ضحكنا معاك

[A-Boudjema]

السلام عليكم ورحمة الله يا أحلى عائلة ، عائلة اللمة الجزائرية
كنت قاعد نتفرج فالتيلي والبرامج تع رمضان السنة والله غير أغلبيتهم ولاو صامطين قلت علاه منديرش موضوع نتبادلو فيه مواقف مضحكة صراتلنا وننحو شوية الصماطة ياك يقلك الضحك مفيد الإنسان

المهم أنا الموقف لي راح نحكيهولكم اليوم صرالي عشية كي كنا نديرو فالفرض تع الإنجليزية
عطاونا سوجي واعر بزاف وفالوضعية الإدماجية قالونا نكتبو على كاش عالم وهذي حاجة مازال مقريناهاش حنا وواعرة علينا، حليت كامل الأسئلة وبقاتلي الوضعية الإدماجية وجات الشيخة وسقساوها الزملاء إذا يقدرو يديرو على أي شخص مشهور قالتلهم إيه معليش وأنا ثم جاتني وحد الفكرة شيطانية إبليس ومخممش فيها، عاودت سقسيتها إذا نقدرو نديرو عليهم كامل بدون إستثناء طرحت عليه السؤال زوج مرات وقالتلي إيه تقدرو أنا ثم عرفت بلي راح يكون ختامها مسك، فالنص تع السوجي دايريهولنا على ويليام شيكسبير وهو مشهور تسما أنا رحت درتلها على ويليام شيكسبير ونقلت مالنص والزملاء مساكن راهم يخمو وكاين لي يبكو ولي يستغفرو ولي يضربو فالطوابل وأنا حاط رجل فوق رجل ونخزر فالساعة
صونات أنا درت روحي راني نراجع كملو خرجو كامل وقعدت أنا ووحد الثلاثة ممبعد حطيت الورقة وخرجنا، سقسيتهم كيفاه السوجي كامل يقولولي واعر والدنيا وكذا وكذا وسقسيتهم واش درتو فالوضعية كاين لي مادارش وكاين لي دار ومكملش وكاين لي كتب حرف ودالو المراقب الورقة وأنا بكل ثقة قلتلهم راني درت على ويليام شيكسبير هههههههه وثم كانت الطامة الكبرى بالنسبة للجميع، الحل راهو قدامهم وهوما مخموش مليح كون تشوفو النظرة لي كانت على وجوههم كيما هذا الإيموجي ونتوما واشن هو الموقف المضحك لي صادفكم ​

 

[إلياس]

سلمت يمناك على الموضوع القيم جعله الله في ميزان حسناتك يا رب العالمين اجمعين