خبي الطابلية

[زاد الرحيل]

السلام عليكم

يا ربي تكونو بخير جميعا و اليوم راني راح نرجع أنسة منشن انتاع سالي اذا تتذكروها .
صراحة كاينة ظاهرة قديمة من وقتنا لليوم نشوفوها مع الطلبة و هي تدراق او اخفاء
الطابلية عند الجميع ،هذا سؤال يحيرني واش اوراه في الحقيقة و علاه الطلبة ميحبوش الطابلية ،حتى الذكور و لاو يدرقها و لا ينحيو لها الذرعين و الاعجب أنهم يكتبو عليها عبارات قاسية و يرسموا عليها رسومات مثل الوشم و الويل كل الويل للي تحدث معاهم
تمنيت نعرف من الاخصائيين اعلاه الطابلية مرفوضة و هل هذا يعني رفض للعلم في حد ذاته و لا حشمة بها و لا تفسد الاناقة انتاع البنت خاصة
الاساتذة و الاستاذات اليوم مطلوب منهم الحضور و الأعضاء يكشفوهم بالاشارة
تفضلوا

 

[Skor m@k]

السلام عليكم
هههه الطابلية هذي عندها قصص بزاف لوكان نحكيوها ماتفراش ههههههه
في حياتي المدرسية كرهت زوج حاجات الطابلية ومادة العلوم ههههه
نهار يسفوها علينا نلبسوها نكره هذاك النهار
تقول راني رافد جبل فوق ظهري منذاك نجبدها منذاك نخربش فيها ومنذاك نقطعها ههههههه
باش المراقب كي يقولي البسها نقولو تقطعتلي يما ماخيطتهاش
زمان حنا كانت بيضاء هكذاك وكنا نحشمو بيها
خلي يا ضرك كي ولات زرقة للأولاد وروز للبنات هههههه
الطابلية عند الجزايريين عنهدم عقدة نفسية فالمسلسلات تاع سوريا كنا نشوفوهم كامل يلبسو لون واحد ونوع واحد
وتقريبا كل البلدان هكذاك بلاك غير حنا والتوانسة والمغاربة
ضرك نقولك علاه تقريبا يحشمو يلبسوها خاطرش الناس برا كي يشوفوك لابسها
يبداو كامل يعايرو هاو انوش هاو جا القاري هههههه
وتانيت تخسر المظهر سورتو الى كنت لابس جديد فبداية الدخول المدرسي هههههه
موضوع هايل ختي ميلينا يستحق التميز​

 

[أم أحمــــد يــسّ]

ههههههه موضوع في الصميم..
انا نجي بلا إشارة لكن نستنى ( التلاميذ ) يجاوبو هههه
..
انا كنت نفتخر بيها وعمري ماقصفتها ( بصح كنت نفتحها ساعات بلا كذب ههه) ، اجيال ضرك خسرت كلشي يخص التعليم الله غالب ، نظن كيما قال الأخ مالك كاين اللي مايحبش يبان باللي تلميذ ..زعمة غير القرايين اللي يلبسوها؟؟
كاين اللي يطوال شوي ولا تزيد زوج سنتمترات يحسبو رواحهم طلعو للقمر ويولو يحشمو بيها ( زعمة هذاك يحشم باه تقول عنو لبنات مزالو يقرا ويشوف روحو رجلة وهذيك راها مع المراهقة وتبعاتها وتحب تبين واش لبست من الصباح وهي تستيكي وتجي تلوح فوقها شكارة خخخ)
..
والسبب الرئيسي غياب الاحترام للأسف ونلقاوه في المدارس وزيد الأسرة عندها دور تلقاي أم تشري طابيلية ومفوتتها للخياطة باه تردها طابلية مودارن..ياو طابلية ياماما ويعني ساتر وحامي لملابسو من غبار الطباشير والحبر والمواد الخطيرة في المخابر والاوساخ و...و....وهاكي التعريف الصحيح
(
رداء لحماية الملابس ويغطي في المقام الأول الجزء الأمامي من الجسم. ويمكن ارتداؤه لأسباب صحية، أو من أجل حماية الملابس من البلى. ويعتمد كلباس عمل موحد للفئات عدة من الاعمال مثل التلاميذ..النادلات، الممرضات... كما يرتديه العديد من ربات المنازل خلال عملهم بالمنزل وخاصة عند الطبخ. يفرض ارتداء المئزر في العديد من المؤسسات التجارية لحماية ملابس العمال من الأضرار.

