عاونوني رايحة نموت

[خديجة محمد]

السلام عليكم ورحمة الله وبركاته
انا مخطوبة من المفروض عرسي راهو قريب بضح وقع مشكل بيني وبين خطيبي داوسنا وعايرني وقالي كلام انا متحملتوش قلتلو بلي عييت منو وتضرفاتو عيكلي وقالي والله منزيد نعيطلك وقولي لداركم بلي خلاص بيني وبينك والكارني والتصاور قطعيهم ولا احرقيهم ولا يكفر ويطيح قولولي وش ندير حاسة روحي راح نموت راجل كيما هذا وش راح ندير معاه​

 

[redmoon]

من المفروض يكون الاحترااام و normalement يحترمك ومادام العرس راهو قريب لازم تكون المودة والتفاهم وتركزو على الاشياء المهمة فهاذي la periode لي بقاتلكم

ماديري والو بالاك الغضب هو الي يهدر فيه اصبري شوية يهدى وهدري معاه بسياسة وحلو مشاكلكم بلعقل

ان شاء الله غير الخير وربي يتمملكم بالخير ان شاء الله

وبلاك كاينة بنات يفيدوك خير مني لاني مانيش مخطوبة ومنعرفش بزاف هذو لحوايج

 

[ماكانش]

الراجل ألي يعايرك ويقلك كلام كبير ونتي مخطوبة برك مايجيش منو الخير بعد الزواج وبعد ماتكوني بين يديه ...
وشاوري والديك

 

[كنزة]

خيرو فغيرووووو
اخطاك هدا باين ما يستاهلكش​

 

[SAMIRA25]

ربي يصلح ذات بينكم و ينور طريقكم

 

[الميزان]

سلام عليكم

يا ختي على حساب هدرتك ماكيش مستعدة تفارقيه

وماكانش راجل بلا عيوب انتي راجعي روحك مليح وشوفي لاي درجة تقدري تصبري ومادام وصلتو للزواج باينة بلي كان بيناتكم تفاهم
والراجل راهو صعيب عليه يودع العزوبية والحرية

حسب رايي خلي يمات واصبري وشوفي واش ردت فعله

وقوليلو كيما جيت خطبتني من عند والديا ارواح بطل قدام والديا

ربي يكون معاك ويفرج عليك

 

[FATIMA 19]

ممكن هاذي غلطة وتفوت لحظة غضب الانسان يتقلق
اصبري شوي واذا كان مصر مع رأيو تشاوري مع أهلك وتفاهمو
ربي يعينك حنونة

 

[روز]

لما يقرب موعد العرس دائما يزيد التوتر والقلق على أتفه الامور
حاولي تستوعبيه وتساعفيه وماتقلقيهش
الرجل والمرأة كلهم قبل الزواج يكونو مقلقين كاين لي يتقلق بزيادة وكاين لي مايبانش عليه
على حساب العقلية وشخصية كل واحد
اتصلي بيه وهديلو اعصابو
الحياة الزوجية مش حب وسعادة فقط راهي تاني مشاكل وقلق
يلزم من دركة تتعلمي كفاش تمشي المركب​

 

[بنت الـ25]

والله ما لقيت وش نقلك يا ختي
العلاقة بين أي اثنين تكون بالأساس مبنية على الاحترام المتبادل
حتى لو انعدم الحب ..
وعلى العكس من ذلك لو كاين الحب والاحترام مكانش مستحيل تستمر العلاقة بزاف
وتصل إلى طريق مسدود
أنا في رايي هدا اللي يعايرك وانتي مزالك مرحتيش لدارو و"يكفر"
ويقلك قطعي الكرني حتى لو في لحظة غضب باين انو مستغني عليك
صحيح اننا لما نتصدمو في ناس حبيناهم نبغو نموتو كيما قلتي
لكن شوفي للجانب المشرق الإيجابي
انتي بالعكس يلزم كنتي تحمدي ربي انو هاد الشي صرا قبل ما تروحي لعندو
وإلا لكانت معاناتك اكبر
احنا يا ختي نطلبو من ربي يرجع لعقلو وتتصالحو لكن في حالة استمر على رأيو معندك حتى حل
غير انك تستغني عليه حتى انتي وتحاولي تنساي وربي يعوضك بأحسن منو
اللي يقدرك ويحترمك ويصونك


​

 

[والدة فاروق]

الاستخارة و الالحاح في الدعاء

 

[خديجة محمد]

شكرا علي كل لي ردو عليا راهو عيط درك وقالي قولي لداركم بلي خلاص قلتلو انا جيت خطبتني من عند بابا كي تبطل تهدر معاه قالي انا منهدر منحوس حتي نبعتلك ورقة الطلاق قلتلو امالا درك نعيط لداركم قالي انا دارنا ميحكموش فيا نحكم في روحي انتي ديري رايك وانا ندير رايي​

 

[بنت الـ25]

شكرا علي كل لي ردو عليا راهو عيط درك وقالي قولي لداركم بلي خلاص قلتلو انا جيت خطبتني من عند بابا كي تبطل تهدر معاه قالي انا منهدر منحوس حتي نبعتلك ورقة الطلاق قلتلو امالا درك نعيط لداركم قالي انا دارنا ميحكموش فيا نحكم في روحي انتي ديري رايك وانا ندير رايي​

