أهلا بكم ناس اللمة ان شاء الله تكونو بخير وعافية
اسمحونا رانا مصقرين في حقكم شويا الله غالب الظروف المناخية والطبيعية والبسيكولوجية والبيروقراطية ووو...
المهم اليوم تمر حوالي 14 سنة على ذكرى أليمة حدثت هنا فالجزائر ولي هي زلزال بومرداس
14 سنة جازت مزالني نتخايل فيه غير البارح برك
اليوم جيت نحكيلكم على واش صرا في هذوك الأيام لي بلاك كنا نضحكو اكثر ملي كنا نبكو خخخخ
خاطرش كنا صغار واول مرة نسمعو بالزلزال اصلا ماكناش نعرفو واش معنتها الزلزال
حنا ياك حتى تطفر الحاجة باش المنظومة التربوية تفيق وتحذرك منو ياو قيو عليهم خخخخ
وهذي ديديكاس لختي عبير @Twinkle Stars اللي تخاف من الزلزال
وسبيسيال للأخت فاطمة @الصحافية الساخرة اللي وعدتها نكتب القصة هذي
المهم كان في عمري هذاك الوقت 10 ولا 11 سنة هههه عجزت نحسب شحال في عمري خخخ
نضنا صباح ربي نقراو كيما العادة رحنا للمسيد وقرينا عادي
بصح الجو هذاك النهار كان ماشي كي العادة
كان كل شيء ساكن حتى الحيوانات والعصافير ماسمعناهمش كامل
كان اشبه بالسكون قبل العاصفة
بصح حنا ماعرفناش واش راح يصير لكن تحس بلي هذاك النهار مختلف عن الايام العادية
مع المساء خرجنا من المدرسة وديركت رحنا نلعبو بالون
كان لازم علينا نلعبو بالون خاطر نهائي دوري الابطال كان راح يلعب هذاك النهار هههه
وصلت الساعة السابعة والنصف كنا انا وزوج من اخوتي لاسقين مع التلفزيون خخخخ
على كل حال مكانش يشبه التلفاز في اي شيء هههه
كان بالابيض والاسود وكان صغير الحجم هههه المهم المقابلة نشوفوها وخلاص هههه
الله غالب جنون الكرة ملي كنا صغار ههههههه
كنا ساكنين مع جدتي وحتى هي كانت تتفرج معانا الماتش خخخ
يما كانت فالكوزينة كاش ما طيبنا وبابا مكانش معانا كان خدام فالعاصمة
حنا تسمرنا قدام الشاشة حتى بدا حفيظ دراجي وبرنامج سهرة الابطال
وكان هذاك النهار النهائي بين اسي ميلان ويوفنتوس
وخوكم يوفنتيني من بكري الروح فالدم ههههه
قبل صافرة البداية بدينا انا وخويا نتجادلو شكون الميلان وشكون اليوفي خاطر التلفزيون نوار اي بلو ههه
حتى قال حفيظ الميلان بالابيض واليوفي بالابيض والاسود خخخخخ
سافيك مزيا قلنا مافيهمش الوان ههههه
*****
انطلقت صافرة البداية
حتى سمعنا صوت جاي من بعيد تقول انفجار قنبلة او لحظة سقوط صاروخ وراهو جاي بسرعة نحونا
الكهرباء راحت قبل ما تهتز الارض سكتنا كامل
ممبعد خيم السكون على المكان حتى بدات الارض بالاهتزاز
ماكناش نعرفو واش نديرو ومكانش عندنا الوقت للتفكير في واش هاذا واي شيء هذا
اول مرة في حياتنا نحس باهتزاز الارض
لحسن حظنا كانت الباب مفتوحة كل واحد فينا انطلق للجري
المهم نخرجو من الصالون احياء برك
الوجهة مكانتش معلومة لا اراديا تهرب للشارع تجري
خويا لكبير هو الاول زدت انا موراه والجدران يتساقطو ربي لي سلكنا منهم
للآن معلباليش كيفاه خرجت وملنجرحت ماوالو هههه
لكن المشكلة ماتقدرش تجري عندما تقف تسقط أرضا
وبما اننا صغار قدرنا نخرجو من البيت ولجدران تتساقط ارضا خرجنا انا واخوتي ومن ثم امي
وبقات جدتي تصارع بالخروج هههه بقات ملتصقة في الباب تديها يمنة ويسرة هههه
حتى حبست الارض من الاهتزاز بعدها شفنا جدتي تخرج من بين الانقاض هههه
كي خرجت قالتنا هربتو وخليتوني نموت وحدي والله ماتحشمو هههه
بعد ذلك بقيت كل دقيقة تهتز الارض وتسكن وتلايمنا كامل في الشارع مع الجيران
وبدأ الظلام يخيم على المكان
لا كهرباء ولا ماء ولا غذاء
بقينا شادين في يما وكل دقيقة نسقسيوها واشنو هذا لي صرا علاه تهزت الارض
ويما كانت تقرالنا سورة الزلزلة وتفهمهانا ومذاك تحكينا على زلزال سمعت بيه
هو زلزال الاصنام تاع الشلف لي حدث في الثمانينات
وكل ماتضرب كانت وحد الطفلة بنت الجيران تبدا تعيط قد ماعندها
انا مكانتش تخلعني الزنزلة قد ماكانت تخلعني العيطة هذيك تاع الطفلة
الليل ماحبش يخلاص تقول جاز فيه يومين
تهتز الارض مرة كل دقيقة ومرة كل خمسة دقائق وهكذا بدأت تقل تدريجيا
رقدنا بدون عشاء ولا ماء
كل ما تتهز الارض نحكم في يما هههه
حتى لقينا وين نباتو
كان عند جيرانا بيوت بلاستيكية دخلنا وقعدنا داخلهم حتى للصباح
نرقد خمس دقايق ونفطن نصف ساعة وهذيك الطفلة كل زنزلة تعيط اخ اخ اخ
نضنا لقينا كل شيء مهدم
تقريبا دارنا مارابتش كامل غير الجدران وسقف تاع البلاط لي طاح وكل القش تخرب
بصح ماقدرناش نسكنو فيها
خرجنا منها شويا قش وبنينا خيمة صغيرة بقينا فيها
حتى وحد اليومين مدونا الدولة خيمة تاع الجيش حطيناها قدام الدار
مكاش الكهرباء والماء كان عندنا زوج بيور وخلاص فيهم الماء كي ضرب الزلزال
ماعادوش تيعمرو بالماء وكي ضربت تقت الارض وراح الماء
بدات الدولة جيب فالاعانات الغذائية وحتى الماء كانو يجيبوف في ساشيات كي تاع الحليب
بقينا هكذاك وحد الشهر حتى خدمنا دارنا شويا ولينا سكنا فيها
وضرك الحمد لله بصح بقات ذكرا مترسخة في عقلنا وقلوبنا
اياو قولنا حكايتكم مع الزنزلة الى كاش مرة حسيتو بيها
آخر تعديل:
