تجربتي في نوم طفلي

[أمــ وليــد الجزائرية]

رد: تجربتي في نوم طفلي

ام الحلوين

يعطيك الصحة على الإضافات
رني في المتابعة
نحاول نستفاد من كل نقطة من تجاربكم

ربي يحفظكم و يخليلكم ولادكم
​

 

[ام الحلوين]

رد: تجربتي في نوم طفلي

نحكي شوية على ولادي
بنتي الاولى كي كملت عام زاد خوها (اي ابني الثاني ) بديت نرقدها في صالون وحدها (ماكانش عندي غرفة زيادة ) و نحيتلها لاكوش (اعزكم الله )في الليل برك و نفرشلها بلاستيك و فراش شوية خفيف لي نقدر نغسلو في المشينة و الحمد لله ماكانتش تعمل يوميا مرة في الاسبوعين من بعد بدات مرة في الشهر و لا الشهرين مع انها كانت عايشة في الحليب ترضع 3 مرات في الليل و مع الوقت قطعت التبول نهائيا في الليل و كي كملت عامين نحيتلها تاع النهار و الحمد لله مالقيتش صعوبات معاها و تعودت في مدة قصيرة

 

[ام الحلوين]

رد: تجربتي في نوم طفلي

و ابني كي كمل عام و 7 اشهر بديت نرقدو مع اخته في الصالون و قطع التبول (اعزكم الله ) تاع الليل و لاكوش تصبح ناشفة من بعد عملتلو كيما اختو نحيتلو لاكوش و نفرشلو فراش و بلاستيك تحتو و في نفس الوقت نحيتلو تاع النهار و تاني مالقيتش صعوبات معاه
و العام لي فات كنت حامل و لا يرقد في بلاصتو و في نص الليل يجي عندي تقريبا شهر بصح مانخليهش يرقد معايا بسكو خفت يوالف و الحمد لله كل ما يجي نرجعو لبلاصتو حتى والف و مابقاش يجيني
و درك راني مع بنتي هذي مازالت صغيرة و اذا كتب الله نتبع واش عملت لخاوتها

ربي يحميهم و يفرحنا بيهم و يرزق كل متمنية

 

[hadda0425]

رد: تجربتي في نوم طفلي

طبعا اي ام تعاني من النوم تع اولادها وحدة انا
اولادي متعلقين بيا وبالرضاعة لازم يباتو لاصقين فيا لوكان نتحرك يتحركو معايا
مدة الرضاعة وانا نتعافر معاهم وخاصة لما يكونو صغار ويجيهم الم في كش بلاصة وما تفهميش وين نبات هازة طول الليل
ايظا االرضاعة كي السوسات جيست نحيهالهم يفطنو لازم نرقد على جنب مدة اكثر من عام هههههه
نروح ندير لعشا ونرجع نكمل
​

 

[أمــ وليــد الجزائرية]

رد: تجربتي في نوم طفلي

hadda0425

تبانلي سوفريتي بزااف اخالتي ربي معاك

رنا نستناوك ترجعي سينو تعلمي من تجارب الي فاتو حكاو و سيها في الي رهم جاين :d باه تشوفي ولا تنجحلك التجربة
​

 

[ام الحلوين]

رد: تجربتي في نوم طفلي

طبعا اي ام تعاني من النوم تع اولادها وحدة انا

اولادي متعلقين بيا وبالرضاعة لازم يباتو لاصقين فيا لوكان نتحرك يتحركو معايا
يا الزينة نتي ولفتيهم يلصقو فيك
مدة الرضاعة وانا نتعافر معاهم وخاصة لما يكونو صغار ويجيهم الم في كش بلاصة وما تفهميش وين نبات هازة طول الليل
كي يبكو حطيهم و دبخي خير من الهزان
ايظا االرضاعة كي السوسات جيست نحيهالهم يفطنو لازم نرقد على جنب مدة اكثر من عام هههههه
انا نرضع و نرمي في السرير مانقرب حتى واحد ليا هههه حتى التقراع مانقرعهمش نقول في قلبي حتى الصباح و لي حب يتقرع يتقرع ههههه
نروح ندير لعشا ونرجع نكمل
بصحتك العشا و رانا نستناو فيك
سلامي ​

 

[ام الحلوين]

رد: تجربتي في نوم طفلي

ام الحلوين​

يعطيك الصحة على الإضافات
رني في المتابعة
نحاول نستفاد من كل نقطة من تجاربكم ​

ربي يحفظكم و يخليلكم ولادكم ​

الله يخليك حبيبتي ربي يعطيك واش متمنية

 

[امونة الشاوية]

رد: تجربتي في نوم طفلي

موضوع قيم مفيد لاكتساب الخبرات
في ابني الاول تعذبت معاه يبات يشوف ويبكي لدرجة راح اصاب بالانهيار الى ان قفل 4 اشهر تعدل نومه
اما اختو واش نقولكم ربي يبارك ترقد من 9 والصباح تصبح معايا حتى ل10 حتى نوضها انا نرضعها لما صدري يوجعني والسر
انو انا لما رضعتها وبحكم اني اكولة :d:dالحليب يكون عندي غزير ولما نرضع بجهة يسيح من الجهة الاخرى نولي لما نرضعها نحط منشفة على صدري الجهة الاخرى اللي ما نرضعش بيها وتتعمر بالحليب
وتكون فيها ريحة الحليب وانا من المرة الاولى كنت تلاقيلها المنشفة باش تحكملها السوسات وهي تبات تشم في الحليب وترضع السوسات وتقول راني عند ماما ههه كلحتها:p:p:p وعمري بت معاها في الليل نشوف غير في الايام اللي تكون مريضة
اااااااا نسيت ونوض نعسها لا تولي عليها المنشفة و نغسلها يوميا لاني زيدت في الصيف والحليب يقراس

 

[امونة الشاوية]

رد: تجربتي في نوم طفلي

وتاني اولادي 6 اشهر نحاوزهم من الشومبرا ويرقدو وحدهم ونريقل البوتابل كل نصف سا نطل
بزاف يقولولي كيفاه تقدري ما ترقديهمش معاك بصح انا نشوف مصلحتي ومصلحتهم درك ابني 8 سنين وبنتي 3 سنين ونصف ما يطمعوش في السرير وما يفوتوش للشومبرا وحتى اللي يجيني الضياف لما يدخلو الاولاد يموتو يوليو يعيطو ام دخلو للشومبرا
وصاحبتي كانت تقولي انت ماشي حنينة هه وولدها ترقدو بينها وبين زوجها ودرك راهو 4 سنين
ومرات تجي تشكيلي نقولها بسلامة حنانتك لا تقدري درك تخرجيه من السرير

 

[ام الحلوين]

رد: تجربتي في نوم طفلي

تجربتك رائعة اختي امونة
ربي يحفظلك وليداتك و العقوبة للثالث :up::up:

 

[امونة الشاوية]

رد: تجربتي في نوم طفلي

تجربتك رائعة اختي امونة
ربي يحفظلك وليداتك و العقوبة للثالث :up::up:

الله يخليك اختي ام الحلوين
رانا فيها انا حامل ودرك راني عندي 5 اشهر وسمانة وعندي طفلة وراح نسميها ان شاء الله اسماء
ربي يحفضلك اولادك ايضا ويخليهملك

 

[أم أمين23]

رد: تجربتي في نوم طفلي

مشكورين على الموضوع واكيد راه كاين كثير منا يعاني من هاد المشكل
نحكيلكم تجربتي
الاول والثاني كانو في زوج كارثة الرقاد في الليل اشكال كبيرلازم الرضاعة ليل كامل والا الهوان في اليدين بالصح المشكل ماشي منهم كان منا حنا لخاطر كان المخلوق تاعي ما يحبهمش يبكو الا فاقو لازمني انوض نجري نهزهم ونسكتهم وعلى بيها كنت نخليهم راقدين حدايا ويرضعو كل ما فاقو واحيانا كانو يفيقو برك شوي ويرجعو وانا ما نحبش انوضلهم لكن مخلوقي يديرلي حالة وانوض يجري يهزو فوليت نهزهم نرضعهم بمجرد ما يفيقو هاد كي كانو بيبيات والاول حملا بالثاني وهو كان يرضع ففطمتو وعوض الرضعة بانو يرقد وهو حاكم يدي ليل كامل والا نحيتها افيق وحتى كي جا خوه بقى في نفس العادة نبات نص ليه ونص لخوه وبالشوي نحتهالو تقربا في سن 3 سنوات كنت نهدر معاه وهو من النوع الي يسمع نقولو راك وليت كبير ولازم ترقد وكان يسمعلي وطبق وولى هو وحدو اقولي ماما اريد ان انام وحدي بالصح لازم يبقى خوه معاه وبما انو خوه كان مازال يرضع نرقد معاهم حتى يرقدو وانوض بالصح كل شوي انوض واحد ونولي رايحة جاية والا ما رحتش انا يجيو هوما نرجعهم كل مرة حتى والف الكبير ومن 4 سنين ما عادش ينوض خلاص من بلاصتو غير للحمام وفي الاول كان كي ينوض اعيطلي وبالشوي ثاني نحيتهالو ولى ينوض وحدو بلا ما انوضو وبلا ما يعيطلي
اما امين فماوال للان ما نحاش النوضة من بلاصتو ويجي عندي والمشكل ثاني مخلوقي خاطر كي يفيق هو يكون حاب يروح للحمام ادا فقتلو انا نديه ونرجعو لبلاصتو اما باباه اروح يجيبو عندنا للشمبرا مالا هو ولى كي ينوض ادير طنطانة بالبكا باش يجي باباه يهزو ويحطو معانا

 

[أم أمين23]

رد: تجربتي في نوم طفلي

طولت بالصح نكمل معليش هههه
وضرك مع الطفلة الجديدة راني بدلت السيستام بالصح هي ثاني اعقل من الولاد لخاطر حتى كي تفيق في الليل صوتها ماشي قاوي تبكي شوي برك وترجع ترقد ما تقلقش
وزيد من النهار الاول ولفتها ترضع وتكون شبعانة نحطها في بلاصتها ما تفيقش الا مرة والا مرتين ونعاود نحطها في بلاصتها ترقد رحمة ربي الحمد الله
وبالصح امين مازالو في نفس العادة خاصة الا فاق وانا لاتية في الرضاعة يروحلو سي باباها ويجيبهولي وينوض تقريبا مرتين او ثلاثة في الليل نخليه يرقد ونعاود نردو ازيد ينوض وضرك وليت نعيط عليه يخاف يسكت ويرجع يرقد بالصح يرقد اخر واحد وانوض اول واحد وساعات كي ينوض يشعلو باباه التيفي حتى لة كانت 3 تاع الصباح لخاطر هو اكون يحلم ويبكي على براعم اروح باباه يجري يشعلو التيفي وراني نربي فيه وفي باباه ضرك كل صباح نصبح نوصي وقبل وما نرقد كيف كيف : الا فاق وكنت لاتية مع اختو اديه الحمام ورجعو بلاصتو ما تشعلو التيفي ما تجيبو للشومبرا والحمد الله بداو يتربو شوي هههه مازالي برك الفيقان بكري

 

[ام منصف]

رد: تجربتي في نوم طفلي

امونة الشاوية
تجربتك رائعة وتستحق التطبيق
امالا ما عليكم غير اللي راهي بالحمل تقرا تجربة امونة وترجعلنا الخبر
فكرة المنشفة مليحة كلحتي بيها صغيرك مسكين :up:
بخصوص نوم الاطفال مع الوالدين فهذا امر محرج شوية عليها لازم كل ام تولف ابنائها النوم في شمبرتهم الخاصة
شكرا لمرورك الطيب
​

