نصيحة من عندكم ..وبارك الله فيكم

[همس الوُرود]

السلام عليكم ورحمة الله وبركاته

أهلا بكم في موضوعي أتمنى أن لا أزعجكم بسؤالي

سأدخل في ما يقلقني مباشرة لأني لا أتقن التحدث خاصة في المقدمات وحينما أكون متأثرة قد تجدوني أكتب باللغة وأغير اللغة كثيرا فأرجو أن تتحملوني قليلا


لدي صديقة أعرفها منذ زمن أمممم قرابة 6 سنوات إلى 7 سنوات لا أذكر بالظبط.. في البداية لم تكن صداقتنا تعني شيئا فقد كنا مجرد زميلتين ثم بدأنا نتقرب من بعنا إلى أن أصبحنا صديقتان مقربتان جدا ..

وكلما اقتربنا كلما علمنا أشياء جديدة عن بعضنا

دعوني أحدثكم عنها قليلا

هي فتاة مشاكسة لأقصى الحدود وطيبة جدا لطيفة وكثيرة ما تبتسم ربما تذكرون موقف الشورمة وما أكلنا في ذاك المطعم قد ذكرت مرة مووعا هنا عن تلك الشراهة ههه ربما في منتدى وش راك تهدر

فتاة كثيرة الضحك لكن لكن ........ لكنها يتيمة

أمها توفيت وهي فتاة صغيرة لا تعرف شيئا


صادفتها عوائق كبيرة في حياتها

بطبيعة الحال لما توفيت أمها من كان لها الأم والأب؟؟ هو أبوها رحمه الله ... أجل رحمه الله فقد توفي قرابة شهر من الآن

رغم تلك الفترة التي قضيتها مع صديقتي

أووووه خلوني نحكي دارجة خير

رغم أني كنت قريبة بزاف من صاحبتي هادي وكنا توجور مع بعضانا إلى أني مانيش قادرة نواجهها

لأني نعرف بزاف شحال تحب باباها وشحاااااااااااااال تحبو بزاااااااف

فريمو مالقيتش كيفاش نحكي معاها

وحتى هي كلما نبعتلها ميساج متردش عليا وكلما نعيطلها متريبونديش مانيش فاهمة وشبيها وراني خايفة عليها بزاااف لأنو معندهاش صحابات معندهاش ناس توقف معاها كاينة أنا صاحبتها ووحدة أخرى

إيه وصاحبتنا الدوزيام عادي تحكي معاها وتردلها على ليميساج وراحت عندها أما أنا لالا

قلت بلاك بيسك أنا القريبة ليها بزاف مقدراش تحكي معايا؟؟

وتاني هي مجابتش الباك وحنا جبناه نشفى هداك النهار بعتتلي ميساج قالتلي مبارك عليك بصح أنا راني ماجبتش كيما عيطتلها كوبات عليا بعتلها ميساج قلتلها والله يا أختي راهي ظروفك الي ماسمحتلكش لأنو باباها كان مريض بزاف بهداك المر الي مش مليح وكانت متجيش تقرا وتبقى معاه و يجوهم الضياف توجور سما متلقاش وقت للقراية هي رجعتلي وقالتلي خلاص عبير بكري كنا صحابات مي دوك سيبو أنسايني

والله يا ناس اللمة راني خايفة عليها بزاف بزاف ومانقدرش نروح عندها لدارهم لأنها متسكنش هنا فميلة و ماقدروش يدوني تع الدار رغم أني توجور نقوللهم يدوني وراني نستنى وقتاش يقدروا يدوني عندها معليش نحوس على دارها حتى نلقاها

بصح راني خايفة من جهة أخرى ؟؟ بلاك كون نبعد عليها ترتاح أكتر؟؟ بلاك كون منحكيش معاها هدي الفترة حتى ممبعد؟؟

وإ\ا تلاقيتها وش نقوللها؟؟

مارانيش فاهمة وش ندير معاها إيكزاكت

ه\ا الموضوع مقدرتش منكتبوش بيسك صح صح صح توحشتها بزاف والله توحشتها وتوحشت قعداتنا وضحكاتنا

نتمنى نرجعوا كيف ما كنا وأفل نتمنى ربي يفرج عليها إن شاء الله

و الي كملوا قراو السيجي حتى للأخير نقوللكم أسمحولي على الإزعاج و بارك الله فيكم

ماتبخلوش عليا بنصيحة و

في رعاية الله​

 

[Hakan]

