وتربّع الظلام.. مُسلسل حصري للمتنا الغالية

[{مُدَلَّلَتُهُ}]

رد: وتربّع الظلام.. مُسلسل حصري للمتنا الغالية

على السلامة ميسون ♥ توحشناك الزينة

اييه شحال توحشت هاد القصة

يعطيك الصحة حبيبة على الحلقتين شابين بانتظار التتمة ان شا الله

ربي يوفقك في قرايتك و يوفقنا أجمعين غاليتي
​

 

[أم راضية ~_]

رد: وتربّع الظلام.. مُسلسل حصري للمتنا الغالية

السلام عليكم
اهلا ميسون واهلا بجرعة الامل الي راهي تكبر عند بطلتنا ^^
ويعطيك الصحة على الخبر المليح الي فرحني ^^ ان شاء الله يكونو توام
وااااااااصلي وااااصلي رانا هنا ماتخافيش ^_^​

 

[nanoche]

رد: وتربّع الظلام.. مُسلسل حصري للمتنا الغالية

ياخاااه والله بكيتيني حتى كي دخل زوجي اتخلع فيا
فعلا شىء رائع مي ما تطوليش بين الحلقات راني مشتهية نلحق للاخر هههه راكي تعرفي التقلاق عند الجزايريين لوكان يصيبو يتولدو كبار
ربي يوفقك اختي
​

 

[Melia azedarach]

رد: وتربّع الظلام.. مُسلسل حصري للمتنا الغالية

السّلام عليكم ورحمته تعالى وبركاته..

وشحالني متوحشة نشوفكم لهنا والحمد لله رجعتو
كنت نحسبكم مش راح ترجعو لانكم كرهتو المدة الطويلة بين كل حلقة وحلقة...

الله غالب ..
لقراية لاحقتني والأسبوع الأوّل نتاع العطلة فات قراية..
يمكن هذا الأسبوع نلتحق بيكم ونكملكم هذي السلسلة.. لأنو سلسلة جديدة راهي في بالي...

المهم ..
نحييكم على الوفاء..
وهاهي حلقة جديدة عربون شكر ..
انتظروا الجديد ..
لانو مامازال والو وتخلاص بإذن الله..
دعوة صالحة مع عندكم حبايبي..

رب يحفظكم



مع الحلقة الثامنة والعشرين:

بزغ الفجر..
وأملي كل يوم يكبر..
ربّ ابتلاني مرة من المرات ..لحتى يشوف صبري..
وهاهو يكافئني ..بيبي جديد وحياة أحسن من يلي تولدت عليها..
بطني يكبر..
وفرحتي مزالها تكبر بمرور الأشهر ..
يوم 30 جوان الحمد لله حبسنا لقراية..
وكأنو ربّي محبنيش نحبس قرايتي..
خيّرلي هذا الموعد باه ما نتأخرش ..
فطنت على ألم غير اعتيادي ماشي كيف كي يكون لبيبي يتحرك
وشحالو يخوّف..
كنت موجدة لفاليز نتاعي ونتاع البيبي..
كل شي..
نستنى فيه بفارغ الصّبر وراهو جا..
هذا اليوم يلي إذا قدر ربي نشوف يلي حملتو تسع شهور..
يا رب يكون لباس عليه بصحتو وعافيتو يكون بار بوالديه..

ركبت في السيارة ..
والوجع ينخر في بطني..
أسامة كان زارب على قد ماهو زارب البيبي أنو يخرج لهذي لحياة ..
الحلوة المرة في نفس الوقت..
دخلت للمشفى..
جناح الأمومة..
غرفة الولادة..
هذا الطريق قد ما كان قصير..
ولا طويل لأنو بصحبة الوجع..
الغرفة ..
القابلة ..معاها طبيبتي وئام حبيبة قلبي..
ملهمتي..
وأنا..
عرق ..
ألم...
دموع...
بيبي يبيكي..
كانت طفلة
نسيت كل شي كي شفتها..
مثل قطعة من الجنة..
يا رب احفظهالي..
وشحالني فرحانة ..
راح تكون لي أخت وبنت وصديقة..
آه..
وشحال الأم تتحمل باه نخرجو لهذي الدنيا..تضحي..يمكن تتوجع علاجالنا..
علابيها ربي دار الجنة تحت رجليها..
كنت عارفة قيمة الأم..لكن نظريًا..
وهاهي الحياة تكشف هذا تطبيقيا...

رحت للغرفة ثم ..
وكانت حبيبتي مساميا..

