جلسة تبادل خبرات بين أمهات المنتدى-العدد الثاني-

[السلطانة]

أهلا وسهلا بكم وبالأخص بسيدات المنتدى
أما بعد

في هذا الموضوع نريد أن نتبادل أطراف الحديث
بغرض الافادة فيما يخص الأطفال الرضّع


سبق لنا وأن تحدثنا في موضوع سابق
جلسة تبادل خبرات بين أمهات المنتدى -العدد الأول-



واليوم نطرح موضوعا جديدا على أمل أن نفيد ونستفيد من بعضنا البعض


حينما وُلد رضيعك أو رضيعتك ماهي الارشادات والتجارب الطبيعية التي استعملتها للعناية به ؟ -ماذا كان يشرب من الأعشاب منذ الولادة؟ -نوع الزيوت الطبيعية التي كنتِ تستعملينها له لدهن الجسم ؟ -حينما يمرض هل تأخذينه للطبيب أم تستعملين نوعا آخر من العلاج الطّبيعي ؟ -لانزال حرارته ماذا كنتي تستعملين طبيعيا ؟ -هل حقيقة أفادك العلاج الطبيعي في معالجة طفلك ؟ -بعض النصائح تقدمينها لنا فيما يخص بعض الأعشاب والزيوت ؟

الرجاء اثراء الموضوع لاثراء الأخوات وافادتهن بتجاربكن الخاصة

دمتن بألف خير

​

 

[أم لينة]

رد: جلسة تبادل خبرات بين أمهات المنتدى-العدد الثاني-

اهلين اختي ساندي راني غير اليوم جيت و شفت موضوعك رغم اهميته للاسف انعدمت المشاركات لا ادري اين الخلل ؟
المهم لي عودة ان شاء الله .

 

[ام أمينة]

رد: جلسة تبادل خبرات بين أمهات المنتدى-العدد الثاني-

السلام عليكم
مشكورة اختي على الموضوع ان شاء الله كل الامهات يستفادو انا رايحة نفيدكم بحكم عندي 2 بنات الله يبارك


​

حينما وُلد رضيعك أو رضيعتك
ماهي الارشادات والتجارب الطبيعية التي استعملتها للعناية به ؟
كي يزيد البيبي ندهنولو جسمه و المغيغة تع راسو بزيت الزيتون و الصباح ندوشولو و لا نديرولو لاتواليت تاعو و نبدلولو حوايجو كامل بلا ما ننساو العناية بالسرة نديرولها الدواء الحمرا باش تنشف و نحطولها كومبراس و من بعد واحد الشاش سبيسيال السرة و كي نروحو نبدلولها الكوبراس نديرولها زيت الزيتون باش تتنحى تمتم الكومبراس

-ماذا كان يشرب من الأعشاب منذ الولادة؟

زريعة البسباس و كمون و ورقات نعناع مرات نديرهم كامل شوية شوية و مرات ندير كون وحدو و لا زريعة البسباس وحدها

-نوع الزيوت الطبيعية التي كنتِ تستعملينها له لدهن الجسم ؟
زيت الزيتون بكثرة

-حينما يمرض هل تأخذينه للطبيب أم تستعملين نوعا آخر من العلاج الطّبيعي ؟
الواحد يجرب فالدار و الا ما فاد والو لازم الطبيب

-لانزال حرارته ماذا كنتي تستعملين طبيعيا ؟
نشمخ التقاشر بالخل و نلبسهوملهم ينقص شوية الحمة + السرابت تع الماء على الجبهة و الابطين و الكرش

-هل حقيقة أفادك العلاج الطبيعي في معالجة طفلك ؟
احيانا يفيد و احيانا لا حسب المرض

-بعض النصائح تقدمينها لنا فيما يخص بعض الأعشاب والزيوت ؟
الواحد يبدا بالدواء الطبيعي قبل ما يروح للطبيب لان الادوية قد ماهي مفيدة هي مضرة خاصة للاطفال

و خاصة شراب العسل م عسل + كاس ماء و يشربها الطفل عندها فايدة كبيرة جدا و زيت الزيتون كذلك مليح لما الطفل يبدا ياكل تديريلو ملعقة صغيرة مع الاكل رايحة تفيدو و تجنب الامساك
الى اخره و امور اخرى بزاف في ما يخص الاعشاب و الزيوت هي عند الحاجة ينصحو بيها الكبار باش تتفكريها







و كاين حاجة مهمة و مجربة لما تغيري الحفاضة لاولادك و يكون عندو التهاب يعني المنطقة حمراء (تهرية) و الله عن تجربة انا تاني كي قالولي ما صدقتش اغسلي هاديك المنطقة بصابون قالب (طرف) و شللي مليح و من بعد حطي الطفل على فراشية و نشفي كامل الماء بالورق الماص و من بعد حطي الكوش تحتو و رشي بالمايزينة(النشاء) كمية معتبرة و اغلقي الكوش و من التبديلة الاولى رايحة تشوفي الفرق و اذا كانت المنطقة ملتهبة بزاف عاودي العملية حتى 3 مرات فاليوم و ريحة تشوفي النتيجة



ان شاء الله نكون افدتكم و لو بالقليل

تحياتي




​

 

[السلطانة]

رد: جلسة تبادل خبرات بين أمهات المنتدى-العدد الثاني-

اهلين اختي ساندي راني غير اليوم جيت و شفت موضوعك رغم اهميته للاسف انعدمت المشاركات لا ادري اين الخلل ؟
المهم لي عودة ان شاء الله .

اهلا اختي ام لينا

في انتظار عودتك ان شاء الله

 

[أم لينة]

رد: جلسة تبادل خبرات بين أمهات المنتدى-العدد الثاني-

أول حبيت نشكرك اختي شوشو على الموضوع المهم و المفيد

حينما وُلد رضيعك أو رضيعتك ماهي الارشادات والتجارب الطبيعية التي استعملتها للعناية به ؟
* كي زيدت ببنتي وخرجت من السبيطار على طول عجوزتي نحتلها كل ملابسها و دهنتها ملييييييح بزيت الزيتون من راسها لرجليها و بدلتها الكومبراس تاع صرتها و درتلها كيما نقولو دوا لحمر .و قمطتها .و الثلاث ايام الاول ماكانش فيا الحليب لكن كان فيه كيما نقولو احنا اللبا و هو مفييييييييييد جدا للبيبي هو يجي كي الماء ينزل من صدرك هذاك لازم تعطيه للبيبي و امسحيلو وجهو بيه مش راح تجيه الحساسية في وجهو هاذي قالتهالي ماما بصح انا مدرتهاش نسيتها .

-ماذا كان يشرب من الأعشاب منذ الولادة؟
نعطيها تيزانة تاع اليانسون للغازات ضربة وحدة و منكثرش نص ملعقة صغيرة في نص فنجان قهوة و نديرولها في البيبرو الخاص بالتيزانة و ايضا نخلطلها زريعة البسباس و الكمون لكن كيما قلت منكثرش لانو الكبدة تاع البيبي ميكونش اكتمل نموها و تلقايه اصفر و كثرة التيزانات مش مليحة ليه نعطيلها مرتين في اليوم صباح و في الليل .وايضا المزهر مليح للغازات نشربلها مغرف صغيرة منو .
-نوع الزيوت الطبيعية التي كنتِ تستعملينها له لدهن الجسم ؟
زيت الزيتون فقط في اشهرها الاولى مخلطتلها حتى نوع آخر و كي كبرت شوي ندهنها بزيوت عطرية كيما زيت جونسون .و اهم شيء في الدهن انك ديري كمية في يدك و تحكيها شوي يعني دفيه و من بعد ادهني بيها جسم طفلك مع عمل ماساج في منظقة البطن و الظهر راح يرتاح .
-حينما يمرض هل تأخذينه للطبيب أم تستعملين نوعا آخر من العلاج الطّبيعي ؟
كيما قالت الاخت ام امينة على حساب نوع المرض لكن انا ندير اسعافات اولية طبيعية .
-لانزال حرارته ماذا كنتي تستعملين طبيعيا ؟
طبيعيا جوارب الخل و ماء دافئ فيه قطرات من الخل و ندير بيه كمادات على الجبهة و البطن و بين الافخاذ و تحت الابطين .وندهن الراس و الجبهة بزيت الزيتون .
-هل حقيقة أفادك العلاج الطبيعي في معالجة طفلك ؟
نعم كثيرا لانو البيبي في اشهره الاولى غير حاولي تجنبي الطبيب الا اذا كانت حالة تتطلب الطبيب .لكن اغلب امراضهم و بكائهم اما مغص او يرجع الحليب بزاف يعني ميشبعش او غازات في كرشو .
-بعض النصائح تقدمينها لنا فيما يخص بعض الأعشاب والزيوت ؟
نصيحتي متكثريش من الاعشاب كي يكون البيبي لباس عليه اعطيهملو مرة كل 3 ايام و اذا عاد عندو مغص مرتين في اليوم بمقدار نصف ملعقة صغيرة في نصف فنجان ماء ساخن. و الاعشاب لي كنت نستعملها هي المعروفة عندناكامل و هي : زريعة البسباس و اليانسون و الكمون فقط .
يعني تجنبي الاعشاب الغريبة و لي تشكي فيها غير تجنبيها .
الزيوت ننصحك بافضل زيت هو زيت الزيتون طبيعي و عندو كثيير من الفوائد حتى انك تقدري تشربيه للبيبي لكن حاذري لانو يشرق يعني اغطسي الخنصر ديالك و اعطيهلو يمتصو راح يفيدو اذا كان عندة امساك .

