انا رومنسي وعاشق قلبي معمر بالحب . . .

إنضم
1 أوت 2008
المشاركات
6,566
الإعجابات
1,583
النقاط
351
الجنس
ذكر
#1
لما تمشي في الشارع في دزاير 2010 تبقى توحد في ربي للحالة اللي وصلت ليها الشبيبة نتاعنا .


في شعرو راسم قلب وقي ذراعو قلب وفي التريكو قلب ولابس سلسلة فيها قلب وخلفية البورتابل قلب ودارني غنية اُه ياقلبي . . . .
ويدخل لمنتدى مثل اللمة تصيب الصورة الرمزية قلب والتوقيع قلب والمواضيع تشكي على القلب . ..

حتى يجيك مرض القلب اللهم احفظنا .


الشاب عاطفي ورومنسي
يحب عندو قلب رهيف واحساس خفيف وشعور هفيف حساس وكلمة صغيرة تجرحو ..


شوفو مستوى العاطفة والحب عندو .

ينوض الصباح عالعشرة يتكسل باباه المسكين ديجا راه خرج صرف المصروف وجابو فوق ضهرو والعرف يتصصب عليه ورجليه يصطرو عليه يمشي ويطيح .
صاحبنا حساس وقلبو رهيف بصح مع باباه


يلقى الوالدة ربي يحفظها في شغل الدار شقيانة موجدة الفطور يتكسل في صاحبنا في الكرسي ولا الفوتوي

يماااا اعطيني نفطر جيبيلي القهوة
اعطيني الما زيدي هاذيك حطي ارفعي يلقى القهوة بلا سكر يبدى يشنف ويعيط تقول هو اللي جابها
يخبط الطابلة وينوض يسب ويعيط ويكفر بالنعمة


صاحبنا حساس وقلبو رهيف بصح مع يماه


اختو مايصبح عليها تقول جان في الدار ميسقسيهاش واش تحتاجي واش يخصك اختي ميهدر معاها ميضحك معاها بورتو منين كان صغير كانت ديما هازاتو تلعب بيه وتضحك فيه
واذا كانت صغيرة في السن منحكوش هذاك معطاها سعدها الكفرانيات والضرب والعباط بلا سبة
خوها طول وعرض بصح دكتاتور وفرعون الهدرة معاه مستحيل . . .وبلا مانكمل لانو راح ندخلو في موضوع اخر .

صاحبنا حساس وقلبو رهيف بصح مع اختو


يفتح باب الدار وموراه يخبطو حتى تتزعزع يلقى جارو يخدم في حاجة وحاصل ومحتاج اللي يعاونو يشوفو من بعيد يحط الكيتمان في وذنيه لعراض
ويبقى ماشي صباح الخير ميقولهاش شغل عمى مشافوش .


صاحبنا حساس وقلبو رهيف بصح مع جارو


يفوت على فقير ولا متسول وهو عندو مصروف الجيب الصداقة متخرجش من جيبو عالعام مي الدخان والقهاوي والفليكسي وكل شيء يخرجو الصوارط بلا حساب
يشوف ولد صغير حفيان ولا شيخ يطلب في الخبزة ولا عجوز واقفة عند البولونجي ولا مسكين حاير في ماكلة ولا دواء لولادو بصح هو فايت نورمال

صاحبنا حساس وقلبو رهيف بصح مع الزوالي


مايعرف يهني اقارب مايعرف يعظم الاجر في ميت ما يعرف يوقف في الشدة ما يعرف وين صادة القبلة ميعرف قداش في المغرب من ركعة .مايعرف يذكر ربي ما يعرف يصلي على النبي .
ما يقادر كبير ما يعطف على صغير ما ينحي حجرة من طريق ما يبدع منكر ما يصلح ما يرحم ما يخلي رحمة ربي تنزل .ما يعاون جار ما يحمل حمل على عجوز ولا شيخ ما يرفق بزوالي ما يصدق على فقير ما يخفف على مسكين .
مايعاون باباه ما يداويه في مرضو ما يوقف معاه في عجزو ما يصبح على امو ما يحبها على راسها كي تلقالو يحسب الرعدة ضربت ولا الزلزلة رجت .
مايقضي ما يصرف ما يدخل للدار خبزة ما يخرج من الدار معروف .


يدحل للسيبار ويفتح منتدى اللمة
ويكتب اول موضوع


انا عاطفي
انا حساس انا نحب
وقلبي رهيف انا مجروح
وقلبي ميحملش

.

ويبدا يفستي ويزوخ علينا
وهو فوت نهارو كيما راني حكيتلكم .


اذا كان قلبك هاكذا ربي يجيبلو وقفة ونتهناو وتتهنى من العذاب اللي هلكتنا بيه .


ولما تتعلم تحب ربي والرسول و امك وابوك واختك وخوك وجارك
احكي على الحب وعلى العواطف

يقلك اللي ما ضاق الحب عمرو ولا يحب واللي ماضاق حب هاذو كامل اللي فاتو عمرو ولا يعرف الحب ولا معناه .

وتستاهل هاذي من عندي




 

مسامعية

:: عضو مُتميز ::
إنضم
15 مارس 2009
المشاركات
580
الإعجابات
9
النقاط
17
العمر
28
#2
كاينــــــــــــــــــــــــة
عندهم العواطف والمشاعر من منظور و مفهوم واحد و نساو او تنساو الصح و الاهم
عقلية dz مازالت ماتكونتش
 

mina009

:: عضو مُتميز ::
إنضم
28 مارس 2010
المشاركات
776
الإعجابات
5
النقاط
0
#4
يعطيك الصحة اللي يحب و قلبو حساس يسبق يحس بلي اولى ماشي قلبو رهيف في حاجات و ميت على والديه
 

Elif DZ

:: عضو بارز ::
إنضم
30 أكتوبر 2009
المشاركات
5,446
الإعجابات
58
النقاط
0
#5
ربي يهدي
هاذ واش نقول
و كلهـ من سوء التسيير و التوعية و الفراغ العاطفي
 

Voyage dans un rêve

:: عضو مُتميز ::
إنضم
8 أفريل 2009
المشاركات
854
الإعجابات
29
النقاط
17
#6
يقولك خيركم خيركم لاهله و لي مافيهش الخير مع دارهم ماشكيتش يدير الخير في الناس..
 

POLIYANA

:: عضو فعّال ::
إنضم
13 أوت 2008
المشاركات
1,902
الإعجابات
6
النقاط
0
العمر
29
#7
هههه موضوع مميز وطرح اكتر تميرز
ولك مني تقييم :cool:
 

iméne09

:: عضو بارز ::
إنضم
6 ديسمبر 2008
المشاركات
6,468
الإعجابات
1,378
النقاط
351
#8
عندك الحق كلامك صواب نورمالمون قلبو رهيف وحساس ع الناس لي يستاهلو والاقرب منو ماشي في حوايج تافهين لي مايدو مايجيبو كفاش راح يحب وهو اصلا مارحمش في اهلو ربي يهديهم
يعطيك الصحة خويا موضوع في القمة
 
إنضم
1 جوان 2008
المشاركات
9,191
الإعجابات
6,830
النقاط
0
#9
خويا فريد ديما نقولهالك دائما فريد في اختيار مواضيعك وطرحها
ان شالله يحبسو القلوب نتاع التفياس كامل
والله غير ربي يهدي
 

أفراح الجزائر

:: عضو مُتميز ::
إنضم
27 نوفمبر 2009
المشاركات
1,460
الإعجابات
5
النقاط
37
#10
اذا كان قلبك هاكذا ربي يجيبلو وقفة ونتهناو وتتهنى من العذاب اللي هلكتنا بيه .


ولما تتعلم تحب ربي والرسول و امك وابوك واختك وخوك وجارك
احكي على الحب وعلى العواطف

بارك الله فيك
هههههه والله موضوع في بلاصتوا
 
إنضم
16 مارس 2010
المشاركات
1,208
الإعجابات
7
النقاط
0
#11
مع هذا كامل و ما نقولوش باللي الحب ما كانش في حياتنا
بصح لي ما حبش والديه عمرو لا يعرف يحب عندك الحق
موضوع قمة
شكرا
 

chiva.

:: عضو فعّال ::
إنضم
2 جوان 2009
المشاركات
1,733
الإعجابات
11
النقاط
0
#14
ههههههههههههههههههههههههههههه والله يا فريد جبتها سواسوا كي تهدر معاه يقلك القلب لحمة ههههههههههههه :glare:جياحة ياو فاقو يجي نهار لي تفيق نتا تحبها يجو صحاح يدوها اقعد تلوى كي لحنش :sleep:
:sneaky2: لبنات تاني ربي يهديهم يلعبو بمشاعر دراري سيرتو لي طايح على راسو
 
آخر تعديل:

نجاة40

:: عضو فعّال ::
إنضم
10 جانفي 2008
المشاركات
1,774
الإعجابات
15
النقاط
0
#15
يعطيك الصحة على الموضوع
لي رزين رزين حتى في عواطفو خويا
تلقاه عندوامو وخواتاتو بالدنيا
وحتى كي يحب يعرف كيفاه يحب
ماشي تمسخير نتاع مسلسلات
وان شاء الله ربي يجيبلهم الشفاء
 
آخر تعديل:

أم ياسمينdz

:: أمينة اللمة الجزائرية ::
طاقم الإدارة
إنضم
20 سبتمبر 2009
المشاركات
45,192
الإعجابات
58,617
النقاط
671
الإقامة
من الشرق
الجنس
أنثى
#16
يعطيك الصحة خويا فريد
شباب مراهقين هادو على الرغم من انو كبر ولازم يتحمل المسؤولية لكن هيهات
 

سمسوم

:: عضو فعّال ::
إنضم
27 جوان 2008
المشاركات
2,488
الإعجابات
14
النقاط
0
#17




ههههههههههههههههه

منا لغدوة و انا نضحك

يعطيك الصحة فريد


 

bibaa

:: عضو منتسِب ::
إنضم
3 فيفري 2010
المشاركات
45
الإعجابات
3
النقاط
0
#19
شكرا أخي على الطرح

حقيقة كاين بزاف ناس كيما راك تحكي

و لكن هذا لا يعني اننا نعمم هذه الظاهرة على شباب "الدزاير "

فمازالت الدنيا بخير و مازال كاين الرجال

ولا راني غالطة؟

بصراحة أنا الحي اللي ساكنة فيه ما فيهش كامل هذه النوعية

بصح فعلا رجال و الله

و عندي ملاحظة: مادام كاين ناس وصلوا للحالة اللي ذكرتها فالموضوع
وين راهوا الدور التربوي لوالديهم

ما عساني الا أن أقول :

الحمد لله على نعمة العقل و الاسلام
 

AGENT007

:: عضو مُتميز ::
إنضم
26 جانفي 2010
المشاركات
1,388
الإعجابات
852
النقاط
0
#20
والله كلامك هو الواقع المر لي رانا فيه
معليهش الولد يحب بالصح أولويات
تلقو واحد مشتاق ياكل حاجة ولا يلبس حاجة
....ويروح يفليكسي باش يعيط لحبيبتو كيما راهي تبالو....مش نعاير في الفقير بالعكس
ربي يجيب الخير حتى الوالدين يلعبوا دور في الجياخة نتاع لولاد
والله بخسوا بينا