زهو الدنيا معادوا لا يدوووووم

[الصراحة راحة]

يا سـايلني عـلاه راك تسال""على لي سكن قلبي و دخالي
حب تربع على عقلي بحـال""حـال اللي مـا يعرف سـوالي
مدة و سنين هذي شحـال""تجـدر ما خطى راسـي و هنانـي
حب الخيل هذي شي محال""يفطم منها قلـبي خوتي مڤواني
ماني عاشق مادة ولا مال""ماني داري بهذ المرض من بلاني...
مـاني عـارف نربط لوصـال""مـاني عـارف ليه أنا واش داني
يفهمني غير لـي كيفي خيال""و لي مـا فهـمني خليه يعاني
من كنا صغار في بيت لعـيال""عـامرة بالخيل لمصيلة يادلالي
سبحان ربنا العالي المتـعال""خلقـها و فرڤ بينها في للواني
من كل الألوان كسبتها رجال""لشهب سيـدهم منو نا تعـوالي
ولا أزرڤ دار بدار زهو البال""ذاك مير الخـيل سومو غــالي
وأحمر صيفتو دم غزال يسيال""من غيرو فالـركبة مـا يحـلالي
أدهم لونو ما يحلو فيه خصـال""فالندهة طبعو حـربي عدواني
قالو على لشڤر يشطح بروال""في وسط لمحافل نور لعياني
هذي عواد كسبوها رجال بطال""خاظو بيها حروب ضد لعدياني
كسوها بسروج مفصلة تفصال""مطروزة بالذهـب يسلب ذاتي
مكاحل عامرة بارودهـا يصـال""يخرج من الجعب حسو داونـي
غزالي ناظم كلمات ذا لمـقال""طالـب دعـوة ياقـري كـلامـي
بصلاة علـى محمد و الأال ""والصحابة والتابعين زيد بسلامي

​

 

[عماد خطاب]

​

 

[❤️كلي أمل❤️]

يعطيك الصحة خويا جمال
في المتاااااابعة ههه

 

[الصراحة راحة]

لالي طير من الطيور البلديه *** ومبسوط الجنحين بريش المرقوم
يدي جواب خطوا بديا ****** وفوق وكار الزايخه يعلى ويحوم يغدالي في الحين نعطيه بريا *** ومقصود الجواب يقراه الفطوم
قوللها كلمات بعد التحيه **** وراكي هولت القلب جفاه النوم
انا حبك يافاطمه جار عليا ***** راني صابر والصبر عني محتوم
عليك مايهناش قلبي فيكي ****خيالك منحوت في عقلي مرسوم ...
قوللها في شوفتك راه دوايا *** وريح ذلقلب من عيطات هموم
​

 

[الصراحة راحة]

يلزمني اصيل ڨارح بن عودة
ناخطر بيه اليوم لاحد خلافو
لونو لون اليل دامس بصرودة
ولون ليالي ڨاع لخيول تخافو
حتا ملفرسان منو مرعودة...
ويسكرف موج الوطا فوڨ كتافو
مخو تاكل فيه من داخل دودا
ويبرڨ جلدو قايمو في تعلافو
ونتاع نهارات ينفع لشدة
ولنهار المرحول وسوڨ جحافو
عينو علخودات ساڨ المهمودة
وفارس داير زايخا فوڨ كتافو
​

 

[الصراحة راحة]

ياقلبي عييتني ماكش صبار........
وتمهل للكاتبة وسع بالك........
ماكش ولدي نقهرك ولا ننهيك......
ولا خو نخطيك تبقا في حالك.......
هايم دايم بلقضا ربي باليك..........
نار المحنة زادها ريح زعافك...

​

 

[Malika Tlm]

يعطيك الصحة
كلام شباب بزاف
ربي يوفقك

 

[الصراحة راحة]

يعطيك الصحة
كلام شباب بزاف
ربي يوفقك

اميييييييييييييين ربي يحفدك مليكة
تحياااااااااااااااااااتي

 

[الصراحة راحة]

لا تصحبشي المقلق الي ما يزكاش***تعي من صحبته و تهرب و تخليه
المحبة الناصحة تجي بعد التغباش***الي ما عاشر حبيب ما يعرف ما فيه
اذا تبغي اخيار ظنك ما تلقاش***الي تستخبر تكون الدولة فيه
الحبيب الي تقول هذا ما يرداش***زوره في ساعة الخصام تعرف ما فيه
والي لغالك لا تقول له شي لياش***قرب حتى يكون سرك منك ليه...
تعرف ما فيه لا اتظنهشي غشاش***ما تعرف حاجته و لا صالحتك فيه

