السّلام عليكم
بارك الله فيك أختي على مواضيعك القيّمة والهادفة
ان شاء الله مزيد من التألق والتوفيق ^^
بصراحة عجبوني ردود الأعضاء قبلي لأنو كل شخص وصلنا الفكرة بطريقتو الخاصة, فبارك الله فيهم
واما عن نفسي نكره النت يكون في الحياة الزوجية سواءا من طرف الرجل ولا المرأة ,و لما نقول النت نقصد مواقع التواصل الإجتماعي
لأنو درك في وقتنا الزوجة تقولك نتواصل عبر الفايس بوك مثلا ولا السكايب والرجل تاني كيف
ومن بعد هي يوليو عندها اصدقاء تاع النت وهو صديقات تاع النت وتتحول الأمور حتى تلحق وين الرجل يولي يسهر حتى الفجر ويحكي
مع مرا برانية ومرتو نفس الشي, على هادي نحب بعد الزواج ماتبقى عندي حتى علاقة بالنت, ونقصد بيها مواقع التواصل الاجتماعي
لأنوأولا لو نشوفو كاين حوايج في النت تستفاد منهم المتزوجة وخاصة المنتديات, كيما منتدى اللمة راني نشوف فيه ماشاء الله
تستفاد المتزوجة والعازبة وكامل فئات المجتمع وثانيا ربما درك وحدة عازبة في وقت فراغها تتجول في عالم النت
بصح كي تولي متزوجة رايح تشغل وقت فراغها بدارها , مع راجلها ومع ولادها, يعني كاين حوايج يوليو اهم من هاد المواقع
اما الفايس بوك وجماعتو مانحبوش بعد الزواج , صار تحط منشور ديني تلقاه يخليلك تعليق مخل بالحياء
مع انك ماتعرفو ماشفت خليقتو , تكون قاعد تلقى ميساج يلحقك وفيه صور غير لائقة مع انك ماتعرفش الشخص
يعني الفايس بوك مكان فيه البلا ونتا ماش متزوج فمابالك تتزوج , أنا اصلا درك مارانيش متزوجة وعندي مدة مادخلتش للفايس بوك
راني غير في اللمة خاطر لقيت راحتي, واصلا بلا حكاية زواج ساعات تجي في بالي نفاصيه ونتهنا منو بالرغم من اني مدايرتو للمنشورات
الدينية فقط ونخدم بيه في رمضان كتر خاطر ندير حملات لحفظ القرآن وحملات لختم القرآن , اما غير هاد الشي ماعندي ماندير بيه
اما فيما يخص المودباس اذا من حقوق الزوجة, انا نظن ماش حكاية من حقها ولا ماش من حقها, اصلا نكره الفكرة هادي تاع هاتي
المودباس تاعك ونعطيك الموبادس تاعي ويبدا هو يدخل بالتخبية وهي بالتخبية ويبداو يعسو في بعضاهم ويدخل فيها الشك, والعلاقة لي يدخل فيها الشك تفسد
انا نفضل الزوج يخطي هاد المواقع, واذا رفض بينو وبين مولاه, لأنو لما يحب الزوج يخون زوجتو يقدر يحل حساب آخر ويدير رايو
ماش رايح يطبق يديه ويستناها حتى تدخل بالمودباس تاعو, انا عن نفسي ماندير حساب مانمد مودباس, عندي عايلتي اهم من مثل
هاد المواقع لي ماعندها حتى معنى , والزوج كيما سبق وقلت بينو وبين مولاه
ان شاء الله مانكونش خرجت على الموضوع
تحياتي الخالصة