بالإضافة إلى القماش، تصنع مآزر من مجموعات متنوعة من المواد. ويشيع استخدام المآزر المطاطية عند الأشخاص الذين يعملون مع المواد الكيميائية الخطيرة، ويرتدى المآزر المصنوعة من الرصاص من قبل أشخاص بعملون بالقرب من إشعاعات صناعية مثل الأشعة السينية. وتصمم بعض المآزر بجيوب كثيرة لحمل الأدوات، مثل مئزر النجارين. وتصنع المآزر المنزلية المقاومة للماء من البلاستيك أو المشمع هي مناسبة لأغراض الطهي وغسل الأطباق.)
..
وممكن نلقاو الراس لكبيرة مش محترموا( الاستاذ) فلا ننتظر من الصغار احترامه، فللأسف عروض ازياء صارت في مؤسساتنا من طرف الكبار فلا نتوقع من شخص لا يحترم نفسه او سنه او مهنته ان يحترمه غيره ويأتوه طالبي العلم مستترين بالمآزر...
يبقى أسفي على عدم اعطاء الدولة والوزارة للمئزر حقه فما يلبسه اولادنا ليس مئزرا للأسف لا من حيث التوحيد ولا التصميم ولا القماش ، قطعة بالية تلفيها في كفك تتلف ويسمونها مئزرا؟؟
شكرا ع الموضوع الجميل

 

[sanaya]

صراحة منعرفش علاه راني نسمعها منك
مي أنا دوكا كبديت نقرا طلبت راجلي يشريلي طابلية و حبيت بزاف هاذ الشي
مالڨري مش لازم نلبسوها
ولكن كشغل تبين انك رايحة تقراي صح
وكذلك نورمالمو المئزر شباب فبلايص وحد اخرين
كاين دي سيبيرات كتدخلهم تلقى لجان اللي يبيعوا كامل بطبلية وحدة فيها اسم السيبيرات
حاجة فور توحي بالنظام وبالجدية في العمل
تسلمي

 

[cosette]

هههههههه
فكرتيني في روحي هه
انا مدايرۃ ححاب مي منحيهاش نحلها بسكو ححاب وزءد ظتبليۃ حيني مزيرۃ.يعني انا كي نحلها ماشي باه نبين شا لابسۃ ههههه ححاب باينۃ بلي كحل هه,
شكرا لك

 

[زاد الرحيل]

و عليكم السلام
شكرا لختم التميز الي زينت به الموضوع
صراحة الشقاوة انتاع الصغر و لا واحد فينا منع منها .
العجيب أننا نحشوا بها و كأننا ماش راح نقراو رايحين للحفلة و مع هذا منعرفوش هذا الغلطة حتى حتى نكبارو
صح انا درقت الطابلية بصح مخربشتهاش و نظن الذكور فقط هما الي يتصرفو هكا
اما اللباس الموحد فعندهم مدة يهدرو بلي راح يوحدوه بصح نظن راح يبطلواالطابلية و يتهناو

 

[لؤلؤة قسنطينة]

السلام عليكم
مساء الورد حبيبتي ميلينا وشكرا على الموضوع الجميل والظريف
كي ذكرتي الطابلية فكرتينا بيامات زمان وقت الدراسة ووقت الليسي والمتوسط
راني نشعل الميكرو ونرجع نرد ان شاء الله
لي عودة غاليتي​

 

[زاد الرحيل]

السلام عليكم
مساء الورد حبيبتي ميلينا وشكرا على الموضوع الجميل والظريف
كي ذكرتي الطابلية فكرتينا بيامات زمان وقت الدراسة ووقت الليسي والمتوسط
راني نشعل الميكرو ونرجع نرد ان شاء الله
لي عودة غاليتي​

بكل تاكيد ذكرتك بايام ميرجعوش.و بنتهم وحدها
نستناوك واش درت في الطابلية انتاعك مسكينة

 

[Tama Aliche]

السلام عليكم
هههههههه لي عودة ان شاء الله
موضوع رائع

 

[زاد الرحيل]

السلام عليكم
هههههههه لي عودة ان شاء الله
موضوع رائع

وعليكم السلام
في انتظار حكايتك مع الطابلية

 

[Tama Aliche]

ها راني رجعت رحت شفت للعشاء يزيد يتحرق لي هههخخخه
الطابلية قماش مرعب عهههههه كانت عندي وحدة فيها اللون البرتقالي نسينيالي من بعيد ههههه كنت نكرها بصح مزالها لحذ الآن مخبية فخزانتي من الذكريات الجميلة كنت دايرتها كي شغل فاست ههههه تجيبلي المشاكل تقول شفافة كل ما ندخل من الباب يحكمني المراقب وينها طابلية وانا نقولوا هااا راني لبستها عميت عليها هههه و نمر سلامات من بعد ندخل لاكلاس الاساتذة وينهم الطابلية و انا نظل كي الببغاء هااا هي الطابلية بن عمييي التشينة ما تبانلهمش هههه كانوا يحسبوها فاست بلاك لبستها هههههه

وتاع التخربيش ايييه تحسبي غير الاولاد اللي كتبوا فالطابليات تاعهم مام أنا :p بصح مكنتش نرسم الاوشام و الرعب كنت نرسم الاعلام الوطنية يا جدك نحب بلادي هي فؤادي ننهههه العلام الجزايري يخبط وزاد نصور الحرف الاول من اسمي و لقبي و نركبهم هههه و الناس تقرى فالنقص اوووه شكون هذا فيها إن ؛ وكي نقولهم هذا اسمي و لقبي ما يصدقوش تجيهم غريبة كيفاه تكتبي الحرف الاول من لقبك هههههه الله غالب لقبي نحبوا بزاف خهههه

وكاين بنات تلقاهم يرسموا قلب مكسر و لا اخترقوا سهم هههه بصح هذيك عفسة جايحة كانت تبالني انا قلبي نخليه فالسر دااخل ما يخرجش للميدان ههههههه

مساكن بصح الاولاد والله تاع ذرعين طوال غير تعيي عندهم الحق كي يقصوهم والله تحس جبل في ذرعيك وزاد الاناقة ماكاش هههههه سيرتوا فالصيف والله تخنقهم ههه انا منكذبش عليك فالشتاء كنت نديرها زيادة تدفيني شوي مي فالصيف ارمي عليك ههههه الكرطابل اللي فوق ظهري يكفي هههه

مي ماشي قضية تفسد المظهر للبنات لا بصح متحسش براحتك كما قال الاخ مالك غير حنا معندناش لباس موحد يجيبولك طابلية تقول راح تقطع اللحم كي تاع البوشي هههه و زاد حتى لوكان كنا نديروا تجارب في الفزياء و نوسخوا يدينا الله الله يتغبروا عينيك و عقلك برك تجيبلك ميكروا و توريلك الكرة الارضية ههههه مالا علاش نلبس مئزر حتى الطباشير نحاوه ماركور وانت تكتب فالسبورة وحتى الكتيبة فالسبورة وقليل وين تطلع ولاو الاساتذة يكتبوا هوما و يتقشفوا عليه هههه و يهدروا كتر من التطبيق هههه ) تسما مكنتش نلقا فيه فايدة وباش تقولي تاع الناس تميزك بالطابلية بلي انت طالب هههه هذي ماجاتش فالطابلية كامل يخرجوا على الربعة ونص ولا الثلاثة وتلقاهم خارحين في بعض وزاد يستناو فالبيس المخيرة هههه باينين طلبة

مي حبيت نفهم فالجامعة علاه ما يلبسوناش طابلية ههههه شفتي بلي ماشي قضية يميزوك بين طالب و انسان عادي يعني قضية الكبر تسما كي تكبر يحبوك تقلش روحك ههههههه تخمام معكوس هههه
مرسي ميلينا على الموضوع الشباب بارك الله فيك

 

[زاد الرحيل]