​

 

[الصراحة راحة]

قلبي شوق للخيل لاهب مشعالي ​

​

نُقصُدْ عوْدي كي اتْسحبْلي لرْكاد *** يفْجي كُلْ امْراضْ عني وانْكادي
نلْقا فيهْ اوصافْ منْ عندْ الــودّاد *** العادياتِ صورتْ الله مُقْصـادي
واكْلامْ الرسولْ يمْدحْ فالْجــــــواد***الناصية والخيرْ عنْها كي بادي...
والفْني ذالْعودْ جبتْ اعْليهْ انْشاد *** وْعشْرتْنا ماهيشْ صُحبة سقّادي
سمّيتو مسْعودْ سعْدي زادْ اسْعاد *** وْيا سعدْ المسْعودْ فالدنْيا هادي
​

 

[الصراحة راحة]

يا شاري النيف ما تسومش شحال..ويا قاصد الاصل مايهمكش المال
ما تقولش فلان حبيب حتى تعرف الخصال..ما يغركش الزين حتى تشوف لفعال
الوقت اذا فات ما يشدوه حبال..والريح اذا جا مايصدوه اجبال
قلب الانسان ولآ بدال .. يصبح معاك بحال ويمسي معاك بحال
مايسلك من غر الدنيا غير لي شبع منها ونال

​

 

[الصراحة راحة]

بعد العزّ تهان مجـمع عشرتنا *** بعد نكان عزيز بالخف نسيتـيه
يا حســراه منين كــانت لمّتنـا *** في مرسم لحباب الحب آدفنتيه
يا وَدادَة يـــاك مــا درنا شينــة *** مادرناش لْعيب محبوبك لمتيـه
ريّبيتي بجـفاك صــور محبتنـا *** حجرة حجرة يا حبيبـة هدّيتيــه
في لـحظة وحدة راب و عرّانـا *** و كشفتي سري كنت آنا خافيه...
مـا شكيت تهون عندك حرمتنا *** و العز لّي كان عندي بـهدلتيه
أحـديث الحُسّــاد مــا داير فينــا *** ڤـدّاش آن مـرة وصيتـك خليــه
ما ضنيت تـهون عندك ساحتنا *** و تشفي فيـا الحـاسد و آتْـعنيــه
أعطيتك ڤلــبي يـا زين الخانــة *** ولفك راه صعيب باش نفرّط فيه
يا ولـفي يهــديك هـجرك عذّبنــا *** ماطُڤنا للبُعد ضاڤ الخاطر بيـه
وكـرك راه يـشّف خـالي ڤـــابلنا *** يهشم حالو كي رُحتي و خطيتيه
بــعد العز تـهان ولّى في هانــة *** ولّى ڤفرة و لحمـام معشش فيـه
لڤّطتي بعض دعاوي يا حسنــة *** و آخربتي ڤلبي بعد آمّا سكنتيـه
نحلف عن حبك ماعُدتش نـهنى *** و هادونك ڤلـبي بالشّـفرة نحيـه
هذا حال جميع من والف محنة *** يوهبها ڤلبــو و يغمّض عينيـــه
يـا ســايلني ودّهـا راح خطانـــا *** من بعد آرّيشات العش هجرتيه
طارت و تعلّات غابت لا بينـــة *** مرة على مرة نسـعادو ونجيـــه
لعلى تشتاڤ حضـني و تجينـــا *** يـڤـابلني خيالــها نـتونس بيـــه
آتبقّى على خير مرسم عشرتنا *** الخيـط لّي بينا ضُركة آڤطعتيــه
يـا ڤلبي بركاك من الحلم آفطنـا *** أتهنّى و آبرد هاذ الراي آخطيه


​

 

[الصراحة راحة]

ﻋﻤﺮﻩ ﺍﻟﺤﺮ ﻣﺎﻳﺮﺍﻓﻖ ﺍﻟﺒﻮﻡ .. ﻭﻋﻤﺮ ﺍﻟﺤﺮ ﻣﺎ ﻳﺎﻛﻞ ﻓﻀﺎﻟﻲ .. ﻭﻋﻤﺮ ﺍﻟﺤﺮ ﻣﺎ ﻳﻨﺰﻝ ﺍﻟﺴﻮﻡ ..ﻭعمر ﺍﻟﺤﺮ ﻣﺎ ﻳﺴﻮﺍﻩ ﻏﺎﻟﻲ .. ﻭﻋﻤﺮ ﺍﻟﺤﺮ ﻣﺎﻳﻘﻌﺪ ﺫﻣﻮﻡ .. ﻭعمر ﺍﻟﺤﺮ ﻣﺎ ﻳﺨﻄﻰ ﺍﻟﻌﻼﻟﻲ .. ﺩﻳﻤﺎ ﺍﻟﺤﺮ ﻓﻲ ﺍﻟﻌﺎﻟﻲ ﻳﺤﻮﻡ .. ﻭﺩيما ﺍﻟﺤﺮ ﻣﺎﻳﻌﺮﻑ ﺧﺒﺎﻟﻲ .. ﺧﻮﺫ ﻛﻼﻡ ﻭﺍﻣﺸﻲ ﺑﻴﻪ ﺩﻭﻡ ......
كلامي راه..
لجماعة اللمة

​

 

[الصراحة راحة]

الاخلاق الطيبه راها تعجب ****واحسن تربيا تكون على اداب
والمرؤ الصديق سيس متأدب ****ولا ينطق بكلام عيب ولا كداب
وطايع والديه عمروا ماينكب ****ورضا الله في طاعة الام مع الاب
وياعاقل نوصيك في الهدرى رتب ****واحسن قولك كون صادق في الجواب
ونطق بالحكمه مع الناس تأدب ****وتركت قول قالت تنجى من الاذناب ...
ماقل ودل في القول الطيب **** لاتغتب ولا تعاند بن غتاب
ودير الخير وخالط الناس وجرب **** وصاحب ظنك لا دير معاه حساب
والجايح يعطي الوعد ويتهرب ***** دايرك تحت الظل لبدا ماينصاب
لاحشما لاجود لامنطق طيب **** لاشجاعه لاكرم لا حسن جواب
والساجي غي هدرتوا ترهب **** والجايح لوكان لاقيك بنشاب
هدي الشئ معرف عند اهل النسب **** وابن الهامه مايجي كي ولد لعقاب

​

 

[الصراحة راحة]

الزين للنساء والنساء لخيرة الرجال
والرجال للمحنة والمحنة لي قدر عليها
ماتخالط ما تقول انا الغالط
ماتعاشر النحل ما تشكي من لسعاتو...
احكي سرك للغريب حتى واذا محافظش عليه ينشرو بعيد على دوارك
ولا تحكي سرك للقريب كي ينشرو يجيبلك العيب لباب دارك
زين النساء في السترة
والراجل يتقاس بالهدرة
ومتحكمش على الناس بالنظرة
تحب تشرب الماء صافي شوف مجراه
ولا حبيت تحكم لغزال تبع خطاه
وعمرك لا تقول كلام وما تعرف معناه
لازمك كلام موزون وزيد ثبت معاه
لاعينك تصحب اصحب الراجل الفحل كي البارود ديما يخلي الدم يسيل معاه
خيار لكسيبة للخيل وتكون قادر على عشاهم وخيار لحباب الرجال وتكون تعرف معناهم وخيار الهواية البارود والصيادة حذاهم.
عيب النفس في كثر الخطايا
وعيب العين من قلة النوم
وعيب العقل في موت الخلايا
وعيب الڨلب دسان الهموم
وعيب الروح في خبث النوايا
الرجال يبانوا فالشدة وجه البارود اذا خرج مافيه ردة و الرجلة ماشي فالزندة والعظم عمرو ما يكون فالكبدة والجايح يخلع بالهدرة والدنيا فانية كيفها كيف الرقدة.


​

 

[*رحيق الزهور*]

السلام عليكم
جمييل ماكتبت
أعجبني حقا
مشكووور أخي

 

[الصراحة راحة]

خير المال في كسيبة لخيال
وخير النساء في بنت الحرة
لا تكسب غير في الحلال
ولا تعاشر زراعة مرة
اصحب ولد السبع بصوتو جوال ...
واخطيك من ناس لي تبع الجرة
العشرة لحلوة تصلح مع الرجال
وخلطة الشمايت تخليك عرة
من بكري معروفين نهدو الجبال
ما نعرفو نذال ما نرجعو على الجرة

​

 

[الصراحة راحة]

