صاي خويا ؟؟؟ مارديتليش الصرف ...

[ماكانش]

السلام عليكم ورحمة الله وبركاته
واش راكم خاوتي لاباس بخير الحمد لله
واش راكم مع رمضان راهي فاتت سمانة خلاص
البارح كنت في واحد الحانوت نشري وكان قبلي واحد
المهم لقيتو واقف يسنا، من بعد قال لمول الحانوت صاي خويا ؟؟؟
قالو مول الحانوت واش ؟؟؟ قالو الصرف تاعي (ميات فرنك) ...
جبد عطاه مول الحانوت ميات فرنك :surrender:، وخرج هاد العبد
أنا حرت على ميات فرنك هكدا تريكلامي ؟؟؟؟؟؟؟؟
مانعرف أنا ألي غالط ومفرط ولا هادا ألي يطلب في ميات فرنك هوا الغالط
ونتوما قولولي واش تشوفو في هاد العفسة ...​

 

[** غزال الصحراء **]

اه هاذا Sure غالبو رمضان ,, ميات فرنك كون يلقاها طايحة في لرض ما يهزهاش جاي يدابز عليها في مول الحانوت

ربي يلطف .

 

[DARINE05]

يخي عباد يخي يدير الحرب على حاجة تافهة ههههههههههههههه

 

[ماكانش]

اه هاذا sure غالبو رمضان ,, ميات فرنك كون يلقاها طايحة في لرض ما يهزهاش جاي يدابز عليها في مول الحانوت

ربي يلطف .

يعطيك الصحة خويا
أنا تبالي ماشي قضية رمضان تبالي الشح والبخل برك ...

 

[ماكانش]

يخي عباد يخي يدير الحرب على حاجة تافهة ههههههههههههههه

هههههههههههههه
يعطيك الصحة دارين
حنا ديما هكدا على جال ألف يقتلك هههههه​

 

[ماكانش]

اهلا بيكم.......

 

[Oxygene2]

دراهمو هو راه يتعب عليهم ويعرف قيمتهم

 

[tarek ess]

مول الحانوت اللي غالط اعطيه الصرف تاعو مهما كان

 

[N@riM@N]

وعليكم السلاام
هههههههههههههه فكرتني بوحد النكته
قالك وحد انهار بخيل جالس يبكي شافو واحد يبكي سقساه وعلاش تبكي قالو راهي سنة المشطة تبحرت و معاش نقدر نرفد المشطة معايا قالو الراجل و علاه ماتقدرش حتى انا نرفدها و شحال من سنة طايحة و ماقلت والو قالو البخيل ماشي هنا المشكل المشكل راهي السنة لخرانيا تع المشطة ​

 

[الحمساوية]

دراااااااااهموووووووووو ميا دورو ولا بغا ربعين دورو يعطيهالو........مول الحانوت نورمالمو يعطيهالو الدراهم دراهم ولا طمع في ميا دورو..........

وحتى ميا دورو راهي دراهم......زعما هههه ........المهم ماراهش غالطططططط نكره هاد العفسة تاع موالين الحوانيت زعما ميا دورو اسمح فيها اووووووووو

 

[Im here for ever]

وانتوما علاه راكو حايرين الدراهم دراهمو وهو حر فيهم
بيناتنا لوكان هاد السيد راح يشري عفسة وخصو 1dinar مول الحانوت يقولو مادبيك جيبلي ميات فراك ولا راني غالطة

 

[معاك يا الخضراء]

و عليكو و السلاااااااااام
ازيك يا راgل:heh:
هادييييييي مدة ما لقيتكش :glare:
مية فرانك :yahoo::yahoo: هههههههه ما نطلبهاش مي الا عطاهلي نردهالو و نقولو عمو اعطيني حبة امين
:yahoo::yahoo: و لا زوج تاع عشرة دورو :yahoo:
اييييييييييييي وش من عام رديتني :surrender::surrender:​

 

[إحسَانْ]

نووورمال

لاه وش فيهااااااااااااااااااا
يريبوندي على حقوو

ميات فرنك ولا مليون

كل واحد مسؤول على جيبو وكون يكون الماكلة ولا القضية لي شراهي ميش ليه تعتبر سرقة لاخاطر ماعندو حتى دخل في النقود هاذيك

 

[ريفال]

المسكين هدا راه قطع عليها البحور وتحوسو يخلي الصرف تاعو ههههههههههه بصح والله هدي تانى حاجة مليحة

 

[اسامة]

يخي عباد يخي يدير الحرب على حاجة تافهة ههههههههههههههه

 

[الشاوية الحرة]

المفــــــــروض مول الحــــــــاانوت يردهـــــــــاا وهو يقـــــــــولو خليـــــــــهاا
​

 

[khalil hip hop]

انتا حرت وانا محرتش علاه ؟

لأنو ميش كل واحد راح يطلب مول الحانوت علا جال ميات

فرنك كل واحد وكيفاه رانا عقلية dz ماتنساش ياخويا

انا كون نقلك خطرا جينا ماشيين انا وا ولد خالي جينا

نتمشاو في حي اخر ميش بحذا البيت نتاعنا واش سمعنا بحذا

الحانوت الا التطييح و ونشوفوا البونيا ثايرا المهم

الدنيا تقلبت وصبحت فيها الدرك الوطني احنا جينا نحزوا

على هاذم الاثنين كانوا يحزوا عليهم ناس اخرين سلافيا

اللي يعرفوا ربي مليح يعطيهم الصحة راحوا يحزو على

هاذم الاثنين وجينا انا وا ولد خالي دخلنا حى احنا نحزوا

عليهم وراك انتا عارف عقلية dz ميش كل مرة على

المباشر المهم بعد ما حزينا عليهم جاو الدرك الوطني

وهزوهم وراحوا بيه الى المحكمة الوطنية ومن بعد صقصيت

الجيران على هاذم واش بيه تعاركوا وثوروا البونيا :music_whistling:

؟ قالولنا راهم تعاركوا على جال كعبة حلوة ماقسموهاش

بانص مسقمة :scared: ديكتموا رحت انا ولد خالي رحنا قبل

مايرجعوا الدرك الوطني ورحنا نتشاوروا على هاذم الاثنين

ربي يهدي خويا هذا مكان ميش كل واحد وعقليته نورمال

واش راح تدير اصبر خويا ان مع الصبر مفتاح الفرج اصبر

خويا مكانش اي باي واستهلا في روحك والسلام عليكم
​

 

[ماكانش]

دراهمو هو راه يتعب عليهم ويعرف قيمتهم

ماشكيتش ميات فرنك عندها قيمة ؟؟؟؟؟؟​

 

[ميسون]

السلام عليكم نشكرك على هاذ الموضوع المميز والهام لان هاذي العفسة تصرا بزاف والغلطة
انا نقولك نتاع مول الحانوت نورمالمو هاذي امانة لازم يرجعها حتى لو 1دينار

 

[كلي امال]

السلام عليكم
معاك حق 1 دج تبالك والو و ماعندها مادير
بصح اتخيل تستحق مليار و انت عندك مليار غير 1 دج و مالقيتش منين تجيبها
تولي هديك 1 دج تحجب على المليار و اللي عندك ماعندهمش فايدة بلا بيها
هكدا كان يقولنا الاستا> تاعنا باه نعرفوا قيمة الشيئ مها كان صغيرو لا تافه
سلام​