وتربّع الظلام.. مُسلسل حصري للمتنا الغالية

[وهرانية في بشار]

رد: وتربّع الظلام.. مُسلسل حصري للمتنا الغالية

سلام كيفكم

 

[وجع الظلم]

رد: وتربّع الظلام.. مُسلسل حصري للمتنا الغالية

فعلا اصعب شيء ان اعز الناس يظلموك وفي وقت الشدة يتخلاو عليك
وتعيش معاهم وانت غريب ما راك قادر لا تتقرب منهم ولا اتبعد عليهم
واصعب من هذا الظلم ان الحب الي كنت تملكه يتحول الى كره ويقتلك
يالله حلقة مؤلمة واتبكي الله يكون في عون كل مظلوم
يا ناس الظلم وجعو مررررررررررررررررررررر
تحياتي​

 

[Melia azedarach]

رد: وتربّع الظلام.. مُسلسل حصري للمتنا الغالية

السّلام عليكم ورحمته تعالى وبركاته
أهلا بكلّ المشاهدين والمشاركتين: وجع الظلم والمبتسمة إبتسام...
نورتو
مع
الحلقة الثانية عشرة:

جا الصّباح..ونور الشمس يتسلل من نافذتي حتى ينوضني..
لنقف من جديد ..ونخطي خطوة بعد عجز دام آيام..
نضت مصممة على أنو نحكي مع خالتي في التيليفون..
وانتظرت حتان تفوت الثمنية نتاع الصباح..
وكلمتها..
أنا: السّلام عليكم ..صباح الخير
خالتي:وعليكم السّلام ورحمته تعالى وبركاته..صباح النور.. ((بنبرة صوت تدل على أنها فرحت))..
أنا: وش هي أحوالك خالتي..إن شاء الله لاباس..
خالتي : لاباس والحمد لله والله غير سوال عليكم...وش هاتي لبشارة..
أنا: خالتي..أنا عمري ما تمنيت أنو نتزوج وأنا في هذا السّن..كنت نحلم أنو نولي طبيبة ونتخرج..ومن بعديها نخطي خطوة الزواج..مي الظروف حتمت عني أنو أحلامي تتبخر..
ومستقبلي يتدمّر..و حتمت عليا نقبل بالأمر الواقع..
رغم آنو منيش حابة ندمر مستقبل واحد ناجح معايا..وألف بنت تتمناه..
فقط لأنو آنسيستا بزاف عليا..
أنا ردي أنو موافقة..
خالتي: ((فرحت بزاف))..الحمد لله..أسامة راني غير شاداتو كل يوم حاب يجي يكرر..
ربي يعطيلو قد نيتو..
ومتقوليش هاك..أنت مزالك في نظرنا نُهى الطاهرة التاقيّـة..العفيفة..
ليوم راح نجي.. وجدي ورقاتك ويلي ناقصك يخرجو اسامة..
أنا: في أمان الله
خالتي : بالعافية..

وانتهت المكالمة..
ماما جات وجدة..
فرحو ..
أنا مبينت والو..
فقط قلت صباح الخير ..ومشيت..
مضا نصف اليوم..
وبعد الظهر جات خالتي..
خرجتلها مش كيف وحدة جايين يخطبوها..
خرجت وكأنو خالتي برك جات تزورنا..
لأنو مزالني في ظلمة..
جات لبستني الخاتم..وعطات المهر..
وراحت..
كانوا عينيها ينطقوا فرح..
فقط لترضي بنها أسامة..
وحتى جدة وماما..فرحو
يمكن باه يتهناو مني..
بقيت نشوف في خاتم .. ونتفكر في أمنياتي..
فرق كبير بين ما كنت نتمنى ..وبين واقعي في هذيك اللحظة..
وكعادتي مع مصحف بابا وسبحتو..وصلايتي قايمة الليل..

وغدوة جا باه أسامة يدي الورقات والصور..
فتحت درجي ..ولقيت فيه صوري تصورتهم لما كنت نسجل في الجامعة...
افتقدت بسمتي هذيك...وحتى شخصيتي المرحة..
افتقدت كل شي فيا..

