أغاني العروسة و أصوات الحيوانات دايرين حالة في القسم نتاعنا..

"نور العين"

:: عضو مُشارك ::
إنضم
9 أوت 2010
المشاركات
335
نقاط التفاعل
8
النقاط
7
مساء الخير عليكم يا وجوه الخير
وشراكم وواش حوالكم يا الغاليين على قلوبنا أعضاء لمتنا العزيزة؟

كما كل يوم وكما تعودنا في حياتنا كايان بزاف الحكايات اللي تصرالنا وتضحكنا وخطرات تخلعنا
اليوم رايحة نحكيلكم على ظاهرة جديدة ظهرت في قسمنا وباقي الاقسام في الليسي نتاعنا

مرة من المرات كنا نقراو في english وكان الكالم في la class و فجأة نسمعوا أغنية نتاع العروسة "ولولوا يا البنات عليها عروستنا راهي جات أنشاء الله يسعد سعدها نوظوا باركلها..." وولات قاع la class تضحك من هذا الجاست والله غير حاجة تضحك كاين شيء élèves هبلوا شوية

هذي وقلنا معليش نهار وجاز

غدوة من هداك تاني عند l prof de englais االلي مسكينة دايما تحضر هدو المشاكسات ههههه
قاعدين نقراو عادي حتى نسمعوا قطة تنونو "مياو مياو" منبعد زعما ينطق واحد من les élèves يقول "أها خرجولنا هدي القطة خلونا نقراو " منبعد يعاودوا يديروها تنونو هديك القطة في البورتابل وموراها juste يديروا كلب ينبح منبعد يقول واحد"سلكوا هديك القطة مسكينة قبل ما ياكلها"و l prof مسكينة تندب سعدها على زهرها مع les élèves

shaun the sheep دايروينها صونري وقلنا معليش وهدي المرة دايرنا عرس وزيد قطة وكلب ومعليش
والمرة الجاية واش يديروا ربي يستر

نخليكم تعلقوا شوية على هدا الموضوع
 
السلام عليكم

تصرفات صبيانية ربي يهديهم برك

و ماشي غير فاليسيات و لا مدارس وصل الامر حتى فالجامعات
 
ههههههههه ربي يعينها l profديالكم قداشها تعاني
وكيما قالت منيني تصرفات صبيانية
وربي يهدي الجميـــع
 
سلام
تعرفي والله كارثة جون ولا جون في في سن 17 و18 سنة يدير تصرفات صبيانية تقول ملعبوش في وقتهم ،الله يهدي هادي الامة
مارسي
 
اكره ما عندي اني نشوف هاد الخدايم
المشكل ما يجيبوها غير في رواحهم
ليبروف ماهم خاسرسن والو يحضروا صحة يديروا الي عليهم و يخرجوا
معليش الانسان كي يديرها في وقت مناسب مي تصيبيهم كل وقت هكدا ماشي خدمة
 
والله الموضوع ضحكني نشفا يامات بكري كي كنا نقراو التلميذ يخاف لوكان يفوت عليه استاذو ويلقاه يلعب واش راكي تحكي صاري في جميع الاطوار الدراسية وذلك بسبب التربية انعدمت .الاستاذ مايضربش(بن بوزيد واش راهو يخرج )
انا ننصحك حاجة انت وكافة الزملاء انكم ماتوافوش تضحكو كل مايشعل البورتابل ماتضحكولهمش ودوك تشوفو كيفاه يوليو
 
خليوهم يعيشو la vie
هههههههههههههههه
حبيتوهم يجيبوها كامل قراية ههه
...
راني نتمسخر برك
ايه تصرا هاذي بزاااف
و انا الحق نمووت بالضحك فالمواقف هاذو
مي فالحق ما يديروهمش
للأسف راحت قيمة الأستاذ
سيرتو مع المستخلفات الأنوشات لي يقريو ذرك
ما يفرضوش هيبتهم على التلاميذ عليها تصرا هكا
....
الله يهدي ما خلق
ربي يجيب الخير
و مارسي ع الموضوع
 
