لو عادت الطفولة ساعة ؟

[أبو عاتكة]

راه وحد البرود ياجماعة يهبي ول سه سه الحمد الله ياربي.

البرود بالتدرج المناخي التالي : سخانة+شهيلي يشوط > اونسويت > غبار كحل مع انقطاع الكهرباء > اونسويت مطر مع رياح الحالة رحلت > اونسويت هبيهبي او مايسمى بالفغونسي البحري. في لافاش نتاع الكرارص متصيبهاش هاذ الخلطة.

كأنك دخلت لجزر الكاراييبي على طريق تندوف.

المهم راه الواحد مرحرح ويتبرد وجات فكرة نتاع شوية موضوع جايح مع النسمة.

- يقول الولد اللي راه يضرب في لاتاي الفوق في الصورة :

.... تخلطلي البروڨرام الواحد يروح يضرب فيها ماتش مع المشرر نتاع صحابي.
ولا يهبط للواد يصيد الكلاب والجران.
ولا يروح يحفر فيها حفرة ويغطيها ويستنى كاش واحد يطيح فيها.
ولا نجبد الطواط التربولات ونوض نلاوح في الوعالة والحمام في السطح.
ولا نحي التريكو ونخبطها بغطسة في الساڨية.
ولا نخرج الفيلو نعمل دورة في الفيلاج ونكريها بعشرة دورو للدورة.
ولا نروح نضارب مع هذاك الطفل اللي محبش يعطيني لحسة نتاع اكريم نلحسلو وجهو بالتراب.
ولا ندخل للدار نعمل كسكروط سكر ولا طماطيش ونتفرج الكبتن ماجد.

والله ق ذهبت واش نعمل؟ رجليا ويديا راهم ياكلو فيا لازم ندير حاجة وقيلا نحرڨ روضة وندحرجها مع الهبطة نشوفها كيفاش دور..

=====

الاختبار:

لو عادت اليكَ واليكِ الطفولة ساعة لا غير من زمن الطفولة ماذا كنت ستفعل فيها ؟

أنا كنت ندير فيها كسكروط سكر بالقهوة ونديسر بحبة لفت ونروح ندير فيها ماتش بالحفى صبعي الكبير نڨلعوا من بلاصتو عالقش.

ماذا عنكم ؟ ادحي برك.

 

[aljentel]

سيتغير كل شيء حينما نعود للطفوله سيكون العقل والفكر والتصرف طفولي غير مسئول
لم نعد نتذكر طفولتنا فالحياه وهمومها انستنا كيف كانت طفولتنا …
شكرا ..

 

[aljentel]

الموضوع كوم وهذا الطفل بالصوره كوم
رايق على الاخر كما لو كان عقله اكبر من سنه
ههههه

 

[اسماعيل22]

إيييه أجمل حاجة الواحد يدير فيها ماتش يبدا مور الظهر في وحد السطاد جاي في عقبة و ندابزو شكون يلعب في الجهة لي جايا لفوق ههههه
ويجو وحدين شغل زعما جماعة أشرار بزعما يقولولك سطادنا حنا نلعبو فيه. و تبدا حرب التراب و تكمل لا غالب ولا مغلوب المهم تطلع للدار قهوي ههه تزيد تاكل طريحة من عند بوك و يحلفلك ماكانش الخرجة طل على صحابك مالتاقة كامل معاقبين كيفكيف و يبدا التخطيط للثأر و إحكام السيطرة على الملعب من اليوم ف صاعدا

 

[Hakan]

لوكان نرجع الصغر ما عنديش واش نزيد كثر من لي درتو هههه الحمد لله لعبت حتى شبعت درت كلش في صغري مكانش حاجة وما لعبتهاش. ،وقريت في الجامع والمدارس القرآنية ،قصرت مع صحابي جميع أنواع الالعاب ما نقدرش نقول كنت مكتفي لكني ما كنتش محروم الحمد لله ، المؤسف راهو في أطفال اليوم يكبر عمرو عامين يطيشوه في الحضانة باش زعما زعما وليدو يولي يحكي كلمات بالفرنسية و شوي بالإنجليزية ،وكي يكبر شوي ما نعرف واش راح يكون للأسف ولا يرميلو تيليفون ويجيك زعما يمدح في وليدو بلي يعرف يخرب في تلفون ويدخل اليوتيوب وانا نقولوا يا خويا راك قتلت وليدك ، نحير ونحير اربع مرات كي نشوف طفل صغير نظيف زعما ولدها ما يخلطش في التراب و متربي و للأسف الشديد ما علابالهمش بلي راهم مطبقين الطغيان على وليدهم ،الطفل لي ما يلعبش بالتراب لي هو الفطرة نتاعو ماهوش طفل ،ما نقولش ولدك ديما موسخ مي شوي ماشي حتان يولي يخاف انو يجرب يلعب ،صحيت موضوع ولو أنو لاسترجاع الذكريات ولكنوا مؤسف للاطفال اليوم والحمد لله أطفال الحي نتاعي ههههه مازالهم شادين العهد ويلعبوا كيما لعبنا ونشجعهم كي نشوفهم باش يلعبوا ويتعلموا يحترموا الناس بارك الله فيك .

 

[sana barhoumi]

حتى الصغار ولو يشرب cappucin

 

[ليليا مرام]

السلام عليكم
يا خويا ضرك نقلع من عمري35 ونولي لوقت 5, او قل ..
باغية غي نرجع فالڨايلة نصوني فالبيبان ونهرب مع انو مرة درتها وانا كبيرة لانو توحشتها بصح ما هربتش خرجو ومحال يشكو فيا كملت نمشي كلاص كلللي ما علاباليش ...
توحشت يديرو ڨودرون جديد ونجري فيه بالحفى وهو سخون اووووه متعة قليل لي يعرفها ...
اممم نلعب بويتة والا عشةةفبعض ولايات نطيبو ونديرو قصة من خيالنا وشعال تزوجت فيها وكبرو تزوجو وخلاوني....اشهر عبد القادر جاري تزوج حكمت مرتو قتلها سرقايلي راجلي تخلعت مرا قتلها لعبنا عشة هذا كان راجلي وكان يقاب دنيا علجالي فليكول .....
توحشت نربي أرانب اووه كانت متعتي نجي من ليكول ونتهلي فيهم ونجيبلهم حشيش وكانت عندنا ورا درا قطعة ارض صغيرة نغرس فيها خضر والد يجيبلي ويعلمني ونتهلى نقي ونسقيها ونموت بالفرحة كي ندي سلة نحي حار طماطيش باذنجان حتى فراز درتلو دار صغيرة بالبلاستيك
رجعتني ايام طفولة بزاف شابة كبرنا وندمنا

 

[إلياس]

رجعتني ايام زمان
بارك الله فيك أخي على الموضوع الرائع جعله الله في ميزان حسناتك يا رب العالمين اجمعين

 

[السلطانة]

أجمل الأيام أيام الطفولة


اشتقت ان اذهب الى دكان حينا القديييم
واشتري انواع الحلويات التي كانت قديما
خاصة حلوة المروحة ههههه وحلوى الاسنان
وفلاش فلاش كيفو مكاش