في أمان الله
مع حلقة جديدة غدًا بإذن الله إن كان في العمر بقيّـة​

 

[منايا الجنة]

رد: وتربّع الظلام.. مُسلسل حصري للمتنا الغالية

قطعتولنا قلوبنا.. في انتظار الحلقة التالية
بارك الله فيك

 

[وجع الظلم]

رد: وتربّع الظلام.. مُسلسل حصري للمتنا الغالية

فعلا بعد الضيق ياتي الفرج
حلقة فيها اشوية امل
ما اطوليش علينا برك مسلسلك رغم اني في الاول
بعد ما عرفت انه خيالي فقط قررت اني ما ندخلش
بصح اعرفتي يا لالا كيفاه اتشديني بالسيف
اسلوب روعة يعطيك الصحة بالتوفيق​

 

[Melia azedarach]

رد: وتربّع الظلام.. مُسلسل حصري للمتنا الغالية

السّلام عليكم روحمته تعالى وبركاته

نورت يــا مُنايا الجنّـة و وجع الظلم..شُكرًا على التواجد الجميل

الحلقة الثالثة عشرة:

توحشت كل شي فيا..
مشيت حتان جا مباغاتني خويا فؤاد..
وشحال كان متقلق..
كان الشرر يطير من عينيه..
عطالي كف...
ولأول مرّة نتلقا كف في حياتي..
أصلا بيا مُسالمة في البيت..
ما نتعافرمع حتى واحد فيهم..

سيرتو فؤاد ..
هو و العينين..
كان لسع جا من البر..
وشحال تصدمت من هذاك الكف..
زاد بعديها شدلي شعري..
دموعي سالو..بصمت
لانو تعلمت أنو نواجه كل شي بدمعة وصمت..
قالي ..يا وحد الكلبة..بهدلتي بينا
واحد مراهو حاب يحكي معايا..
حبستي لبابا قلبو بعملتك..
ودمرتينا بقلة ادبك..
راني حاير..وعلاه بابا كان يعتبرك مثل اعلى..
كان الله يرحمو مغشوش فيك...
طعنتيه ومات..
وطعنتينا حنا..
قالها وهو يعيط..
تعرفي يا مُحترمة ..
هذا الكلب نتاع سعد ..
أوسخ واحد..
كي شافني خرجت..
سبني ..وحكالي على شي سمعتو لاول مرة ليوم..
تصدمت فيك..
قالي روح اقعد في داركم كي الحرمة..
على زين عمايل اختك..
تعرفي تمنيت تنشق الأرض وتبلعني..
وما نسمع واحد يوصلني قدام الناس..
كانوا كامل موافقينوا..
حتى انهم تحاماو معاه باه يضربوني..قالولي روح ادفن روحك.
يا مضيع شرفو..
الله لا يتربحك الله يديك ..

وبدا يبكي..
دموعوا كانت اول مرة نشوفها بعد ما كبر..

هيه كلام الناس..


ماما جات تجري كي سمعته يعيط..
وكلهم جاو
حتى اسامة كان عارف انو كاين إّن في الموضوع..
بعداتو ماما عني..
محبش قلها خليني نقتلها ونتهنا منها..
قعدت نشوف..
حتى هوما تصدمو كي شافوني هادية بهذاك الشكل..
كنت في موجة صدامات بين نفسي ..
كل حواسي تتضارب..
والعقل نتاعي يرجع في لاميموار..
يوم ضيعوني وحطموني وحرقولي فراشاتي..
حرقوا الاخضر واليابس..
وطحت مغشية ..
تمنيت نموت..
نتهنا من هذي الآلام..
مي الحياة مقادير..
ومزاله وقت وفاتي ما لحقش..
سرعوا فطنوني..
أسامة خرّج فؤاد ..
وراحوا للصالة..
ماما وجدة يفطنوا فيا..
جدة كانت تفكر وتقول.. : وشحال صبرت هذي البنت ...وشحالها حاملة هم..
الله يرفع عليها..
فطنت على واقعي المؤلم ..وعدت ليه ولحياتي الظلمة..
ماما قاتلي: من قلة الأكل..تحوسي تقتلي روحك..حرام عليك..
جدة: يا بنتي صبر جميل..بعد الضيق فرج..
محبيتش نرد..لأنو فعلا مكان حتى شي نحكيه..
كل يوم نتصدم في واحد فيهم..وشحال الناس يتبدلو فيسع حتى يلي قراب ليك..
كون جا بابا لهنا..ميرضاش معاملتي بذي الطريقة..لانو بابا انسان عادل..بابا انسان مثقف..
مشكيتش موجة التغيير راح تضربه..
مي الله أعلم..