ههههههه موضوع في الصميم..
انا نجي بلا إشارة لكن نستنى ( التلاميذ ) يجاوبو هههه
..
انا كنت نفتخر بيها وعمري ماقصفتها ( بصح كنت نفتحها ساعات بلا كذب ههه) ، اجيال ضرك خسرت كلشي يخص التعليم الله غالب ، نظن كيما قال الأخ مالك كاين اللي مايحبش يبان باللي تلميذ ..زعمة غير القرايين اللي يلبسوها؟؟
كاين اللي يطوال شوي ولا تزيد زوج سنتمترات يحسبو رواحهم طلعو للقمر ويولو يحشمو بيها ( زعمة هذاك يحشم باه تقول عنو لبنات مزالو يقرا ويشوف روحو رجلة وهذيك راها مع المراهقة وتبعاتها وتحب تبين واش لبست من الصباح وهي تستيكي وتجي تلوح فوقها شكارة خخخ)
..
والسبب الرئيسي غياب الاحترام للأسف ونلقاوه في المدارس وزيد الأسرة عندها دور تلقاي أم تشري طابيلية ومفوتتها للخياطة باه تردها طابلية مودارن..ياو طابلية ياماما ويعني ساتر وحامي لملابسو من غبار الطباشير والحبر والمواد الخطيرة في المخابر والاوساخ و...و....وهاكي التعريف الصحيح
(
رداء لحماية الملابس ويغطي في المقام الأول الجزء الأمامي من الجسم. ويمكن ارتداؤه لأسباب صحية، أو من أجل حماية الملابس من البلى. ويعتمد كلباس عمل موحد للفئات عدة من الاعمال مثل التلاميذ..النادلات، الممرضات... كما يرتديه العديد من ربات المنازل خلال عملهم بالمنزل وخاصة عند الطبخ. يفرض ارتداء المئزر في العديد من المؤسسات التجارية لحماية ملابس العمال من الأضرار.

بالإضافة إلى القماش، تصنع مآزر من مجموعات متنوعة من المواد. ويشيع استخدام المآزر المطاطية عند الأشخاص الذين يعملون مع المواد الكيميائية الخطيرة، ويرتدى المآزر المصنوعة من الرصاص من قبل أشخاص بعملون بالقرب من إشعاعات صناعية مثل الأشعة السينية. وتصمم بعض المآزر بجيوب كثيرة لحمل الأدوات، مثل مئزر النجارين. وتصنع المآزر المنزلية المقاومة للماء من البلاستيك أو المشمع هي مناسبة لأغراض الطهي وغسل الأطباق.)
..
وممكن نلقاو الراس لكبيرة مش محترموا( الاستاذ) فلا ننتظر من الصغار احترامه، فللأسف عروض ازياء صارت في مؤسساتنا من طرف الكبار فلا نتوقع من شخص لا يحترم نفسه او سنه او مهنته ان يحترمه غيره ويأتوه طالبي العلم مستترين بالمآزر...
يبقى أسفي على عدم اعطاء الدولة والوزارة للمئزر حقه فما يلبسه اولادنا ليس مئزرا للأسف لا من حيث التوحيد ولا التصميم ولا القماش ، قطعة بالية تلفيها في كفك تتلف ويسمونها مئزرا؟؟
شكرا ع الموضوع الجميل

اهلا و سهلا بك غاليتي زيدي جيبي معاك سلك التعليم و الا ولاد هدديهم بالتقويم يجو كامل
احترامك للطابلية هو احترامك للعلم و النتيجة استاذة ،يبدو ان الطابلية تعبر على رغبة الطالب او الطالبة في قبول التعلم أو رفضه و النتيجة تاتي في النهاية
يبقاو البنات هما الاكثر رفضا لهاو الام المسكينة انتاع اليوم اما مثلها و اما مغلوب على أمرها خاصة. ان العقوق بلغ ذروته ،اما الحماية مهيش في قاموسهم ابدا كاين برك الاناقة و ان كانت فاضحة
الف شكر لمشاركتك الثرية

 

[زاد الرحيل]

صراحة منعرفش علاه راني نسمعها منك
مي أنا دوكا كبديت نقرا طلبت راجلي يشريلي طابلية و حبيت بزاف هاذ الشي
مالڨري مش لازم نلبسوها
ولكن كشغل تبين انك رايحة تقراي صح
وكذلك نورمالمو المئزر شباب فبلايص وحد اخرين
كاين دي سيبيرات كتدخلهم تلقى لجان اللي يبيعوا كامل بطبلية وحدة فيها اسم السيبيرات
حاجة فور توحي بالنظام وبالجدية في العمل
تسلمي

مفهمتش استغرابك من واش ،انا منيش رافضة الطابلية بالعكس نسأل عن أسباب الرفض لها من قبل الطلاب تحديدا ،اما انتاع العمل فهذيك نوع أخر يتقبلوه بصدر رحب ربما كيعاد وراه الشهرية
و بما انك سيدة راح تتقبليها عادي لان وعيك اكبر

 

[لؤلؤة قسنطينة]

السلام عليكم
هاني رجعت من جديد هههه
عجبتني فاطمة قاتلك طابلية كي تاع البوشي ههههه علاه ماقلتيش كيما تاع الطبيب هههه
أنا صراحة لوكان نعتلك الطابلية تاعي تاع المتوسط تلقايها جديدة تقول البارح وين شريتها هههه بيضاء تشعل كي التلج
وجديدة وما مخربشة ما مقطعة، أنا صراحة بالاك الوحيدة لي ماكنتش نتقلق من الطابلية هههه لدرجة كنت نقرا بعيد على الدار
يعني كي نخرج من القراية نروح لدار جداتي نقعد عندها حتى لعشية خلاص باه نروح ونبقى بطابليتي حتى لعشية خلاص
نروح بيها، يعني الطابلية نلبسها في الدار ونحيها في الدار عمري لا نحيتها برا، يعني كملت بالطابلية حتى آخر نهار
من دراستي الثانوية، نهار امتحان الباكالوريا برك دخلت بلا بيها يعني المئزر تاعي دايما محافظة عليه وعمري لا خربشت فيه
وقعد لأختي قرات بيه وختي خلصت منو ومازال كيما راه جديد يشعل ماش كيما جماعة المخربين لي لفوق
وحدة رسمت الاعلام تقول راهي في الثورة وواحد يقطع فيها هههه أنا مسالمة عليكم
تفكرت حاجة برك كي كنت نقرا في الابتدائي كانت عندي طابلية زرقاء (بلو نوي) تهبل وعلى اليمين جهة الجيب
مدايرين كلي جيب شفاف من البلاستيك مغلوق وحاطين فيه أدوات مدرسية مصغرة يعني قلم ومسطرة وممحاة صغاااار خلااص
يعني حجمهم سنتمترات قليلة وأنا كانو يسخفوني مالا كنت نستنا فيا لنهار لي نجبدهم من تم هههه غير تقطعت الطابلية شوي
في بالي ماما رايحة ترميها رحت قطعت الجيب البلاستيكي الصغير هاداك وجبدت الأدوات هادوك ههههه وشحاال فرحت بيهم
تقول كنز هههه، يا سلااام على الذكريات
شكرا ختي ميلينا على الموضوع المميز ربي يهنيك
تحياتي
​

 

[طيب الكلام]

السلام عليكم . موضوع مليح يعطيك الصحة اختي
راك حكيتي على مشكلة عويصة يعاني منها تلاميذ اليوم ههه . ولات لهم كابوس . الاغلبية يكرهوها و الا يحشمو يلبسوها خصوصا الذكور
اغلبية الذكور يهزوها معاهم في المحفظة كي يلحق للمتوسطة و الا الليسي و يلبسها في فم الباب اجباريا لانو مستحيل التلميذ يفوت لمؤسسة تربوية بدون طابلية
و الا تلقايه يلبس فاست و يلبس تحتها الطابلية و يطبقها باه ماتبانش تحت الفاست . و كي يروحو يشريوها في بداية السنة لازم تكون قصيرة جدا تقولي تاع سنة اولى ابتدائي
و اللي يلبس طابلية منظمة يبداو يعلقو عليه و يعقدوه مسكين . اما البنات مايعانوش من المشكل هذا فئة قليلة فقط تحب تبين روحها ربما او عندها عقدة منها . انا شخصيا كنت نلبسها بطريقة عادية جدا
مشكورة اختي علىى الموضوع المميز .

 

[sanaya]

مفهمتش استغرابك من واش ،انا منيش رافضة الطابلية بالعكس نسأل عن أسباب الرفض لها من قبل الطلاب تحديدا ،اما انتاع العمل فهذيك نوع أخر يتقبلوه بصدر رحب ربما كيعاد وراه الشهرية
و بما انك سيدة راح تتقبليها عادي لان وعيك اكبر

لا مستغربتش منك ههههه
استغربت من الشباب اللي يحشمو من الطابلية

 

[ضيوف وسـنغادر]

السلام عليكم
موضوع قيم اخيتي شكرا لك ويستحق ختم التميز بحق♥
اما بعد
انا من عاشقات الطابلية
نحبها ونحب اللي يحبها (تفكرت برك شعار نجمة ايامات زمان ههه)
هالمهم انا كنت من المــــــلتزمات بالطابلية ونعتبرها بطاقة هوية انو هاد الانسانة طالبة علم
كنت ديما محافظة عـــــــــــــــــــــــــــــــــــــــــــــــــــــــــــليها ونلبسها ديما وهي محددة تحديد على الشعرة هههه
بحكم اني كنت نطلع للســـــــــــــبورة بزاف تع المتوسط كنت مانفيقش مع روحي حتى نلقى
الفاتر صبغلي وادخل حتى للـــــــــــــــــــــــــــــــــــــــــــــــــــــــــــــحوايج اللي تحت الطابلية تبا XD ههه
و لكن الحمد لله طابليتي تع الثانوية ماكانش فيها ليطاش شغل كبرت العقلية والرزانة ههه
في الامتحانات كان معظمهم ينحوها انا منحبش ومن المستحيلات مادام دخلت مؤسسة تعليمية واجبة
علي كي نحيها شغل وكاني جيت ندير استعراض ولا وشمام فلي كور كنت نلبسها تحت شعار طالبة علم
وافتخر بزاف يقولوا على اللي يلبسوها قاريين وماعرف وش ايه قارية ونفتخر اصلا الغرض كلو هو القراية
اين العجب !!بل العجب فيهم هومامانقدرش نستغني عليها وعزيزة عليّ بزاف فوتنا بزاف ذكريات مع بعض
(انا انسانة حساسة نتعلق بكلش خخخ)

اعلاه الطابلية مرفوضة

انا والله مانقدر نصيب فالاجابة مي كيما استنتجت يمكن التصميم ماهوش عاجبهم او اللون
او تقلقهم شغل اللي يلبسها يبان معقّد وقآري وماعرف واش (هادي عند الذكور)

و هل هذا يعني رفض للعلم في حد ذاته

شخصيا نعرف شخص مايحبهاش gع وكان مايلبسهاش غير كي يؤبليجيوها عليه
وفي النهاية راه يقرى ميدسين
لذلك يمكن علاقتها برفض العلم لا تنطبق على الجميع

و لا حشمة بها و لا تفسد الاناقة انتاع البنت خاصة

ايه لبنات كيما لاحظت يحبو يوروا قش جديد واناقة ووو
والذكور يمكن يحشمو بيها حابة نعرف السبب لا اعلم
يمكن من التاثر مثلا اذا كانوا كل مايلبسوهاش وهو يلبسها يحس روحو في وسطهم غريب صافي تتحتم عليه يدير كيفهم

انا ننصح الاولياء انو يوعيو ولادهم خاصة الصغار ويفرضوا عليهم المئزر من باب البيت لغاية المؤسسة التربوية
والاساتذة ايضا لازمهم يوعيو تلاميدتهم ويكونوا هوما تاني لابسين الطابلية تعهم مش المذبوحة تنصح فالمسلوخة
الطابلية بالنسبة لي سواء كانت عند التلميد او الاستاذ راهي مظهر من مظاهر الانضباط والتفاني في الخدمة او القراية
اجدد شكري لك على الموضوع تقبلي مروري غاليتي♥​

 

[عماد خطاب]

رغم أن المئزر رمز التربية والتعليم ويحافظ على ملابس نظيفة ويحميها من الطباشير، لكن بعض التلاميذ يحبون التباهي بالملابس الجميلة، والسراويل الغالية...
ربما رفض التلاميذ للمئزر هو رفض لرمز الاستبداد الذي يمارسه المدير عليهم، فيريدون معاكسته بجميع الطرق!

