اللهم صلي وسلم وبارك على سيدنا محمد وعلى اله وصحبه اجمعين
هذي تحلية للاخت ام اماني لكني غيرت فيها غير شوية ان شاء الله تعجبكم
faux تيراميسوسميت بهذا الاسم لانها تشبه التيراميسو لكن بمقادير مختلفة راح نعوض جبنة الماسكربون بالياؤؤرت والقهوة بشراب الفراولة ونعوض الكاكاو بالشكولة البيضاء راح نتحصل على تحلية رائعة
المقادير:
راح نعطيكم مقادير تكفي حوالي 4 اكواب
كمية من بيسكوي بودوار
2 علب ياؤورت ذوق فراولة
4 م ك كريم شانتيي غبرة
كمية من الفراولة
لتحضير شراب الفرولة نحتاج الى
100غ فرولة +م ك سكر رطب + قطرات من الليوم يعطيلها ذوق رائع ام اماني مدارتش الليمون
للتزيين
شكولة بيضاء
حبات فراز
كوكاو افلي
الطريقة:
اولا نطلع الكرم شانتيي غبرة مع كمية من الحليب الباااارد انا نضيف الحليب تدريجيا ونخلط بالباتور على اقصى سرعة حتى نتحصل على القوام المطلوب
نضيف 2 علب ياؤورت لكريمة الشانتيي انا استعملت ذوق الفراز ونحرك هنا راني ماضفتش السكر للكريمة لاني ضفتلها الياؤورت ولي يحب الحلاوة بزيادة ممكن يضيف نصف م ك سكر رطب
من جهة نحط 100غ فراز مع م ك سكر رطب وقطرات من الليمون في الميكسور راح نتحصل على شراب الفراولة
حتى يولي هكذا شحال يجي بنين هذا الشراب
نقطع لبسكوي بودوار
طلعت شانتي واضفتلها ياوورت فراز انا استعملت علبة واحدة
الان نحضر الاكواب نحط كمية قليلة في اسفل الكوب
من بعد نحط البودوار في شراب الفراولة مانخليهش يتشمخ قيس ماندخل في الشراب نعاود نخرجه ونستفو فوق الكريمة
نعاود نحط كمية من الكريمة ونحط فوقها فراز مقطع
واخيرا طبقة من الكريمة انا غطيتها بساشي
نغطي الاكواب بورق الشفاف ونحطهم في الثلاجة من 3 الى 4 ساعات
من بعد نزينهم بالشكولة البيضاء المبشورة درتلها غير في الوسط واضفت كوكاو افلي في الجوانب وحبات من الفرازفي الوسط مع اوراق من الحبق او النعناع انا درت حبق باش يعطي لون ونقدم التحلية
هذي الصور في عز النهار لكن الله غالب تلفوني ميصورش غاية
يلا تفضلو متحشوش هههههههههههه
وهنا عملتها في مول صغير خرجت هايلة
اضفتلها كاكاووشوية كوكاو محمص ومرحي في الجوانب
