أختك أمانة ماتخليهاش في الهانة ...

[منال إدريس]

سلام ..أزول
إن شاء الله تكونو بخير وصحتكم لابأس
موضوع اليوم موجه بشكل رئيسي للخاوة اللي يتعاملو مع خياتهم باحتقار وقلة اهتمام من الناحية المعنوية أو المادية على حد سواء خاصة كي تتزوج ..كاين حتى اللي ينساو تماما وجود الأخت من عدمها ..حبيت نقول الأخت راهي أمانة في رقبتكم ماتكونوش جافيين في المشاعر من جيهتهم راهم المؤنسات الغاليات هوما رمز الحنانة وطيبة القلب هوما السند الفرحة والود يستناو منكم غير كلمة طيبة غير طلة خفيفة عليهم تفاجي على خاطرهم وتدخل السرور والإبتهاج على قلوبهم تقول دخلة خويا عليا وأنا في داري فخر ليا وقيمة قدام راجلي وأهلو يقولو خوها راهو في كتافها قبل ما يخمو يحقروها يديرو ألف حساب ..واش راكي يا أختي واش حوالك أنت والأولاد ؟ خوك راهو هنا كاش ما خصك عيطي برك تلقايني عندك ..هاد لكلام يسوى الدنيا وما فيها.. كي تدخل للدار وتلقى أختك وجدتلك الغذاء والا غسلتلك حوايجك كلمة صحيتي يا أختي ربي يخليك ليا تسوى عندها كنوز الدنيا..وتزيد تطيب الخاطر وتقوي الأخوة بيناتكم كي تعرفك أختك حنين وطيب تفديك بعمرها وديما تمشي في الدنيا بلا خوف كاين خوها مصدر الأمان والرحمة اتقو الله فيهم راهي أختك أمانة ماتخليهاش في الهانة ...
ربي يحفظنا أجمعين
ودمتم سالمين

​

 

[أبو عاتكة]

كاينة بزاف للاسف راهم في الهانة وخاطرهم مكسور وتقريبا انقطعت علاقاتهم مع خاوتهم خاصة للي متزوجات وتوفاو والديهم وهاذ الشيء من قسوة القلب ومكانش حتى سبب او ظروف تمنع الاخ من التلطف مع اخته ومعاملتها بالحسنى او الاهتمام بها وتفقدها وزيارتها مكانش حتى سبب مقنع سوى قسوة القلب وموت العاطفة الاسرية وحتى في عالم الحيوان كاينة العاطفة والشفقة فكيف برابط الاخوة المقدس.
كاينة المشاكل كاينة الهدرات والنميمة كاين النقص وعدم الثيقة لكن هذا ميخليش الاخ يهجر اختو او العكس ماهي الا دنيا فانية حاجة ماتدوم فيها لاصحة لا مال لا عيال هي فترة لا نعرف مدتها نودع فيها بعضنا يوميا صباح وعشية وقسوة القلب اعمت بصيرة الناس كل واحد عاد يشوف في الاخر عدو له ولوكان امه وابوه.
ربي يهدي الخلق ويجمع بين قلوبهم وبارك الله فيك على الموضوع النافع.

 

[الامين محمد]

لا حول و لا قوة الا بالله
الله المستعاان
و الله لا يحتقرهن الا جبان و قليل اصل


بارك الله فيك
موضوع ممتاز و حساس

 

[dahman kz]

الاخت هي الحنانة وهي السند وهي للي تعوض الام وللي ماعنداهش اخت محروم
والاخت وجودها بحد ذاته نعمه وللي يحب يعرف قيمتها يصقصي واحد ماعنداهش اخت.
والاحسان للاخت و زيارتها والاهتمام بيها و معاملتها معاملة طيبة حتى لو غلطت معاك او اساءت ليك هو من صلة الرحم وصلة الرحم امرنا بيها ربي وعندها شأن كبير
و الشرع والدين طلب منا الاحسان للاخت حتى وهي ظالمة وغالطة فما بالك اذا كانت الاخت هاذي مولات خير .

 

[sana barhoumi]

@منال إدريس لو كانت الأخت بالفعل ليست من هؤلاء التي تطرق باب دارك كأس من الخميرة كأس زيت قليل من الفلفل قليل من الطماطم فتصبح تنفق على مطبخك ومطبخها وذلك لأنهن كثر هذه الأيام.فهذه الأشياء من مرة إلى عادة.

 

[ذكريات]

موجة جفاء ضربت القلوب فجعلتها قاسية كالحجارة والتباعد سبب من أسباب كثيرة غيره، وهناك بعض الأشخاص لا يزورون حتى والديهم في ظروفم الصحية المتدهورة فما بالك بالأخت، نسأل الله الهداية

 

[محتارة]

شكرا لكي على الموضوع
بعيدا عن كل الحالات الشاذة والتصرفات الغير طبييعة والغير مبررة، انا الذي اعرفه انه ان احسنت لاخيك فسيحسن اليك الا ادا كان لئيما ، فان انت اكرمت الكريم ملكته وان اكرمت اللئيم تمردا، واكرام الشخص ليس فقط بالاحسان اليه واعانتهةبل ايضا بكف الأذى عنه واحترامه .فهل حقا ادينا حقوق اخوتنا واحترمناهم واستمعنا لنصائحهم كما يجب ام اننا قصرنا وكنا عكس ذلك، ففاقد الشيء لا يعطيه والجزاء من صنف العمل ، فارجو ان نطرح الاسئلة المناسبة في الوقت المناسب ونصلح انفسنا ونتسامح مع اخوتنا ونبتعد عن عزة النفس والتكبر فان يعلم الله خيرا في انفسنا يأتنا خيرا منه.
وشكرا مرة اخرى على الطرح