​

 

[زاد الرحيل]

هههههههه
فكرتيني في روحي هه
انا مدايرۃ ححاب مي منحيهاش نحلها بسكو ححاب وزءد ظتبليۃ حيني مزيرۃ.يعني انا كي نحلها ماشي باه نبين شا لابسۃ ههههه ححاب باينۃ بلي كحل هه,
شكرا لك

يا ربي تكون الذكرى عجباتك ،كل الامور الماضية تصبح جميلة في حاضرنا ،و كاين بزاف الي خباو الطابلية انتاعهم لتصلح أجمل ذكرى

 

[زاد الرحيل]

ها راني رجعت رحت شفت للعشاء يزيد يتحرق لي هههخخخه
الطابلية قماش مرعب عهههههه كانت عندي وحدة فيها اللون البرتقالي نسينيالي من بعيد ههههه كنت نكرها بصح مزالها لحذ الآن مخبية فخزانتي من الذكريات الجميلة كنت دايرتها كي شغل فاست ههههه تجيبلي المشاكل تقول شفافة كل ما ندخل من الباب يحكمني المراقب وينها طابلية وانا نقولوا هااا راني لبستها عميت عليها هههه و نمر سلامات من بعد ندخل لاكلاس الاساتذة وينهم الطابلية و انا نظل كي الببغاء هااا هي الطابلية بن عمييي التشينة ما تبانلهمش هههه كانوا يحسبوها فاست بلاك لبستها هههههه

وتاع التخربيش ايييه تحسبي غير الاولاد اللي كتبوا فالطابليات تاعهم مام أنا :p بصح مكنتش نرسم الاوشام و الرعب كنت نرسم الاعلام الوطنية يا جدك نحب بلادي هي فؤادي ننهههه العلام الجزايري يخبط وزاد نصور الحرف الاول من اسمي و لقبي و نركبهم هههه و الناس تقرى فالنقص اوووه شكون هذا فيها إن ؛ وكي نقولهم هذا اسمي و لقبي ما يصدقوش تجيهم غريبة كيفاه تكتبي الحرف الاول من لقبك هههههه الله غالب لقبي نحبوا بزاف خهههه

وكاين بنات تلقاهم يرسموا قلب مكسر و لا اخترقوا سهم هههه بصح هذيك عفسة جايحة كانت تبالني انا قلبي نخليه فالسر دااخل ما يخرجش للميدان ههههههه

مساكن بصح الاولاد والله تاع ذرعين طوال غير تعيي عندهم الحق كي يقصوهم والله تحس جبل في ذرعيك وزاد الاناقة ماكاش هههههه سيرتوا فالصيف والله تخنقهم ههه انا منكذبش عليك فالشتاء كنت نديرها زيادة تدفيني شوي مي فالصيف ارمي عليك ههههه الكرطابل اللي فوق ظهري يكفي هههه

مي ماشي قضية تفسد المظهر للبنات لا بصح متحسش براحتك كما قال الاخ مالك غير حنا معندناش لباس موحد يجيبولك طابلية تقول راح تقطع اللحم كي تاع البوشي هههه و زاد حتى لوكان كنا نديروا تجارب في الفزياء و نوسخوا يدينا الله الله يتغبروا عينيك و عقلك برك تجيبلك ميكروا و توريلك الكرة الارضية ههههه مالا علاش نلبس مئزر حتى الطباشير نحاوه ماركور وانت تكتب فالسبورة وحتى الكتيبة فالسبورة وقليل وين تطلع ولاو الاساتذة يكتبوا هوما و يتقشفوا عليه هههه و يهدروا كتر من التطبيق هههه ) تسما مكنتش نلقا فيه فايدة وباش تقولي تاع الناس تميزك بالطابلية بلي انت طالب هههه هذي ماجاتش فالطابلية كامل يخرجوا على الربعة ونص ولا الثلاثة وتلقاهم خارحين في بعض وزاد يستناو فالبيس المخيرة هههه باينين طلبة

مي حبيت نفهم فالجامعة علاه ما يلبسوناش طابلية ههههه شفتي بلي ماشي قضية يميزوك بين طالب و انسان عادي يعني قضية الكبر تسما كي تكبر يحبوك تقلش روحك ههههههه تخمام معكوس هههه
مرسي ميلينا على الموضوع الشباب بارك الله فيك

مفهمتش أعلاه درت العشاء بكري و مفهمتش كفاه تكرهي الطابلية انتاعك و في نفس الوقت خبيتيها حتى تبقى أجمل الذكريات و الشقاوة انتاعك يلزمها @قمر الوادي باش نشوفو واش الدير في تلميذها المشاغبة
ام انتاع الجامعة زعمة كبارو صح صح و عيب يلبسوا الطابلية ميطولوش و يتزوجو كفاه يلبس و الطابلية