خالتي ثانيك ..
وطبعًا أسامة..
كانو فرحانين..
واش نسموها ؟؟؟؟؟
يمكن تستغربو لانو رانا في عصر التطور ونقدرو نعرفو جنس البيبي قبل.. ما يتولد..
لكني محبيتش أنو نعرف ..
كنت حابة نعرف الشي الوحيد وهو أنو صحيح خالي من العيوب..
وكنت حابة نشوف المفاجأة يلي قدّمهالي ربي
شحالها كانت باهية..
صغيرة ..
بريئة..
أسامة حب يخليني نخير الاسم وحدي لصغرونتي..
ياه صعيب..
تطايرو كامل الأسماء..

ساعة وأنا نتفكر..
لكن لاسم يلي بقا في ذاكرتي يراودني هو اسم أمل..
وشحالو صغير بسيط في النطق
لكنو يعنيلي بزاف صوالح..
لوكان مكانش هذا الأمل لبقيت في نفس المكان...
​

 

[ام رحاب]

رد: وتربّع الظلام.. مُسلسل حصري للمتنا الغالية

اهلا اختي توحشناااك طولتي الغيبة امالا تهلاي فينا هاد ليامات عوضي الغياب

شكرا لكي

 

[أم راضية ~_]

رد: وتربّع الظلام.. مُسلسل حصري للمتنا الغالية

السلام عليكم
والله رااااااااااااااااااااااائعة هاد الحلقة
فرحت بزاااااااااااف بزاااااااااااااااااااااف
ما شاء الله عليك ميسون مشاعرنا تتحرك مع كل جملة
وااااااااصلي ورانا معاك
موفقة بإذن الله​

 

[أمــ وليــد الجزائرية]

رد: وتربّع الظلام.. مُسلسل حصري للمتنا الغالية

راني غبت بزاااف عليك

و فاتوني حلقات كثيرة

رح نعاود نسترجعهم اكيد

كنتي تبكيني ديما حتى هربت ودرك كي رجعت نشوف في الردود كامل فرحانين

رح نرجعلك بردي كي نقرا الي فاتني

استنايني
​

 

[أمــ وليــد الجزائرية]

رد: وتربّع الظلام.. مُسلسل حصري للمتنا الغالية

راني قريت حتى الحلقة السادسة عشر

غير حزن في حزن

مقدرتش نكمل درك

راني نرجع ان شاء الله

راكي فوور في سرد الاحداث

ربي يبارك عليك

​

 

[أم راضية ~_]

رد: وتربّع الظلام.. مُسلسل حصري للمتنا الغالية

ميلينا ختيتو
صح باكتنا كاااامل وقاستلنا المشاعر و انا شخصيا نقرا و ندمع
بصح كملي اقراي على مسؤوليتي
زادت عندنا بنيتة شابة و سماوها أمل
و اختنا ميسون توفقت بزاااف بخصوص الإسم الي عندو علاقة وطييييييييدة مع حبكة القصة و العبرة منها
حبييييييييييييييييييييييت القصة مهما بكيت فيها بصح عجبتني وحبيتها
موفقة ميسوووون ^^
وميلينا اقرايها و ماتخافيش لافان مليحة ​

 

[Melia azedarach]

رد: وتربّع الظلام.. مُسلسل حصري للمتنا الغالية

السّلام عليكم ورحمته تعالى وبركاته..
أهلا بيكم فراشات منتدانا..
نتمنى أنكم لاباس..

الحمد لله أنو القصّــة عجبتكم...
والله العظيم مكنت متوقعة أنو نشوف رجوعكم ليها..
لأنو بزاف تبطّيت عليكم ..
مي الله غالب..
حتى العطلة راحت راني مضغوطة بزاف...
غير كي نطل لهنا نفرغ شوي..
والله كرهت حياتي..
البرنامج مكثف والتعب..
حتى وقت فراغ راح..
وشحالني خايفة أنو العام لجاي..يكون الضغط النفسي والجسدي..
أدعولي بالتوفيق..
وبإذن الله غدوة نحطلكم حلقة..
واعذروني لانو راني نغيب عليكم
لكن والله ما نقصد هذا الشي

أدعولي ربي يوفقني..

رب يحفظكم
وما تطفشوش من لهنا..
خلي أسماءكم يونسوني كي ندخل

في أمان الله

ميسون
​

 

[مسعدية]

رد: وتربّع الظلام.. مُسلسل حصري للمتنا الغالية

اهلا وسهلا بيك
نورتي المنتدى
القصة كانت اكثر من رائعة وكنت ديما نحكي لصحاباتي
وعدت كي نروح نقرا يقولولي كملي الحلقة ههههههههههههههههه

المهم ربي يوفقك ورايحين ننتظروك هنا
تحياتي لك

 

[Melia azedarach]

رد: وتربّع الظلام.. مُسلسل حصري للمتنا الغالية

السّلام عليكم ورحمته تعالى وبركاته....