لا حول ولا قوة إلا بالله العلي العظيم
اختي هدا إنسان عنيد صعب المعاشرة
رايحة تتعبي معاه إذا حب ربي وتصالحتو
ومدامو مصر على الفراق خلصت الحكاية
عالأقل احفظي ماء وجهك وكرامتك .. يزي ما يدوس فيها اكثر من هك
انا من عندي هدا ما يستاهلش دمعة من عينك ولا لحظة تفكير فيه
كان الأحسن كيما بديتو بالمعروف تتفارقو بالمعروف لكن هو حب هكا فله ما أراد
تعرفي لو ما تزيديش تتصلي بيه رايح يدخلو الفضول ويحب يعرف انتي فواش راكي تخممي
ورح يتصل ساعتها قوليلو انا اللي مفرطة فيك وانتي لي ماكيش شاتيتو وشوفي ردة فعلو
وربي يرزقك بأحسن منو ... مش برك هو راجل فالدنيا هادي
​

 

[خديجة محمد]

والله ماقلتلو شيئ هو لي بدا يخلط فالهدرة كي قلتلو احترمني شوية انا مرانيش طفلة تع زنقة مادابيا نهدرو في حاجة سيريو قالي انا منعرفش السيريو وانت نار تحت تبن ونكشفك باعقل وبدا يكفر ويطيح
وهو عندو طبيعة كي نكونو نهدرو فالتلفون يبدا يجياح ويبسال ويهدر هدرة معندها حتي معني بعدها انا قلتلو نعودو نهدرو خطرة فالسمانة قالي اوك بصح ولا يعيط كل يوم وعمرو ميهدر علي حاجة تع صلاح غير تمهبيل وتمسخير وانا منحبش هكا هدامكان​

 

[سمسم السمسومة]

مهما كان المشكل لي بيناتكم و أنا منيش نعفي فيك نتي على خاطر نورمالمو راكي تعرفي طبايعوا...زعما من نهار عرفتيه مقالك حتى كلمة قاساتك...._سامحيني و لكن مكانش _منها...لي فيه طبيعة تبان مع اللول مش مع اللخر....و راكم في فترة حساسة قريب العرس الضغط حاجة عادية راح تكون عليكم في زوج....كنت قادر تساعفيه و تفوتي المشكل ...أنا منقدرش نقولك فكيك منو وتهناي مي esq بلاك الله غالب لحظة غضب و ماتتعاودش....استخيري ربي سبحانوا....و الاحترام هو أساس أي علاقة و اذا طبيعة فيه نتي تعرفيه خير منا...ولي فيه الخير ربي يجيبوا...........

 

[SAMIRA25]

ربي يسهلك امورك اختي و لي فيه الخير يجيبو ربي

 

[سمسم السمسومة]

لي يحترمك يبداها وحدوا بلا متقوليها نتيا......هذي طبيعة فيه ونتي راكي قولتيها...في رايك منطقية تجي ذركا تقولي واش ندير...نتي قبلتي بيه نهار اللول هاكا...قبل و أثناء الخطوبة و قريب العرس زعما هاذي ماشي فترة خلات تكتشفي بلي مش راح يتبدل......والله حيرتيني معاك...نتي مشيتي فالحكاية برغبتك واحد مسيفك.....في رايك نتي هذا انسان يستاهل واش راكي تستناي خليه يدير واش يحب ...علاه غير هو اللي كاين في هاذ الدنيا....

 

[خديجة محمد]

اختي حنا عندنا 3 شهور خطبة برك وانا مكنتش نعرفو من الاول مان يبانلي عاقل

 

[خديجة محمد]

ختي م مفهمتيش نوع الكلام لي يقولو لالا ماشي غزل لوكان جا هكاك معليش هو كلمة حلوة ميعرفش يقولها يهدجرلي غير الهدرة الباسلة تصوري يقولي كي نكون نمشي معاك فالزنقة نحشم بيك تبهدليني بلبستك وانا والله لبستي محترمة ونقية وخطرة خرجت معاه وتقطعتلي ليبة جديدة جازو يمات عايرني بيها وخطرة كنا نهدرو قالي بلاكي جيني بسباطك هداك الفايح ياختي وش نقولك وكي تشوفيني وتشوفيه فرق كبير بيناتنا انا خير منو في كل حاجة شحال من مرة يزيد معايا الهدرة ويقولي راني حاب نبطل وكي نقولو دبر راسك انا قلبي وجعني وعييت من تصرفاتك يولي يحلل ويقولي كنت نقصر معاك برك​

 

[الميزان]

عسى ان تكرهو شيئا وهو خير لكم

يا ختي عليك بالصبر منين وصلتو لكيما هاك اخلاص ربي يجيبلك الخير في غيرو

 

[أم راضية ~_]

السلام عليكم
شفت موضوعك الصباح وقلت لوكان غير ما تستعجلش
وحبيت نرد مي لقيت روحي ما نعرفش نهدر
و دوكا كي عاودت قريت الموضوع و أراء الأعضاء و قريت الإضافاات الي زدتيهم قدرت نتخيل شوية كيفاش عامل الانسان هادا
ربي حبك و بينهولك على حقيقتو و قبل ما يطيح الفاس فالراس
أحمدي ربي على هاد الشي
عادي جدا ادا حبستي مادام هو الغالط في كلش
وزيد الكلام الي يقولهولك :down: مؤسف جدا على خاطر يدل على انعدام الاحترام وكي ما يكونش الاحترام والقدر كيفاش تترافدو و تعيشو مع بعضاكم ؟؟
الحمد لله اختي كي جات خفيفة و قبل الزواج وقبل ما تحصلي تاع الصح
وما تخميش بزاف ربي يجيبلك واحد أحسن منو ألف مرة على حساب نيتك و عقالتك إن شاء الله
شوية صبر و قوة باش تواجهي الامر هادا برك فترة و تجوز
​