- إنضم
- 15 مارس 2009
- المشاركات
- 8,138
- نقاط التفاعل
- 3,560
- النقاط
- 356
السلام عليكم .. وش راكم شوي
الفايدة وباب الراي .. ونا نسركل في الاقسام نلقى حوايج حيروني حبيت نحكي عليها :music_whistling: ربما راني غير انا نتخيل
أول حاجة لقيتكم ما تقراوش الردود :confused1: يعني نورمالمون موضوع فيه 3 صفحات ..اقراو الكلام اللي تكتب فيه كامل من بعد جاوبو ولا وش قال ؟ يعني يكون واحد يمد في وجهة نظرو في حاجة و في الردود تاعو كاين نفس الكلام لي راح تكتبو نتا واللي جاوب عليه ديجا .. يعني كيما يقولو راح تولي ترجعو لنقطة الـ 0 .. نص الردود تاعكم معاودة ..علابالكم علاش ؟ خطراش تقراو زوج سطر وتبداو تجاوبو طول .. و زيد راي اللي كتب الموضوع ديما تلقاوه في الردود .. وتتوضح كثر بين الصفحات ..
حاجة خرى واللي فعلا تدوخني موضوع مكتوب في 2007 معرف صاحبو حي ولا ميت :music_whistling::001_huh: وهذا الامر راني مشوكي فيه ..
يدر مثلا واحد موضوع في 2006 ** اريد الزواج ببنت عمي ولا استطيع ** ..يجاوبوه الاعضاء ذاك الوقت وتخلاص القصة .. من بعد يجي واحد يسركل بتاريخ اليوم 09/2009 يلقى هاذ العنوان يدير فيه رد .. ولا واحد تفكر هذيك القصة حب يطلعها .. يولي في الصفحة لولة .. وتبداو نتوما تجاوبو عليه الاعضاء الجدد و حتى القدم : استخر بالله .. روحلها .. اخطيك منها .. شمر على ذرعيك .. :blink::scared: والسيد هذاك وقيل راه رحل من لبلاد هاذي طول ..وبلاك هذيك بنت عمو تزوجت وعندها 3 ذراري ذرك ..والسؤال يبقى مطروح علاش ما تشوفوش التاريخ اللي تكتبو فيه المواضيع ؟ ولا تستنى فيكم طاكسي ومسافرين :music_whistling:
يااااااااااااااو اقراو هاذي العبارة ديما تلقاوها في الجهة اليسرى الفوق " كُتب -- .--. ---- : [ يوم -- :-- ] ''
.. رحت لمنتدى آدم لقيت فيه غير اسم فلانة والبسودو تاع فلانة مدايرين موضوع :closedeyes:
هاذي تبين في روحها بلي ستيل جابت قرعة ريحة :001_wub:ولخرى راحت دارت على تصاور السوايع و حطتهم .. كشما يقولولها نتي فور و عقلية دوريجين وراكم تعرفو la suite .. زوج ردود و 20 رسالة خاصة .. هي تبداهالو شفتك عجبتك .. وهو يبدا صباح الخير في الميساج لول و نحبك ونموت عليك في الميساج الثاني و يبعثها لبزاف بنات ... كي يلحق هو للميساج العاشر تكون هي مع الميساج لول تاع وحداخر ..عرفاتو من موضوع دارتو هي في قسم الصور مثلا يحكي على البالو :001_tt1:
ياسيدي معليش خلوهم يديرو ... بصح وين راه ادم ؟؟ نورمالمون هذيك بلايصنا نتلاقاو نحكو على مشاكلنا تاع الذراري ونعاونو بعضانا ولا راني غالط ؟ علابلالي برا متقدروش تصقسو صحابكم .. تخافو يضحكو عليكم .. يا سيدي ارواحو هنا ونحكو ..
