كل الاخوة و الاخوات في اللمة .. مساء الخير عليكم
.
.
ان شاء الله تكونوا في صحة و عافية و للاسف الاخت @ليليا مرام ماهيش معانا و راهي في المستشفى , ربي يشفيها و يعافيها
و المنتدى فيه نوعا ما لمسة حزنة , و اكيد بزاف يحسوا هذا الاحساس
و رغم مرضها و الالام اللي فيها مازالت تبعث لنا بسمتها و ضحكتها المنورة من خلال كلماتها , هي نموذج يمثل بزاف من الشابات اللي مثلها .. تحمل المرض و الرضى و البسمة معاها .
كيفاه احنا رانا في 2017 و دولة البترول نتاعنا المعروفة عالميا , و مسؤولينا نهار كامل و هوما ينفخوا في رواحهم , و كأنهم مسؤولي دبي و لا ابو ظبي اللي خدموا بلادهم صح بصوارد البترول بلا مانهدروا على الغرب كيعاد هاذيك هي الحشمة الكبيرة طول طول
اختي ليليا و هي تحكي لي على الوضع في السبيطار اللي كامل الشعب شافه حسيت روحي بلي رانا في الصومال و لا اريتريا .
يعالجونا بالمزية و يعطونا الدوا كيما الصدقة , و السرارقة الداخل ماتقدروش تحسبوهم .. الضمير ميت الا من رحم ربي , من عشرة تلقا زوج ملاح
الفساد منتشر في كل بلاصة و اللي يحيرني انهم يقولوا للمريض بكل بساطة ماعندنا ما نديروا لك , و زيد يسمعوا الكلمة من المدير اللي مداير الدوارة نتاع الحرام و يتفشفش في الكرسي المفخفخ
البارح شفت في اليوتوب الرئيس الاكوادوري القديم كي دخل الاسلام و هو يبكي و يقرأ سورة الفاتحة , نحيف جدا و لباسه متواضع جدا .. و الله اللي يشوفوا يقول عليه بواب
سبحان الله .. فرق شاسع بين حكامنا و حكامهم
اما المسؤولين نتاعنا وين نحطوهم نلقاوهم نقمة على الشعب لا اكثر
المدراء نتاع السبيطارات مانعرفوهمش و مانشوفوهمش و ماكانوش اصلا , و ما عندناش الحق اصلا باش نشوفوهم و لا نهدروا معاهم
و حتى باش يراقبوا الموظفين نتاعهم ... ماكانش
عاملة النظافة مانيش نحتقر وظيفتها و هي وظيفة شريفة , تلقايها تسرح و تمرح في السبيطارات و تعلي صوتها بكل وقاحة كأنها هي الطبيبة اللي راح تداويك و تدير لك عملية و تنقذ لك حياتك
و ولا واحد من الموظفين يهدر معاها كلمة و لا ينتقدها
ذكرني هذا الكلام واحد المرة كنت في عيادة التوليد , لما وضعت ولدي كنت مريضة في الموت .. قول خرجت من الاخرة
جات عاملة النظافة تنظف قدامي , شافت عندنا بالحقد و احنا مع اولادنا
سخطت على رب العالمين جهارا نهارا و قالت بالصوت العالي : صحا يا ربي خليتني خدامة عند النسا , مالقيناش واش نقولو و سكتنا
مالا هذا المدير و غيره نتاع المستشفيات علاه كاينين .. واش هو دورهم و كيفاه راهم يمشيو في الادارة هاذي ؟
.
.
الحلول ماكانش للحالات الصعبة , ما يحوسوش يفهموا و ما يديروش اجراءاتهم للاشخاص العاديين باش ينقلوهم للخارج , و يعرفوا مع من يخدموا
خنقوا ضميرهم بيديهم و نساو رب العالمين
الدوا ماكانش و مايهمش الامر ثاني
الممرضات يشيخوا و يضحكوا , و اذا شافوا المريض تبسم برك و ماعادش ينازع يوليو يشوفوه عشرة و يقولوا له راك ارتحت روح تروح خلينا نكملوا شياختنا
لمن راح يرفع المريض صوته و شكون يسمعه , و شكون يحس بيه , و شكون يعالجوا ؟؟
طبعا بلا الدولة خاصة وزارة الصحة , بصح وين راهي وزارة الصحة مانيش نشوف فيها و مانيش نسمع بيها
راني صح في الحقرة نتاعنا و لا راني غالطة ؟