نتمنّى انكم بخير...

راح نشكركم على الوفاء...

ونعتذر لأنو ما وفيتش بوعدي..أنو نحطلكم تكملة القصة في الأيّام السّابقة لأنو النت وشحالها ضعيفة...
عيّاتني بالبزاف..
المهم الحمد لله لحقت أنو نحطهالكم قبل الدّراسة

مع الحلقة التاسعة بعد العشرين:

تلوّنت أيامي بأمولة حبيبة قلبي وملات عليا الدّار..
حتى كي تبكي ورغم النشاز .. إلاّ أنو بكائها يفرّحني بقد ما يخليني نتساءل وعلاه راهي تبكي..
أسامة من ضرك جاب الألعاب يحسبها راهي كبيرة وتلعب
ضحكني يومها جابلها بوبية مع خزانتها ووو
هههه
هيه يا أسامة وشحال ضحكتني .. مزالها متعرف والو كيفاه تلعب بيها..
أما خالتي
أغلب الوقت حاضنتها وتغنيلها
راني خايفة يدللوها ومن باعد نعود نعاني في تربيتها...
شهر ثنين ثلاثة ..
كل شهر يمشي ويجري
وأمل ولات عندها ثلاث سنين نزعق ثلاث شهر..
بانتلي كبرت
كي تشوفني تضحك
ترفع اديها ..
أما كي تشوف أسامة تكون راح تفر وتطلع للسما..
لانو يظل رافدها..

وأنا وشحالني فرحانة..
لدرجة أنو نسيت الظلمة
تجاهلتها ..

لكن عمري ما فرطت في قيام ليلي وصلاتي وقراءاني..وذكري لربّي
لازم لواحد فينا يتفكر ربي ساعة العسر واليسر
عندي ثقة في ربي كبيرة ..وإيمان يقوى كل يوم ...
ولهذا ربي وفقني
فالحمد لله رب العالمين
ربّ ادمها نعمة واحفظها من الزّوال..


جا وقت الدراسة نتاعي
حسيت قلببي ينقبض لأنو راح نروح ونخلي أمولة

لكن لازمني نولي طبيبة ..مثل ما بابا حبيبي الله يرحمه وصّاني...

ومثل ما حلمت من يلي كنت صغيرة..

شريت حجاب طويل لونو باج وخمار باج صاك و بالغينة حاشاكم..
وجدت كل شي ..
متحمسة ومتشوقة لأنو راح ندخل عامي الأخير ومن بعديها نتخصص

وشحالني فرحانة لأنو راح نوري لصحباتي صورة أمولة زينونتي

كل ما تكبر تحلى و تزيان ..


مرّة أسامة قالي هي أزين منك

:-r
​

 

[مسعدية]

رد: وتربّع الظلام.. مُسلسل حصري للمتنا الغالية

اهلا بعودتك
حلقة رائعة اليوم ...واش راهي امولة ؟هههههههههه
عبجتني كي قلتِ مرة قال لي اسامة هي ازين منك
ههههههههههههههههههه

عندك اسلوب مميز ورائع في سرد القصة
ننتظر جديدك بكل شوق
سلميلي على امولة وقولي لاسامة عندك الحق امولة ازين
هههههههههههههه
وبالبركة عليك اللبسة واللون الباج عجبني ماعليش تسلفيهملي؟

هههههههههههه
سلام

 

[أم عبد الله]

رد: وتربّع الظلام.. مُسلسل حصري للمتنا الغالية

أسجل دخولي لعــآالمكـِ غلاتي
وعند مـٌطالعة القصة سـأعطيكـ رأيي - اتفقنـآ ؟.


سلامي ​

 

[أم راضية ~_]

ما شاء الله رووووووعة

السلام عليكم ورحمة الله وبركاته
علابالك ختي ميسون
هاد الحلقة عجبتني بزاااااااااااااف بزااااااااااااااااااااااف وعلى قد ما نوصفلك فرحتي قليل
عندك اسلوب سهل خفيف وعميييييق فالمعاني تاعو
صدقيني انتي موهوووووووووووووووووبة بزااااااااااااااااااااف
ما شاء الله تبارك الرحمن
رح نقولك وعلاش عجبتني الحلقة هادي :
اولا والاهم لانو كتبتي بحبيبي ههههه اقصد باللون تاعي ههههههه اقصد كتبتي بالاخضر وهاد اللون تاعي :d ههههههههه
*****
نولي للصح
عجبتني هاد الحلقة بزااف على خاطر مانساتش ربي وقعدت علاقتها بيه قوية و وثيقة وهادي حاجة مليحة لازملنا نتعلموها
نعرفو ربي فالشدة والرخاء
وتانيت لانو مازالت مصرة تكمل الطريق لحلمها وتولي طبيبة
وايضا كي علاقتها بأسامة مليحة و الجملة الاخيرة الي ختمتي بيها وهي اجمل منك ههههه
حسيت بلي أسرة مستقرة فيها حب ودفء و وفاء و مزاح ^^
ما شاء الله
ماتحرميناش من قصصك وافكارك و اسلوبك الي يشدنا بالسيف علينا حتى و طولتي علينا بصح اسلوبك لصقة لصقنا بيها هنا وماقدرناش نبعدو :-r :up: ​

 

[أم عبد الله]

رد: وتربّع الظلام.. مُسلسل حصري للمتنا الغالية

اهاه غلاتي مع اني ولا مرة حاولت تتمة شيء مكتوب بالدارجة لكوني احيانا تختلف علي الكلمات فلا استطيع استصاغتها
ولكني اهنئك لقد جلعتي اتتبع كل الحلقات بشغف وحب حتى نهايتها
فطريقتك في السرد مشوقة مع انها تخللها بعض الاخطاء الا اننا لاننتبه لها حين الغوص فيها
مي هيا يجب عليك ان تخبرينا مذا حدث بعد عودتك للدراسة

في انتظار باقي المسلسل الدرامي فلا تطيلي

سلامي​

 

[أمــ وليــد الجزائرية]

رد: وتربّع الظلام.. مُسلسل حصري للمتنا الغالية

هي انا مكنتش حابة نلحق للحلقة الاخيرة


لاني كل مانقرى ردود الاعضاء نضحك عليهم


لاني انا قريتهم كما نحب


درك الي يضحك يلحق الور دالتي نستنى معاهم

درك نقولك بالنسبة لرواية راكي وجعتيلي راسي بلبكا حمد الله كي جات امولة نساتني دموعي

شوفي ديري روايتك كما تحبي بصح متلعبيليش برك بامولة بلاكي بلاكي تديري حاجة تضرها ياو ناكلك

راهي الوحدة تاع الصبح درك انت سور تكوني تقراي يادكتورة ديالنا متعبيش روحك بزااف لانو ولا عندك بنوتة صغيرة

يعطيه الصحة عمو اسامة كان راجل بمعنى الكلمة




,,,,,,,,,,,


ميسون حبيبتي انت ثانيك منسيتكش راكي درتي حاجة شابة بزااف و انا رني وليت مشرفة غير علجالكم لازم نفرحك عن قريب الور مطوليش على المشاهدين بزاااف رهم اوفياء بمعنى الكلمة و يستاهلو تطلي عليهم كل جمعة بعد الصلاة بحلقة



ربي يخليك لاهل و يوفقك في قرايتك ياميسون المميزة​

​

 

[أم راضية ~_]

رد: وتربّع الظلام.. مُسلسل حصري للمتنا الغالية

اهلا ميلينا صار كنتي تضحكي علينا
حنا كنا مندمجيييييييين مليييييييييييح مع الحكاية و قاستلنا المشاعر و لحقنا وين نبكو
و استفدنا من القصة بزاااااااااف شخصيا انا استفدت منها في امور عديدة ..
فرحت كي قريتيها ميلو ^^
وكي راكي مشرفة هنا نتوقع منك بزااااف حاجات امممم راكي عارفة ههههه ربي يوفقك
وميسون تانيت باش تدخللنا في قصة وحدوخرا​

 

[أمــ وليــد الجزائرية]

رد: وتربّع الظلام.. مُسلسل حصري للمتنا الغالية

ميسون الرواية تستحق خاتم التمييز

ستجدينه في الصفحة الاولى

مبارك لكي و نحن ننتضر التتمة بفارغ الصبر
​

 

[{مُدَلَّلَتُهُ}]

رد: وتربّع الظلام.. مُسلسل حصري للمتنا الغالية

السلام عليكم و رحمة الله و بركاته

يعطيك الصحة ميسووووووووون

راني في فترة امتحانات سرقت هاد الدقايق سرقة باه نجي نطل على الحكاية واش صرا فيها

يا اختي الله يبارك عليك اسلوبك هاايل عجبتني الحلقة بزااااااااف و طلعتلي المورال

رديت برك باه نثبت حظوري خلي نكمل الإمتحانات ان شاء الله و نريح مليح هاكا نجي نرد رد مرتب ♥
​