فات هذاك اليوم بالسواد نتاعو..
فؤاد حسيتو خفت حدة التعامل نتاعو..
كان حاب يحكي معايا ..وربما يعتذر..
هذا لانو اسامة حكى معاه ..مي بالضبط مش عارفة وش هو الكلام ..
هذي المرة تمنيت أنو نروح لدار خالتي...ماشي كيف ما نتمنى كل وقتي..
ونحي على كاهل عايلتي يلي تعب مني..
وجا اليوم يلي نروح فيه..مي مش كيف يلي تمنيته..

بإذن الله في المساء مع حلقة جديدة..
صحيتو
​

 

[وجع الظلم]

رد: وتربّع الظلام.. مُسلسل حصري للمتنا الغالية

يا لحبيبة راكي ما خليت فينا اصبر
عذبتينا بهذا القصة
واش انقول قصة خيالية لكنهامن الواقع
بورك فيك تحياتي ما طوليش علينا برك
راحت نزهة الفلاح وملينا رانا نستناو في تكملة القصص:p
ما تخلوناش معلقين ربي يحفضكم
مشكورة يا الغالية:up:​

 

[Melia azedarach]

رد: وتربّع الظلام.. مُسلسل حصري للمتنا الغالية

السّلام عليكم ورحمته تعالى وبركاته..

وجع الظّلم
ههههه ملا غير ربي ولا تحشاتلك مشفتيش المسلسل...
والله غير راني نبذل في جهدي باه نكملكم قبل لقراية مي ..والو
كون ندير بزاف حلقات يسماط ..

الحلقة الرابعة عشرة:
فقت ..اليوم الصباح راح تجي خالتي تديني لبيت راجلي كيما يقولو..
مزالني متقبلتش هذي الكلمة...
ومنحبش ننطقها..
نحس روحي مزالني صغيرة عليها..
جهزت لبستي كامل..
ولميت كتبي..
حطيت مصحفي وسبحتي في صاكي
ولبست حجابي..
وراني نقارع فيهم..
ماما جات وجدّة..
سهى كانت بزاف حزينة ..
خزرت فيهم فقط لنعبر أنو هاني رايحة باه نهنيكم..
مي مهدرتش..سكتت ككل مرّة..
وليت نخاف من الكلام..
والصمت ولا صديقي
ماما طاحو دموعها..كنت نسمع في دقات قلبها..
مقدرتش تتنفس..من درجة الحزن..
شدتلي إيديا..
قاتلي متمنيتش نشوفك عروسة بلا روبة بيضا كيف باقي لبنات..
تمنيت نرقص في عرسك ونزغرد..
اعطاتلي شي في منديل ..قاتلي افتحيه ..
كنت حاباتك تلبسيه وانت زهيانة..
فتحت المنديل..
كان فيه خاتم ذهب..وشحال شاب..
قاتلي هذي يما هداتولي في ليلة عرسي..
حبيت نعطيهلك لانك لكبيرة نتاعي..
ولانو قيمتو اكثر من ثمنو..
محبيتش نكسر بخاطرها..فشديتو..
ماما حضنتني..
وباستلي راسي..
وانا مزالني جافيــة..
يمكن بستلها ايديها
ماشي كيف بكري بهذيك الحنيـة..
بستهالها لانو واجب فقط
وجا دور جدة..
جدة كانت تبكي قبل ما تجيني..
محاكتش ولا شي
برك حبت تلبسلي سنسال..
وشحالو باهي...مشفتوش عندها..
قاتلي
هذا كنت بكري كل ما نحمل نجمل دراهم ..
حتى آخر حمل ليا قلت يمكن ربي يرزقني بنت..
مي مرزقنيش..ورزق بني بنت كيما الذهب..
رزقني نهى حبيبة قلبي..
هذا شريتو لانك بنتي..وجا وقت تلبسيه..
في هذيك اللحظة طاحو دمووعي
كنت نكابر فقط..وكأنو نعاتب فيهم
مي مقدرتش نمثل هذا لانو ميليقش عليا التمثيل
ضميت جداتي
وبكيت
حسيت روحي ريحت وراح جزء من همي..
مسحت دموعي
وجبدت من ساكي الظرف يلي مداتهولي خالتي
كنت نقصت منو باه منه في الجامع..صدقة على بابا..
وعطيتو لماما..
مقبلتش ماما
قاتلي هذا حقك
هيه يا ماما
قتلها هذو اشريهم لخاوتي حوايج الليكول راه جا..
متخليهمش يحسو بلي مراهمش كيف غيرهم..
خرجت باه نروح لسُهى..
بستها..
كانت تبكي
قاتلي راح نتوحشك..
أنا ثاني حبيبتي رديت..