رد: نصيحة من عندكم ..وبارك الله فيكم

تم الاعتماد :
حاجة ما فهمتهاش في موضوعك ونورمالمون هي السبب يعني اسكو عيطتيلها نهار اللي توفى باباها يعني النهار الاول او لا
لاني فهمت من موضوعك انك ما عيطتيلهاش الا من بعد وهذا يااختي ممكن انت شفتيه حاجة صعيبة مي متاكد انو بالاك صحبتك كانت محتاجة هذاك الاتصال نتاعك حتى بلا ما تروحي ليها ونصيحتي انك تعيطي وتعيطي لا بغات ما ترفدش عليك واذا مكانش نتيجة شوفي كاش وحدة من صحاباتك راهي تحكي معاه وتحكي معاك سواء في التيليفون او النت تروح تحكيلك معاها وقوليلها اذا راكي غالطة راكي مستعدة تصحي الغلط وبالاك صحبتك عندها سوء فهم وخلاص يعني ممكن ينحل بالوساطة نتاع صاحبتك
اما الحل الثاني هي انو تقيمي الصداقة نتاعكم اسكو كانت صداقة مكان وزمان او كانت صداقة عمر
اما المكان هو الليسي والزمان هو الفترة الدراسية يعني شحال من زملاء كنا نحسبوهم في مقام الصداقة مي نهار جبنا البكالوريا ورغم محاولاتنا باش نوصلوهم الا انهم قطعونا فقط لانو ماكانوش صحاب بل مجرد زملاء وهكاك في امور زمالة العمل وزمالة الجامعة وغيرها من الامور
اما الصدااقة صراحة عند البنات تكون نادرة شويا لانو معروف انو الطفلة غير تتزوج او تنفصل على صحبتها او تفوتها صحبتها في نجاح وغيرو مباشرة تقطع الصدااقة نتاعها وتلهى بامورها كانو تربي ولادها ولا تقرى وغيرها من الامور بالتوفيق وان شااء الله ترجعلك صحبتك ..سلام​

 

[همس الوُرود]

رد: نصيحة من عندكم ..وبارك الله فيكم

تم الاعتماد :

بارك الله فيك
حاجة ما فهمتهاش في موضوعك ونورمالمون هي السبب يعني اسكو عيطتيلها نهار اللي توفى باباها يعني النهار الاول او لا
لاني فهمت من موضوعك انك ما عيطتيلهاش الا من بعد وهذا يااختي ممكن انت شفتيه حاجة صعيبة مي متاكد انو بالاك صحبتك كانت محتاجة هذاك الاتصال نتاعك حتى بلا ما تروحي ليها
إيه ماعيطتلهاش من اليوم الأول لأنو ماوصلنيش خبر وفاة والدها حتى بعد مرور أسبوع من موته بحكم أنها متسكنش فالمدينة و بعد ما فاتت سمانة عيطتلي صاحبتي الدوزيام وأخبرتني بأنو والد أمينة توفى " هي عرفت لأنو بنت خالة أمينة صاحبتها "
لتم حاولت نتصل بيها لكني مقدرتش و منتم ماريبونداتش عليا ولا شيء
وحاولت نروح عندها مي ماقدرتش تاني و حتى أني بعتلها ميساج عزيتها فيه وقلتلها أني فهداك الوقت برك وين سمعت بالخبر وقلتلها أني نحاول نروح عندها بصح هي ماردتش عليا
ونصيحتي انك تعيطي وتعيطي لا بغات ما ترفدش عليك واذا مكانش نتيجة شوفي كاش وحدة من صحاباتك راهي تحكي معاه وتحكي معاك سواء في التيليفون او النت تروح تحكيلك معاها وقوليلها اذا راكي غالطة راكي مستعدة تصحي الغلط وبالاك صحبتك عندها سوء فهم وخلاص يعني ممكن ينحل بالوساطة نتاع صاحبتك
كيفاش يسمى نقول لصاحبتنا الدوزيام تتصل بيها و تقوللها ويلا أنا غالطة فكش حاجة معاها؟؟ هكذا؟؟
وكيما نعيطلها كون تريبوندي عليا وش نقوللها؟
إيه وتفكرت أنو في يوم ردت عليا أمينة لأني كنت توجور نبعتلها نقوللها إن شاء الله تكوني مليحة راني توحشتك

مرة ردتلي وقالتلي الحمد لله حتى أنا توحشتك مي منتم مازادتش ردت ولا
اما الحل الثاني هي انو تقيمي الصداقة نتاعكم اسكو كانت صداقة مكان وزمان او كانت صداقة عمر
اما المكان هو الليسي والزمان هو الفترة الدراسية يعني شحال من زملاء كنا نحسبوهم في مقام الصداقة مي نهار جبنا البكالوريا ورغم محاولاتنا باش نوصلوهم الا انهم قطعونا فقط لانو ماكانوش صحاب بل مجرد زملاء وهكاك في امور زمالة العمل وزمالة الجامعة وغيرها من الامور
صح كاينة منها هادي وهادي الي منيش قادرة نستوعبها لأنو علاقتي مع أمينة علاقة أخوة مش صداقة فحسب لأنو نفهموا بعضنا ولو بالإشارة فحسب يعني ولينا قراب بزاف
ماشكيتش تكون علاقة صداقة عابرة ونتمنى متكونش هكاك
اما الصدااقة صراحة عند البنات تكون نادرة شويا لانو معروف انو الطفلة غير تتزوج او تنفصل على صحبتها او تفوتها صحبتها في نجاح وغيرو مباشرة تقطع الصدااقة نتاعها وتلهى بامورها كانو تربي ولادها ولا تقرى وغيرها من الامور بالتوفيق وان شااء الله ترجعلك صحبتك ..سلام
صح للأسف كلامك منطقي لأنو أغلب العلاقات بين الفتيات هكا ..
​

بارك الله فيك وأحسن إليك

شكرا على النصيحة

وعليكم السلام
​

 

[نورالإيمان~]

رد: نصيحة من عندكم ..وبارك الله فيكم

السلام عليكم .
ماشي ساهل لي فاتت عليه صحبتك ربي يكون ف عونها ويصبرها .
نظن أنو لازم تبقاي تعيطيلها وتسقسي عليها لانو راهي بحاجة للي يوقف معاها .
ومتحكميش عليها حتي كي تروحي ليها ثم راح تشوفي ردة فعلها كي تشوفك وحاولي تفهمي منها .
وان شاء الله ترجع صحبتك كيما كانت وساعفيها .وربي يخليكم لبعض .
هذا مجرد رأي والسلام عليكم .

 

[السلطانة]

رد: نصيحة من عندكم ..وبارك الله فيكم

وعليكم السلام ان شاءالله تكوني رحتيلها وتكلمتي معاها لانو كي تعودو فاص افاص تهدرو خير وباينة الظروف لي فاتت عليها اثرت بزاف على نفسيتها
خسرت اعز انسان وماجابتش الباك هذا الشي ماشي ساهل وممكن تغشت منك او عندها راي خلاف
ربي يقربكم من بعض ان شاءالله .

 

[Smile Queen]

رد: نصيحة من عندكم ..وبارك الله فيكم

السلام عليكم
اختي الحبيبة حبيت نقولك راكي غلطتي بزاف كي ماعيطيلهاش يوم توفى باباها كانت محتاجاتك
وهي مش رح تفهم انو كان صعيب باش تعيطي لان الشخصيات تختلف وهي كانت في ظرف محتاجة شكون يوقف معاها خصوصا انك قلتي انها يتيمة الام ايضا
من رأيي دخلي صديقتكم الثالثة وخليها واسطة خير بيناتكم خليها تكلمها هي اولا وتديرو موعد باش تتلاقاو ثلاثتكم واطلبي منها السماح وعزيها في باباها وقوليلها بصراحة نيتك انك كنتي محرجة وحبيتي تخليها يفوتو هذوك الايام وتحكي معااها
ربي يحنن القلوب ويديم اخوتكم

 

[همس الوُرود]

رد: نصيحة من عندكم ..وبارك الله فيكم

السلام عليكم
بارك الله فيكم اخواتي في الله ايمان وعاىشة و ابتسامة ملكة

بالنسبه لحكايتي مع صاحبتي امينة..مؤخرا اتصلت بيها وردت عليا والحمد لله وحكينا مليح والحمد لله..نظن أن صداقتنا مزالت والحمد لله وعن قريب ان شاء الله نتلاقاو☺
ربي يحفظكم

 

[السلطانة]

رد: نصيحة من عندكم ..وبارك الله فيكم

السلام عليكم
بارك الله فيكم اخواتي في الله ايمان وعاىشة و ابتسامة ملكة

بالنسبه لحكايتي مع صاحبتي امينة..مؤخرا اتصلت بيها وردت عليا والحمد لله وحكينا مليح والحمد لله..نظن أن صداقتنا مزالت والحمد لله وعن قريب ان شاء الله نتلاقاو☺
ربي يحفظكم

الحمد لله انه حصل خير
حافظا على هذه الصداقة فهي نادرة في وقتنا
ربي يحفظكم لبعض