يامضنوني... بقلمي

[medcherif03]

يامضنوني علاواش حاير متنكد***مول الملك الله هو مصرف فيه
طاوعني خليك ق حدثني و اقعد***لا تكثر على القلب بالهم اترديه

رفيقي جايح مولا اخشانة متعند***ماجرب محنات كولش مستهزيه
ضنيتو مصدوع في القلب امكبد***كي مسيتو فلجراح رقرقلي عينيه

حدثني و اتفش عني لا تجحد***من سرك لا تخاف في قلبي دربيه
اسكت مدة و زمان خمم واتنهد***و حلفني ع السر عندك لا تفشيه

يا محمد قاللي كنت هاني مسفرد***و متفنطز وحدي و شري كافيه
عايش متهني في حياتي مسسعد***ما نعرف عثرة قليبي حاكم فيه

نعت الطير الحرعايش مسوحد***و اللا افحل آدمي البر مسخليه
حالي حال اسبع في الغابة يرعد***تستحذر منو كل شي طايع ليه

و اليوم ملكني ضر فيا نا يلهد***صدالي ذالقلب على طول مرشيه
راك تشوف الحال وجهي متجلد***تحلف تلزم ع ثلاثين لا تعطيه

مدة عام ونص ولا نقول ازود***حاس قلبي هوداس واعر مصنكيه
يامحمد قاللي من شوفتها نجمد***خطفت لي قلبي و انا نخزر فيه

سلبتني و داتني مسجون امقيد***لامن سلكني من حكمها وقبلت بيه
ما نعرفش النوم عنها ما نهمد***الساهر مثلي طول الليل امسريه

مرة على مرة تجيني كي نسهد***نوض انازع كي الحمى ماتخطيه
يامحمد شوف حالي راه اتهد***انصحني في حالتي ليا كون انبيه

اقصبلي في الراي هاذالقلب اشد***دير الواجب ضانك حاكم و افقيه
قوتلو يا مكشوف من لول عود***و اصدقني في القول عليا ما تخفيه

أنتيا متعنتر في رايك متعمد***و داخل بحر الهوى وحدك متعنيه
ضنيتك يا صاحبي فايق مترشد***وفي الظاهر تدري ذالعلم وتحصيه

نعرف ضرك راه في القلب يهدد***وريني من كانت في السبة تشويه
مون عني و قالي دونك ذالمعهد***أرفد راسك شوف للصريات ألهيه

يا خوتي مقواه الا يبات يعدد***بنت العز اللي الناس تقول عليه
معروفة في النسب ع الأب والجد***المخول مشنوع من ينسب ليه

يامضنوني خوذ بنصيحة حد***وش مديك الصور عالي متعنيه
ماهو مستواك يا ودادي شد***و اتمعن في ذالطريق امشي خليه

ماتلقى عندي الحل اللي يسعد***تحتم مرة ع المر ولا ديمة تحسيه
صاحب ضني جات دمعاتوع الخد***اتبكم فلسانو وطاح على اركابيه

حكمتني ضيقة على مطبوع القد***و ماهو بساهل حتان انفرط فيه
لازم لك تجنى من البر اتحيد***واتبعد ذ المرسم على الشوفة تخطيه

اتلفت ليا و قال لي يا محمد***حكمك قاسي طاح ع القلب مفنيه
يا ودادي روح بدل ذ المقصد***وهني بالك قا من ضركة خليه

هذا نصحي ليك و ربي شاهد***العالم بالجاية حاجة ماتخفيه
ملس من طينك هذا ما نقصد***يسجالك كيما الناس تقول عليه

اتبع في واد جاهل عنك يجلهد***ويلا جا محمول كولش ما يخليه
احمد ربي كول الطعمة بالقد***و لا اتشرك فمك بالطعمة تمليه

ماعنديش منين اندخل هاذ اليد***و مانعرفش الحل و ابخلتك بيه
انت تلعب بالنار في فم الاسد***ويلا عطبك راه جرحو ما يداويه

خذ رايي خليك نوض اسقعد***و استغفر مولاك للقلب ايشافيه
هاذ الضر قداه من قبلك لهد***أمرا و اسلاطين كامل طاعت ليه

فيهم من تلقاه فالجبانة راقد***و فيهم من اخرج من عقلو نسيه
موحال من القى ماتمنى يوجد***و قليل من وصل ما كان متمنيه

سقسي ذي لجيال تحسب واتعاود***لا من جا في خاطروومستنيه
أطلب لي ربي قلبي يتقيدد***ننسى أمبريم اغرامها نخطيه

يا عظيم الجاه مشعالو يبرد***طفي لو ذالصهد سلامات عليه
بدل لو محبتها بمصطفى لمجد***يبرد لو ذ الخاطر و اتكاكيه


تمت بقلمي medcherif03

​