هههههههههههههههههههههههههههههههههههههههههههه
هههههههههههههههههههههههههههههههههههههه
شح فيهم الأساتذة الحقارين يستهلو ا هههههههه
نتمسخر برك صح هذي العدوى راها انتشرت في كل
انحاء البلاد وصلت يديرو شونيشيب راهي دايرة حالة هههه
 
هههه
الكلاب و القطوطة
في الكلاسة عندنا حظيرة حيوانات
و لي خرجت جديدة الصوت تاع tondeuse
دارو بيه حالة
و يبداو لي زيلاف يعلقو
" خف يدك باح تحففلي حتى انا "
" ازرب شوية خويا عندي ساعة و انا نسنا "
و حتى تاع pـشيييييييو
ف لا بيام سات
يحطوها و يبداو من واحد لواحد
باه ميفيقش الپروف مين جاي الحس
 
ههههههههههههه الله غااااااااااااالب
مالعبوش في صغرهم
 
والله غير تحيري في جيل تاعنا
انا بعدا في كلاصتنا لوكان غير اغنية احنا يديرولك اغنية لراي اللي فيها غير الكلام الشين والله تحشمي في بلاصتهم
و كاين و كاين كل يوم كاين جديد
 
يعطيكم الصحة على التعليق وكما قلتو ربي يهديهم ويهدي الامة جمعاء
 
السلام عليكم
والله كثرت بزااف لكن الحمد لله اللي كاينة ههه
تكون كاره القراية امبعدا يضحكوك
المرة القادمة رح نديرلهم تع القذافي ربي يرحمه
حنا داروها عندنا
حتى سمعنا واحد يقول...من انتم من انتم هههه
ربي يهدينا ..الجزائريين وحدهم ربي يحفظهم =)
 
ربي يثبت عليهم العقل والدين
 
خليهم يعيشو la vie كيما les profs عايشين حياتهم يضربو ينقصو يشتمو en plus بلا سبب
meme عندا dans la class يديروغنى تاع englais فالحصة تاع انجلش وغنى فرنسي فالحصة تاع الفرنسية وغنى الراي /نكرهووووووووو/في الحصة تاع العربية mais في الحصة تاع الرياضيات نديرو
كلاب وقطوطة
مي انا عندي حاجة وحدة كما تدين تدان
كيما يعملو فينا الاساتدة الشر ونرجعهولهم
ماارسي
**
 
ههههههههههه ياخي مهابل يخي
بصح والله غير يمات الدراسة وحدهم صراحة
 
ههههههههههههههه والله غير فووووور
اختي نقولك حاجة استمتعي بهاد اليامات باسكو من بعد تتوحشيهم +الاساتدة يستاهلو اكتر
بصح لازم وقت القراية قراية وشوية هبال ما غاديش يأثر بزاف ما فيها والو المهم يزيرو رواحهم في وقت الجد
بالتوفيق للجميع ...
 
تشفاي على فيلم امراتان كي خرجت يماة مراد تحوس عليه وقعدت تعيط "مراد مراد" امالي حنا كانو يعيطو كيما هاك كيدور الاستادة هههههههههه
 
ههههههههههههههههه والله ضحكتيني ختي ههههه
والله عندك الحق صح حنا تاني كل مرة يخرجوا بعفسة جديدة
واخر عفسة لي خرجوا بيها مي بيناتنا انا عجبتني
فالبورطابل مسجليين صوت لاسونات تع السويام تعنا
وكي نكونوا كارهين من الحصة يديروها واحد المرة داروها في حصة لفرونسي هه رفدنا حوايجنا وخرجنا والاستاذة منها بالصح جاية خارجة وكامل حتى من بعدة فاقتنا ههههههههههه
واش ضحكنا هذاك النهار
شكرا ليك ختي
 
والله عندكـم الحق....تصرفات صبيانية...


حتى حنا في قسمنا ...يديروا الغنا و les songsاللي يعيو...و أصوات الشاحنات والكوموبيلات ولا حتى هدرة مسجلة تاع تـgـمبير ........ و حنا نهار الاربعاء حتى جا لينا المدير وبهدلنا واحد دارولو طرد ونصف داخلي قالولهم والله ماكاين الفطور اليوم و داروا البورطابلات من القسم والمشكلة طاحت غير في العاقلين تع القسم... ربي يهدي وخلاص
 
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top