلويات و الطارطة يخاوتي الطايح كثر من النايض الرجال والنساء و لولاد أختلاط الحابل بنابل زادت نسبة اكسيد الكربون ونقص الاكسجين احمرة الوجه
سبحان الله قولشي خرجوا من عصر المجاعة وماشافوش الماكلة من دهر
واشي هذا واش صرا تسمع غير الصوت القضم يخرج بين الثغرات
وانتهت العرضة و انتهى كل شيئ ومابقي في القاعة غير ليكيسات و جوطابل تتلاوح الكل أكلى وشرب ومسح فموا غير عمي العساس كان يعس علينا ونسينها هذا رد الجميل نتاعنا ليه
على امل اللقاء في عرضة وحدة اخري انشاء الله :re_gards: