والله أحنا الززايريين ظهرنا نكارين العشرة وأقلال الخير ...
من يوم 10 ماي وبعد انتخاب المزلش الشعبي الأفلاني وأحنا غير نسبوا وندوا ونلعنوا في المزلش ونتهمو السلطة بالتزوير.
لكن هاو المزلش يا سيدي جاب فايدة للززاير ...
قالك يا سيدي المزلش نتاعنا كلاساوه في المرتبة 20 على مزالش العالم ....
مكمش مآمنين ؟؟؟؟؟؟؟
والله غير صح بالصح ماشي في النزاهة والترونسابرونس والخرطي إلي طرشولنا وذنينا بيه، قالك تكلاسا من حيث التمثيل
نتاع النساوين راهم الله يبارك بالزااااااااافففففففف
شفتو كيفاش المزلش هذا جاب حاجة للجزائر مكناش نحلمو بيها ... كاش ما جابوها نتاع البالون و التلفزيون وغيرهم ؟
وزيد المزلش ضرك الله يبارك تلقاه مفحفح بالروائح الطيبة راهم أكثر من 100 نائبة ربي يلطف بينا كل وحدة تحط نوع نتاع ريحة يولي المزلش كالجنينة المنورة وزيد حتى النواب ضرك يوليو يهتمو برواحهم ويحكو الحطة لعل وعسى ....
وزيد ضرك مبقاش النواب يزرطو ورايحين تشوفو دائما الكراسي مليانة
إمالا أفرحو بمزلشكم ومكلاه تكونو نكارين الخير