كي حوست على ادم لقيتو في منتدى حواء يسركل .. هاذي روبة و هذي كيف تاعلمين انك تحبين :001_wub: ولاخر مدايرين موضوع على الحجاب باش يجبد اكبر عدد من بنات حواء وكي يشوف بلي كاين تفاعل مع موضوعو يكومبي ثم شهر .. يسكن ثم نورمال .. كينين بسودوات كون مانعرفمش صح بلي ذراري كون شكيت بلي بنات و دايرين بسودو تاع طفل تالمون ضالين لاصقين ثم
ياسيدي البنات عندهم قضاياهم لي يخصوهم وما يقدرش الطفل يدخل معاهم فيهم .. مهمش كيما حنا ..و يحبو يتشاورو في بعضاهم في امور كثيرة اغلبها تمس البنية التركيبية تاعهم ولا تصرفاتهم ومش غير لا سمينا الباء والتاء باش تفهموني .. المرة تحب تسمع النقد واللي ينصحها .. بصح حسب ما شفت مكانش منتدى حواء بمعنى حقيقي .. لي يعرفو بعضاهم يتواصلو بالرسائل .. في حين كانو قادرين يديرو مواضيع يستفادو منهم بنات جنسهم خاصة المراهقات .. والي راح يتزوجو جدد ... نورمالمون اللمة تستفادو فيها من بعضاكم .. ماشي مديورة تقراو نكت وتروحو
كي نعقب لقسم الحياة الزوجية نلقاه فارغ يصفصي :confused1: الخبرات لي يندارو في هاذ القسم تسوى الذهب .. فيهم امور وتجارب من الواقع ومن القفص الذهبي ..المراة لولين كانو بعض الاعضاء يعطيهم الصحة يديرو مواضيع ثم ..من بعد لقيت الحالة فارغة مكانش تواصل .. مكانش اللي يقرى النصائح هذوك .. خطراش الناس كامل مراهاش تخمم في الزواج حسب المفهموم الحديث .. ياسيدي اوموان طلو ثم على موضوع ولا زوج غدوة يجيك موقف تكوني ولا تكون علابالكم بيه
والاغرب من هذا كامل كيما يقول خويا البروقرامور .. لقيت ذراري صغار هوما لي يجاوبو ثم
hmy:ولله في خلقه شؤون
البارح دخلت لزوج اقسام عامة في منتديات جدد .. تصدقوني رحت نحوس كشما نجيب موضوع باهي مدامني دخلت .. لقيت بلي كامل المواضيع محطوطة عندنا مكانش حاجة ماتجابتش ( اعرف شخصيتك من اسمك .. هذو الاعضاء كرهتهم .. معرف واش ..) راني حاير وينراهم الناس لي يكتبو بالفصحى ؟؟ في اي منتدى بالظبط .. علاش نتوما هنا كي تحكو بالدارجة نورمال وفي فرغ قلبك نورمال ..و كي تروحو للقسم العام لازم تجيبو موضوع منقول و تزيدو تديرولو تصاور باش يبهى ويزيان .. وين راهي كتبتكم نتوما في الفصحى ؟
اللي يجي لقسم واش يهدر و نلقاو العنوان بالفصحى راه باين بلي منقول .. بصح في القسم العام راني كيما درت مقدرتش نلقى موضوع مكتوب من عضو ..ما نحلفش عى زوج ولا تلاثة نعرفهم مليح ..
لقيت وحد الناس مفهمتش اذا هذيك نيتهم ولى عمبالهم ذكاوة منهم ..يبدلو العنوان و يخلو الموضوع نفسو اللي راح ينقلوه .. هات ميكونش معاود برك والفكرة مكررة .. هذيك لي نخاف منها ..خطراش راني تالمون لي يتعاودو الروابط و حفظتها
المواضيع الشرقية والخليجية
حاجة خرى نهار لي تجيبو موضوع اكتبوه بالفصحى ولا الدارجة تعنا تاع دزاير .. سواء كنتو في المنتدى العام ولا ركن حواء ولا وش تهدر .. نصقسيكم نتوما كي تكونو برا تقولو : تسلموووووووووو ولا تقولو يعطيك الصحة ؟ تقولو صبايا و بنوتات ولا تقولو بنات صغار ؟ تقولو أبلش ولا تقولو نبدا ؟ تقولو بس ولا تقولو برك ولا لكن ؟ تقولو مو عاجبني ولا تقولو مش عاجبني ؟ تقولو بدون زعل ولا تقولو بلا زعاف ؟ تقولو ابي ردود كثيرة ولا تقولو نحوس على بزاف ردود :thumbdown:
ياو اللمة دزيرية و كحلة الراس ماشي خليجية .. انا نشوف هاذ المواضيع ونا تقولني ضربني جن نبدا طول نسمي و نستغفر
راني راح نخدم لوحد الاعضاء تراديكتور traducteur خليجي - دزيري ماشي العكس باسكو هوما ما يدوش مواضيعنا تاع الدارجة .. وحنا نتفنينو باه نكتبو موضوع ونتفنينو باه نعاودو نكتبوه بالدارجة تاعنا اذا كان خليجي
كاين فرق بين اللعب و الجياح ...بين واحد يديفولي وواحد يستصغر .. بين واحد ينحي في ضيقت خاطرو وواحد كبير ومالعبش في صغرو :closedeyes: كي تروحو لقسم الالعاب طلعو النيفو بمواضيع تاع العاب بصح في مستوى المنتدى .. لكامل الاعمار ..فيها العاب تثقيفية ولا حوايج ملاح ..ماشي تاع اطفال في حضانة ( لاكراش ويعافوها ) .. : احسب لربعة و قول احبك لعضو .. الخامس في السجن .. الثالث احسن عضو .. :thumbdown: واش الفايدة ؟؟ يعني كي يدخل ليهم الواحد راه صح يستراح ولا راه يهبط في النيفو ولا راه يعقب في الوقت ... مزية راني نشوف في قفزة و صحو من طرف بعض الجماعة فهمت اخيرا بلي تقدر تجعل من القسم هذاك بلاصة نتباهاو بيها بافكارنا الجدد على كامل المنتديات و يدخلها اللي في عمرو 40 كالي في عمرو عامين
كينين حوايج تبدلو ومظاهر نقصو ..منها الردود بمشكور اللي دارت فينا حالة وحد الوقت والحمد لله تنحات ذرك وفهمت الناس بلي اللي يدير مشكور هو عبد فارغ ولا واحد يزيد في مشاركاتو برك ..
راحت ظاهرة الردود 0 لي كانت تهبط المورال .. رغم اني علابالي بلي كاين مواضيع فيهم 2 ردود ..بصح العقلية تاع الشخص تبان بردودو ..وكامل نبداو من 0 ..
لاحظت ثاني بلي ولينا تقريبا 400 عضو تكونيكتي كل يوم وان شاء الله نولو 2000 عضو ونعرفو اعضاء من دزاير ومن العالم كامل ...
اخيرا نقلكم كونو بسطاء ..في ردودكم في مواضيعكم .. اخطيكم من التكلف وتركاب الماسك ..واحد ما يكسر على راسنا الجوز ..اللي فور باين والعاقل باين والفارغ باين والترونكيل باين والمتدين باين .. اخرجوها طاي طاي ..ماكان لاه تغلفو رواحكم بغلافات ملونين تبان شخصيتكم من بعد كي واحد يقشر هذوك الغلافات .. مكانش فينا الكامل ومكانش الواصل .. وعلابالكم مليح بلي كامل نبداو في الخرطي منحبسوش .. بصح لالا ..خلي لي يعرفك بعقليتك هنا ..تكون نفسها برا .. والانسان راه يتعلم من الناس لي دايرة بيه
لقيت بلي الموضوع تاعي راح يولي جرنان مالا حبست .. :music_whistling::closedeyes:
خوكم محمد
آخر تعديل:
