* مقتطفات من ذاكرة الماضي * مشاركة في انشاء قصة من وحي الأعضاء

الحالة
مغلق ولا يسمح بالمزيد من الردود.

حكايا الورد

:: عضو بارز ::
أحباب اللمة
إنضم
19 ماي 2011
المشاركات
4,729
نقاط التفاعل
5,225
النقاط
351
محل الإقامة
جيجل
الجنس
أنثى
*يما الزهراء و عرايساتها * مشاركة في انشاء قصة من وحي الأعضاء


do.php


السلام عليكم

مشاركة مجموعتنا في مسابقة:

بداية المنافسة " انشاء قصة من وحي الأعضاء "

القصة بعنوان:

*يما الزهراء و عرايساتها*

* مقتطفات من ذاكرة الماضي *

القصة عبارة عن تصوير فني و تطبيقي لعائلة جزائرية
عايشت حياة القرون الماضية
نصور جوانب صغيرة من الحياة
وكيفية تعامل أفراد الأسرة في
البيت الواحد.....
نتمنى الاستمتاع للجميع....



 
آخر تعديل:
رد: * مقتطفات من ذاكرة الماضي * مشاركة في انشاء قصة من وحي الأعضاء

...كي العادة يما الزهراء ..-كيما يحبوا بزاف يناديوها- قاعدة في شط الركنةوعينيها على لي رايحة و جاية ....
يما الزهراء عندها 5ولاد رجال متزوجين كامل يعني 5 عرايس
و عندها 3 بنات متزوجات تاني....والشيخ كيما راهي تعيطلوا ...يا *الشيخ*...
عايشين في بيت واحد ..عيشة مرمدة من كل الجوانب....لا سكنة و لا خدمة مليحة تكفي العايلة لي كبرت من الولاد ...
يخدموا الخاوة كامل في أرض الشيخ ..يعني الفلاحة و مكفيين ماعندهمش و ماخصهمش...بصح...بصح...
وينها الاستقلالية و الحرية...
5عرايس في مراح واحد...بزاااااااف..........

يما الزهراء عقلية الجدود ..العايلة مالازمش تتفكك ..نعيشوا كامل مع بعض الحاجة لي تجي تقيسنا كامل كيف كيف...

يتبع.....

 
رد: * مقتطفات من ذاكرة الماضي * مشاركة في انشاء قصة من وحي الأعضاء

...الرجال و النساء و زيدلهم الولاد...ربي يبارك..
بصح وينها الحرية و راحة البال ...الوالدين وصى عليهم ربي و النبي
وراهم فوق روسنا ..بصح لازم الواحد يتنفس ... يكون في داره وحده باش يتنفس شوي و يعرف كيفاش يربي ولادو....

كي العادة يما الزهراء قاعدة فالمراح و تعس في كلش..هذي راحت هذي جات وبيانسور ماتحبش المنشار تاع فمها..
((شوف ذيك المصفارة أذن عليها الفجر و هي راقدة..))
((شوف هاذ البقرة..ايه بيانسور تولي بقرة الماكلة و الرقاد وبيع البلاد))
((والله يا انتِ..توخذ ولدي مسكين فيك..والله نجيبلو الزاوجة..))

يما الزهراء مايعجبها العجب
تمنشر في عرايساتها..والمنشار تاني راكب فالجهة الاخرى:
((يا العجوزة المسنوحة تصبح على صبحة ربي هنا..))
((الله يجيبلك موتة خفيفة يا السنح..))
((مصيبتنا على الصباح تعس فينا ..وكتاش ربي يهنينا..))

هذي هي اليوميات تاعهم تمنشير و تشناف و دعوات...من الصباح لعشيا.....

يتبـــع..
 
رد: * مقتطفات من ذاكرة الماضي * مشاركة في انشاء قصة من وحي الأعضاء

كي العادة يما الزهراء متوسطة المراح...عروستها فايتة بحداها...
((اسمعي يا المصفارة انت ماكش عاجبتيني خلاص مع رقادك هذا تاع الصباح واش تكوني انت ..سلفاتك يبكروا على الصباح و انت تصبحي راقدة..))
..((يا لالا راني تعبانة شوي و مع الوحم هاكي تعرفيو..))
((مانعرف والو .. نعرف ماكانش فرق بيناتكم ..راكم كامل كيف كيف))....
العروسة تتمشى شوي و تبدا : ((الله يديك ان شاء الله و يهنينا منك يا وحد النحس...))

الشيخ مسكين العكس تاعها خلاص النية و الطيبة و الحنانة و لي تحس روحها مظلومة تروحلو ... وتشكيه....

دخل الشيخ يصيب عجوزته متوسطة المراح و تناقر في هذي و هذيك...
..((الله لا تربحك ان شاء الله تصبحي هنا يا طايحة الطبل .. تعسي في لي رايحة و جاية بلاك يهديك ربي تهزي سبحة تنفعك و تقعدي برا تسبحي مايشي خير..))
((واش دخلك يا مصيبة فيا راني نوريلهم في صلاحهم كون ما تنعاتي راهم سايبات و خايبات..))
((انت لي واش دخلك راهم ترباو في ديار باباهم و راهم ربي يبارك عليهم راكي حبستي عليهم النفس و هوا ربي يا عجوزة بلاك يهديك ربي...))
خرج الشيخ مزعف خلاص ماهاش عاجبتو خلاص ... من زمان حاب يمدلهم الحرية متمني يشوف كل واحد من ولاده بداره و يربي في ولاده بحرية و على مزاجه...