لقيت فؤاد مقابلني..
خزرت فيه..
قتلو انا هاني رايحة مي خليك راجل البيت..
علابالي مش راح تتوحشني..مي انا رح نتوحشك..
اسمحلي لاني كنت في يوم من الأيام سبب في كسر كبرياءك
مي نقول ربي أعلم ..ونفكرك بكلام بابا: كلام الناس ميهمش ..
لانو كيف نباح لكلاب..
كمّلت
أنا مهمنيش إلاّ ربّي
لانو هو يغنيني على لعباد

إلى موعد آخر بإذن الله مع جديد مسلسلنا..وجديد نُهى

سبحان الله وبحمده ..سبحان الله العظيم


نتمنى نشوف الصفحة فيها إقبال..:regards01:​

 

[نزهة الفلاح]

رد: وتربّع الظلام.. مُسلسل حصري للمتنا الغالية

جميل ميسون
أسلوبك فالحلقات يجبرك تكملي
شي واحد، ياريت تقفلي بتشويق ، مجرد ملاحظة لكن لي تحبي
ربي يسعدك ويكرمك
​

 

[وجع الظلم]

رد: وتربّع الظلام.. مُسلسل حصري للمتنا الغالية

قلتها ونعيدها
ستصبحين مؤلفة او مخرجة سنيمائية
لان لك خيال خارق للعادة من النوع الرفيع
فعلا شكرا رغم الحزن الذي يخيم على الحلقات
هناك امل في الفرحة نحن في الانتظار
تحياتي
مرحبا بنزهة الفلاح نحن في انتظار تكملة مسلسلك الشيق​

 

[نزهة الفلاح]

رد: وتربّع الظلام.. مُسلسل حصري للمتنا الغالية

قلتها ونعيدها
ستصبحين مؤلفة او مخرجة سنيمائية
لان لك خيال خارق للعادة من النوع الرفيع
فعلا شكرا رغم الحزن الذي يخيم على الحلقات
هناك امل في الفرحة نحن في الانتظار
تحياتي
مرحبا بنزهة الفلاح نحن في انتظار تكملة مسلسلك الشيق​

فعلا ميسون ما شاء الله عندها قوة خيال أعترف أني أفتقدها وبكل أمانة أعترف بذلك وأعلم سبب ذلك ولن أقوله :d بارك الله فيها وزادها من فضله
أما عن المسلسل فأي واحد فيهم، الآن راني مع الجن ههههه، ننتهي بعون الله من السلسلتين عن حقيقة المس والجن والسحر والرقية والحسد والعين..... ونعود مع الجزء الثاني لليوميات
بورك فيك عزيزتي ورضي عنك
​

 

[وجع الظلم]

رد: وتربّع الظلام.. مُسلسل حصري للمتنا الغالية

فعلا ميسون ما شاء الله عندها قوة خيال أعترف أني أفتقدها وبكل أمانة أعترف بذلك وأعلم سبب ذلك ولن أقوله :d بارك الله فيها وزادها من فضله

أما عن المسلسل فأي واحد فيهم، الآن راني مع الجن ههههه، ننتهي بعون الله من السلسلتين عن حقيقة المس والجن والسحر والرقية والحسد والعين..... ونعود مع الجزء الثاني لليوميات
بورك فيك عزيزتي ورضي عنك​

السلام عليكم
والله انا في انتظار مسلسل هيثم وومنى
اما مسلسل الجن الاسود خفت ادخل :-o
واذا دخلت لن اقراه الا في النهار:surrender01::dunno01:​

 

[نزهة الفلاح]

رد: وتربّع الظلام.. مُسلسل حصري للمتنا الغالية

السلام عليكم
والله انا في انتظار مسلسل هيثم وومنى
اما مسلسل الجن الاسود خفت ادخل :-o
واذا دخلت لن اقراه الا في النهار:surrender01::dunno01:​

وعليكم السلام ورحمة الله وبركاته
هههه والله مافيه الخوف هو يحكي قصة بنت مع الوهم وراني نشرح أمور كثيرة بفضل الله
جزاك الله خيرا وطبعا الى يهمك تعرفي ان كل ما نخاف منه وهم
بوركت
​

 

[{مُدَلَّلَتُهُ}]

رد: وتربّع الظلام.. مُسلسل حصري للمتنا الغالية

يعطيك الصحة اختي

مانيش عارفة علاه كي ندخل نحسك راكي تحكي في قصة صح صرات

نبكي تقول راني نعرف هاد البنت و حافظة حكايتها

متابعة للمسلسل ماطوليش علينا بالحلقات حنونة

سلآمو
​

 

[Melia azedarach]

رد: وتربّع الظلام.. مُسلسل حصري للمتنا الغالية

السلام عليكم ورحمته تعالى وبركاته..
نتمنى أنكم في صحة مليحة..
والله غير اسمحولي..تعرفوا الدراسة راهي جات ..وهاك التحضير باه
نتحصل على معدل مليح ورتبة أولى..تبطيت عليكم ..
مي والله غير اعذروني..
كنت متمنية انو نكملكم قبل لقراية مي الله غالب..
المهم ادعولنا كل ما تدخلوا لهنا بالتوفيق..
راح نشكر كل وحدة باسمها الخاص..يلي مروا من لهنا وتركوا بصماتهم من وجع الظلم الغالية و نزهة الفلاح حتى لوفلي سمايل..
ونقلهم انتم يلي شجعتوني ..وانتم يلي تصنعوا الابداع..
الله يحفظكم ويستركم..

دوكا لأنو باه نعوض يلي فات لا زمني في نهاية هذا الاسبوع نكون مشيت في الحلقات..

إذا مع الحلقة الخامسة عشرة:

فؤاد ..حسيتو بدرجة ماهو نادم ..
هو مخربط بين كلام الناس وبين صورتي لقديمة..
طبعًا أنا مرانيش راح نظلموا لانو مجتمعنا مجتمع مزاله في الرجعية والتخلف..
رغم انو الاسلام نهى عن الظلم..وقذف المحصنات ..وسوء الظن..
مي اكثرية مجتمعنا مزاله يرتدي بدلة الاسلام فقط..هي ارث ابا عن جد..
ما شي دين نطبق واش راه يقول..
نتفلسفو فقط وندعي إنو رانا نصلي ونصوم ..مي مزال لقلوب فرغانه منه ..
مليانة بكلشي عيّان..
مشات لحظات الخروج من بيتنا..
بأسامة وخالتي جاو يدوني ..
راح نروح..
نخلي روحي معلقة ..
نتذكر أنو بكيت على شي و أنا خارجة..
بكيت على أحلامي ..يلي طارت ..هربت مني..
خلاتني..
هذا الشي..يلي كان يبكيني كل ما نتذكره..
أحلامي صارت سراب..
خلاص..نهى ولات نهى ثانية..
أحلامها محدودة عند بيتها لجديد..
مع ناس جدد..
رحت معاهم في السيارة..
وأنا ساكتة كي عادتي لجديدة..
علامات الاستسلام للواقع باينة على وجهي..
دخلت بيت خالتي..
رحبت بيا خالتي.. مام اسامة قالي هذي هي دارك..
رحت لغرفة خالتي..
مرانيش حابة نشوف غرفتي..
لانو مزالني موجوعة..
بقيت دايرة خيماري..
شعري البني..وخصلاتو الطوال..
حبيت نخبيهم..
مش راح نهتم بيهم كيف بكري..
نوجدهم ليوم عرسي..
لانو مضى يوم عرسي بدون أي علامات..
مي الظروف تحتم أنو نتنازلوا..
اليوم الأول رقدت مسامي خالتي..
نتفكر انو مرقتش كامل..
كنت حابة نصلي..
مي خفت الظلمة ..
كيف نروح نتوضى..
بقيت نسبح..
حتان بان الصبح..
واليوم الثاني ينادي..
قضيت كل أيامي كيف بعضاهم..
يا إما في الكوزينة نعاون في خالتي..ولا مخزونة في الغرفة ..