خفف عني شق الملامة ياراجل @ وأحسن عوني من البلى راني مظلوم.
وسقسيني واش بيك عن ضري سايل @ وسليني بخبار تفاجي لهموم.
طاح ستار الليل بظلامو قاتل @ ونستنى لفجار ما جانيش النوم.
جاوبني بحديث تراس مأصل @ سلبوك الخودات مسرارات عروم.
مقدودات الخد طوله ومفاصل @ ولى بيك مدام من كيسان الروم. ...
ولى بيك ديون مسلفهم حاصل @ ياك الدين ايرخس الغالي فالسوم.
ولى بيك قضى ربي يا جاهل @ ماعندكش أولاد على الخلفة محروم.
ولى بيك ذنوب ياسر يا سافل @ ترجع كيف الخلق للتوبة ملزوم.
ولى بيك تراب للخلق امقدل @ هذي أرض الناس بهواها وغيوم.
ولى معرت أحباب ملي كنت طفل @ دعوتهم تصفاك ويبقى فيك اللوم.
ولى بيك حبيب فالسجن معطل @ دارق خلف صوار متعذب مكلوم.
جاوبته بحديث ارزين وعاقل @ مابيا مافات راني انا مظلوم.
ضري راه كبير ماهوشي ساهل @ وحب بلادي ضرني البارح واليوم.
حبي لبلادي اداي عقلي بالكل @ ومااحلاها بعذاب ولوكان ادوم.
الجزائر وافية كريمة ماتبخل @ نفديها بارواحنا هذا الشيء معلوم.
ياحبي راني قريب لا نهبل @ عقلي صد وراح اداوه الغيوم.
قلبي طار من الفريسة راه انسل @ انحوس عليه يتخبط بدموم.
ماتبعش حقود فالهدرة تهمل @ ايدور الحال عليك وايديرك سلوم.
أولاد بلادك قع خاوة وأهل @ ارفق بيهم وماتلطخ روحك بحموم.
أحفظ نفسك من البلا وانت غافل @ راه الحيط ايطيح وتعشي مردوم.
المنكر اخطيه وماتقولش قايل @ اذا عم خلاص يرجع عش البوم.
اسمع كلام كبار والنصحة أقبل @ الرايس طيعو راه كبير القوم.
​

 

[الصراحة راحة]

#الـــــــــــــکـــــــــــــــمــــــــــــــــــة
حصراه على لكلمة انا ڨلت عليك
من شاف الحال راه يشــفو...
كنتي ميزان راجل يتباها بــــيك
وليتي غير كلام يـــــزفـــــو
لكلمة يالكلمة مادرو فـــــيــــــك
هـــــــذا زمـــــان ڨـــلــبي عافــو
هذا زمان من جا يتحدث بــيــك
مسؤل ولخـــــادم ڨـــاع يــهــفو
خلاوك يالكلــمـــة ماسالو فـيـك
باســـم الـــجلالة زادو حــــلــفو
حصراه على رجالي ذوك لفرسان
ولي بعهــــودهــــم يــــوفـــــــو
لكلمة بارود اذا خرجت دمها سال
موحــــال يدور فــــها شــرفــــو
يالوعد ولا لًــــعــــبة يــــــهان
ياحلف بالله ماكــــــانـــلو ماشافــــو
بالوجه صحـيح يڨابلوك لخوان
من لله عــمارهـــم ماخافــــو
عطالك كلمة ويرجع يدور عليك
وجه نــــفـــــاق هــــذا وصـــفــو
عطاوه صيفة يڨلك انا نرڨد بيك
تربى عنو ياك هــــذا ولــــفــــو
وحفظنا يالله ياربي يا مليــــــك
يحلف بلـــــكتـــاب و ما يـــكــفـــو
مادار حــــســاب يـــــوم يلاقيك
من لخوف ڨوايــــــمـــــو يـــترجــفو

​

 

[الصراحة راحة]

ً..............

التربة تضحك على الغربة
والمكتوب يضحك على الخطبة

الحرث بالثرى والزواج بالرضى

الحرث بالنية والزواج بالنية ولي ماعنده نية ماعنده قسمة

الزواج للمرا سترة ولراجل مقام

احرث الأرض لڨريبة ودي لمرا لبعيدة

أدي بنت أصول الدهر معها يطول

الزواج ليلة وتدبيره عام

المرأة سلطانة .......................والراجل هو التاج
هي بلا راجل حيرانا وهو بلا مرا يبقى محتاج