كيفاش يفوتو بنات اللمة لاكوب دوموند ؟؟

[امورة المنتدى]

انا وش نقلك مانكدبش عليك والله سيرتو قبل الماتش تع صربيا بسوايع رحت كونيكتيت في منتدى مصري وقاعدة نزوخ ونزوخ راك تعرف ديما قبل ليماتش لازم ندخل نبكيهم باه يجي ال9و تع الماتش حلو

وتوجور روح نرسم علامات راك تعرف شخلط من جخلط من
نسمع غنا نروح مع خويا فالطوموبيل نزهاو مع الناس ايا جا الماتش خويا يجيب كاوكاو معاه نقرمش ونتفرج
بصح ياويلي كي نشوفهم لحقوا للبارا تاعنا نهببببببببببببل نصيب نطيح اهئ
ياو الماتش تع صربيا طفيت يمات التيليفيزيو حمبوك داك ماتش داك؟ مال كيفاه حبيتو يطلعوا دوزيام تور

ههههههههه المهم اني حكيتلك البروقرام

تصاور فور صحيت

 

[zineb92]

انا نحب نتفرج مع العائلة نتاعي وافضل التفرااج مع الرجالى احسن من النساء على خاطر النسا راكم عارفين ..
مايسكتوووش طول ...طول الماتش وهم يرحو .....قالي قلتلك.....هداك زين وهدا شين هداك عندو لاطاي ..مايعرفو غير هدا مكا ....ههههههههه
وانا كي نعود نتفرج لازم الذبابة حاشاكم وحاشى قدركم مانسمعش صوتها....
*-* تقبل مروري اخي الكريمـ *-*​

 

[دعوني وربي]

السلام عليكم
واش نقولك ياخويا بكري ماكنتش خلاص نتيع ليماتش هدو غير الا لعبت دزاير
بصح منهار لعبنا مع هدوك وخبطناهم بالثلاثية في تشاكر عدت نتبع حتى ليجوور تاوعنا مع النوادي تاوعهم
في الدار يعيطولي الراجل تالمن نتفرج غير الجزيرة سبور ونهار يكون عندنا ماتش مانخرجش من الدار نقعد نوجد
حتى العشاء نديرو بكري باه مايقلقونيش
ونحب نتفرج مع الدار كاملة هاك تكون اومبيونس
وكون نلقى نروح للستــــــــــــــــــــــــــــــــــــــــــــــــــــــــــــــــــــــــــاد
وش نقول والله راني شايفة مافيهاش في هد المونديل ملي بكا سعدان حبطلي المورال
ميـــــــــــــــــــــــــــــــــــــــــــــرسي موضوع هايل
واقيلا كثرت الهدرة اسمحولي
سلام

 

[جزائرية للابد18]

موضوع هايل انا ثاني من سطيف وراهي غايضتني لونطونت بزاف والله غير هدا مش موضوعنا ان نتفرج جميع المتشات ماشي شرط تكون جزائرية كيما البارصة وريال مدريد وانتر ميلان الي دا الكاس وخاصة الجزائر وبعد مدة طويلة رجعنا للمونديال انا نتفرج مع عايلتي وكي تربح نروحو كامل للبلاد كامل ونفرحو ونزهاو هدي هي وانشاء الله نفرحوا من قبل كي تديها الوفاق يا رب

 

[°~Kenza_02~°]

سلام خويا محمد على سلامتك
انا ما يحلاليش الماتش لوكان ما نكونش مع لبنات :closedeyes:
نتفاهمو كامل كل وحدة تقضي شغلها بكري ونتلاقاو عن وحدة فينا:u_pc:
جيبها الكارطي قاع من الطرف للطرف حتى ما كاش وين نقعدو :yaw:
وقاع نكونو لابسين لخضر ومعلقين لعلامات وراسمين في وجوهنا ...انا الاولى :heh:
وكي يجي الهدف يا ويلي نgلبو الدار بالعياط والجري تقول علينا مهابل:sheer::lolo::yaw:
وكي نربحو بيان سوغ نديرو غنية تاع دزاير وعليك يا شطيح وتمهبيل :yahoo:
حتى نطيحو من العياااااااااااااا

علاجال لالجيري نديرو كلش ..............يا ربي ان شاء الله يحمرونا وجوهنا في المونيال ويفرحوناااا يا ربي


مشكور خويا محمد
​

 

[DARINE05]

انا يا خويا موح والله نلبس تريكو تع ليكيب ناسيونال وشابو الدار تريب ومنحكيلكش على التصفار وانا قبل ما تبدى اي مبارة نتفهم مع بابا اذا تربح دزاير يفليكسيلي :yahoo::yahoo::yahoo:
نهار مع صربيا:sneaky2::sneaky2::sneaky2::sneaky2::sneaky2:
تفرت فيا ومنحكيلكش نهار تكليفينا للموناديال مع مصر :santa_1::santa_1::santa_1:
فليكسالي 1000:scared::scared::scared:
موبيلي حكامتو السخانة من الفرحة طحتلو البطري :wink::wink::wink:

 

[02asma02]

والله يا خويا محمد ماني عرفة كيفش نفوت المونديال السنة خصوصا مع الخضر
من قبيل كونا مع بابا وديروا معاه لومبيونس وضروك راه عنده شغل في مستغانم والله ماني عارفة كيفاش راح يفوت داير بصح المهم لالجيري تتألق وتفرحنا هذا ماكان شكراااااااا
​

 

[مغرورة بأنوثـتي]

حنا في الدار كل مايكون الدزاير تلعب
نديروا عشا سبيسيال
ونوجدوا سهرة مطحطحة
ونتفرجوا في راحتنا

 

[je suis algerienne]

انا نتفرج مع ختي لاخاطر:u_pc::u_pc:
خويا يخرج يتفرج مع صحابو في البرا
وانا وختي ندخلو لا شومبر انتاعنا:heh: ونتفرجو وحدنا لخاطر :u_pc::u_pc:ايجو لافامي انتاعنا يتفرجو واحنا نعيطو pzf:busted_red::busted_red::busted_red:ونقلقوهم
وعلابالكم كون يسجلو علينا butنقعد انا وهي نتعافرو :busted_red::scared::surrender:هي تقلي بسبتك وانا نقلها لا بسبتك انت. المهم نولو نتهيبلو:yahoo::yahoo::yahoo: وغدوة الصباح نتسامحو:surrender::surrender::surrender:
وهاك نفوتوها :angel::angel::tears::tears:

 

[dana1993]

بلازعاف هههه شكون الحكلة؟ ماشي باتنة خخخخخخ ايه والله المدرب زكري باتني دوريجين الحاج عيسة وليد بوعقال دورجين بن شادي وليد عمتي ههه دوريجين 05
ههه حابة نقلقك برك ماعليه ياك سميتنا واحد الوقت ديفيريس هه راه جا فيريس ليماتش
علا لاكوب دوموند يعني درك ميهمنيش كان همي انهم يطلعولها بيسك تحقرنا بزاف ايه و بكاونا بزاف
وو مننساش نهار18 - نوفمبر - 2009ايه الناس خارجة تفرح وانا مازالي نخزر في التيفي ونبكي هه
ذركا فلاكوب علابالي لاطولنا بالبزاف الدور الثاني بيسك سعداني راه ماشي 4-4-2 جامي يبدل هه
ربي يوفقهم ان شاء الله ولا جابو كثر ماعليش ماذا بينا


مشكور اخ موح

 

[Elif DZ]

ههههههههههه
يا موحا وش هالتصاور واش عامل بروحك
ربي يبارك عاش وش يصرالك لا قدر الله تقول عاينتني بنت الصحراا و لو انه عيني باردة

ربي دارنا ما تهتمش
عندنا 4 تلفزيونات ( ربي يبارك آه و ما ناش نتفاخروا عليكم هههههه)
واحد في الصالة و ندير فيه القناة الأرضية
و واحد في الهول و ندير فيه ممكن الجزيرة
وواحد في السطح و نديره للذراري ربي يقعدوا يصيحوا علينا
و الرابع مقفول
بابا يجي يسقسي برك
و ماما ما اهتمت كان بماتش أم درماان
كي نحب ندير فوضى نروح لدار جدي و نقعد بحذا خالي
هههههههههه
و الله تقعد حذاه كرشك تطربق بالضحك

واش رح نحكيلكم غير ربي يستر و ما جيناش بشايم في هالكوب ديموند
صحااا


ريم
من قدام ميكرويا
اللمة الجزائرية
هههههههه
​

 

[فراشة الايمان]

أنا قلتلهم حضرولي نيمرو الاسعاف من درك يطيح الدم و السكر و ما نعرف وشنو تاني
ههههههههههههههههههههههه

 

[Moha le sage]

المارسي عليكم كامل ..نروح للدار ان شاء الله و نجاوبكم على ردودكم ربي يخليكم
​

 

[ياسمين عنابة]

الصراحة ماندير والو في هذيك اللحظة نبقى قدام التلفيزيون وغير يبدا الماتش عين مغمضة عين محلولة حتان يكمل نحب نشوفه وحدي بعيد على خوي باسكو نيرفووووووو ويسوط ياسر وأنا نحب الكالم
المهم ربي ينجحهم ويتحفونا لي ماتش بيان

 

[معاك يا الخضراء]

السلللللللللللللاااااااام
وش نقلك انا اولا احم احم
نحكم الدرابو نغطي بيه وجهي كامل نخلي غير عينيا كي التوارق :yahoo::yahoo::yahoo:
الاااا ربحنا اتفقنا تطلع عجوزة ختي و نهبطو كامل a pieds للبلا
نديرو شوي اومبيونس و نطلعو:music_whistling::music_whistling:
بابا حبيبي ما يقول والو كي نعودو في جماعة :angel::angel:
الا خسرنا راني نكون هنا فاللمة نعيط حتى كي نبح
و لا تجي ماما طفيلي الميكرو :angel:​

 

[kou147kou]

لوكان جيت نقدر نروح نقعد وحدي في جبل حتان تخلس المباراة نروح منشوف والوغير النتيجة بصح لازم نتفرج لاخاطر ياكلني قلبي وزيد نحب نشوف زياني كي عشي يجري و التفريجة تكون مع لافامي والجيران

 

[فتاة حساسة]

awah
ana ntaferdj m3a djirana fi quartier ta3na
ydirouna datacho

wa ta7la lka3da







w rabi ykoun m3a l'equipe nationale

 

[هــــيلدا]

هههههههههههه،، وشبيهم مدايرات هكذا هههه

انا نزغرت برك:yahoo:
​

 

[w@hiba2010]

يعطيك الصحة على الموضوع

* انا نتفرج امع عائلتي
واندير لعشا من قبل باه كي يبدا الماش
نقعد مبروشيا

 

[صفحة بيضاء]

انا منتفرج ما نمرض روحي
غي هديك المرة مع مصر قريب هبلت
يربحوا او ميربحوش مغاديش يقسموا معيا دراهم او الشهرة
​