جا اسامة بفكرة جديدة ..
معرفتش مين طاح بيها..
حقيقة صدمني..
رغم أنو الصدمات صارت شي عادي..
وهي تفاصيل حياتي المشؤومة..
هي لجديد نتاعها..


في أمان الله مع حلقة جديدة
أدعولنا بالتوفيق..​

 

[{مُدَلَّلَتُهُ}]

رد: وتربّع الظلام.. مُسلسل حصري للمتنا الغالية

Melia

كمليلي القصة اليوم ما نحوسش نفهم :p

يا بنتي علاه راكي معلقتني هاك هههههه

متابعة ليك بكل شغف عجبني الجزء تاع اليوم ياادرا أسامة شا جاب جديد ! !

"مازآل في القصة بزاف ؟ psk ما بقاليش بزاف و نروح نقرا "
​

 

[Melia azedarach]

رد: وتربّع الظلام.. مُسلسل حصري للمتنا الغالية

Melia ​

كمليلي القصة اليوم ما نحوسش نفهم :p ​

يا بنتي علاه راكي معلقتني هاك هههههه ​

متابعة ليك بكل شغف عجبني الجزء تاع اليوم ياادرا أسامة شا جاب جديد ! ! ​

"مازآل في القصة بزاف ؟ psk ما بقاليش بزاف و نروح نقرا " ​

اهلا بيك
هههه
مي كون نكملها متحسيش بيلي فيها..
والله غير راني نبذل في مجهودي باه نكمل..
بويسك لقراية جات..
ودوك نلتا بيها..
منقدرش نقدر بويسك راني نكتب فيها في لحظة نشرها..
مي نظن متفوتش 12 حلقة جاية..

نورينا ..
ورانا نحاولو نرضوكم..بكل ما نقدرو
صحيتي حنونتي ..​

 

[منايا الجنة]

رد: وتربّع الظلام.. مُسلسل حصري للمتنا الغالية

انا المديرة تع المؤسسة ديالك زيدي خودي عطلة شهرين باش تكملينا الحلقات و من بعد عاودي ارجعلي للقراية بدون حساب :d
بالاكي تحلمي بيها هدي ههه
مشكورة على الحلقة في انتظار الحلقات الاخرى
سلامي

 

[Melia azedarach]

رد: وتربّع الظلام.. مُسلسل حصري للمتنا الغالية

انا المديرة تع المؤسسة ديالك زيدي خودي عطلة شهرين باش تكملينا الحلقات و من بعد عاودي ارجعلي للقراية بدون حساب :d
بالاكي تحلمي بيها هدي ههه
مشكورة على الحلقة في انتظار الحلقات الاخرى
سلامي

اهلا بسيدي المدير..
هههه نورت...
خلاص..
مي مزال طلب اخير..
معليش تحطوني أنا في الرتبة الأولى ..ومعدلي هو الباهي في قسمي؟
ونوعدكم بسلسلة جديدة..
ههههههههههههههه
نزعق..
أهلا بيك نورتي منايا..
بإذن الله نكملكم..
وطبعا متنساونيش بدعائكم
صحيتي​

 

[yasmine 4ever]

رد: وتربّع الظلام.. مُسلسل حصري للمتنا الغالية

مرحبا ميسون حبيبتي
عندي مدة ما دخلتش للقصة و الله غير توحشتها بزااااااااف مي دوركا غير قريت الحلقات الجدد تشوقت كثر:d
علابالك مع السمانة اللولة تاع القراية و لا ليست تاع الأدوات وليت نسجل الدخول غير باه نشوف التنبيهات و نخرج
مي الله يبارك الحلقات دائما راااائعة و نظن اللي جاي أروع بإذن الله:up::up:
راكي 4444 حبيبتي و راني نستنا الحلقة الجاية بفراغ الصبر و سمحيلي على الغياب:$
يعطيك الصحة و بارك الله فيك و أنا في المتابعة ان شاء الله
ربي يوفقك حبيبتي​