 

[ام منصف]

رد: تجربتي في نوم طفلي

بالمناسبة امونة الف مبروك الحمل اختي
ربي يتمملك بكل خير
​

 

[ام منصف]

رد: تجربتي في نوم طفلي

أم أمين23​

اشرت الى نقطة مهمة انو الطفلة ماهيش كيما الطفل في كل شيء تقريبا وفي النوم خاصة اللي هو موضوعنا
يعني اضافة الى مراعاة الفروق الفردية بين الافراد هناك فروق بين الجنسين
بارك الله فيك على المرور
​

 

[ام الحلوين]

رد: تجربتي في نوم طفلي

امونة ربي يكمل حملك بخير و يعطيك وقفة ساهلة

 

[راضية حامدة]

رد: تجربتي في نوم طفلي

السلام عليكم

مازال ما قريتش وش فات لكن نحط بعض التجارب قبل ما ننساهم


الرياضة قبل النوم اي اننا نعملو ماساج و بعض الحركات للطفل قبل النوم حنا الكبار كانو يديروها بزاف و الان بداو يتخلاو على هذه العادة الجميلة و النافعة


و كذلك لي تيزان خاصة المعروفة بمفعولها في التهدئة و التنويم
و يا ريتها تكون طبيعية و معروفة

مثلا مشروب نجمة الارض هي من التوابل نستعملوها في بعض الماكولات
بزاف لي جربوها يغلوها و يمدو للطفل يشرب تيزان تاعها عندها مفعول مليح في تنويم الطفل
و كاين تيزانات تع اعشاب اخرى مثل البابونج و اليانسون
حنا هنا في الجزاير ما نستعملوهمش بزاف

 

[hadda0425]

رد: تجربتي في نوم طفلي

hadda0425

تبانلي سوفريتي بزااف اخالتي ربي معاك

رنا نستناوك ترجعي سينو تعلمي من تجارب الي فاتو حكاو و سيها في الي رهم جاين :d باه تشوفي ولا تنجحلك التجربة
​

ايه فلة سوفريت شوية معاهم في الليل
مع بنتي الاولى والله ما شفيت كيفاه تربات كانت حتى هي متعلقة بيا لكن ما مرضتليش و الحمد لله
لكن حنين وادم شبعت معاهم المر على خاطر كانت السخانة ديما تطلعلهم خاصة في الليل
يعني 2 ولا 3 تع الصباح تلقايني في السبيطار نجري
سوفريت معاهم في وقت الرضاعة من بعد كي ينحيو الرضاعة يبداو يعتادو على النوم عادي
كي كانو صغار كيما قالت راضية حامدة نديرلهم مساج تع زيت الزيتون انا ديما نمسد ولادي وحدي نهار بنهار نديرلهم مساج ونقمطهم يرتاحو ويسخسخو في الرقاد او نديرلهم دوش دافي لكن بعض الايام تمر عسيرة
ولادي الحق يرقدو معايا حتى 3 سنين
مع بنتي الاولى كانت معايا وهي عمرها 4 سنين بحكم كان عندنا الضيق مكانش وين ترقد كي شرينا سكنة خصصتلها غرفة وحدها وكانت بنتي الثانية كملت معايا عام وحطيتها مع اختها
بقى ادم في هاد الصيف نبدا نولفو وحدو هو يحب يرقد مع خوتاتو لكن انا نخاف عليه بحكم انو تطلعلو السخانة في الليل خفت ما نفطنش عندو
لكن نشوف بلي راهي حبست عليه والحمد لله كيما قلت هاد المرة نحطو مع خوتاتو حتى نخصصلو غرفة وحدو باذن الله
لكن الرقاد تع الطفل يتعب يتعب مهما رقد معاك او بعيد عليك

​

 

[hadda0425]

رد: تجربتي في نوم طفلي

:p:p:d:p:p نخلي ردي للموضوع القادم