 

[لؤلؤة قسنطينة]

رد: جلسة تبادل خبرات بين أمهات المنتدى-العدد الثاني-

السلام عليكم
والله فكرة مميزة وموضوع رائع،
بالرغم من أني لا متزوجة ولا عندي أطفال
لكن من توجيهات الأختين استفدت بزااف
ان شاء الله يلقى الموضوع تفاعل واقبال من عند الأمهات وحتى من عند العازبات
بالتوفيق وربي يحفظلكم وليداتكم ان شاء الله ^^
تقبلوا مرروي المتواضع
​

 

[Oum Loukmane]

رد: جلسة تبادل خبرات بين أمهات المنتدى-العدد الثاني-

السلام عليكم
شكرًا على هذ ا الموضوع الرائع والذي سوف يبقى كمرجع للأمهات المبتدئات


حينما وُلد رضيعك أو رضيعتك
بعد ما يولد طفلي أول شئ يجب تنظيفه بقطعة قماش فيها ماء ويكون دافئ لازم تكون رطبه لأن جلد المولود يكون حساس أنا أولادي زادوفي الصيف ما نستعملش زيت الزيتون لأنه يرفع درجة حرارة الجسم أستعم زيت عادي وندلس البيبي مليح نلبسه الملابس الداخلية نحرس على أن تكون قطنية نحط الدواء الأحمر على السره وذوقه أول شئ ماء زمزم فيه قليلا من العسل
-ماذا كان يشرب من الأعشاب منذ الولادة؟
الأعشاب التي أعطيها لطفلي زراعة البسباس حبه حلاوه الكمون
-نوع الزيوت الطبيعية التي كنتِ تستعملينها له لدهن الجسم ؟
زيت الزيتون ومرات أستعمل زيت عادي
-حينما يمرض هل تأخذينه للطبيب أم تستعملين نوعا آخر من العلاج الطّبيعي ؟
إذا كان مرض معروف كالمغص أو سعال أعالجه في البيت إذا عجزت أخذه إلى الطبيب
-لانزال حرارته ماذا كنتي تستعملين طبيعيا ؟
كنت أستعمل كمدات الماءأذيب فيها(ملحه الحيه ) تباع عند بائع الأعشاب كذالك أضع جوارب في الخل وألبسها لطفلي
-هل حقيقة أفادك العلاج الطبيعي في معالجة طفلك ؟
نعم في كثير من الأحيان
-بعض النصائح تقدمينها لنا فيما يخص بعض الأعشاب
هناك أعشاب يجب أن يكون لها مقدار محدد حتى لا تضر طفلك وكذلك يجب أن تكون مجففة في مكان نضيف
هذه بعض تجاربي ان شاء الله يستفادو منها بناتي وأخواتي إلى اللقاء

 

[Oum Loukmane]

رد: جلسة تبادل خبرات بين أمهات المنتدى-العدد الثاني-

]أين أنتن يا أمهات هذا الموضوع مفيد ومهم

 

[السلطانة]

رد: جلسة تبادل خبرات بين أمهات المنتدى-العدد الثاني-

شكرا لتقديم هذه الافادة ياأخواتي بارك الله فيكن

 

[أم لينة]

رد: جلسة تبادل خبرات بين أمهات المنتدى-العدد الثاني-

وفيك بارك الله في انتظار الاعداد المقبلة

 

[taleb2011]

رد: جلسة تبادل خبرات بين أمهات المنتدى-العدد الثاني-

ربي يوفقكم ويجازيكم