علاه هكا الجيران

[red rose]

السلام عليكم اللمواين

ان شاء الله تكونو بيان

اليوم جا في بالي موضوع قلت خلي نحطوا و نشوف واش راح تحكيو عليه و لي هو الجار

ياك هاذي حاجة نعرفوها من الصغر الجار وصا بيه الله و النبي (صلى الله عليهوسلم) و الاحسان للجار ووو

بصح دوكا واش رانا نشوفو لعجب و خاصة في لي باتيمون و نادرا وان تلقا 2 متفاهمين

و دوكا ولاو يتقابضوا على الاولاد الصغار ياك لولاد مابيناتهم يتزاعفوا مايجي يسكاد ليوم تلقاهمك مع بعضاهم

دوكا لا يدخلو فيها les parents وصراو حوايج كبار حتى يدخلوا فيها لابوليس

مرة كنت عند بيت خالي جيت طالعة في الدروج غي نشوف 2 نساء ندبوا لالبعضاهم هاذيك تجبد من الشعر

و لوخلرا تشنشف و تسب خخخ تقول ولاد صغار

و و ولادهم هوما الجمهور يشجعوا هههه

وفي لافان كي سقسيت علاه هاذ الباgار كامل قالوا بلي محبتش تمدلها الشارجور تاع البورتابل

يعني هاذا شارجور داروا عليه هكا كان حاجة كبيرة كيفاه يديروا

ولا تلقا حاشاكم الجار يطيش الزبالة قدام دار جاروا هاذي بلوكاتلي راسي

يعني تقول مكاش بلاصة يطيش فيها غير قدام جاروا

و في لافان واش راح نقولكم الله يهدي ما خلق

​

 

[Ma$Ter]

السلام عليكم ورحمة الله
ربي يهدي هاذ الامة
من كثرة كلام على الرسول ضن الصحابة انو راح يورثو كما الابناء
ونشوفو الجيران لا قدر لا والو
بارك الله فيك اختى عبير على الموضوع المميز

​

 

[Pyar]

السّــلآام علييكم..
ربي يهديهم، بالنسبة لينـآا كيمآ نقول أنـآا حنآآ جيرآن إنطوآئيين خخ
يعني مآنآش مخآلطين الجيرآن تآعنآ مآلغري أقـآارب مآمآ لكن مستحيل تلقآينآ كيمآ البقية
لي ف النهآر يروحو لبعض 100 مرة وعلى مشكلة صغيرة مآيزيدوش يحكيو 20 سنة خخخخ
مآمآ تروح غير على المنآسبآت عرس ولآ جنآزة ولآ مولود وهكدآ برك للجيرآن
وأنـآا جبدت عقلية مآمآ هههه عليهـآا مآكآش يعني عدآوة ولآ مشآكل بيننآ ويآهم
وحتى كي يتلآقآو ف المنآسبآت سلآم كيرآكي الحمد لله أيآ سلآم ههه مآم خآلآتي
يقولو لمآمآ كيشغل مآكيش عآيشة لهنآ ههه بآسكو هومآ (خآلآتي) يجيبو
أخبـآار الجيرآن تآعنآ لينآ هههههه وحنآ عآيشيين ف عآلم وحدنآ
بآسكو كآمل مآتلقآيش فيهم الصدآقة على مشكلة بسيطة خلآص مآيوليوش يهدرو
وف هـآاد الحآلة بعد عليهم خيرلك ~ مغسي عبير ع الموضوع
تحيــآاتي ^^.
​

 

[آمِيْرَتُه]

السلام عليكم
عندي تعقيب برك إن شاء الله يتم التعديل واش هذي (صلعم) عجزت تكتبي صل الله عليه وسلم لأنها كتابة مخالفة
يقولك سبق باب جارك قبل دارك و لا يقولو الجار قبل الدار
درك هذي المقولة ولات متنفع في جيران اليوم
ياما يصروا حكايات و لاو جرائم و هما حوايج تافهة
ربي يهدينا و يهديهم

 

[touffik]

الله يجيب الخير قع رنى كيف كيف من جهت الجورين

 

[ضآحكة مستبشرة]

السلآم عليكم عبير
شكرآ على الموضوع و الله سبقتيني ليه يا الفحلة
المهم يآك نآس زمآن يقولوآ : <{ الجآر قبل الدآر }>
و الرسول صلى الله عليه و سلم اوصآنآ بالجآر
مي نآس هآد الوقت محتآرموآ دآرهم يحتآرموآ جيرآنهم
و الله معندي منقول غير

رآح الحيآء مع الدين
و شكرآ ليك​

 

[الباندي]

الجار قبل الدار .....الله غالب قلة الوعي انا كنت كيندير كاش بروبلام يضربني جارنا نورمال ....و الوالد عادي يgولي انت علاه تقباح هذا ميخسر عليا........
دروك لوكان يضرب ولد الجيران تتخلط ههههههههه و كاين نزاعات وصلت حتى للضرب هههه
النية راحة و التربية مابقاتش الا من رحم ربك
صغيرة و دير مواضيع تاع الكبار تحية الى عبير هههههههه

 

[zozo firem]

يطيك الصحة ختي موضوع مميز

واش نقولو الله يهدي ما خلق حبيت نزيد اضافة لي هي سكان البطيمات راهم مخلطين حب يقول ما يكونوش من منطقة واحدة متخالفين

في التفكير و هكا يتخلط الحابل بالنابل

اييه الله يستر و خلااص

 

[hanine_mona]

الله يهدي ما خلق

والله الوقت لي وصلنا ليه صعيب

شكرا على الموضوع

 

[جمالي في حجابي]

ربي يهدي ما خلق

 

[السلطانة]

وعليكم السلام
الجار والجار
صح كاين جيران تاع خير وكاين جيران تاع شر
والعبد لي ميخالطش خيرلو لأنو كثرة الخلطة والدصارة وادخل واخرج هي لي تجيب المشاكل
خاصة بين النساء
اصلا النسا هوما لي يديرو المشاكل
تدخل لبيتها تعرف اسرارها من مباعد تتعارك معاها تروح تبخرلها بشلالقها
ويوليو في حل واربط
ويطيح القدر وراجلك فيه وفيه وبنتك فيها وفيها
انا نقول العبد ميخالط النخالة ماينقبو الدجاج
يعني يدير خط أحمر بينو وبين جارو
صباح الخير مساء الخير واش راك لاباس
اما تاع خش واخرج هاديك خاطية
صحيتي عبير
سلام
​