بصح وينها ... العجوزة ماهيش حابة وكل واحد يزعف و يحب يدير دار وحده..تقيم الدنيا و تدوخ و تطيح ... غير باش تحبسو معاها ..وهو يطيح قلبو من جيهتها و يتراجع....

صعيبة بزاف و الرجال كرهوا و ماعادوش يصيبوا راحتهم وسط هذي العايلة الكبيرة بزاف بزاف
وتزيد يما الزهراء يوم على يوم و تعيط على بناتها المتزوجات يتضايفوا فالدار يعني جيب العايلات عند العايلات


محنة كبيرة بزاف و الحل ماكانش خلاص.....

يتبـــع....

 
رد: * مقتطفات من ذاكرة الماضي * مشاركة في انشاء قصة من وحي الأعضاء


لعروسة الصغيرة هزت حوايجها و مشات لدار باباها ماعادتش قادرة تحمل و شرطت على راجلها دارها وحداها..:((راني نشوف في نساء خوتك واش صاري معاهم و مع ولادهم مانيش حابة نربي ولادي فالجو هذا..حابة دار وحدي..))
((يامخلوقة اخزي الشيطان علابالك بدارنا من النهار الاول وعلاش قبلت..))
((مانعرف والو دار وحدي ولا ماكانش رجوع..))

المخلوقة ماهيش عارفة واش راه يستنا فيها...
كملت 15 يوم مشات يما الزهراء تخطبلو وحدة من الجيران ..
((ياولدي مايصيرش تقعد هاكا بلا امراة لازم نجيبلك وحدة و تكون لالات هذيك المصفارة...طلقلها و تهنا منها..))

المخلوقة كي سمعت جات لباب الدار و تندب ..تبكي و تطلب فالسماح..بصح كي العادة يما الزهراء قلبها حجر و لي يغلط معاها يسلك ..ماشفعلها والو حتى الشيخ ماصاب واش يدير : ((الله غالب يا بنتي راكي علابالك وعلاه تغلطي...))
الشيخ : ((يا مخلوقة بلاك يهديك ربي تبالي انا لي لازم نطلقلك عند الأخر خلي الولاد يعيشو حياتهم شحال من مرة نقولك .. راكي كبيرة.. والله نهار تموتي يديرو عرس عليك..))
((بعيد الشر عليا ..هذو ولادي و لازم يقعدو تحت جناحنا..تعبنا عليهم و كبرناهم باش يروحو علينا؟))

الرجال الله غالب جاتهم حجر فالغرجومة مالقاوش حل معاها من جهة طاعتها و رضاها و من جهة نساهم و ولادهم و حريتهم....

هذي هي حياتهم روتين فروتين...
حبوا نهار يتلايمو مع بعضاهم و يفاتحوها فالموضوع ...كي العادة الرفض و تطيح و تبدا تبكي و تعدّد...

صح نهار تموت يما الزهراء راه استقلال فالدار و فرح...كبير كبير...

يتبــع....
 
رد: * مقتطفات من ذاكرة الماضي * مشاركة في انشاء قصة من وحي الأعضاء

الكل فالدار الكبيرة مقتنع بلي الحل تاع كل المشاكل و الفرج و الحرية هو بموت يما الزهراء....
آه خسارة كي رجع الانسان يتمنى الموت للانسان الآخر..عيب كبير و محنة كبيرة...بصح الله غالب
وعلاه العادات هذي تاع الولاد يتزوجو و مايتحرروش..؟ وعلاه العادة تاع العجوز تحكم كيما تحب..؟ وعلاه ماكانش الحرية و الاستقلالية...؟

أكيد الانسان رايح رايح لدارو الأبدية و هو في هذي الدنيا ضيف برك ورايح يروح ...
جا النهار الي الكل يستنا فيه ...مرضت يما الزهراء و طاحت فالفراش مدة طويلة بزاف...قدرو العرايس فيها يتنفسو شوي و يزهاو و يروحو و يجيو كيما يحبو
يما الزهراء خايفة من الموت و ماهيش لاهية فلي رايحة و لي جاية....
جا القدر و توفات العجوزة يما الزهراء خلية من وراها عرايس و ولاد مانقولوش فرحانين حاشا ..ولكن مستقلين ... كل واحد منهم دار دار وحدو و ربا ولادو و عاش متهني في دارو ....

هذي هي حياة بكري من سلبيات و ايجابيات ...بصح تاع الصح حلوة وكانت البركة و احترام الكبير و طاعة الوالدين مايش كيما دوك يعيشوا كيما يحبوا و العروسة هي الي تتصرف و مع الأخر يدوهم لدار العجزة..

******انتهـــــــــــــى*****

*حاولنا تصوير القليل ..كان الوقت ضيق جدا ...*
 
رد: * مقتطفات من ذاكرة الماضي * مشاركة في انشاء قصة من وحي الأعضاء

سيتم فتح الموضوع لاحقا ....

شكرا لكم
 
الحالة
مغلق ولا يسمح بالمزيد من الردود.
لإعلاناتكم وإشهاراتكم عبر صفحات منتدى اللمة الجزائرية، ولمزيد من التفاصيل ... تواصلوا معنا
العودة
Top