croissants et pain au chocolat اخدميه في نص نهار وداعا للثلاجة والتذكير بالاصابع 100%ناجح،
اسعد الله اوقاتكن يا اخواتي اللاتي لم تلدهن لي أمي وتحية كبيرة للاخت سكون الفجر
ههه ممم الحلقة للي فاتت تاع المسمن قولتولي واش راكم هه
نتمنى راكم ملاح
:bravo01:كرواسو تحضيره بوقت قصير ويجي خفيـــــف الله يبارك :thumb_up02:
اتمنى من صميم قلبي ان تنجح معكم مثلما نجحت معي ولله الحمد:-r
في مثل هاته الايام تمضي السنة الاولى ذكرى لتعلمي صنع الكرواسو :love01:
شكر خاص وتحية كبيرة بزاااف لطاطا الحاجة كريمة هي من وقفت معي وعلمتني اياه بارك الله فيها
والحمد لله الذي وفقني فكله بفضله تعالى
نبداو على بركة الله
600 غ ماء دافىء
1 كلغ فرينة
30 غ خميرة الخبز
100 غ سكر
60 غ لحظة/ حليب بودرة/
1 حبة بيض
20 غ ملح / ديريها مع الاخير/
فنجان صغير /تع القهوة/ من الزيــــت
500 غ زبدة التوريق /للتوريق /
شوكولا للحشو
1 البيض مع قليل من نسكافي للطلي
انخلي الفرينة وزيدي عليها كل المواد الجافة ما عدا الملح / مديريهش باسكو لوكان ديريه ينحي للخميرة هذيك ليميديتي تعها ويبطل مفعولها اوكي
/ ثم ضيفي البيضة والزيت والماء وخلطي شوي ثم الملح وكملي هخلطي / هنا كيما تحبي تحبي ديرها فالخلاط الكهربائي او تعجنيها بيدك ههه مي راح تتعبي بيدك بزااف انا لميتها بيدي على البوتاجي /
كي تلمها تجيك تتلصق شوي ماتخافيش برك تتطلب العجن بحركة من يديك الاثنتين تديها من الاسفل الى الاعلى وعندما تصلي الى الاعلى بسرعة بسرعة حطي يدك من الجهة اليمنى واليسرى تحت العجينة وارفعي العجينة وارجعي حطيها وعاودي كيما الاول وهكا بقاي لازم بسرعة حتى لي تشوفيها ولات مليحة وماتتلصقش / العجن ياخذ حوالي 20 دقيقة دون توقف لذلك اصبري ههه هذي صالة تع حديد ماشي كوزينا هههه:p /
اه حطيها ترتاح
كي تشوفي حجمها تضاعف مليييح هكا
ارجعي هبطيها بيدك بلعقل
وتكوني من قبل قطعتي الزبذة الى قطع متساوية وتستفيهم على البابي فيلم بحيث تاخذ شكل مستطيل وغلفيها كامل بالبابي وتخليها تبرد
كي تهبطي العجينة ورقيها على شكل مستطيل وحطي فالوسط الزبدة واغلقي علي الزبدة مليح ثم ورقيها وحافظي على الشكل الطولي للعجينة كما هو موضح في الصورة
ثم تبداي بالتور الاول لي هو التور البسيط / لم التقط صورا لهاته الخطوات لذا استعنت بالرسم ، اتمنى ان يكون واضحاً :graduation:/
هذاك هو التور السامبل مزال نزيدو التور دوبل هكذا نكونوا ورقنا العجينة على 3 تع التور اوكي
قبل ما نرجع نورقها السهم اللي راكي تشوفي فيه /هذيك الجهة اجعليها على يمينك عند التوريق اوكي
/ارجعي ورقيها حليها بالطول ثم ديري التور دوبل
ثم دائما حطي الجهة اللي فيها السهم على يمينك وورقيها بالطول وشويييا برك العرض باه نقسموها على 2 نقسموها من العرض تعها ماشي من طولها اوكي
هذه الصورة ما شفيتش واش من تور المهم هنا راهم يبانو الطبقات برك باه تشوفي انها مورقة مليح
اذا الان راه عندنا 2 مستطيلات متساويين
واحد نقطعو منو مثلثات هكذا
وتخليهم يرتاحو شويا ومنبعد تبداي بالوحدة ركزي معاي هنا
شدي بيدك اليسرى القاعدة وبيدك اليمنى تبداي تمددي فيها بالعقل / حركة برك خفيفة ماتمدديش بزاف /
ثم تفتحيها فتحة صغيرة فالوسط من جهة القاعدة بالموس هكذا
وتبداي ترولي من الجهة الي فيها االاسهم ، تحطيهم فالسنيوة وتطليهم البيض وتخليهم يخمرو
المستطيل الثاني ساهل تبداي تحطي الشوكولا اليي مقطعتها على الطول في حافة المستطيل ثم تبداي ترولي لين يتشكل حربوش وتقطي بالحبة ، تحطيهم فالسنيوة وتطليهم بالبيض وتخليهم يخمروا
كي يطلعو ملييييح تكوني مسخنة الفرن من قبل ودخليهم يطيبو
:thumb_up02::thumb_up02:
:thumb_up02::thumb_up02:
واش نقلكم جا خفيف وبنين
وهنا كي عاودتوا للمرة الثانية بصح انا معجبنيش بزاف والخطا لي درتو اني استعملت زبدة عادية هههه علينا احترام القوانين المطبخية
آخر تعديل بواسطة المشرف:
